Avyakt murli for Wednesday 4 May 1983

>

04-05-83 om shanti avyakt baapdaada madhuban

sada ek mat, ek hi raaste se ekras sthiti

sada shreemat daata, sada vishwa-kalyaankaari apne bachchon ke prati bole:-

aaj baapdaada vatan mein sarva bachchon ke prati rooh-roohaan karte muskara rahe the। kis baat par? sabhi bachche vishwa mein challenge karte hain - mukti jeevanmukti ka varsa second mein praapta kar sakte hain! yeh challenge karte ho na! vaise anubhav se dekho divya buddhi jo har brahman ko barthade ki gift mili hai brahman - naamsanskaar hua aur divya buddhi ki godly gift baapdaada dvaara mili। us divya buddhi ke aadhaar par socho gyaan bhi second ka hai। rachayita aur rachna। alpha aur be। aur yog bhi second ka hai - main baap ka,baap mera। divyagundhaari banna yeh bhi second ki baat hai। kyonki jaisa janma jaisa kul vaisi dhaarna svatah aur sahaj hoti hai! eeshvareey kul hai to gun arthaat dhaarnaayen bhi eeshvareey hongi na! brahman janma oonche te ooncha janma। to dhaarna bhi oonchi hongi na। to dhaarna bhi second ki hai। jaisa baap vaise bachche। aur seva bhi second ki baat hai। anubhvi ban khazaanon ke adhikaari ban,baap ka parichay dena hai! jo apne paas hai woh doosron ko dena second ki aur sahaj baat hai। to baapdaada dekh rahe the ki second ki baat mein itna samay chalte hue, chaahe do maas ke brahman hain va bahut samay ke brahman hain,brahman arthaat second mein varse ke adhikaari। to second ke adhikaari phir adheen kyon ban jaate? kya apne adhikaar ke sthiti roopi seat par set hona nahin aata?aaraam ki seat ko chhod halchal ki beaaraami mein kyon aate! seat chhodte kyon jo baar-baar set hone ki mehnat karte। seat se utre aur sarvashaktiyon ki praapti gai। shreshtha arthaat sthiti par set hone se adhikaari-pan ki athaarti hai। jab seat chhod di to athaarti kahaan se aai?seat se utar apni shaktiyon ko order karte isliye woh order maanti nahin। phir sochte hain,hoon to master sarvashaktivaan lekin shaktiyaan kaam nahin karti। kya daas ka order daas maanega va maalik ka order daas maanega? aur phir chehra kya ban jaata?jaise kamzor shareer vaale ka chehra peela ho jaata hai kyonki woh khoon ki shakti nahin aise kamzor aatma udaas ban jaati। gyaan bhi sunega, seva bhi karega lekin udaas roop mein। khushi ki shakti,sarva praaptiyon ki shakti khatma ho jaati hai। daas sada udaas hi rahega। daas aatma ki aur kya vishesh hansaane vaali baaten hoti hain? chhoti si baaton mein bolte confuse ho gaye hain,moonjh gaye hain। jaise aankhon ki najar kam ho jaati hai na to ek cheez ke bajaae do do teen teen cheejen dikhaai deti hain aur usi mein confuse ho jaate hain ki yeh sahi hai ya woh sahi hai। aise kamzor aatmaayen ek raaste ke bajaae doosre raaste bhi dekhte hain। ek shreemat ke saath-saath aur maten bhi dikhaai deti hain। phir sochte ki yeh karen va woh karen। yeh yathaartha hai va woh yathaartha hai! jab hai hi ek raasta, ek shreshtha mat to yeh karen, kya karen yeh question hi nahin। confuse kyon nahin honge, svayan hi do banaae duvidha mein aate hain। to yeh vichitra chaal dekh baapdaada muskara rahe the। baapdaada kehte seat par sthit raho to ekras rahenge lekin chanchal bachche ke samaan baar-baar chakkar lagaane ke abhyaasi phir kehte maaya ka chakra aa gaya। confuse hone ka koi aadhaar hi nahin hai। lekin vyartha,kamzor sankalpon ke aadhaar le lete hain। jab hai hi vyartha aur kamzor aadhaar to phir result kya hogi! ya atkenge ya latkenge ya neeche girenge। phir chillaayenge - baba main aapka hoon, aap shakti de do। seat par set raho to gyaan soorya ke shaktiyon ki kirnen, aapke seat ki chhatrachhaaya svatah hi, sada hi praapta hai। seat se neeche utar vyartha va kamzori ke sankalpon ki deevaar khadi kar dete। vyartha sankalp ek nahin aata। ek second mein ek se anek sankalp paida ho jaate। aur usi se anek eeton ki deevaar ban jaati hai। isliye gyaan soorya ke shaktiyon ki kirnen pahunch nahin sakteen। aur phir kehte madad nahin milti, shakti nahin aati। khushi nahin aati va yaad rehti nahin। aa hi kaise sakti! to baapdaada,puraane-naye jo aisa khel karte hain unhon ka khel dekh muskara rahe the। second ki baat ko itna mushkil kyon bana diya hai। ek raasta, ek mat usko chhod - manmat, parmat usko mix kyon karte ho! apne kamzori ke banaaye hue raaste, aise to hota hi hai,aisa to chalta hi hai - in raaston ko svayan hi banaae phir svayan hi bhool bhulaiya ke khel mein aa jaate hain। manzil se door ho jaate hain। aise karte kyon hain? yeh soch rahe ho, ho jaata hai, karte nahin lekin ho jaata hai। hota bhi kyon hai?beemaari kyon aati hain?badparhej va kamzori se। va yeh kahenge ki beemaari aa jaati hai? na kamzor bano, na maryaadaaon ki parhej se va maryaadaaon ki lakeer se baahar aao। abhi tak yahi khel karne hai?vishwa-kalyaan ke thekedaar itne bade occupation vaale aur yeh bachchon ke khel khelte, yeh kab tak? vishwa aapka intajaar kar raha hai ki shanti ke doot aaye ki aaye। hamaare dev hamaare oopar shanti ki aasheervaad va kripa karne ke liye aaye ki aaye। jor-jor se chilla ke ghantiyaan bajaate। kabhi to chimte bhi bajaate hain, nagaade bajaate hain। aao, aao karke pukaarte hain। aisi dev aatmaayen agar apne bachpan ke khel mein rahengi to unhon ki pukaar sunengi kaise! isliye pukaar suno aur upkaar karo। samjha, kya karna hai। achha baap bhi samay ka khyaal rakhta,aap log nahin rakhte।

aise sada shreshtha samajhdaar, sada ek mat ek raasta par chalne vaale, ekras sthiti mein sthit hone vaale, sada second ke adhikaar ko smriti mein rakh samartha aatma rahne vaale, vyartha sankalpon ke khel ko samaapta kar vishwa-kalyaan ke shreshtha sevaadhaari - aisi mahaan aatmaon so dev aatmaon ko baapdaada ka yaad-pyaar aur namaste।’’

kumaariyon ke saath :- sabhi kumaariyaan apne ko shiv shaktiyaan samajhti ho? shaktiyaan sada kahaan rehti hain? shiv ke saath rehti ho na! jo jiske saath rehte uske sang ka rang to un par zaroor lagega na! to jo baap ka gun, jo baap ka karttavya vahi aapka hai na! baap ka karttavya hai seva, to aap sabhi sevaadhaari ho na! seva karti ho ya karni hai?sada yeh lakshya rakho ki baap samaan banna hai। har baat mein check karo ki yeh baap ka karma va baap ka sankalp, bol hai? agar hai - to karo। nahin to parivartan kar do। kyonki saadhaaran karma aadhaakalpa kiya abhi to baap samaan banna hai। sabhi baap samaan vishwa sevaadhaari ho na? had ke nahin। himmat achhi hai। himmat aur umang mein aage badh rahi ho। umang ullaas hi sada aage badhaata rahega।

sada umang aur ullaas mein rahne vaale har baat mein number one honge। yaad mein bhi number one, gyaan,dhaarna seva sabmen number one। aise ho? number one umang ullaas vaale gharon mein kaise rahenge! nirbandhan honge na! sabhi kaun ho?pinjare ke panchhi ho ya svatantra panchhi? padhaai ka pinjara hai?maa baap ka pinjara hai? aise pinjaron mein bandhane vaali ko number one kaise kahenge! abhi nirbandhan ho jaao। jo shaktishaali aatmaayen hongi unke aage koi bhi kuchh kar nahin sakta। jaise tej aag jal rahi ho to uske aage koi bhi aayega nahin,door bhaagega। aap bhi yog agni ko aisa jagaao jo koi bandhan daalne vaala saamne aa hi na sake। jaise koi jaanvar ko bhagaana hota hai to aag jala dete hain, aag ke saamne koi jaanvar nahin aa sakta। aise lagan ki agni ko tej karo। agar abhi tak bandhan hain to lagan hai lekin agni nahin bani hai। lagan hai tab yahaan pahunchi lekin lagan agni ban jaae to nirbandhan ho jaao। lagan full force mein ho। shaktiyaan maidaan par aao। itna bada group jo aaya hai to zaroor kamaal karega na! itne hands nikal aave to vaah-vaah ho jaae। achha!