Avyakt murli for Thursday 19 May 1983

>

19-05-83 om shanti avyakt baapdaada madhuban

saakshi drishta kaise banen?

sarva shaktivaan, sada vishwa kalyaankaari shivbaaba bole :-

aaj baapdaada is puraani duniya aur puraane raajya ki duniya, jadajdeebhoot hui duniya ka samaachaar sun rahe the। baapdaada dekh rahe the ki mere bachchon ko puraani duniya mein kitna sahan karna padta hai। aatma ke liye maujon ka samay hai lekin shareer se sahan bhi karna padta hai। apne raajya mein prakriti aap sabki daasi hogi। vaise bhi daasiyaan bahut hongi aur prakriti ke paanchon hi tatva sada aagyaakaari sevaadhaari honge। lekin apna raajya sthaapan karne ke liye puraane ko hi naya banaana hai। puraani mein sevaadhaari banna hi padta hai। abhi ki yeh seva janma-janmaantar ki seva se mukta kar deti hai। is seva ke phalasvaroop prakriti aur chaitanya sevaadhaari aapke chaaron or ghoomte rahenge। haajir maalik,haan ji maalik,yahi sada meetha-meetha saaj sunte rahenge। isliye sadaakaal ki sarva praapti ke aage yeh thoda bahut sahan karna bhi sahan karna nahin lagta। shreshtha seva ke nashe aur khushi mein sahan karna ek charitra roop mein badal jaata hai। bhaagvat aap sabke sahan shakti ke charitron ka yaadgaar hai। to sahan karna nahin lekin yaadgaar charitra ban rahe hain। abhi tak bhi yahi gaayan sun rahe ho ki bhagwan ke bachchon ne baap ke milan ke sneh mein kya-kya kiya। gopi vallabh ke gop gopikaaon ne kya-kya kiya। to yeh sahan karna nahin lekin sahan hi shaktishaali bana rahe hain। sahan shakti se master sarvashaktivaan bante ho। sahan karna lagta hai ki khel lagta hai?man to sada naachta rehta hai na। to man ki khushi yeh thoda bahut sahan bhi, khushi mein parivartan kar deti hai। tan bhi tera,man bhi tera। to jisko tera kaha woh jaane। aap to nyaare aur pyaare raho। sirf jis samay tan ka hisaab kitaab chuktu karne ka part bajaate ho us samay yeh nirantar smriti rahe ki baba aap jaano aapka kaam jaane। main beemaar hoon,nahin mera shareer beemaar hai, nahin,teri amaanat hai tum jaano। main saaksheedrishta ban aapke amaanat ki seva kar rahi hoon। isko kaha jaata hai - ‘saaksheedrishta’। trustee banna। aise hi man bhi tera। mera hai hi nahin। mera man nahin lagta, mera yog nahin lagta, meri buddhi ekaagra nahin hoti। yeh ‘mera’shabd halchal paida karta hai। mera hai kahaan। meraapan mitaana hi sarva bandhan mukta banna hai। mera dhan,meri patni,mera pati,mera bachcha gyaan mein nahin chalta, uski buddhi ka taala khol do। sirf unhon ka kyon sochte ho! mere ke bhaav se kyon sochte! yeh kabhi bhi koi bachche ne abhi tak nahin kaha hai ki mere gaanv ki va desh ki aatma ka taala kholo। kehte meri patni ka,mere bachchon ka, merepan ka bhaav, behad mein nahin le aata। isliye behad ki shubh bhaavna har aatma ke prati rakhte hue sarva ke saath un aatmaon ko bhi dekho। kya samjha! tera to tera ho gaya। mera koi bojh nahin। chaahe baapdaada kahaan bhi seva prati nimitta banaave। tan dvaara seva karaave,man dvaara mansa seva karaave,jahaan rakhe,jis haal mein rakhe, chaahe daal-roti khilaave, chaahe36 prakaar ke pakvaan khilaave। lekin jab mera kuchh nahin to tera tu jaano। aap kyon sochte ho? bhagwan apne bachchon ko sada tan se,man se, dhan se sahaj rakhega। yeh baap ki guarantee hai। phir aap log kyon bojh uthaate ho? us din bhi sunaaya na ki sab kuchh tera karne vaale ho to jo baap khilaave to khaao, pio aur mauj karo,yaad karo। sirf ek diyuti aapki hai bas। baaki sab diyuti baba aapehi nibhaayenge। ek hi diyuti to kar sakte ho na! mera kehte ho tab man chanchal hota hai। yahi sochte ho na ki yeh mushkil baat hai। mushkil hai nahin lekin kar dete ho। merepan ka bhaav mushkil bana deta। aur terepan ka bhaav sahaj bana deta hai। vishwa kalyaan ki bhaavna rakho to vishwa-kalyaan ka karttavya jaldi samaapta ho jaayega। aur apne raajya mein chale jaayenge। vahaan aise pankhe nahin hilaayenge। (garmi hone ke kaaran sabko haath mein rang birange pankhe diye gaye the) vahaan to prakriti aapka pankha karegi। ek ek heera itni roshni denge jo aaj ki light se bhi wonderful light hogi। sada aapke mahlon mein naurang ke heeron ki light hogi। socho kitni badhiya light hogi! naurang ki mix light kitni badhiya hogi। aur yahaan to dekho ek rang ki light bhi khel karti rehti hai। isliye seva ka karttavya sampanna karo। sampanna bano to apna raajya,sarva sukhon se sampanna raajya aaya ki aaya। samjha!

aaj sabhi ke jaane ka din hai, baapdaada bhi jaldi-jaldi karenge tab to jaayenge। ab to trenon ke rash mein jaana padta hai phir to aapke mahlon mein aage peechhe anek vimaan khade honge। chalaane vaale ka bhi intajaar nahin karna padega, chhote se chhote jeevan mein bhi chala sakte ho। chhota bachcha bhi switch dabaayega aur udega। accident to hona hi nahin hai। vimaan bhi taiyaar ho rahe hain। lekin aap sab ever ready ho jaao। svarga to taiyaar hai hi hai। vishwa karma order karega aur mahal aur vimaan taiyaar। eeshvareey jaadu ke praalabdha ki nagri hai। (sabhi pankhe hila rahe the) yeh bhi achhi scene hai,photo nikaalne vaali। aisi koi sabha nahin dekhi hogi jo rang birange pankhe hilaane vaale hon। achha!

sada tera tu jaano, aise dridh sankalpadhaari,sada behad ke sarva aatmaon ke prati shubh bhaavnaadhaari,sada har karma yaad dvaara yaadgaar banaane vaale,aise ever ready bachchon ko baapdaada ka yaad-pyaar aur namaste।’’

training karne vaali kumaariyon se :-sabhi apne ko baap ki right hand samajhti ho na! left hand to nahin ho। right hand - ek haath ko bhi kehte hain aur doosra jo seva mein sada sahayogi hote hain usko bhi right hand kaha jaata hai। to sada seva mein sahayogi banne ka dridh sankalp kar liya hai na। vahaan jaakar bhool to nahin jaayengi। jo bhi kaarne-akaarne seva mein abhi nahin nikal sakti woh bhi yahi lakshya rakhna ki humein seva mein saathi banna hi hai। sada har sankalp mein seva samaai ho। jahaan bhi raho, vahaan sada apne ko poojya mahaan aatma samajhkar chalna। na aapki drishti kisi mein jaae,na aur kisi ki drishti aap par jaaye। aisi poojya aatma samajhkar chalna। poojya aatma ki smriti mein rahne vaali kumaariyon ke taraph kisi ki bhi aisi drishti nahin ja sakti hai। sada is baat mein apne ko saavdhaan rakhna। kabhi bhi apne ko halki smriti mein nahin rakhna। brahmaakumaari to ban gai,… kabhi aise albele nahin banna। abhi to daadi ban gai, deedi ban gai… nahin। yeh to kahne mein bhi aata hai। lekin hain shreshtha aatma, poojya aatma, shakti roop aatma… shakti ke oopar kisi ki bhi najar nahin ja sakti। agar kisi ki gai to dikhaate hain - woh bhains ban gaya। aur bhains jaise kaali hoti hai to woh bhains arthaat kaali aatma ban gai। aur bhains buddhi arthaat moti buddhi ho jaayegi। agar kisi ki bhi buri drishti jaati hai to woh moti buddhi,bhains buddhi ban jaayega। kyon kisi ki drishti jaae। ismen bhi kamzori kumaariyon ki kahenge। paandavon ki apni kamzori,kumaariyon ki apni। isliye apne ko check karo। daadi-deediyon ko bhi dar isi baat ka rehta hai ki koi ki najar na lag jaae। to aisi pakki ho na! kabhi bhi kisi se prabhaavit nahin hona। yeh sevaadhaari bahut achha hai,yeh seva mein achha saathi madadgaar hai, nahin। yeh to itna karta hai,nahin। baap karaata hai। main itni seva karti hoon, nahin। baap mere dvaara karaata hai to na svayan kamzor bano aur na doosron ko kamzor banne ki margin do। is baat mein kisi ki bhi report nahin aani chaahiye। paandav bhi bahut chatur hote hain, koi achhi-achhi cheejen le aayenge, khaane ki, pahanne ki - yeh bhi maaya hai। us samay woh maaya ke parvash hote hain। lekin aap to maaya ko parakhne vaali ho na। us cheez ko cheez nahin samajhna,woh saamp hai। saamp zaroor kaatega। yeh paavdar aur cream nahin hai lekin saamp hai। jab itni kadi drishti rakhengi tab hi safe rah sakengi। nahin to kisi mein bhi maaya pravesh hokar apna banaane ki koshish bahut karegi। jaise shuru mein chhoti-chhoti kumaariyon ko baapdaada kehte the itni mircha khaani padegi, itna paani peena padega, darna nahin। to maaya aayegi, bahut baden roop se aayegi… lekin parakhne vaale sada vijayi hote hain। haar nahin khaate। to sabhi ne parakhne ki shakti dhaaran ki hai ya karni hai? dekho। abhi sabka photo nikal gaya hai। pakki rehna। kumaariyaan agar is baat mein shakti roop ban gai to vaah-vaah ki taaliyaan bajengi। baapdaada bhi vijay ke pushpa barsaayenge। abhi dekhenge result। aise ‘angad’ ke muaaphik banna।

samay par samajh aa jaana yeh bhi takdeervaan ki nishaani hai। samay par phal dene vaala vriksha moolyavaan kaha jaata hai। sansaar mein rakha hi kya hai?chinta aur dukh ke sivaay aur kuchh bhi nahin hain। to pakka sauda karna। koi badhiya aakarshan vaali cheejen aayen, koi aakarshan vaale vyakti saamne aayen,to aakarshit nahin ho jaana। sankalp svapna mein bhi beeti hui baaten yaad na aayen। jaise woh pichhle janma ki baat ho gai। kabhi sochna bhi nahin।

party se mulaakaat karte amritvela ho gaya

dekho, din ko raat, raat ko din bana diya। yahi gop gopikaaon ka gaayan hai। mahaaraas karte-karte raat se din ho gaya - yeh aap sabka gaayan hai na। sada baap ke sneh mein samaaye hue, snehi aatmaayen ho na। jitna bachche snehi hain,usse padmaguna baap snehi hain। aise anubhav hota hai na। bas second mein socho aur baba haajar ho jaate। achha sevaadhaari hai na। sabse quick sevaadhaari baap hua na। doosra aane mein deri lagaayega, uthega,taiyaar hoga,chalega tab pahunchega। baap to sada ever ready hai। jab bulaao, second se bhi kam time par pahunch jaayega। sabhi ki seva ke liye sada haajar hai। kabhi tang nahin karte। dekho, abhi bhi jitna samay baithe utna samay sneh mein samaaye hue baithe ya thak gaye। baapdaada bachchon ko dekh-dekh khush hote hain। baap ne theka uthaaya hai ki sabhi bachchon ko raaji karna hai to apna theka poora karenge na। sada harek bachcha ek do se priy hai। koi apriy ho nahin sakta। bachche hain, bachche apriy kaise ho sakte! sab ek do se aage hain। sabhi bachche raaja bachche hain, praja bachche nahin।

aapke jad chitron ke liye bhakta jaagran karte hain, kabhi to aap logon ne bhi kiya hai tabhi bhakta kaapi karte hain। yeh jaagran double kamaai vaala jaagran hai। vartamaan ki kamaai hui aur vartamaan ke aadhaar par bhavishya bhi shreshtha hua। to ham kalyaankaari aatmaayen hain,har baat mein kalyaan samaaya hua hai, akalyaan ho nahin sakta। kyonki kalyaankaari baap ke bachche ban gaye। chaahe baahar se akalyaan ka kaam dikhaai de। jaise maano accident ho gaya to nuksaan hua na। log to kahenge akalyaan ho gaya। lekin us akalyaan mein bhi sangamayugi aatmaon ke liye kalyaan bhara hua hai। nuksaan bhi sooli se kaanta ho jaata hai। bade nuksaan se kam nuksaan ho jaata hai। ismen bhi sada kalyaan samajhte hue aage badhte chalo। aisi kalyaankaari aatma svayan ko samajhte hue chalo। baap ne apne samaan bana diya। baap kalyaankaari to bachche bhi kalyaankaari। bachchon ko baap apne se bhi aage rakhte hain। double pooja aapki hai, double raajya aap karte ho। itna nasha aur itni khushi sada rahe - ‘vaah re main shreshtha aatma, vaah re main punya aatma, vaah re main shiv shakti’ - isi smriti mein sada raho। achha –

aap sabka ghar madhuban hai। madhuban ghar se hi paas milengi paramdham ghar mein jaane ki। saakaar reeti se madhuban ghar hai aur niraakaari duniya paramdham hai। madhuban asli ghar hai, jahaan aap log ja rahe ho, woh seva kendra hai। ghar samjhenge to phans jaayenge। sevaakendra samjhenge to nyaare rahenge। jin aatmaon ke prati nimitta bante ho unki seva ke sambandh se nimitta ho,blood connection ke sambandh se nahin। seva ka connection hai। sada yaad aur seva mein raho to nashtomoha sahaj hi ban jaayenge। achha ।

vishesh sevaadhaari arthaat har kaarya mein visheshta dikhaane vaale। sevaadhaari to sabhi hain lekin vishesh sevaadhaari, visheshta dikhaayenge। jab bhi koi seva karo, plan banaao to yahi socho - seva mein kya visheshta laai?vishesh seva karne se vishesh aatmaayen prasiddha ho jaati hain। sada lakshya rakho aisa koi vishesh kaarya karen jisse svatahhi vishesh aatma ban jaaen। baap aur parivaar ke aage aa jaaen। hamesha koi na koi visheshta dikhaane vaale। visheshta hi nyaara aur pyaara banaati hai na। to har kaarya mein visheshta ki naveenta dikhaao। sachche sevaadhaari, sarva ko apni shaktiyon ke sahayog se aage badhaate chalo। isi seva mein hi sada tatpar raho।

achha - om shanti।