Avyakt murli for Wednesday 1 June 1983

>

01-06-83 om shanti avyakt baapdaada madhuban

meeting mein padhaare hue bhaai bahnon ke sammukh praan avyakt baapdaada ke uchchaare hue madhur mahaavaakya

jimmevaari ka taaj va takhtadhaari, mahaarthi bachchon prati baapdaada bole:-

sabhi taaj aur takhtadhaari vishesh aatmaon ki sabha hai na। sabhi apne ko taaj va takhtadhaari samajhte ho na! sabhi behad ke sevaadhaari ke jimmevaari ke taajdhaari ho na। behad ka taaj arthaat behad ki smriti swaroop mein sthit ho। behad ki jimmevaari ke taajdhaari। har ek behad ke taajdhaari bachche ki light aur might ki kirnen behad mein phaili hui hain। had se nikal behad ke baadshaah ban gaye na! jab deh ke had ki smriti se bhi paar ho gaye to deh sahit deh ke saath sarva hadon se paar ho gaye। vishesh seva hi hai had se behad mein le jaana। brahma baap avyakt kyon bane? had se nikaal behad mein le jaane ke liye। brahma baap ke sneh ka pratyaksha swaroop hai - follow brahma father। brahma baap apne right hand bachchon ko, apni vishesh bhujaaon ke liye avyakt vatan se behad ke seva sthaan se baahen pasaar kar haath mein haath milaane ke liye bula rahe hain। brahma baap ka bachchon se sneh hai। to bahma baap bula rahe hain ki bachche, behad mein aa jaao। yeh aavaaz sunte ho? bas ek hi lahar brahma baap ki sada rehti hai ki mere samaan behad ke taajdhaari ban chaaron or pratyakshata ki light aur might aisi phailaaven jo sarva aatmaon ko niraasha se aasha ki kiran dikhaai de। sabki anguli us vishesh sthaan ki or ho। jo aakaash se pare anguli kar dhoondh rahe hain unhon ko yeh anubhav ho ki is dharti par, vardaan bhoomi par dharti ke sitaare pratyaksha ho gaye hain। yeh soorya, chandrama aur taaraamandal yahaan anubhav ho। jaise science vaale science ke aadhaar se aakaash ke taaraamandal ka anubhav karaate hain। aise yeh dharti ka chaitanya taaraamandal door vaalon ko bhi anubhav ho। is shubh aasha ko poorn karne vaale aap sabhi nimitta aatmaayen ho। aise behad ke plans banaaye hain na। plans to yatha shakti banaaye। baapdaada ab samay pramaan bachchon se kaun si rahi hui seva chaahte hain? –

baapdaada aaj rooh-roohaan kar rah the। kya rooh-roohaan hui। baap bole ki mere nimitta bane hue shreshtha bachche, sikeeldhe bachche kaho, murabbi bachche kaho va sada baap ke saathi bachche kaho - aise bachche vardaan bhoomi par ikatthe hue hain, seva ke plans banaane ke liye,to brahma baap bole ki jo meeting mein yojnaayen nikaaleen woh to bahut achhi। lekin mukhya ek seva abhi bhi rahi hui hai। kyonki aap kitni badi athaarti vaale ho aur kitne prakaar ki athaarti vaale ho, gyaan ki athaarti,yogbal ki athaarti, shreshtha dhaarna swaroop ki athaarti,direct baap ke vaarispan ki athaarti,vishwa parivartan karne ke nimitta banne ki athaarti। kitni athaarti hai! jaise ek shaastran ki athaarti vaale, thoda bahut tyaag kar pavitra banne ki athaarti vaale,sirf yeh ek athaarti hai,woh bhi satyata ki athaarti nahin,bhal mahaan aatmaayen hain lekin paramatma baap ke sambandh mein yathaartha knowledge ki athaarti nahin - aise ek athaarti vaale bhi vishwa mein sarva aatmaon ko apne taraph aakarshit kar jhooth ko satya siddha kar chalte aa rahe hain। kitne samay se apni athaarti dikhaate aa rahe hain। kitni phalak se, alpakaal ke praapti ki jhalak se apna prabhaav daalte hain। to jo sarva athaarti vaali shreshtha aatmaayen hain unhon ko kya karna hai?baaki kya raha hua hai,jaante ho?samaapti ke liye kahaan tak samay ka andaaj laga rahe ho? 84 tak va 2000 tak?kahaan tak andaaj laga rahe ho? do hajaar poore hone hain va uske pahle hona hai? apni taiyaari ke hisaab se kya samajhte ho? kaun si baat abhi rahi hui hai? nai duniya ke liye dharni to bana rahe ho। lekin nai duniya ka aadhaar - yeh nai knowledge hai। pahli athaarti to knowledge ki hai na! baap ki mahima mein bhi pahli mahima kya aati hai? ‘gyaan ka saagar’ kehte ho na। to jo pahli mahima hai gyaan, us naye gyaan ko duniya ke aage pratyaksha kiya hai? jab tak ‘‘yeh naya gyaan hai’’ - yeh pratyaksha nahin hua hai to gyaandaata kaise pratyaksha ho। pahle gyaan aata hai phir daata aata hai। to gyaandaata oonche te ooncha hai। ya ek hi woh gyaandaata hai,yeh siddha kaise hoga? is naye gyaan se hi siddha hoga। aatma kya kehti aur paramatma kya kehta hai,yeh antar jab tak manushyon ki buddhi mein na aaye tab tak jo bhi tinke ke sahaare pakde huai hain woh kaise chhodenge?aur ek ka sahaara kaise lenge। abhi to chhote-chhote tinkon ke sahaare par chal rahe hain, vo hi apna aadhaar samajh rahe hain। jab tak unhon ko gyaan dvaara gyaandaata ka sahaara anubhav nahin ho tab tak is had ke bandhanon se mukta ho nahin sakte। abhi tak dharni banaane ki, vaayumandal parivartan karne ki seva hui hai। achha kaarya hai, parivaar ka pyaar hai,yeh pyaar ka gun vaayumandal ko parivartan karne ke nimitta bana। dharni to ban gai aur banti jaayegi। lekin jo foundation hai,naveenta hai,beej hai,woh hai ‘naya gyaan’। nihsvaartha pyaar hai, roohaani pyaar hai yeh to anubhav karte hain lekin abhi pyaar ke saath-saath ‘gyaan ki athaarti’vaali aatmaayen hain,satya gyaan ki athaarti hai,yeh pratyakshata abhi rahi hui hai। jo bhi aate hain vo samjhen ki yeh naya gyaan,nai baat hai। jo koi ne nahin sunaai woh yahaan suni। yeh varnan karen ki yeh dene vaala athaarti hai। pavitrata hai,shanti hai,pyaar hai,svachchhata hai yeh sab baaten to foundation hain, jis foundation ke aadhaar par dharni parivartan hui। yeh bhi 4 stambha hai। pahle jo kisi ki bhi buddhi is taraph tikti nahin thi so abhi in 4stambhon ke aadhaar dvaara buddhi ki aakarshan hoti hai। yeh parivartan to hua। lekin abhi jo mukhya baat hai - naya gyaan, uska aavaaz bulanda ho। aaj tak jin baaton ki sabhi ne ‘‘haan’’ki, un baaton ke liye bra.ku. ki almighty athaarti‘‘na’’ siddha karke bataati hain। jo ve na kehte, aap siddha karke bataate ho aur jo aap ‘haan’kehte use vo‘na’ kehte। to haan aur na ka raat din ka antar hai na। to is mahaan antar ko siddha karne vaali mahaan aatmaayen hain,yeh naam ab pratyaksha karo tab jayjaykaar hogi। aatma ka gyaan yathaartha roop mein na bhi hai lekin phir bhi log sun karke mix kar dete hain ki - haan vahaan bhi aise hi kehte hain। lekin yeh aavaaz bulanda ho ki duniya saari ek taraph hai aur bra.ku. doosre taraph hain। yeh naya gyaan dene vaale athaarti hain। yeh athaarti prasiddha ho। isi se hi shaktishaali aatmaayen aage aayengi jo aapke taraph se dhindhora pitvaayengi। aapko dhindhora nahin peetna padega lekin aisi aatmaayen saitisphaay ho,nai baat,jaan naye umang mein aakar dhindhora peetengi। dharma yuddha bhi to abhi rahi hui hai na। abhi gurooon ki gaddi ko kahaan hilaaya hai। abhi to taal taaliyaan aadi sab bahut aaraam se apni dhun mein lage hue hain। beej kab pratyaksha roop mein aata hai? maaloom hai beej oopar kab aata hai? jab chhoti badi taal taaliyaan ekdam bigar patton ki sookhi hui daaliyaan rah jaati hain tab beej oopar pratyaksha hota hai। to uska plan banaaya hai?jab apni stage par aate hain to apne original knowledge ki pratyakshata to honi chaahiye na। agar vardaan bhoomi me aakar bhi sirf kahen - shanti bahut achhi hai, pyaar bahut achha hai। sirf yeh thodi bahut jholi bharkar chale gaye to vardaan bhoomi par aakar vishesh kya le gaye! naya gyaan bhi to siddha karna hai na। isi naye gyaan ki athaarti dvaara hi almighty athaarti siddha hoga। dene vaala kaun! prem aur shanti milne se itna zaroor samajhte hain ki inhon ko banaane vaala koi shreshtha hai। lekin ‘svayan bhagwan’ hai yeh bahut koi virla samajhte। to samjha, kya raha hua hai! ab nai duniya ke liye naya gyaan chaaron or phailaao, samjha। koton mein koi nikle lekin aisa aavaaz nikle jo chaaron or papers mein yeh dhoom mach jaae ki yeh bra.ku. duniya se naya gyaan deti hain। gyaan kya deti hain, uska aadhaar kya maanti hain, unko siddha kaise karti hain yeh jab akhbaaron mein aaye tab samjho gyaan daata ka nagaada baja। samjha? gyaan ke prabhaav mein prabhaavit hon। gyaan ke prabhaavshaali aur prem ke prabhaavshaali mein kya antar hai? braahmanon mein bhi do bhaag dekhe na। brahman to bane hain lekin koi pyaar ke aadhaar par, koi gyaan aur pyaar donon ke aadhaar par। to donon mein sthiti ka antar hai na। jo pyaar ko bhi gyaan se samajhte hain, woh nirvighna chalenge। jo sirf pyaar ke aadhaar par chalte woh shaktishaali aatma nahin honge। gyaan ka bal zaroor chaahiye। jinka padhaai se pyaar hai, murli se pyaar hai aur jinka sirf parivaar se pyaar hai, unhon mein kitna antar hai! brahman jeevan achhi lagi, pavitrata achhi lagi, isi aadhaar par aane vaale aur gyaan ki shakti ke aadhaar par aane vaale,unmein kitna antar hai। gyaan ki masti,alaukik,niraadhaar rahne vaali masti hai। vaise prem bhi ek shakti hai lekin prem ki shakti vaale aadhaar ke bina chal nahin sakte। koi na koi aadhaar zaroor chaahiye। manan shakti - gyaan ki shakti vaale ki hogi। jitni manan shakti hogi utni buddhi ke ekaagrata ki shakti automatically aayegi। aur jahaan buddhi ki ekaagrata hai vahaan parakhne ki aur nirnay karne ki shakti svatah aati hai। jahaan gyaan ka foundation nahin hoga vahaan parakhne ki shakti, nirnay karne ki shakti kamzor hogi। kyonki ekagrata nahin। achha ।

baapdaada to sab sunte rehte hain। hansi bhi aati aur sneh mein balihaar bhi jaate। bachchon ki himmat dekh khush bhi hote hain। brahma baap ko jyaada aata hai ki yeh mere samaan behad ke maalik ban jaaen। bachchon ke liye rooke hue hain na aur din raat bachchon ki seva mein tatpar rehte। vatan mein to din-raat nahin hai lekin sthool duniya mein to hai na। ek ek bachche ko vishesh aatma, sampoorn aatma, sampanna aatma, samaan aatma dekhne chaahte। baap brahma ko kehte hain - ‘dhairya dharo’। lekin brahma ko umang bahut hota hai na। isliye woh baap se yahi rooh- roohaan karte ki bachche haath mein haath de mere samaan ban jaaen। brahma baap ke saakaar jeevan ki aadi se lekar kya visheshta dekhi! - kab nahin lenkin abhi karna hai। kab shabd na sunne ke, na sunaane ke sanskaar rahe। agar koi bachcha kehta tha ki ghante ke baad karenge to ghanta lagaane diya? koi kehta tha train jaane mein 5-10minute hain ham kaise pahunchenge to rookne diya?gaadi rook jaayegi lekin bachcha pahunch hi jaayega। chalti hui train rook jaayegi lekin bachche ko pahunchna hi hai। yeh practical dekha na! to aise hi bachche bhi kisi bhi baat mein sva-parivartan mein va vishwa parivartan mein‘kab’ shabd ko badalkar ‘ab’ke practical jeevan mein aa jaaen, yahi brahma baap ka umang sada rehta hai। to follow father hai na! achha

sabhi mahaarthiyon ne seva ke jo plans banaaye hain usmein bhi vishesh ‘youth’ka banaaya hai na। youth va yuva varga ki seva ke pahle jab yuva varga government ke aage pratyaksha hone ka sankalp rakh aage badh raha hai to maidaan mein aane se pahle ek baat sada dhyaan mein rahe ki - ‘bolna kam hai,karna jyaada hai’। mukh dvaara bataana nahin hai lekin dikhaana hai। karma ka bhaashan stage par karen। mukh ka bhaashan karna to netaaon se seekhna ho to seekho। lekin roohaani yuva varga sirf mukh se bhaashan karne vaale nahin lekin unke nayan, mastak,unke karma bhaashan karne ke nimitta ban jaaen। karma ka bhaashan koi nahin kar sakta hai। mukh ka bhaashan anek kar sakte। karma baap ko pratyaksha kar sakta hai। karma roohaaniyat ko siddha kar sakta hai। doosri baat - yuva varga sada saphalta ke liye apne paas ek roohaani taaveej rakhe। woh kaun sa? - regard dena hi regard lena hai। yeh regard ka record saphalta ka avinaashi record ho jaayega। yuva varga ke liye sada mukh par ek hi saphalta ka mantra ho - ‘‘pahle aap’’ - yeh mahaamantra man se pakka rahe। sirf mukh ke bol hon ki pahle aap aur andar mein rahe ki pahle main,aise nahin। aise bhi kai chatur hote hain mukh se kehte pahle aap, lekin andar bhaavna pahle main ki rehti hai। yathaartha roop se,pahle main ko mitaakar doosre ko aage badhaana so apna badhna samajhte hue is mahaamantra ko aage badhaate saphalta ko paate rahenge। samjha। yeh mantra aur taaveej sada saath raha to pratyakshata ka nagaada bajega।

plans to bahut achhe hain lekin plen buddhi ban plan practical mein laao। seva bhal karo lekin gyaan ko zaroor pratyaksha karo। sirf shanti, shanti to vishwa mein bhi sab kah rahe hain। ashaanti mein shanti mix kar dete hain। baahar se to sab yahi naare laga rahe hain ki ‘shanti ho’। ashaanti vaale bhi naara shanti ka hi laga rahe hain। shanti to chaahiye lekin jab apni stage par programme karte ho to apni athaarti se bolo! vaayumandal ko dekhkar nahin। woh to bahut samay kiya aur us samay ke pramaan yahi theek raha। lekin ab jabki dharni ban gai hai to gyaan ka beej daalo। topic bhi aisi ho। tum log topic isliye change karte ho ki duniya vaale interest len। lekin aave hi interest vaale। kitne mele, kitni conference,kitne seminar aadi kiye hain। 13 varsha logon ke aadhaar par topics banaaye। aakhir gupta vesh mein kitna rahenge। ab to pratyaksha ho jaao। woh samay anusaar jo hua woh to hua hi। lekin abhi apni stage par parmaatma bomb to lagaao। unhon ka dimaag to ghoome ki yeh kya kehte hain! nahin to sirf kehte ki bahut achhi baaten boleen। to achhi, achhi hi rahi aur woh vahaan ke vahaan rah jaate। kuchh halchal to machaao na। harek ko apna hak hota hai। points bhi do to athaarti aur sneh se do to koi kuchh nahin kar sakta। aise to kai sthaanon par achha bhi maante hain ki yeh apni baat ko spashta karne mein bahut shaktishaali hain। dhang kaisa ho woh to dekhna padega। lekin sirf athaarti nahin,sneh aur athaarti donon saath saath chaahiye। baapdaada sadaiv kehte ki teer bhi lagaao saathsaath maalish bhi karo। regard bhi achhi tarah se do lekin apni satyata ko bhi siddha karo। bhagvaanuvaach kehte ho na! apna thode hi kehte ho। bigadne vaale to chitron se bhi bigadte hain phir kya karte ho? chitra to nahin nikaalte ho na! saakaar roop mein to phalak se kisi ke bhi aage athaarti se bolne ka prabhaav kya nikla। kab jhagda hua kya? yeh tareeka bhaashan ka bhi seekhe na। gyaan ki reeti kaise bolna hai - study ki na। ab phir yeh study karo। duniya ke hisaab se apne ko badla,bhaasha ko change kiya na। to jab duniya ke roop mein change kar sake to yathaartha roop se kya nahin kar sakte। kab tak aise chalenge? ismen to khush hain ki yeh jo kehte hain bahut achha hai। aakhir duniya mein yeh prasiddha ho ki - ‘yahi yathaartha gyaan hai’। isse hi gati sadgati hogi। is gyaan bina gati sadgati nahin। abhi to dekho yog shivir karke jaate hain। baahar jaate phir vahi ki vahi baat kahenge ki paramatma sarvavyaapi hai। yahaan to kehte yog bahut achha laga, foundation nahin badalta। aapke shakti ke prabhaav se parivartan ho jaate hain। lekin svayan shaktishaali nahin bante। jo hua hai yeh bhi zaroori tha। jo dharni kalraathi ban gai thi woh dharni ko hal chalaake yogya dharni banaane ka yahi saadhan yathaartha tha। lekin aakhir to shaktiyaan apne shakti swaroop mein bhi aayengi na! sneh ke roop mein aayen,lekin yeh shaktiyaan hain,inka ek ek bol hday ko parivartan karne vaala hai,buddhi badal jaae, ‘na’se ‘haan’mein aa jaaen -yeh roop bhi pratyaksha hoga na। abhi usko pratyaksha karo। uska plan banaao। aate hain khush hokar jaate hain। vo to jinhon ko itna aaraam, itna sneh,khaatiri milengi to zaroor santushta to hokar jaayenge। aisa pyaar to kahin bhi nahin milta। isliye santushta hokar jaate hain। lekin shakti roop bankar nahin jaate। brahma baap ki seva ki yojnaayen dekho to kya-kya yojnaayen practical mein ki? brahma baap kehte the ki sab pradarshaniyon me prashnaavli lagaao। usmein kaun si baaten theen। teer samaan thi na! form bharaane ke liye kehte the। yeh right hai va wrong, haan va na, likho। form bharaate the na। to kya yojnaayen rahi। ek hain aise hi bharvaana। jaldi-jaldi mein wrong va right kar diya,lekin samjhaakar bharaao। to usi anusaar yathaartha form bharenge। siddha to karna hi padega। woh aapas mein plan banaao। jo athaarti bhi rahe aur sneh bhi rahe। regard bhi rahe aur satyata bhi prasiddha ho। aise kiski insult thode hi karenge? yeh bhi lakshya hai ki hamaari hi branches hain। hamaare se hi nikle hue hain। unhon ko regard dena to apna karttavya hai। chhoton ko pyaar dena yeh to parampara hi hai। achha- (do chaar bhaai bahnen baapdaada se chhutti lene aaye।)

sneh ka respond to mil gaya na। sachchi dil par saaheb sada raaji hain। aadi se sachchi lagan mein rahne vaali aatmaayen ho isliye baap bhi sachchon ko sada sneh ka respond deta rehta hai। sada dil mein baap hi samaaya hua hai। isliye achhe teevra purooshaartha mein chal rahe ho। karmayogi aatma ho na। karma aur yog combined hai na। sada balance rakh, baap ki blessing ko lene vaale aur sada blissful jeevan mein rahne vaale, aisi shreshtha aatma ho। baap sada har bachche prati yahi shubh aash rakhte ki yeh vijay maala ke manke hain। achha –