Avyakt murli for Monday 2 December 1985

>

02-12-85om shanti avyakt baapdaadaamdhuban

bandhanon se mukta ki yukti - roohaani shakti

mukti-jeevanmukti daata shivbaaba bole

aaj baapdaada apne roohaani bachchon ki roohaaniyat ki shakti dekh rahe the। har ek roohaani bachche ne roohaani baap se roohaani shakti ka sampoorn adhikaar bachche hone ke naate praapta to kiya hi hai। lekin praapti swaroop kahaan tak bane hain, yeh dekh rahe the। sabhi bachche har roj svayan ko roohaani bachcha kah roohaani baap ko yaadapyaar ka return mukh se ya man se yaadapyaar va namaste ke roop mein dete hain। return dete ho na। report bhi karte ho। iska rahasya yeh hua ki roj roohaani baap roohaani bachche kah roohaani shakti ka vaastavik swaroop yaad dilaate hain। kyonki is brahman jeevan ki visheshta hi hai - ‘roohaaniyat’। is roohaaniyat ki shakti se svayan ko va sarva ko parivartan karte ho। mukhya foundation hi yeh ‘roohaani shakti’ hai। is shakti se hi anek prakaar ke jismaani bandhanon se mukti milti hai। baapdaada dekh rahe the ki ab tak bhi kai sookshm bandhan jo svayan bhi anubhav karte hain ki is bandhan se mukti honi chaahiye। lekin mukti paane ki yukti practical mein la nahin sakte। kaaran?roohaani shakti har karma mein use karna nahin aata hai। ek hi samay, sankalp,bol aur karma teenon ko saath-saath shaktishaali banaana pade। lekin loose kismen ho jaate hain? ek taraph sankalp ko shaktishaali banaate hain to vaani mein kuchh loose ho jaate hain। kab vaani ko shaktishaali banaate hain to karma mein loose ho jaate hain। lekin yeh teenon hi roohaani shaktishaali ek hi samay par banaaven to yahi yukti hai mukti ki। jaise srishti ki rachna mein teen kaarya sthaapna, paalna aur vinaash, teenon hi aavashyak hain। aise sarva bandhanon se mukta hone ki yukti - mansa, vaacha,karmana teenon roohaani shaktiyaan saath-saath aavashyak hain। kabhi mansa ko sambhaalte to vaacha mein kami pad jaati। phir kehte socha to aise nahin tha,pata nahin yeh kyon ho gaya। teenon taraph poora attention chaahiye। kyonki yeh teenon hi saadhan sampanna sthiti ko aur baap ko pratyaksha karne vaale hain। mukti paane ke liye teenon mein roohaaniyat anubhav honi chaahiye। jo teenon mein yuktiyukta hain vo hi jeevanmukta hain। to baapdaada sookshm bandhanon ko dekh rahe the। sookshm bandhan mein bhi vishesh in teenon ka connection hai।

bandhan ki nishaani- bandhan vaala sada hi parvash hota hai। bandhan vaala apne ko aantarik khushi va sukh mein sada anubhav nahin karega। jaise laukik duniya mein alpakaal ke saadhan alpakaal ki khushi va sukh ki anubhooti karaate hain lekin aantarik va avinaashi anubhooti nahin hoti। aise sookshm bandhan mein bandhi hui aatma is brahman jeevan mein bhi thode samay ke liye seva ka saadhan, sangathan ki shakti ka saadhan,koi na koi praapti ke saadhan, shreshtha sang ka saadhan in saadhnon ke aadhaar se chalte hain। jab tak saadhan hain tab tak khushi aur sukh ki anubhooti karte hain। lekin saadhan samaapta hua to khushi bhi samaapta। sada ekras nahin rehte। kabhi khushi mein aisa naachta rahega us samay jaise ki un jaisa koi hai nahin। lekin rookega phir aisa jo chhota-sa patthar bhi pahaad samaan anubhav karega। kyonki original shakti na hone ke kaaran saadhan ke aadhaar par khushi mein naachte। saadhan nikal gaya to kahaan naachega? isliye aantarik roohaani shakti teenon roopon mein sada saath-saath aavashyak hai। mukhya bandhan hai - mansa sankalp ki kantroling power nahin। apne hi sankalpon ke vash hone ke kaaran parvash ka anubhav karte hain। jo svayan ke sankalpon ke bandhanon mein hai woh bahut samay isi mein busy rehta hai। jaise aap log bhi kehte ho na ki havaai kile banaate hain। kile banaate aur bigaadte hain। bahut lambi deevaar khadi karte hain। iseelie havaai kila kaha jaata hai। jaise bhakti mein pooja kar, saja-dhaja karke phir dubo dete hain na,aise sankalp ke bandhan mein bandhi hui aatma bahut kuchh banaati aur bahut kuchh bigaadti hai। svayan hi is vyartha kaarya se thak bhi jaati hai। dilshikasta bhi ho jaate hain। aur kabhi abhimaan mein aakar apni galti doosre par bhi lagaate rehte। phir bhi samay beetne par andar samajhte hain, sochte hain ki yeh theek nahin kiya। lekin abhimaan ke parvash hone ke kaaran, apne bachaav ke kaaran,doosre ka hi dosh sochte rehte hain। sabse bada bandhan yeh mansa ka bandhan hai। jo buddhi ko taala lag jaata hai। isliye kitni bhi samjhaane ki koshish karo lekin unko samajh mein nahin aayega। mansa bandhan ki vishesh nishaani hai - mahsoosta shakti samaapta ho jaati hai। isliye is sookshm bandhan ko samaapta karne ke bina kabhi bhi aantarik khushi,sada ke liye ateendriy sukh anubhav nahin kar sakenge।

sangamayug ki visheshta hi hai ‘ateendriy sukh’ mein jhoolna। sada khushi mein naachna। to sangamayugi bankar aur is visheshta ka anubhav nahin kiya to kya kahenge?isliye svayan ko check karo ki kisi bhi prakaar ke sankalpon ke bandhan mein to nahin hain। chaahe vyartha sankalpon ke bandhan, chaahe eershya dvesh ke sankalp, chaahe albelepan ke sankalp, chaahe aalasya ke sankalp, kisi bhi prakaar ke sankalp mansa bandhan ki nishaani hain। to aaj baapdaada bandhanon ko dekh rahe the। mukta aatmaayen kitni hain?

moti-moti rassiyaan to khatma ho gai hain। abhi yeh maheen dhaage hain। hain patli lekin bandhan mein baandhane mein hoshiyaar hain। pata hi nahin padta ki ham bandhan mein bandh rahe hain। kyonki yeh bandhan alpakaal ka nasha bhi chadhaata hai। jaise vinaashi nashe vaale kabhi apne ko neecha nahin samajhte। hoga naali mein samjhega mahal mein। hota khaali haath apne ko samjhega raaja hai। aise is nashe vaala bhi kabhi apne ko wrong nahin samjhega। sada apne ko ya to right siddha karega va albelaapan dikhaayega। yeh to hota hi hai। aise to chalna hi hai। isliye aaj sirf mansa bandhan bataaya। phir vaacha aur karma ka bhi sunaayenge। samjha-

roohaani shakti dvaara mukti praapta karte chalo। sangamayug par jeevanmukti ka anubhav karna hi bhavishya jeevanmukta praalabdha paana hai। golden jubilee mein to jeevanmukta banna hai na ki sirf golden jubilee manaani hai। banna hi manaana hai। duniya vaale sirf manaate hain, yahaan banaate hain। abhi jaldi-jaldi taiyaar ho tab sabhi aapki mukti se mukta ban jaayenge। science vaale bhi apne banaaye hue saadhnon ke bandhan mein bandh gaye hain। netaayen bhi dekho bachne chaahte hain lekin kitne bandhe hue hain। sochte hue bhi kar nahin paate to bandhan hua na। sabhi aatmaon ko bhinna-bhinna bandhanon se mukta karaane vaale svayan mukta ban sabhi ko mukta banaao। sabhi mukti, mukti kah chilla rahe hain। koi gareebi se mukti chaahte hain। koi grihasthi se mukti chaahte hain। lekin sabhi ka aavaaz ek hi mukti ka hai। to abhi mukti daata ban mukti ka raasta bataao va mukti ka varsa do। aavaaz to pahunchta hai na ki samajhte ho yeh to baap ka kaam hai। hamaara kya hai? praalabdha aapko paani hai,baap ko nahin paani hai। praja va bhakta bhi aapko chaahiye। baap ko nahin chaahiye। jo aapke bhakta honge woh baap ke svatah hi ban jaayenge। kyonki dvaapar mein aap log hi pahle bhakta banenge। pahle baap ki pooja shuru karenge। to aap logon ko sabhi follow abhi karenge। isliye abhi kya karna hai? pukaar suno। mukti daata bano। achha-

sada roohaani shakti ki yukti se mukti praapta karne vaale, sada svayan ko sookshm bandhanon se mukta kar mukti daata banne vaale, sada svayan ko aantarik khushi,ateendriy sukh ki anubhooti mein aage se aage badhaane vaale, sada sarva prati mukta aatma banaane ki shubh bhaavna vaale, aise roohaani shaktivaale bachchon ko baapdaada ka yaadapyaar aur namaste।’’

party se - sunne ke saath-saath swaroop banne mein bhi shaktishaali aatmaayen ho na। sadaiv apne sankalpon mein har roj koi na koi sva ke prati aur, auron ke prati umang- utsaah ka sankalp rakho। jaise aajkal ke samay mein akhbaar mein ya kai sthaanon par ‘‘aaj ka vichaar’’ vishesh likhte hain na। aise roj man ka sankalp koi na koi umang-utsaah ka emerge roop mein laao। aur usi sankalp se svayan mein bhi swaroop banaao aur doosron ki seva mein bhi lagaao to kya hoga? sada hi naya umang-utsaah rahega। aaj yeh karenge aaj yeh karenge। jaise koi vishesh programme hota hai to umang-utsaah kyon aata hai?plan banaate hain na - yeh karenge phir yeh karenge। isse vishesh umang-utsaah aata hai। aise roj amritvele vishesh umang- utsaah ka sankalp karo aur phir check bhi karo to apni bhi sada ke liye utsaah vaali jeevan hogi aur utsaah dilaane vaale bhi ban jaayenge। samjha- jaise manoranjan programme hote hain aise yeh roj ka man ka manoranjan programme ho। achha-

2. sada shaktishaali yaad mein aage badhne vaali aatmaayen ho na? shakti- shaali yaad ke bina koi bhi anubhav ho nahin sakta। to sada shaktishaali ban aage badhte chalo। kisi bhi dehdhaari ke peechhe jaana, seva dena yeh sab wrong hai। sada apni shakti anusaar eeshvareey seva mein lag jaao aur seva ka phal paao। jitni shakti hai utna seva mein lagaate chalo। chaahe tan se,chaahe man se,chaahe dhan se। ek ka padamguna milna hi hai। apne liye jama karte ho। anek janmon ke liye jama karna hai। ek janma mein jama karne se 21 janma ke liye mehnat se chhoot jaate ho। is raaz ko jaante ho na?to sada apne bhavishya ko shreshtha banaate chalo। khushi-khushi se apne ko seva mein aage badhaate chalo। sada yaad dvaara ekras sthiti se aage badho।

3. yaad ki khushi se anek aatmaon ko khushi dene vaale sevaadhaari ho na। sachche sevaadhaari arthaat sada svayan bhi lagan mein magan rahen aur doosron ko bhi lagan mein magan karne vaale। har sthaan ki seva apni-apni hai। phir bhi agar svayan lakshya rakh aage badhte hain to yeh aage badhna sabse khushi ki baat hai। vaastav mein yeh laukik study aadi sab vinaashi hain lekin avinaashi praapti ka saadhan sirf yeh knowledge hai। aise anubhav karte ho na। dekho aap sevaadhaariyon ko drama mein kitna golden chance mila hua hai। isi golden chance ko jitna aage badhaao utna aapke haath mein hai। aisa golden chance sabhi ko nahin milta hai। koton mein koi ko hi milta hai। aapko to mil gaya। itni khushi rehti hai?duniya mein jo kisi ke paas nahin woh hamaare paas hai। aise khushi mein sada svayan bhi raho aur doosron ko bhi laao। jitna svayan aage badhenge utna auron ko badhaayenge। sada aage badhne vaali,yahaan vahaan dekhkar rookne vaali nahin। sada baap aur seva saamne ho, bas। phir sada unnati ko paati rahengi। sada apne ko baap ke sikeeldhe hain aisa samajhkar chalo।

naukri karne vaali kumaariyon se - 1.sabhi ka lakshya to shreshtha hai na। aise to nahin samajhti ho ki donon taraph chalti rahengi। kyonki jab koi bandhan hota to donon taraph chalna doosri baat hai। lekin nirbandhan aatmaon ka donon taraph rehna arthaat latakna hai। koi-koi ke circumstance hote hain to baapdaada bhi chhutti dete hain lekin man ka bandhan hai to phir yeh latakna hua। ek paanv yahaan hua,ek paanv vahaan hua to kya hoga? agar ek paanv ek naanv mein rakho, doosra paanv doosri naanv mein rakho to kya haalat hogi। pareshaan honge na। isliye donon paanv ek naanv mein। sada apni himmat rakho। himmat rakhne se sahaj hi paar ho jaayengi। sada yeh yaad rakho ki mere saath baba hai। akele nahin hain to jo bhi kaarya karne chaaho kar sakti ho।

2. kumaariyon ka sangamayug par vishesh part hai, aisi vishesh paartadhaari apne ko banaaya hai? ya abhi tak saadhaaran ho?aapki visheshta kya hai? visheshta hai ‘sevaadhaari’banna। jo sevaadhaari hai woh vishesh hai। sevaadhaari nahin ho to saadhaaran ho gai। kya lakshya rakha hai?sangamayug par hi yeh chance milta hai। agar abhi yeh chance nahin liya to saare kalpa mein nahin milega। sangamayug ko hi vishesh vardaan hai। laukik padhaai padhte bhi lagan is padhaai mein ho। to woh padhaai vighna roop nahin banegi। to sabhi apna bhaagya banaate aage badho। jitna apne bhaagya ka nasha hoga utna sahaj maayaajeet ban jaayengi। yeh roohaani nasha hai। sada apne bhaagya ke geet gaati raho to geet gaate-gaate apne raajya mein pahunch jaayengi।