Avyakt murli for Friday 1 December 1989

>

01-12-89 om shanti avyakt baapdaadaamdhuban

svamaan se hi sammaan ki praapti

avyakt baapdaada apne bachchon prati bole

aaj baapdaada chaaron or ke svamaandhaari bachchon ko dekh rahe hain। svamaandhaari bachchon ka hi saara kalpa sammaan hota hai। ek janma svamaandhaari,saara kalpa sammaandhaari। apne raajya mein bhi raajya-adhikaari banne ke kaaran praja dvaara sammaan praapta hota hai aur aadha kalpa bhakton dvaara sammaan praapta karte ho। ab apne last janma mein bhi bhakton dvaara dev aatma va shakti roop ka sammaan dekh rahe ho aur sun rahe ho। kitna sik va prem se abhi bhi sammaan de rahe hain! itna shreshtha bhaagya kaise praapta kiya! mukhya sirf ek baat ke tyaag ka yeh bhaagya hai। kaun-sa tyaag kiya? deh abhimaan ka tyaag kiya। kyonki deh abhimaan ke tyaag bina svamaan mein sthit ho hi nahin sakte। is tyaag ke return mein bhaagyavidhaata bhagwan ne yeh bhaagya ka vardaan diya hai। doosri baat - svayan baap ne aap bachchon ko svamaan diya hai। baap ne bachchon ko charnon ke daas va daasi se apne sir ka taaj bana diya। kitna bada svamaan diya! aise svamaan praapta karne vaale bachchon ka baap bhi sammaan rakhte hain। baap bachchon ko sada apne se bhi aage rakhte hain। sada bachchon ke gunon ka gaayan karte hain। har roj sik va prem se yaadapyaar dene ke liye paramdham se saakaar vatan mein aate hain। vahaan se bhejte nahin lekin aakar dete hain। roj yaadapyaar milta hai na। itna shreshtha sammaan aur koi de nahin sakta। svayan baap ne sammaan diya hai, isliye avinaashi sammaan adhikaari bane ho। aise shreshtha bhaagya ko anubhav karte ho?svamaan aur sammaan - donon ka aapas mein sambandh hai।

svamaandhaari apne praapta hue svamaan mein rehte hue svamaan ke sammaan mein bhi rehta aur doosron ko bhi sammaan se dekhta, bolta va samparka mein aata hai। svasammaan ka arth hi hai sva ko sammaan dena। jaise baap vishwa ki sarva aatmaon dvaara sammaan praapta karne vaale hain, har ek sammaan dete। lekin jitna hi baap ko sammaan milta hai utna hi sab bachchon ko sammaan dete hain। jo deta nahin hai to devta banta nahin। anek janma devta bante ho aur anek janma devta roop ka hi poojan hota hai। ek janma brahman bante ho lekin anek janma devta roop mein raajya karte va poojya bante ho। devta arthaat dene vaala। agar is janma mein sammaan nahin diya to devta kaise banenge,anek janmon mein sammaan kaise praapta karenge?follow father?saakaar swaroop brahma baap ko dekha - sada svayan ko world servant (vishwa-sevaadhaari) kahlaaya, bachchon ka servant kahlaaya aur bachchon ko maalik banaaya। sada maalekam salaam kiya। sada chhote bachchon ko bhi sammaan ka sneh diya,hovanhaar vishwa-kalyaankaari roop se dekha। kumaariyon va kumaaron ko,yuva sthiti vaalon ko sada vishwa ki naameegraami mahaan aatmaon ko challenge karne vaale, asambhav ko sambhav karne vaale, mahaatmaaon ke sir jhukaane vaale - aise pavitra aatmaon ko sammaan se dekha। sada apne se bhi kamaal karne vaale mahaan aatma samajh sammaan diya na! aise hi bujurga- aatmaon ko sada anubhvi aatma, hamjinsa aatma ko sammaan se dekha। baandhele ya baandheliyon ko nirantar yaad mein number one ke sammaan se dekha। isliye number one avinaashi sammaan ke adhikaari bane। raajya sammaan mein bhi number one - vishwa-mahaaraajan aur poojya roop mein bhi baap ki pooja ke baad pahle poojya - lakshmi-naaraayan hi bante hain। to raajya sammaan aur poojya sammaan - donon mein number one ho gaye। kyonki sarva ko svamaan,sammaan diya। aise nahin socha - sammaan deve to sammaan doon। sammaan dene vaale nindak ko bhi apna mitra samajhte। sirf sammaan dene vaale ko apna nahin samajhte lekin gaali dene vaale ko bhi apna samajhte। kyonki saari duniya hi apna parivaar hai। sarva aatmaon ka tana aap brahman ho। yeh saari shaakhaaen arthaat bhinna-bhinna dharma ki aatmaaen bhi mool tana se nikli hain। to sabhi apne hue na। aise svamaandhaari sada apne ko master rachayita samajh sarva ko sammaan-daata bante hain। sada apne ko aadi dev brahma ke aadi ratna, aadi paartadhaari aatmaaen samajhte ho? itna nasha hai?

to sabhi ne suna - bachchon ka sammaan kya hai, boodhon ka sammaan kya hai, yuva ka kya hai?aadi pita brahma ne hamko aise sammaan se dekha। kitna nasha hoga! to sada yeh smriti rakho ki aadi aatma ne jis shreshtha drishti se dekha, aisi hi shreshtha sthiti ki srishti mein rahenge। aise apne se vaayda karo। vaayde to karte rehte ho na! bol se bhi vaayda karte ho, man se bhi karte ho aur likhkar bhi karte ho aur phir bhool bhi jaate ho। isliye vaayde ka phaayda nahin utha paate। yaad rakho to phaayda bhi uthaao। sabhi apne ko check karo - kitne baar vaayda kiya hai aur nibhaaya kitne baar hai? nibhaana aata hai va sirf vaayda karna aata hai?va badalte rehte ho - kabhi vaayda karne vaale, kabhi nibhaane vaale?

teachers kya samajhti hain? nibhaane vaalon ki list mein ho na। teachers ko baapdaada sada saathi shikshak kehte hain। to saathi ki visheshta kya hoti hai? saathi samaan hota hai। baap kabhi badalta hai kya? teachers bhi vaayda aur phaayda - donon ka balance rakhne vaali hain। vaayde bahut aur phaayda kam ho - yeh balance nahin hota। jo donon ka balance rakhte hain usko vardaata baap dvaara yeh vardaan va blessing milti hai। woh sada dridh sankalp se karma mein saphaltaamoorta bante hain। saathi shikshak ka yahi vishesh karma hai। sankalp aur karma samaan hon। sankalp shreshtha aur karma saadhaaran ho jaae - isko samaanta nahin kahenge। to sada teachers apne ko ‘‘saathi shikshak'' arthaat‘‘shikshak baap samaan'' - is smriti mein samartha ban chalo। baapdaada ko teachers ki himmat par khushi hoti hai। himmat rakh seva ke nimitta to ban gaye hain na। lekin abhi sada yeh slogan yaad rakho- ‘‘himmate teacher, samaan shikshak baap''। yeh kabhi nahin bhoolna। to svatah hi samaan banne vaala lakshya - ‘‘baapdaada''aapke saamne rahega arthaat saath rahega। achha!

chaaron or ke svamaandhaari so sammaandhaari bachchon ko baapdaada naynon ke sammukh dekhte hue sammaan ki drishti se yaadapyaar de rahe hain। sada raaj-sammaan aur poojya-sammaan ke samaan saathi bachchon ko yaadapyaar aur namaste।

bihaar group:-

1. sabhi apne ko svaraajya adhikaari samajhte ho? sva ka raajya mila hai ya milne vaala hai? svaraajya arthaat jab chaaho, jaise chaaho vaise karmendriyon dvaara karma kara sako। karmendriy-jeet arthaat svaraajya adhikaari। aise adhikaari bane ho ya kabhi-kabhi karmendriyaan aapko chalaati hain? kabhi man aapko chalaata hai ya aap man ko chalaate ho? kabhi man vyartha sankalp karta hai ya nahin karta hai? agar kabhi-kabhi karta hai to us samay svaraajya adhikaari kahenge? raajya bahut badi satta hai। raajya satta chaahe jo kar sakti hai, jaise chalaane chaahe vaise chala sakti hai। yeh man-buddhisanskaar aatma ki shaktiyaan hain। aatma in teenon ki maalik hai। yadi kabhi sanskaar apne taraph kheench len to maalik kahenge? to svaraajya-satta arthaat karmendriy-jeet। jo karmendriy-jeet hai vahi vishwa ki raajya-satta praapta kar sakta hai। svaraajya adhikaari vishwa-raajya adhikaari banta hai। to aap brahman aatmaon ka hi slogan hai ki ‘svaraajya brahman jeevan ka janma-siddha adhikaar hai।'svaraajya adhikaari ki sthiti sada master sarvashaktivaan hai, koi bhi shakti ki kami nahin। svaraajya adhikaari sada dharma arthaat dhaarnaamoorta bhi hoga aur raajya arthaat shaktishaali bhi hoga। abhi raajya mein halchal kyon hai?kyonki dharma-satta alag ho gai hai aur raajyasatta alag ho gai hai। to langada ho gaya na! ek satta hui na। isliye halchal hai। aise aap mein bhi agar dharma aur raajya - donon satta nahin hain to vighna aayenge, halchal mein laayenge,yuddha karni padegi। aur donon hi satta hain to sada hi beparvaah baadshaah rahenge, koi vighna aa nahin sakta। to aise beparvaah baadshaah bane ho?ya thodi-thodi shareer ki, sambandh ki … parvaah rehti hai? paandavon ko kamaane ki parvaah rehti hai। parivaar ko chalaane ki parvaah rehti hai ya beparvaah rehte hain? chalaane vaala chala raha hai, karaane vaala kara raha hai - aise nimitta ban kar karne vaale beparvaah baadshaah hote hain। ‘‘main kar raha hoon'' -yeh bhaan aaya to beparvaah nahin rah sakte। lekin ‘‘baap dvaara nimitta bana hua hoon'' - yeh smriti rahe to bephikar va nishchint jeevan anubhav karenge। koi chinta nahin। kal kya hoga - uski bhi chinta nahin। kabhi yeh thodi-si chinta rehti hai ki kal kya hoga, kaise hoga?pata nahin vinaash kab hoga,kya hoga?bachchon ka kya hoga? potron-dhotron ka kya hoga - yeh chinta rehti hai? beparvaah baadshaah ko sada hi yeh nishchay rehta hai ki -jo ho raha hai woh achha, aur jo hone vaala hai woh aur bhi bahut achha hoga। kyonki karaane vaala achhe-te-achha hai na! isko kehte hain - nishchaybuddhi vijayi। aise bane ho ya soch rahe ho? banna to hai hi na! itni badi raajaai mil jaae to sochne ki kya baat hai?apna adhikaar koi chhodta hai?jhompadi vaale bhi honge,thodi-si milkiyat bhi hogi - to bhi nahin chhodenge। yeh to kitni badi praapti hai! to mera adhikaar hai - is smriti se sada adhikaari bane udte chalo। yahi vardaan yaad rakhna ki - ‘‘svaraajya hamaara janma-siddha adhikaar hai।''mehnat karke paane vaale nahin, adhikaar hai। achha! bihaar maana sada bahaar rahne vaale। patjhad mein nahin jaana। kabhi aandhi-toofaan na aaye, sada bahaar। achha!

2. apne ko roohaani drishti se srishti ko badalne vaala anubhav karte ho? sunte the ki drishti se srishti badal jaati hai lekin abhi anubhvi ban gaye। roohaani drishti se srishti badal gai na! abhi aapke liye baap sansaar hai, to srishti badal gai। pahle ki srishti arthaat sansaar aur abhi ke sansaar mein pharka ho gaya na! pahle sansaar mein buddhi bhatakti thi aur abhi baap hi sansaar ho gaya। to buddhi ka bhatakna band ho gaya, ekaagra ho gai। kyonki pahle ki jeevan mein,kabhi deh ke sambandh mein,kabhi deh ke padaartha mein - anekon mein buddhi jaati thi। abhi yeh sab badal gaya। abhi deh yaad rehti ya dehi?agar deh mein kabhi buddhi jaati hai to wrong samajhte ho na! phir badal lete ho, deh ke bajaay apne ko dehi samajhne ka abhyaas karte ho। to sansaar badal gaya na! svayan bhi badal gaye। baap hi sansaar hai ya abhi sansaar mein kuchh raha hua hai? vinaashi dhan ya vinaashi sambandh ke taraph buddhi to nahin jaati? abhi mera raha hi nahin। ‘‘mere paas bahut dhan hai'' -yeh sankalp ya svapna mein bhi nahin hoga kyonki sab baap ke havaale kar diya। mere ko tera bana liya na! ya mera,mera hi hai aur baap ka bhi mera hai। aise to nahin samajhte?yeh vinaashi tan-dhan, puraana man, mera nahin, baap ko de diya। pahla-pahla parivartan hone ka sankalp hi yeh kiya ki sab kuchh tera aur tera kahne se hi phaayda hai। ismen baap ka phaayda nahin hai,aapka phaayda hai। kyonki mera kahne se phansate ho, tera kahne se nyaare ho jaate ho। mera kahne se bojh vaale ban jaate ho aur tera kahne se double light ‘‘trustee''ban jaate ho। to kya achha hai - halka banna achha hai ya bhaari banna achha hai? aajkal ke jamaane mein shareer se bhi koi bhaari hota to achha nahin lagta। sabhi apne ko halka karne ka prayatna karte hain। kyonki bhaari hona maana nuksaan hai aur halka hone se phaayda hai। aise hi mera-mera kahne se buddhi par bojh pad jaata hai,tera-tera kahne se buddhi halki ban jaati hai। jab tak halke nahin bane tab tak oonchi sthiti tak pahunch nahin sakte। udti kala hi aananda ki anubhooti karaane vaali hai। halka rahne mein hi maja hai। achha!

jab baap mila to maaya uske aage kya hai? maaya hai roolaane vaali aur baap hai varsa dene vaala, praapti karaane vaala। saare kalpa mein aisi praapti karaane vaala baap mil nahin sakta! svarga mein bhi nahin milega। to ek second bhi bhoolna nahin chaahiye। had ki praapti karaane vaala bhi nahin bhoolta hai to behad ki praapti karaane vaala bhool kaise sakta! to sada yahi yaad rakhna ki trustee hain। kabhi bhi apne oopar bojh nahin rakhna। isse sada hansate,gaate, udte rahenge। jeevan mein aur kya chaahiye! hansana,gaana aur udna। jab praapti hogi tab to hansenge na। nahin to royenge। to yeh vardaan smriti mein rakhna ki ham hansate-gaate aur udne vaale hain, sada hi baap ke sansaar mein rahne vaale hain। aur kuchh hai hi nahin jahaan buddhi jaae। svapna mein bhi rona nahin। maaya roolaae to bhi nahin rona। man ka bhi rona hota hai, sirf aankhon ka rona hi nahin hota। to maaya roolaati hai, baap hansaate hain। sada bihaar maana khush rahne vaale - khushabhaar। aur bangaal maana sada meetha rahne vaale। bangaal mein mithaaiyaan achhi hoti hain na, bahut variety hoti hai। to jahaan madhurta hai vahaan hi pavitrata hai। bina pavitrata ke madhurta aa nahin sakti। to sada madhur rahne vaale aur sada khushabhaar rahne vaale। achha! teachers bhi khushabhaar ko dekh karke sada-bahaar hi rehti hain na। achha!

dilli zone:- dilli ko baapdaada ‘‘dil'' kehte hain। naam hai dilli arthaat dil li। baap ne aakar dil li aur aapne aakar kya kiya? baap ko dil mein bitha diya। dil mein aur to koi nahin hai na! na vyakti,na vastu। koi vastu bhi aakarshit karti hai to woh bhi dil mein bithaaya na! vastu ke peechhe bhi agar dil lag gai to baap bhool jaayega na! baap ko bhoola to maaya ka laga bam gola। bamba (ndasn gola) lagne se kitna nuksaan ho jaata hai! to yeh bhi bamba lagta hai to bahut nuksaan kar deta hai। dil hai hi baap ke liye to doosra kaise aa sakta hai? jo aasan jiska hoga,vahi baithega na! abhi prime minister ki seat par jo fix hoga vahi baithega। to dil hai dilaaraam ke liye। ek hi kaam mila hai - baap ko yaad karo, bas। jiske dil mein baap hai woh sada hi ‘‘vaah-vaah''ke geet gaata hai aur baap nahin to ‘‘haayha ya'' ke geet gaata hai। duniya vaale ‘‘haay-haay'' karte aur aap ‘‘vaah-vaah''karte। svayan bhi ‘‘vaah-vaah''ho gaye,baap bhi ‘‘vaah-vaah''aur drama mein jo kuchh chal raha hai woh bhi ‘‘vaah-vaah''। to sada ‘‘vaah-vaah''ke geet gaane vaale ho ya kabhi‘‘haay-haay''bhi kar dete ho! man se bhi,svapna mein bhi kabhi ‘‘haay''nahin nikal sakti। ‘‘haay''kya ho gaya! yeh kabhi kehte ho? jo hua woh bhi vaah,jo ho raha hai woh bhi ‘‘vaah'',jo hona hai woh bhi ‘‘vaah।''teenon hi kaal - ‘vaah-vaah'hai। ek kaal bhi kharaab nahin ho sakta। kyonki baap bhi achhe-te- achha,sangamayug bhi sabse achha aur jo praapti hai woh bhi achchhete- achhi aur bhavishya jo praapta hona hai woh bhi achhe-te-achha। sab achha hona hai to ‘vaah-vaah'ke geet gaate raho। jahaan sab achha lagega vahaan ichchha nahin hogi। agar ichchha hoti hai to achha nahin hota aur achha hota hai to ichchha nahin hoti। kyonki achha tab kahenge jab sab praapta ho। jab apraapti hoti hai tab ichchha hoti hai। to koi apraapti hai?maataaon ko gahne chaahiye?sona chaahiye?paandavon ko laakh va padma chaahiye? karod chaahiye? nahin chaahiye? kyonki ab ke karodapti banna arthaat sada ke karod ganvaana। abhi kya karenge?yeh jhoothi maaya, jhoothi kaaya - jhootha kya karenge! shareer nirvaah ke liye, daal-roti ke liye to bahut mil raha hai aur milta rahega। baaki kya chaahiye?lottery vagairah chaahiye? kai bachche samajhte hain lottery aayegi to yagya mein laga denge। lekin aisa paisa yagya mein nahin lagta। hoti apni ichchha hai lekin kehte hain lottery aayegi to seva karenge! abhi to sachchi kamaai jama kar rahe ho,isliye - ‘ichchha maatram avidya।' kyonki ichchha mein agar gaye to ichchha ke peechhe bhaagna aise hi hai jaise mrigtrishna। to ichchha samaapta ho gai,achhe ban gaye! jab rachayita hi aapka ho gaya to rachna kya karenge! behad ke aage had kya lagti hai? kuchh bhi nahin hai। had mein phans gaye to behad gaya।

dilli vaalon ko to nasha chaahiye -dilli mein jamuna ke kinaare mahal banenge! to sirf mahal dekhne vaale banenge ya mahal mein rahne vaale?sabhi raajya karenge ya dekhenge?achha! baap mila sab-kuchh mila। yaad aur seva ke sivaay aur koi kaarya hai hi nahin। agar daphtar mein jaate ho, business karte ho - to bhi seva ke liye। is lakshya se kahin bhi jaayenge to seva hogi। agar yeh samajh kar jaayenge ki duty bajaane ja raha hoon,jaana hi hai - to seva nahin hogi। kaam karke laut aayenge lekin seva nahin kar sakenge। seva ke nimitta yeh kar raha hoon - to seva aapke paas svatah hi aayegi aur jitni seva karenge utni aur ‘khushi'badhti jaayegi। bhavishya to hai hi lekin pratyakshaphal''khushi’’ milti hai। to phal khaao,mehnat nahin karo। seva yaad nahin rahegi to mehnat karni padegi। khaali buddhi rehna arthaat maaya ka aahvaan karna aur buddhi ko yaad aur seva mein busy rakha to sada hi phal khaate rahenge। achha!

dilli vaalon ko baapdaada vishesh sahayog dete hain,kyon? kyonki samay par sahayogi pahle dilli nivaasi bane hain। jab yagya mein aavashyakta thi tab sahayogi banen। to jo samay par sahayogi banta hai usko automatically vishesh sahayog milta hai। dilli nivaasiyon ko yeh vishesh lift hai। sthaapna mein sahayog ke nimitta dilli bani hai,usmein bhi vishesh maataayen। to baapdaada kiska rakhta nahin hai,abhi hi deta hai। ek ka padmaguna karke de deta hai। to extra lift hui na। jab sthaapna mein pahla number bane to raajya mein bhi pahla number banenge। samjha? achha!