Daily Murli for Wednesday 29 April 2020

29-04-2020 praatahmurli om shanti "baapdaada"' madhuban

“ meethe bachche - tumhaara yeh brahman kul bilkul niraala hai , tum brahman hi knowledgeful ho , tum gyaan , vigyaan aur agyaan ko jaante ho ''

prashn:- kis sahaj purooshaartha se tum bachchon ki dil sab baaton se hatti jaayegi?

uttar:- sirf roohaani dhandhe mein lag jaao, jitna-jitna roohaani service karte rahenge utna aur sab baaton se svatah dil hatti jaayegi। raajaai lene ke purooshaartha mein lag jaayenge। parantu roohaani service ke saath-saath jo rachna rachi hai, uski bhi sambhaal karni hai।

geet:- jo piya ke saath hai …

om shanti। piya kaha jaata hai baap ko। ab baap ke aage to bachche baithe hain। bachche jaante hain ham koi saadhu sanyaasi aadi ke aage nahin baithe hain। woh baap gyaan ka saagar hai, gyaan se hi sadgati hoti hai। kaha jaata hai gyaan, vigyaan aur agyaan। vigyaan arthaat dehi-abhimaani banna, yaad ki yaatra mein rehna aur gyaan arthaat srishti chakra ko jaanna। gyaan, vigyaan aur agyaan - iska arth manushya bilkul nahin jaante hain। abhi tum ho sangamayugi brahman। tumhaara yeh brahman kul niraala hai, unko koi nahin jaante। shaastron mein yeh baaten hain nahin ki brahman sangam par hote hain। yeh bhi jaante hain prajaapita brahma hokar gaya hai, usko aadi dev kehte hain। aadi devi jagat amba, woh kaun hai! yeh bhi duniya nahin jaanti। zaroor brahma ki mukh vanshaavli hi hogi। woh koi brahma ki stri nahin thahri। adopt karte hain na। tum bachchon ko bhi adopt karte hain। braahmanon ko devta nahin kahenge। yahaan brahma ka mandir hai, woh bhi manushya hai na। brahma ke saath sarasvati bhi hai। phir deviyon ke bhi mandir hain। sabhi yahaan ke hi manushya hain na। mandir ek ka bana diya hai। prajaapita ki to dher praja hogi na। ab ban rahi hai। prajaapita brahma ka kul vriddhi ko pa raha hai। hain adopted dharma ke bachche। ab tumko behad ke baap ne dharma ka bachcha banaaya hai। brahma bhi behad ke baap ka bachcha thahra, inko bhi varsa unse milta hai। tum potre potriyon ko bhi varsa unse milta hai। gyaan to koi ke paas hai nahin kyonki gyaan ka saagar ek hai, woh baap jab tak na aaye tab tak kiski sadgati hoti nahin। abhi tum bhakti se gyaan mein aaye ho, sadgati ke liye। satayug ko kaha jaata hai sadgati। kaliyug ko durgati kaha jaata hai kyonki raavan ka raajya hai। sadgati ko raamraajya bhi kehte hain। sooryavanshi bhi kehte hain। yathaartha naam sooryavanshi, chandravanshi hai। bachche jaante hain ham hi sooryavanshi kul ke the, phir 84 janma liye, yeh knowledge koi shaastron mein ho nahin sakti kyonki shaastra hain hi bhakti maarga ke liye। woh to sab vinaash ho jaayenge। yahaan se jo sanskaar le jaayenge vahaan woh sab banaane lag padenge। tumhaare mein bhi sanskaar bhare jaate hain raajaai ke। tum raajaai karenge woh (saainsadaan) phir us raajaai mein aakar, jo hunar seekhte hain vahi karenge। jaayenge zaroor sooryavanshi, chandravanshi raajaai mein। unmein hai sirf science ki knowledge। ve uske sanskaar le jaayenge। woh bhi sanskaar hain। woh bhi purooshaartha karte hain, unke paas woh ilam (vidya) hai। tumhaare paas doosra koi ilam nahin hai। tum baap se raajaai lenge। dhandhe aadi mein to woh sanskaar rehte hain na। kitni khitpit rehti hai। parantu jab tak vaanaprastha avastha nahin hui hai to gharbaar ki sambhaal bhi karni hai। nahin to bachchon ki kaun sambhaal karenge। yahaan to nahin aakar baithenge। aise kehte hain jab is dhandhe mein poori reeti lag jaayenge phir woh chhoot sakta hai। saath mein rachna ko bhi zaroor sambhaalna padta hai। haan koi achhi reeti roohaani service mein lag jaate hain phir unse jaise dil uth jaayegi। samjhenge jitna time is roohaani service mein deven, utna achha hai। baap aaye hain patit se paavan banne ka raasta bataane, to bachchon ko bhi yahi service karni hai। har ek ka hisaab dekha jaata hai। behad ka baap to keval patit se paavan banne ki mat dete hain, woh paavan banne ka hi raasta bataate hain। baaki yeh dekh-rekh karna, raay dena inka dhandha ho jaata hai। shivbaaba kehte hain mere se koi baat dhandhe aadi ki nahin poochhni hai। mere ko tumne bulaaya hai ki aakar patit se paavan banaao, to ham in dvaara tumko bana raha hoon। yeh bhi baap hai, inki mat par chalna pade। unki roohaani mat, inki jismaani। inke oopar bhi kitni responsibility rehti hai। yeh bhi kehte rehte hain ki baap ka pharmaan hai maamekam yaad karo। baap ki mat par chalo। baaki bachchon ko kuchh bhi poochhna padta hai, naukri mein kaise chalen, in baaton ko yeh saakaar baba achhi tarah samjha sakte hain, anubhvi hain, yeh bataate rahenge। aise-aise main karta hoon, inko dekh seekhna hai, yeh sikhaate rahenge kyonki yeh hai sabse aage। sab toofaan pahle inke paas aate hain isliye sabse roostam yeh hai, tab to oonch pad bhi paate hain। maaya roostam ho ladti hai। isne phat se sab kuchh chhod diya, inka part tha। baba ne inse yeh kara diya। karnakraavanhaar to woh hai na। khushi se chhod diya, saakshaatkaar ho gaya। ab ham vishwa ke maalik bante hain। yeh paai paise ki cheez ham kya karenge। vinaash ka saakshaatkaar bhi kara diya। samajh gaye, is puraani duniya ka vinaash hona hai। hamko phir se raajaai milti hai to phat se woh chhod diya। ab to baap ki mat par chalna hai। baap kehte hain mujhe yaad karo। drama anusaar bhatthi banni thi। manushya thode hi samajhte ki itne yeh sab kyon bhaage। yeh koi saadhu santa to nahin। yeh to simple hai, isne kisko bhagaaya bhi nahin। krishna ka charitra koi hai nahin। manushya maatra ki mahima koi hai nahin। mahima hai to ek baap ki। bas। baap hi aakar sabko sukh dete hain। tumse baat karte hain। tum yahaan kiske paas aaye ho? tumhaari buddhi vahaan bhi jaayegi, yahaan bhi kyonki jaante ho shivbaaba rahne vaala vahaan ka hai। abhi inmen aaye hain। baap se hamko svarga ka varsa milna hai। kaliyug ke baad zaroor svarga aayega। krishna bhi baap se varsa lekar jaae raajaai karte hain, ismen charitra ki baat hi nahin। jaise raaja ke paas prince paida hota hai, school mein padhkar phir bada hokar gaddi lega। ismen mahima va charitra ki baat nahin। oonch te oonch ek baap hi hai। mahima bhi unki hoti hai! yeh bhi unka parichay dete hain। agar woh kahe main kehta hoon to manushya samjhenge yeh apne liye kehte hain। yeh baaten tum bachche samajhte ho, bhagwan ko kabhi bhi manushya nahin kah sakte। woh to ek hi niraakaar hai। paramdham mein rehte hain। tumhaari buddhi oopar mein bhi jaati hai phir neeche bhi aati hai।

baba doordesh se paraaye desh mein aakar hamko padhaae phir chale jaate hain। khud kehte hain - main aata hoon second mein। deri nahin lagti hai। aatma bhi second mein ek shareer chhod doosre mein jaati hai। koi dekh na sake। aatma bahut teekhi hai। gaaya bhi hua hai second mein jeevanmukti। raavan raajya ko jeevanbandh raajya kahenge। bachcha paida hua aur baap ka varsa mila। tumne bhi baap ko pahchaana aur svarga ke maalik banen phir usmein nambarvaar martabe hain - purooshaartha anusaar। baap bahut achhi reeti samjhaate rehte hain, do baap hain - ek laukik aur ek paarlaukik। gaate bhi hain duhkh mein simran sab kare, sukh mein kare na koi। tum jaante ho ham bhaaratvaasiyon ko jab sukh tha to simran nahin karte the। phir hamne 84 janma liye। aatma mein khaad padti hai to degree kam hoti jaati hai। 16 kala sampoorn phir 2 kala kam ho jaati hai। kam paas hone kaaran raam ko baan dikhaaya hai। baaki koi dhanush nahin toda hai। yeh ek nishaani de di hai। yeh hain sab bhakti maarga ki baaten। bhakti mein manushya kitna bhatakte hain। ab tumko gyaan mila hai, to bhatakna band ho jaata hai।

“he shivbaaba'' kehna yeh pukaar ka shabd hai। tumko he shabd nahin kehna hai। baap ko yaad karna hai। chillaaya to goya bhakti ka ansh aa gaya। he bhagwan kehna bhi bhakti ki aadat hai। baba ne thode hi kaha hai - he bhagwan kahkar yaad karo। antarmukh ho mujhe yaad karo। simran bhi nahin karna hai। simran bhi bhakti maarga ka akshar hai। tumko baap ka parichay mila, ab baap ki shreemat par chalo। aise baap ko yaad karo jaise laukik bachche dehdhaari baap ko yaad karte hain। khud bhi deh-abhimaan mein hain to yaad bhi dehdhaari baap ko karte hain। paarlaukik baap to hai hi dehi-abhimaani। ismen aate hain to bhi deh-abhimaani nahin hote। kehte hain hamne yeh loan liya hai, tumko gyaan dene liye main yeh loan leta hoon। gyaan saagar hoon parantu gyaan kaise doon। garbha mein to tum jaate ho, main thode hi garbha mein jaata hoon। meri gati mat hi nyaari hai। baap ismen aate hain। yeh bhi koi nahin jaante। kehte bhi hain brahma dvaara sthaapna। parantu kaise brahma dvaara sthaapna karte hain? kya prerna denge! baap kehte hain main saadhaaran tan mein aata hoon। uska naam brahma rakhta hoon kyonki sanyaas karte hain na।

tum bachche jaante ho abhi braahmanon ki maala nahin ban sakti kyonki tootte rehte hain। jab brahman final ban jaate hain tab roodra maala banti hai, phir vishnu ki maala mein jaate hain। maala mein aane ke liye yaad ki yaatra chaahiye। abhi tumhaari buddhi mein hai ki ham so pahle-pahle satopradhaan the phir sato rajo tamo mein aate hain। ham so ka bhi arth hai na। om ka arth alag hai, om maana aatma। phir vahi aatma kehti hai ham so devta kshatriy... vo log phir kah dete ham aatma so paramatma। tumhaara om aur ham so ka arth bilkul alag hai। ham aatma hain phir aatma varno mein aati hai, ham aatma so pahle devta kshatriy bante hain। aise nahin ki aatma so paramatma, gyaan poora na hone ke kaaran arth hi munjha diya hai। aham brahmasmi kehte hain, yeh bhi wrong hai। baap kehte hain main rachna ka maalik to banta nahin। is rachna ke maalik tum ho। vishwa ke bhi maalik tum bante ho। brahm to tatva hai। tum aatma so is rachna ke maalik bante ho। abhi baap sab vedon shaastron ka yathaartha arth baith sunaate hain। abhi to padhte rehna hai। baap tumhein nai-nai baaten samjhaate rehte hain। bhakti kya kehti hai, gyaan kya kehta hai। bhakti maarga mein mandir banaaye, jap tap kiye, paisa barbaad kiya। tumhaare mandiron ko bahuton ne loota hai। yeh bhi drama mein part hai phir zaroor unhon se hi vaapas milna hai। abhi dekho kitna de rahe hain। din pratidin badhaate rehte hain। yeh bhi lete rehte hain। unhonne jitna liya hai utna hi poora hisaab denge। tumhaare paise jo khaaye hain, woh hap nahin kar sakte। bhaarat to avinaashi khanda hai na। baap ka birth place hai। yahaan hi baap aate hain। baap ke khanda se hi le jaate hain to vaapis dena pade। samay par dekho kaise milta hai। yeh baaten tum jaante ho। unko thode hi pata hai - vinaash kis samay aayega। government bhi yeh baaten maanengi nahin। drama mein noondh hai, karja uthaate hi rehte hain। return ho raha hai। tum jaante ho hamaari raajdhaani se bahut paise le gaye hain, so phir de rahe hain। tumko koi baat ka phikar nahin hai। phikar rehta hai sirf baap ko yaad karne ka। yaad se hi paap bhasma honge। knowledge to bahut sahaj hai। ab jo jitna purooshaartha kare। shreemat to milti rehti hai। avinaashi surgeon se har baat mein mat leni pade। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jitna time mile utna time yeh roohaani dhandha karna hai। roohaani dhandhe ke sanskaar daalne hain। patiton ko paavan banaane ki service karni hai।

2) antarmukhi ban baap ko yaad karna hai। mukh se he shabd nahin nikaalna hai। jaise baap ko ahankaar nahin, aise nirhankaari banna hai।

vardaan:- sangathit roop mein ekras sthiti ke abhyaas dvaara vijay ka nagaada bajaane vaale ever ready bhav

vishwa mein vijay ka nagaada tab bajega jab sabhi ke sab sankalp ek sankalp mein sama jaayenge। sangathit roop mein jab ek second mein sabhi ekras sthiti mein sthit ho jaaen tab kahenge ever ready। ek second mein ekmat, ekras sthiti aur ek sankalp mein sthit hone ki hi nishaani anguli dikhaai hai, jis anguli se kaliyugi parvat uth jaata hai isliye sangathit roop mein ekras sthiti banaane ka abhyaas karo tab hi vishwa ke andar shakti sena ka naam baala hoga।

slogan:- shreshtha purooshaartha mein thakaavat aana - yeh bhi aalasya ki nishaani hai।