Daily Murli for Sunday 13 December 2020

13-12-20 praatahmurli om shanti ''avyakt-baapdaada'' revise 18-03-87 madhuban

sachche roohaani aashik ki nishaaniyaan

aaj roohaani maashook apne roohaani aashik aatmaon se milne ke liye aaye hain। saare kalpa mein is samay hi roohaani maashook aur aashikon ka milan hota hai। baapdaada apne har ek aashik aatma ko dekh harshit hote hain - kaise roohaani aakarshan se aakarshit ho apne sachche maashook ko jaan liya, pa liya hai! khoye hue aashik ko dekh maashook bhi khush hote hain ki phir se apne yathaartha thikaane par pahunch gaye। aisa sarva praapti karaane vaala maashook aur koi mil nahin sakta। roohaani maashook sada apne aashikon se milne ke liye kahaan aate hain? jaisa shreshtha maashook aur aashik hain, aise hi shreshtha sthaan par milne ke liye aate hain। yeh kaunsa sthaan hai jahaan milan mana rahe ho? isi sthaan ko jo bhi kaho, sarva naam is sthaan ko de sakte hain। vaise milne ke sthaan jo ati priy lagte hain woh kaun-se hote hain? milan ya phoolon ke bageeche mein hota hai va saagar ke kinaare par milna hota hai, jisko aap log beech (samudra ka kinaara) kehte ho। to ab kahaan baithe ho? gyaan saagar ke kinaare roohaani milan ke sthaan par baithe ho। roohaani va godly garden (allaah ka bageecha) hai। aur to anek prakaar ke bageeche dekhe hain lekin aisa bageecha jahaan harek ek do se jyaada khile hue phool hai, ek-ek shreshtha sundarta se apni khushbu de rahe hain - aisa bageecha hai। isi beech par baapdaada va maashook milne aate hain। woh anek beech dekheen, lekin aisi beech kab dekhi jahaan gyaan saagar ke sneh ki lahren, shakti ki lahren, bhinna-bhinna lahren lahraae sada ke liye refresh kar deti hain? yeh sthaan pasanda hai na? svachchhata bhi hai aur ramneekta bhi hai। sundarta bhi hai। itni hi praaptiyaan bhi hain। aisa manoranjan ka vishesh sthaan aap aashikon ke liye maashook ne banaaya hai jahaan aane se muhabbat ki lakeer ke andar pahunchte hi anek prakaar ki mehnat se chhoot jaate। sabse badi mehnat - natural yaad ki, woh sahaj anubhav karte ho aur kaunsi mehnat se chhootte ho? laukik job (naukri) se bhi chhoot jaate ho। bhojan banaane se bhi chhoot jaate ho। sab bana banaaya milta hai na। yaad bhi svatah anubhav hoti। gyaan ratnon ki jholi bhi bharti rehti। aise sthaan par jahaan mehnat se chhoot jaate ho aur muhabbat mein leen ho jaate ho।

vaise bhi sneh ki nishaani vishesh yahi gaai jaati ki do, do na rahen lekin do milkar ek ho jaaen। isko hi sama jaana kehte hain। bhakton ne isi sneh ki sthiti ko sama jaana va leen hona kah diya hai। vo log leen hone ka arth nahin samajhte। lav mein leen hona - yeh sthiti hai lekin sthiti ke badle unhonne aatma ke astitva ko sada ke liye samaapta karna samajh liya hai। sama jaana arthaat samaan ban jaana। jab baap ke va roohaani maashook ke milan mein magna ho jaate ho to baap samaan banne athva sama jaane arthaat samaan banne ka anubhav karte ho। isi sthiti ko bhakton ne sama jaana kaha hai। leen bhi hote ho, sama bhi jaate ho। lekin yeh milan ke muhabbat ke sthiti ki anubhooti hai। samjha! isliye baapdaada apne aashikon ko dekh rahe hain।

sachche aashik arthaat sada aashik, natural (svatah) aashik। sachche aashik ki visheshtaayen jaante bhi ho। phir bhi uski mukhya nishaaniyaan hain:-

pahli nishaani - ek maashook dvaara sarva sambandhon ki samay pramaan anubhooti karna। maashook ek hai lekin ek ke saath sarva sambandh hain। jo sambandh chaahen aur jis samay jis sambandh ki aavashyakta hai, us samay us sambandh ke roop se preeti ki reeti dvaara anubhav kar sakte ho। to pahli nishaani hai - sarva sambandhon ki anubhooti। ‘sarva' shabd ko underline karna। sirf sambandh nahin। kai aise natkhat aashik bhi hain jo samajhte hain sambandh to jut gaya hai। lekin sarva sambandh jute hain? aur doosri baat - samay par sambandh ki anubhooti hoti hai? knowledge ke aadhaar par sambandh hai va dil ki anubhooti se sambandh hai? baapdaada sachchi dil par raazi hai। sirf teevra dimaag vaalon par raazi nahin, lekin dilaaraam dil par raazi hai isliye dil ka anubhav dil jaane, dilaaraam jaane। samaane ka sthaan dil kaha jaata hai, dimaag nahin। knowledge ko samaane ka sthaan dimaag hai, lekin maashook ko samaane ka sthaan dil hai। maashook aashikon ki baaten hi sunaayenge na। koi-koi aashik dimaag jyaada chalaate lekin dil se dimaag ki mehnat aadhi ho jaati hai। jo dil se seva karte va yaad karte, unhon ki mehnat kam aur santushtata jyaada hoti aur jo dil ke sneh se nahin yaad karte, sirf knowledge ke aadhaar par dimaag se yaad karte va seva karte, unhon ko mehnat jyaada karni padti, santushtata kam hoti। chaahe saphalta bhi ho jaae, to bhi dil ki santushtata kam hogi। yahi sochte rahenge - hua to achha, lekin phir, phir bhi… karte rahenge aur dil vaale sada santushtata ke geet gaate rahenge। dil ki santushtata ke geet, mukh ki santushtata ke geet nahin। sachche aashik dil se sarva sambandhon ki samay pramaan anubhooti karte hain।

doosri nishaani - sachche aashik har paristhiti mein, har karma mein sada praapti ki khushi mein honge। ek hai anubhooti, doosri hai usse praapti। kai anubhooti bhi karte hain ki haan, mera baap bhi hai, saajan bhi hai। bachcha bhi hai lekin praapti jitni chaahte utni nahin hoti hai। baap hai, lekin varse ke praapti ki khushi nahin rehti। anubhooti ke saath sarva sambandhon dvaara praapti ka bhi anubhav ho। jaise - baap ke sambandh dvaara sada varse ke praapti ki mahsoosta ho, bharpoorta ho। satguru dvaara sada vardaanon se sampanna sthiti ka va sada sampanna swaroop ka anubhav ho। to praapti ka anubhav bhi aavashyak hai। woh hai sambandhon ka anubhav, yeh hai praaptiyon ka anubhav। kaeeyon ko sarva praaptiyon ka anubhav nahin hota। master sarvashaktivaan hai lekin samay par shaktiyon ki praapti nahin hoti। praapti ki anubhooti nahin to praapti mein bhi kami hai। to anubhooti ke saath praapti swaroop bhi banen - yeh hai sachche aashik ki nishaani।

teesri nishaani - jis aashik ko anubhooti hai, praapti bhi hai woh sada tripta rahenge, kisi bhi baat mein apraapta aatma nahin lagegi। to, ‘tripti' - yeh aashik ki visheshta hai। jahaan praapti hai, vahaan tripti zaroor hai। agar tripta nahin to avashya praapti mein kami hai aur praapti nahin to sarva sambandhon ki anubhooti mein kami hai। to 3 nishaaniyaan hai - anubhooti, praapti aur tripti। sada tripta aatma। jaisa bhi samay ho, jaisa bhi vaayumandal ho, jaise bhi seva ke saadhan hon, jaise bhi seva ke sangathan ke saathi hon lekin har haal mein, har chaal mein tripta hon। aise sachche aashik ho na? tripta aatma mein koi had ki ichchha nahin hogi। vaise dekho to tripta aatma bahut minority (thodi) rehti hai। koi na koi baat mein chaahe maan ki, chaahe shaan ki bhookh hoti hai। bhookh vaala kabhi tripta nahin hota। jiska sada pet bhara hua hota, woh tripta hota hai। to jaise shareer ke bhojan ki bhookh hai, vaise man ki bhookh hai - shaan, maan, salvation, saadhan। yeh man ki bhookh hai। to jaise shareer ki tripti vaale sada santushta honge, vaise man ki tripti vaale sada santushta honge। santushtata tripti ki nishaani hai। agar tripta aatma nahin honge, chaahe shareer ki bhookh, chaahe man ki bhookh hogi to jitna bhi milega, milega bhi jyaada lekin tripta aatma na hone kaaran sada hi atripta rahenge। asantushtata rehti hai। jo royal hote hain, woh thode mein tripta hote hain। royal aatmaon ki nishaani - sada hi bharpoor honge, ek roti mein bhi tripta to 36 prakaar ke bhojan mein bhi tripta honge। aur jo atripta honge, woh 36 prakaar ke bhojan milte bhi tripta nahin honge kyonki man ki bhookh hai। sachche aashik ki nishaani - sada tripta aatma honge। to teenon hi nishaaniyaan check karo। sadaiv yeh socho - ‘ham kiske aashik hain! jo sada sampanna hai, aise maashook ke aashik hain!' to santushtata kabhi nahin chhodo। seva chhod do lekin santushtata nahin chhodo। jo seva asantushta banaave vo seva, seva nahin। seva ka arth hi hai meva dene vaali seva। to sachche aashik sarva had ki chaahna se pare, sada hi sampanna aur samaan honge।

aaj aashikon ki kahaaniyaan suna rahe hain। naaz, nakhre bhi bahut karte hain। maashook bhi dekh-dekh muskaraate rehte। naaz, nakhre bhal karo lekin maashook ko maashook samajh uske saamne karo, doosre ke saamne nahin। bhinna-bhinna had ke svabhaav, sanskaar ke nakhre aur naaz karte hain। jahaan mera svabhaav, mere sanskaar shabd aata hai, vahaan bhi naaz, nakhre shuru ho jaate hain। baap ka svabhaav so mera svabhaav ho। mera svabhaav baap ke svabhaav se bhinna ho nahin sakta। woh maaya ka svabhaav hai, paraaya svabhaav hai। usko mera kaise kahenge? maaya paraai hai, apni nahin hai। baap apna hai। mera svabhaav arthaat baap ka svabhaav। maaya ke svabhaav ko mera kehna bhi wrong hai। ‘mera' shabd hi phere mein laata hai arthaat chakra mein laata hai। aashik maashook ke aage aise naaz-nakhre bhi dikhaate hain। jo baap ka so mera। har baat mein bhakti mein bhi yahi kehte hain - jo tera so mera, aur mera kuchh nahin। lekin jo tera so mera। jo baap ka sankalp, woh mera sankalp। seva ke part bajaane ke baap ke sanskaar-svabhaav, woh mere। to isse kya hoga? had ka mera, tera ho jaayega। tera so mera, alag mera nahin hai। jo bhi baap se bhinna hai, woh mera hai hi nahin, woh maaya ka phera hai isliye is had ke naaz-nakhre se nikal roohaani naaz - main teri aur tu mera, bhinna-bhinna sambandh ki anubhooti ke roohaani nakhre bhal karo। parantu yeh nahin karo। sambandh nibhaane mein bhi roohaani nakhre kar sakte ho। muhabbat ki preet ke nakhre achhe hote hain। kab sakha ke sambandh se muhabbat ke nakhre ka anubhav karo। woh nakhra nahin lekin niraalaapan hai। sneh ke nakhre pyaare hote hain। jaise chhote bachche bahut snehi aur pure (pavitra) hone kaaran unke nakhre sabko achhe lagte hain। shuddhata aur pavitrata hoti hai bachchon mein। aur bada koi nakhra kare to woh bura maana jaata। to baap se bhinna-bhinna sambandh ke, sneh ke, pavitrata ke naaz-nakhre bhal karo, agar karna hi hai to।

‘sada haath aur saath' hi sachche aashik maashook ki nishaani hai। saath aur haath nahin chhoote। sada buddhi ka saath ho aur baap ke har kaarya mein sahayog ka haath ho। ek do ke sahayog ki nishaani haath mein haath milaake dikhaate hain na। to sada baap ke sahayogi banna - yeh hai sada haath mein haath aur sada buddhi se saath rehna। man ki lagan, buddhi ka saath। is sthiti mein rehna arthaat sachche aashik aur maashook ke pose mein rehna। samjha? vaayda hi yeh hai ki sada saath rahenge। kabhi-kabhi saath nibhaayenge - yeh vaayda nahin hai। man ka lagaav kabhi maashook se ho aur kabhi na ho to woh sada saath to nahin hua na, isliye isi sachche aashikpan ke position mein raho। drishti mein bhi maashook, vritti mein bhi maashook, srishti hi maashook।

to yeh maashook aur aashikon ki mahphil hai। bageecha bhi hai to saagar ka kinaara bhi hai। yeh wonderful aisi private beech (saagar ka kinaara) hai, jo hajaaron ke beech (madhya) bhi private hai। har ek anubhav karte - mere saath maashook ka personal pyaar hai। harek ko personal pyaar ki feeling praapta hona - yahi wonderful maashook aur aashik hain। hai ek maashook lekin hai sabka। sabhi ka adhikaar sabse jyaada hai। harek ka adhikaar hai। adhikaar mein number nahin hain, adhikaar praapta karne mein number ho jaate hain। sada yeh smriti rakho ki ‘godly garden mein haath aur saath de chal rahe hain ya baithe hain। roohaani beech par haath aur saath de mauj mana rahe hain।' to sada hi manoranjan mein rahenge, sada khush rahenge, sada sampanna rahenge। achha।

yeh double videshi bhi double lucky hain। achha hai jo ab tak pahunch gaye। aage chal kya parivartan hota hai, woh to drama। lekin double lucky ho jo samay pramaan pahunch gaye ho। achha।

sada avinaashi aashik ban roohaani maashook se preeti ki reeti nibhaane vaale, sada svayan ko sarva praaptiyon se sampanna anubhav karne vaale, sada har sthiti va paristhiti mein tripta rahne vaale, sada santushtata ke khajaane se bharpoor ban auron ko bhi bharpoor karne vaale, aise sada ke saath aur haath milaane vaale sachche aashikon ko roohaani maashook ka dil se yaadapyaar aur namaste।

vardaan:- sada shreshtha aur naye prakaar ki seva dvaara vriddhi karne vaale sahaj sevaadhaari bhav

sankalpon dvaara eeshvareey seva karna yeh bhi seva ka shreshtha aur naya tareeka hai, jaise javaahri roj subah apne har ratna ko check karta hai ki saaph hain, chamak theek hai, theek jagah par rakhen hain..aise roz amritvele apne samparka mein aane vaali aatmaon par sankalp dvaara nazar daudaao, jitna aap unhon ko sankalp se yaad karenge utna woh sankalp unhon ke paas pahunchenga..is prakaar seva ka naya tareeka apnaate vriddhi karte chalo। aapke sahjayog ki sookshm shakti aatmaon ko aapke taraph svatahaakarshit karegi।

slogan:- bahaanebaaji ko merge karo aur behad ki vairaagyavritti ko emerge karo।