Daily Murli for Sunday 18 July 2021

18-07-21 praatahmurli om shanti ''avyakt-baapdaada'' revise 16-02-88 madhuban

sada utsaah mein rahkar utsav manaao

aaj vishveshvar baap apni vishwa ki shreshtha rachna va shreshtha aadi ratnon se, ati snehi aur sameep bachchon se milan manaane aaye hain। vishveshvar baap ke bachche to vishwa ki sarva aatmaayen hain। lekin brahman aatmaayen ati snehi sameep ki aatmaayen hain kyonki brahman aatmaayen aadi rachna hai। baap ke saath-saath brahman aatmaayen bhi brahman jeevan mein avatrit ho baap ke kaarya mein sahayogi aatmaayen banti hain isliye baapdaada aaj ke din bachchon ka brahman jeevan ke avatran ka janma-din manaane aaye hain। bachche baap ka janmadin manaane ke liye umang-utsaah se khushi mein naach rahe hain। lekin baapdaada bachchon ke is brahman jeevan ko dekh, sneh aur sahayog mein, baap ke saath-saath har kaarya mein himmat se aage badhte hue dekh harshit ho rahe hain। to aap baapdaada ka birth-de manaate ho aur baap bachchon ka birth-de manaate। aap braahmanon ka bhi birth-de hai na। to sabhi ko baapdaada, jagat-amba aur sarva aapke saathi advance party ki vishesh shreshtha aatmaon sahit aapke alaukik brahman janma ki sneh se sunahri pushpon ki varsha sahit mubaarak ho, mubaarak ho। yeh dil ki mubaarak hai, sirf mukh ki mubaarak nahin। lekin dilaaraam baap ke dil ki mubaarak sarva shreshtha aatmaon ko, chaahe sammukh baithe hain, chaahe man se baap ke sammukh hain, chaaron or ke bachchon ko mubaarak ho, mubaarak ho।

aaj ke din bhakta aatmaon ke paas baap ke bindu roop ki vishesh smriti rehti hain। shiv jayanti va shivraatri koi saakaar roop ka yaadgaar nahin hai। lekin niraakaar baap jyoti-bindu jisko shivling ke roop mein poojte hain, us bindu ka mahatva hai। aap sabhi ke dil mein bhi baap ke bindu roop ki smriti sada rehti hai। to aap bhi bindu aur baap bhi bindu to aaj ke din bhaarat mein har ek bhakta aatma ke andar vishesh bindu roop ka mahatva rehta hai। bindu jitna hi sookshm hai, utna hi shaktishaali hai isliye bindu baap ko hi shaktiyon ke, gunon ke, gyaan ke sindhu kaha jaata hai। to aaj sabhi bachchon ke dil mein janma-din ki vishesh utsaah ki lahar baapdaada ke paas amritvele se pahunch rahi hai। jaise aap bachchon ne vishesh seva arth va sneh swaroop ban baap ka jhanda lahraaya, baap ne kaunsa jhanda lahraaya? aap sabhi ne to shivbaaba ka jhanda lahraaya, baap kya yeh jhanda lahraayenge? yeh seva ke saakaar roop ki jimmevaari bachchon ko de di। baap ne bhi jhanda lahraaya lekin kaun-sa aur kahaan lahraaya? baapdaada ne apne dil mein sabhi bachchon ki visheshtaaon ke sneh ka jhanda lahraaya। kitne jhande lahraayen honge? is duniya mein itne jhande koi lahra nahin sakte! kitna sundar drishya hoga!

ek-ek bachche ki visheshta ka jhanda baapdaada ke dil mein lahra raha hai। sirf aap sabne jhanda nahin lahraaya lekin baapdaada ne bhi lahraaya। yeh jhanda lahraate ho to us samay kya hota hai? phoolon ki varsha। baapdaada bhi jab bachchon ki visheshta ka sneh ka jhanda lahraate hain to kaun-si varsha hoti hai? har ek bachche ke oopar ‘avinaashi bhav', ‘amar bhav', ‘achal-adol bhav'- in vardaanon ki varsha hoti hai। yeh vardaan hi baapdaada ke avinaashi alaukik pushpa hain। baapdaada ko is avatran-divas ki arthaat shiv jayanti divas ki bachchon se bhi jyaada khushi hai, khushi mein khushi hai! kyonki yeh avatran ka divas har varsha yaadgaar to manaate hain lekin jab baap ka saakaar brahma tan mein avatran hota hai to baapdaada ko ismen bhi vishesh shiv baap ko vishesh is baat ki khushi rehti - kitne samay se apne sameep snehi bachchon se alag paramdham mein rehte, chaahe paramdham mein aur aatmaayen rehti bhi hain lekin jo pahli rachna ki aatmaayen hain, jo baap samaan banne vaali seva ke saathi aatmaayen hain, woh kitne samay ke baad avatrit hone se phir se aakar milti hain! kitne samay ki bichhudi hui shreshtha aatmaayen phir se aakar milti hain! agar koi ati snehi bichhuda hua mil jaae to khushi mein vishesh khushi hogi na। avatran divas arthaat apni aadi rachna se phir se milna। aap sochenge - humein baap mila aur baap kehte hain - humein bachche mile! to baap ko apne aadi rachna par naaz hai। aap sab aadi rachna ho na, kshatriy to nahin ho na? sabhi sooryavanshi aadi rachna hain। brahman so devta bante hain na। to brahman aatmaayen aadi rachna hain। anaadi rachna to sab hain, saare vishwa ki aatmaayen rachna hain। lekin aap anaadi aur aadi rachna ho। to double nasha hai na।

aaj ke din baapdaada vishesh ek slogan de rahe hain। aaj ke din ko utsav ka din kaha jaata hai। shivraatri va shivjayanti utsav manaate hain। utsav ke din ka yahi slogan yaad rakhna ki brahman jeevan ki har ghadi utsav ki ghadi hai। brahman jeevan arthaat sada utsav manaana, sada utsaah mein rehna aur sada har karma mein aatma ko utsaah dilaana। to utsav manaana hai, utsaah mein rehna hai aur utsaah dilaana hai। jahaan utsaah hota hai, vahaan kabhi bhi, kisi bhi prakaar ka vighna utsaah vaali aatma ko utsaah se hata nahin sakta। jaise alpakaal ke utsaah mein sab baaten bhool jaati hain na। koi utsav manaate ho to us samay ke liye khushi ke sivaae aur kuchh yaad nahin rehta। to brahman jeevan ke liye har ghadi utsav hai arthaat har ghadi utsaah mein hain। to aur koi baaten aayengi kya? koi bhi had ke utsav mein jaayenge to vahaan kya hota hai? naachna, gaana, khel dekhna aur khaana - yahi hota hai na। to brahman jeevan ke utsav mein saara din kya karte ho? seva bhi karte ho to khel samajh karte ho na ya bojh lagta hai? aajkal ki duniya mein koi bhi agyaani aatmaayen thoda bhi dimaag ka kaam karengi to kahengi - bahut thak gae hain, dimaag ke oopar kaam ka bahut bojh hai! aur aap seva karke aate ho to kya kehte ho - seva ka meva kha ke aaye hain kyonki jitni bade te badi seva ke nimitta bante ho, utna hi seva ka pratyakshaphal bahut badhiya aur bada milta hai। to pratyakshaphal khaane se aur hi shakti aa jaati hai na। khushi ki shakti badh jaati hai, isliye chaahe kitna bhi shareer ka sakhta kaarya ho va plan banaane ka dimaag ka kaarya ho lekin aapko thakaavat nahin hogi। raat hai va din hai - yeh pata nahin padta hai na। agar ghadi aapke paas nahin hoti to maaloom padta kya ki kitna baj gaya? lekin utsav mana rahe ho, isliye seva utsaah dilaati hai aur utsaah anubhav karaati hai।

brahman jeevan mein ek to hai seva, doosra kya hota hai? maaya aati hai। maaya ka sunkar hansate ho kyonki samajhte ho ki maaya ko hamaare se jyaada pyaar hai! aapka pyaar nahin hai, unka pyaar hai। utsav mein khel bhi dekha jaata hai। aajkal sabko jyaada khel kaun-sa pasanda aata hai? Mickey-mouse ka khel bahut karte hain। advertise bhi Mickey-mouse ke khel mein dikhaate hain। chaahe match pasanda karte, chaahe Mickey-mouse ka khel pasanda karte ho। to yahaan bhi maaya aati hai to match karo, nishaana lagaao। khel mein kya karte ho? gend aata hai aur aap phir doosri taraph phenkate ho aur catch kar lete ho to vijayi ban jaate ho। aise hi maaya ke yeh gend hain - kabhi ‘kaam' ke roop mein aate, kabhi ‘krodh' ke roop mein। yeh catch karo ki yeh maaya ka khel hai। agar maaya ke khel ko khel samajh karo to utsaah badhega aur agar maaya ki koi bhi paristhiti ko dushman samajh dekhte ho to ghabra jaate ho। Mickey-mouse khel mein kabhi bandar aa jaata, kabhi billi, kabhi kutta, kabhi chooha aa jaata lekin aap ghabraate ho kya? maja aata hai na dekhne mein। to yeh bhi utsav ke roop mein maaya ke bhinna-bhinna paristhitiyon ka khel dekho। khel dekhne mein koi ghabra jaae to kya kahenge? khel dekhte-dekhte bhi koi soch le ki gend mere paas hi aa raha hai, mere ko hi na lag jaae to khel dekh sakega? to khushi aur maje se khel dekho, maaya se ghabraao nahin। ek manoranjan samjho। chaahe sher ke roop mein aa jaae - ghabraao nahin। yahi smriti rakho ki brahman jeevan ki har ghadi utsav hai, utsaah hai। usi ke beech ye khel bhi dekh rahe hain, khushi mein naach bhi rahe hain aur baap ke brahman parivaar ki visheshtaaon ke, gunon ke geet bhi ga rahe hain aur brahmaabhojan bhi maje se kha rahe hain।

aap jaisa shuddh bhojan, yaad ka bhojan vishwa mein kisko bhi praapta nahin hai! is bhojan ko hi kaha jaata hai - duhkh bhanjan bhojan। yaad ka bhojan sab duhkh door kar deta hai kyonki shuddh anna se man aur tan donon shuddh ho jaata hai। agar dhan bhi ashuddha aata hai to ashuddha dhan khushi ko gaayab kar deta hai, chinta ko laata hai। jitna ashuddha dhan aata, maana dhan aayega ek laakh lekin chinta aayegi padamguna aur chinta ko sadaiv chita kaha jaata hai। to chita par baithne vaale ko kabhi khushi kaise hogi! aur shuddh anna man ko shuddh bana deta hai isliye dhan bhi shuddh ho jaata hai। yaad ke anna ka mahatva hai, isliye brahma bhojan ki mahima hai। agar yaad mein nahin banaate aur khaate to yeh anna sthiti ko oopar neeche kar sakta hai। yaad mein banaaya hua aur yaad mein sveekaar karne vaala anna davaai ka bhi kaam karta aur duva ka bhi kaam karta। yaad ka anna kabhi nuksaan nahin kar sakta, isliye har ghadi utsav manaao। maaya kis bhi roop mein aaye। achha! moh ke roop mein aati hai to samjho bandar ka khel dikhaane ke liye aai hai। khel ko saakshi hokar dekho, svayan maaya ke chakra mein na aa jaao। chakra mein aate ho to ghabraate ho। aajkal chhote-chhote bachchon ko aise manoranjan ke khel karaate hain, ooncha bhi chadhaayenge, neeche bhi laayenge। to yeh manoranjan hai, khel hai। koi bhi roop mein aaye, yeh Mickey mouse ka khel dekho। jo aata hai woh jaata bhi hai। maaya kisi bhi roop mein aati hai to abhi-abhi aai, abhi-abhi gai। aap maaya ke saath shreshtha sthiti se chale na jaao, maaya ko aane do। aap uske saath kyon jaate ho? khel mein hota hi aise hai - kuchh aayega, kuchh jaayega, kuchh badlega। agar scene badli na ho to khel achha hi nahin lagega। maaya bhi kisi bhi roop se aae, jo bhi scene aati hai woh badalni zaroor hai। to scene badalti rahe lekin aapki shreshtha sthiti nahin badle। koi bhi khel mein koi part bajaata hai to aap bhi uske saath aise hi bhaagne va daudne lag jaayenge kya? dekhne vaale to sirf dekhte rahenge na। to maaya neeche giraane ke liye aaye ya koi bhi swaroop mein aaye lekin aap uska khel dekho। kaise neeche giraane ke liye aai, uske roop ko catch karo aur khel samajh us drishya ko saakshi ho karke dekho। aage ke liye aur sva ki sthiti ko majboot banaane ki shiksha le aage badho।

to shivraatri ka utsav arthaat utsaah dilaane vaala utsav sirf aaj ka din nahin hai lekin sada hi aapke liye utsav hai aur utsaah saath hai। is slogan ko sada yaad rakhna aur anubhav karte rehna। uski vidhi sirf do shabdon ki hai। sada saakshi ho karke dekhna aur baap ke saathi ban karke rehna। baap ke saathi sada rahenge to jahaan baap hai to saakshi hokar dekhne se sahaj hi maayaajeet ban anek janmon ke liye jagatjeet ban jaayenge। to samjha, kya karna hai? svayan baap har bachche ko saath dene ke liye golden offer kar rahe hain isliye sada saath raho। vaise double foreigners akele rahne mein pasand karte hain। woh saath iseelie nahin rehte ki kahaan bandhan mein na bandh jaaen, svatantra rahen। lekin is saath mein saath rehte bhi svatantra hain, bandhan nahin anubhav hoga। achha!

to aaj ka din double utsav ka hai। vaise jeevan bhi utsav hai aur yaadgaar-utsav bhi hai। baapdaada sabhi videsh ke bachchon ko sada yaad karte bhi hain aur aaj bhi vishesh din ki yaad de rahe hain kyonki jo bhi jahaan se aaye honge to sabhi ke yaad-patra laaye honge। card, patra, toliyaan laai। to jin bachchon ne dil ke utsaah ka yaadapyaar va kisi bhi roop se apni yaad-nishaani bheji hai, un sab bachchon ko baapdaada bhi vishesh yaad ka return padamguna de rahe hain aur baapdaada dekh rahe hain ki har ek bachche ke andar seva ka aur sada maayaajeet banne ka umang-utsaah bahut achha hai। har ek bachcha apni shakti se bhi jyaada seva mein aage badh raha hai aur badhta hi rahega। baaki jo sachchi dil se dil ka samaachaar baap ke aage rakhte hain, to sachchi dil par baap sada raazi hai isliye dil ke samaachaar mein jo bhi koi chhoti-chhoti baaten aati bhi hain to woh baap ki vishesh yaad ke vardaan se samaapta ho hi jaayengi। baap ka raazi hona arthaat sahaj baap ki madad se maayaajeet banna isliye jo baap ko de diya, chaahe samaachaar ke roop mein, patra ke roop mein, roohrihaan ke roop mein, jab baap ke aage rakh liya, de diya to jo cheez kisko di jaati hai woh apni nahin rehti, woh doosre ki ho jaati hai। agar kamjori ka sankalp bhi baap ke aage rakh diya to woh kamjori aapki nahin rahi। aapne de di, usse mukta ho gaye isliye, yahi yaad rakhna ki mainne baap ke aage rakh li arthaat de di। baaki videsh mein umang-utsaah ki lahar achhi chal rahi hai। baapdaada bachchon ko nirvighna banne ke umang aur seva mein baap ko pratyaksha karne ke umang ko dekh harshit hote hain। achha!

sada anaadi aur aadi rachna ke roohaani nashe mein rahne vaale, sada har ghadi utsav samaan manaane vaale, sada yaad aur seva ke utsaah mein rahne vaale, sada maaya ki har paristhiti ko khel samajh saakshi ho dekhne vaale, sada baap ke saath har kadam mein saathi ban chalne vaale, aise sarvashreshtha brahman aatmaon ko alaukik janma ki mubaarak ke saath-saath yaadapyaar aur namaste। sabhi ati snehi, diltakhtansheen bachchon ko paavan shivjayanti ki padmaguna yaadapyaar aur mubaarak।

vardaan:- kisi ki kami, kamjori ko na dekh apne gun va shaktiyon ka sahayog dene vaale master daata bhav

master daata woh hai jo sada isi roohaani bhaavna mein rehte ki sarva roohen hamaare samaan varse ke adhikaari ban jaayen। kisi ki bhi kami kamjori ko na dekh, ve apne dhaaran kiye hue gunon ka, shaktiyon ka sahayog dete hain। yeh aisa hai hi - is bhaavna ke bajaae main isko bhi baap samaan banaaoon, yeh shubh bhaavna ho। saath-saath yahi shreshtha kaamna ho ki yeh sarva aatmaayen kangaal, duhkhi, ashaanta se sada shant, sukh-roop maala-maal ban jaaen - tab kahenge master daata।

slogan:- mansa-vaacha-karmana seva karne vaale hi nirantar sevaadhaari hain, unke har shvaans mein seva samaai hui hai।

soochna:- aaj maas ka teesra ravivaar antarraashtreey yog divas hai, baba ke sabhi bachche saayan 6.30 se 7.30 baje tak vishesh apne aakaari swaroop mein sthit ho, baapdaada ke saath oonchi light ki pahaadi par khade ho poore vishwa ko pavitrata ki kirnen dekar prakriti sahit sarva aatmaon ko satopradhaan banaane ki seva karen।