Daily Murli for Sunday 5 September 2021

05-09-21 praatahmurli om shanti ''avyakt-baapdaada'' revise 15-03-88 madhuban

nai duniya ki tasveer ka aadhaar vartamaan shreshtha brahman jeevan

aaj vishwa rachta, vishwa ki shreshtha takdeer banaane vaale baapdaada apne shreshtha takdeer ki tasveer - swaroop bachchon ko dekh rahe hain। aap sabhi brahman aatmaayen vishwa ki shreshtha takdeer ki tasveer ho। brahman jeevan ki tasveer se bhavishya ki shreshtha takdeer spashta dikhaai deti hai। brahman jeevan ka har shreshtha karma bhavishya shreshtha phal ka anubhav karaata hai। brahman jeevan ka shreshtha sankalp bhavishya ka shreshtha sanskaar spashta karta hai। to vartamaan brahman jeevan tasveer hai - bhavishya takdeervaan sansaar ki। baap-daada aise bhavishya ke tasveer bachchon ko dekh harshit hote hain। tasveer bhi aap ho, bhavishya ki takdeer ke aadhaarmoorta bhi aap ho। aap shreshtha bante, tab hi duniya bhi shreshtha banti hai। aapki udti kala ki sthiti to vishwa ki bhi udti kala hai। aap brahman aatmaayen samay prati samay jaisi stage se paas karte to vishwa ki stages bhi parivartan hoti rehti hain। aapki satopradhaan sthiti hai to vishwa bhi satopradhaan hai, golden aged hai। aap badalte to duniya bhi badal jaati hai। itne aadhaarmoorta ho!

vartamaan samay baap ke saath kitna shreshtha part baja rahe ho! saare kalpa ke andar sabse bade te bada vishesh part is samay baja rahe ho! baap ke saath-saath sahayogi ban vishwa ki har aatma ki anek janmon ki aashaayen poorn kar rahe ho। baap dvaara har aatma ko mukti va jeevanmukti ka adhikaar praapta karaane ke nimitta bane hue ho। sarva ki ichchhaaon ko poorn karne vaale baap samaan ‘kaamdhenu' ho, kaamnaayen poorn karne vaale ho। aise har aatma ko ichchha maatram avidya ki sthiti ka anubhav karaate ho jo aadhaakalpa anek janma, na bhakti vaali aatmaon ko, na jeevanmukta avastha vaali aatmaon ko koi bhi ichchha rehti hai। ek janma ki ichchhaayen poorn karaane vaale nahin lekin anek janmon ke liye ichchha maatram avidya ki anubhooti karaane vaale ho। jaise baap ke sarva bhandaare, sarva khajaane sada bharpoor hain, apraapti ka naam nishaan nahin hai; aise baap samaan sada aur sarva khajaanon se bharpoor ho।

brahman aatma arthaat praaptisvaroop aatma, sampanna aatma। jaise baap sada light-house, might house hai; aise brahman aatmaayen bhi baap samaan ho, light-house ho isliye har aatma ko apni manzil par pahunchaane ke nimitta ho। jaise baap har sankalp, har bol, har karma se har samay daata hai, vardaata hai, aise aap brahman aatmaayen bhi daata ho, master vardaata ho। aise brahman jeevan ki tasveer ho? koi bhi tasveer banaate ho to usmein sabhi visheshtaayen dikhaate ho na। aise vartamaan samay ki brahman jeevan ke tasveer ki visheshtaayen apne mein bhar li hain? bade te bade chitrakaar aap ho jo apna chitra bhi bana rahe ho। aapke chitra bante hi vishwa ka chitra banta ja raha hai। aise anubhav karte ho na।

kai poochhte hain na ki nai duniya mein kya hoga? to nai duniya ki tasveer hi aap ho। aapki jeevan se bhavishya spashta hota hai। is samay bhi apni tasveer mein dekho ki sada aisi tasveer bani hai jo koi bhi dekhe to sada ke liye prasannachitta ho jaae। koi bhi jara bhi ashaanti ki lahar vaala ho to aapki tasveer dekh ashaanti ko hi bhool jaae, shanti ki lahron mein lahraane lage। apraapti swaroop, prapti ki anubhooti svatah hi anubhav kare। bhikhaari bankar aaye, bharpoor bankar jaaye। aapki muskaraati hui moorta dekh man ka va aankhon ka rona bhool jaaen, muskaraana seekh jaaen। aap log bhi baap ko kehte ho na ki muskaraana sikha diya… to aapka kaam hi hai rona chhudaana aur muskaraana sikhaana। to aisi tasveer brahman jeevan hai। sada yeh smriti mein rakho ki ham aise aadhaarmoorta hain, foundation hain। vriksha ke chitra mein dekha - brahman kahaan baithe hain? foundation mein baithe ho na। brahman foundation majboot hai, tab aadhaakalpa achal-adol rehte ho। saadhaaran aatmaayen nahin ho, aadhaarmoorta ho, foundation ho।

is samay ki aapki sampoorn sthiti satayug ki 16 kala sampoorn sthiti ka aadhaar hai। ab ki ek-mat vahaan ke ek raajya ke aadhaarmoorta hai। yahaan ke sarva khajaanon ki sampannata - gyaan, gun, shaktiyaan, sarva khajaane vahaan ki sampannata ka aadhaar hain। yahaan ki deh ke aakarshan se nyaaraapan, vahaan ke tan ki tandaroosti ke praapti ka aadhaar hai। ashareeri-pan ki sthiti nirogi-pan aur lambi aayu ke aadhaar swaroop hai। yahaan ki bephikar, baadshaahpan ki jeevan vahaan ke har ghadi ke man ki mauj ki jeevan isi sthiti ke praapti ka aadhaar banti hai। ek baap doosra na koi - yahaan ki yeh akhanda-atal saadhna vahaan akhanda, atal, akhut, nirvighna saadhnon ki praapti ka aadhaar banti hai। yahaan ka chhota-sa sansaar baapdaada va maat-pita aur behen-bhaai, vahaan ke chhote sansaar ka aadhaar banta hai। yahaan ek maat-pita ke sambandh ke sanskaar vahaan bhi ek hi vishwa ke vishwa-mahaaraajan va vishwa-mahaaraani ko maat-pita ke roop mein anubhav karte hain। yahaan ke sneh-bhare parivaar ka sambandh, vahaan bhi chaahe raaja aur praja bante lekin praja bhi apne ko parivaar samajhti hai, sneh ki sameepta parivaar ki rehti hai। chaahe martabe rehte hain lekin sneh ke martabe hain, sankoch aur bhay ke nahin। to bhavishya ki tasveer aap ho na। yeh sab baaten apni tasveer mein check karo - kahaan tak shreshtha tasveer ban karke taiyaar hui hai ki abhi tak rekhaayen kheench rahe ho? hoshiyaar artist ho na।

baapdaada yahi dekhte rehte hain ki har ek ne kahaan tak tasveer taiyaar ki hai? doosre ko ulhana to de nahin sakte ki isne yeh theek nahin kiya, isliye aise hua। apni tasveer aapehi banaani hai। aur cheejen to sab baapdaada se mil rahi hain, usmein to kami nahin hai na। yahaan bhi khel sikhaate ho na jismen cheezen khareedkar phir banaate ho। banaane vaale ke oopar hota hai, jitna chaahe utna lo। lene vaale sirf le saken। baaki khula baajaar hai, baapdaada yeh hisaab nahin rakhta ki do lena hai ya chaar lena hai। sabse badhiya tasveer banaai hai na। sada apne ko aise samjho ki ham hi bhavishya ke takdeer ki tasveer hain। aise samajhkar har kadam uthaao। snehi hone ke kaaran sahayogi bhi ho aur sahayogi hone ke kaaran baap ka sahayog har aatma ko hai। aise nahin ki kuchh aatmaon ko jyaada sahayog hai aur kinhon ko kam hai, nahin। baap ka sahayog har aatma ke prati ek ke return mein padamguna hai hi। jo bhi sahayogi aatmaayen ho, un sabko baap ka sahayog sada hi praapta hai aur jab tak hai, tab tak hai hi hai। jab baap ka sahayog hai to har kaarya hua hi pada hai। aise anubhav karte bhi ho aur karte chalo। koi mushkil nahin kyonki bhaagyavidhaata dvaara bhaagya ki praapti ka aadhaar hai। jahaan bhaagya hota, vardaan hota vahaan mushkil hota hi nahin।

jiski bahut achhi tasveer hoti hai, to zaroor first number aayega। to sabhi first division mein to aane vaale ho na। number first ek aayega lekin first division to hai na। to kismen aana hai? first division sabke liye hai। kuchh kar lena achha hai। baapdaada to sabko chance de rahe hain - chaahe bhaaratvaasi hon va double videshi hon kyonki abhi result out to hui nahin hai। kabhi achhe-achhe result out ke pahle hi out ho jaate hain, to yeh jagah mil jaayegi na isliye jo bhi lene chaaho, abhi chance hai। phir board laga dete hain na ki abhi jagah nahin hai। yeh seat full ho jaayengi, isliye khoob udo। daudo nahin lekin udo। daudne vaale to neeche rah jaayenge, udne vaale ud jaayenge, udte chalo aur udaate chalo। achha!

chaaron or ke sarva shreshtha takdeer ki shreshtha tasveer swaroop mahaan aatmaon ko, sada svayan ko vishwa ke aadhaarmoorta anubhav karne vaali aatmaon ko, sada apne ko praapti swaroop anubhootiyon dvaara auron ko bhi praapti swaroop anubhav karaane vaali shreshtha aatmaon ko, sada baap ke sneh aur sahayog ke padmaguna adhikaar praapta karne vaali poojya brahman so dev aatmaon ko baapdaada ka yaadapyaar aur namaste।

personal mulaakaat

baap ka haath sada mastak par hai hi - aisa anubhav karte ho? shreshtha mat hi shreshtha haath hai। to jahaan har kadam mein baap ka haath arthaat shreshtha mat hai, vahaan shreshtha mat se shreshtha kaarya svatah hi hota hai। sada haath ki smriti se samartha ban aage badhaate chalo। baap ka haath sada hi aage badhaane ka anubhav sahaj karaata hai isliye is shreshtha bhaagya ko har kaarya mein smriti mein rakh aage badhte raho। sada haath hai, sada jeet hai।

prashn:- sahajyogi sada rahen, uski sahaj vidhi kaun si hai?

uttar:- baap hi sansaar hai - is smriti mein raho to sahajyogi ban jaayenge kyonki saara din sansaar mein hi buddhi jaati hai। jab baap hi sansaar hai to buddhi kahaan jaayegi? sansaar mein hi jaaegi na, jangal mein to nahin jaaegi। to jab baap hi sansaar ho gaya to sahajyogi ban jaayenge। nahin to mehnat karni padegi - yahaan se buddhi hataao, vahaan se judaao। sada baap ke sneh mein samaae raho to woh bhool nahin sakta। achha!

avyakt baapdaada se double videshi bhaai bahinon ki mulaakaat

double videshiyon mein seva ka umang achha hai, isliye vriddhi bhi achhi kar rahe ho। videsh-seva mein 14 varsha mein vriddhi achhi ki hai। laukik aur alaukik - double kaarya karte aage badh rahe hain। double kaarya mein samay bhi lagaate ho aur buddhi ki, shareer ki shakti bhi lagaate ho। yeh bhi buddhi ki kamaal hai। laukik kaarya karte seva mein aage badhna - yeh bhi himmat ka kaam hai। aise himmat vaale bachchon ka baapdaada sada har kaarya mein madadgaar hai। jitna himmat utna padamguna baap madadgaar hai hi। lekin donon part bajaate unnati ko praapta kar rahe ho - yeh dekh baapdaada sada bachchon par harshit hote hain। maaya se to mukta ho na? jab yogayukta hain to svatah hi maaya se mukta hain। yogayukta nahin to maaya se mukta bhi nahin। maaya ko bhi brahman aatmaayen pyaari lagti hain। jo pahalvaan hota hai, unko pahalvaan se hi maja aata hai। maaya bhi shaktishaali hai। aap bhi sarvashaktivaan ho, to maaya ko sarvashaktivaan ke saath khel karna achha lagta hai। ab to jaan gaye ho na maaya ko achhi tarah se ki kabhi-kabhi naye roop se aa jaati hai। knowledgeful ka arth hi hai baap ko bhi jaanna, rachna ko bhi jaanna aur maaya ko bhi jaanna। agar rachayita aur rachna ko jaan liya aur maaya ko nahin jaana to knowledgeful nahin thahre।

kabhi bhi kisi bhi baat mein chaahe tan kamjor bhi ho ya kaarya ka jyaada bojh bhi ho lekin man se kabhi bhi thakna nahin। tan ki thakaavat man ke khushi se samaapta ho jaati hai। lekin man ki thakaavat shareer ki thakaavat ko bhi badha deti hai। man kabhi thakna nahin chaahiye। jab thak jaao to second mein baap ke vatan mein aa jaao। agar man ko thakaane ke aadi honge to brahman jeevan ke umang-utsaah ka jo anubhav hona chaahiye, woh nahin hoga। chal to rahe hain lekin chalaane vaala chala raha hai - aise anubhav nahin hoga। mehnat se chal rahe hain to jab mehnat anubhav hogi to thakaavat bhi hogi। isliye hamesha samjho - ‘karaavanhaar kara raha hai, chalaane vaala chala raha hai।

samay, shakti - donon ke pramaan seva karte chalo। seva kabhi rah nahin sakti, aaj nahin to kal honi hi hai। agar sachche dil se, dil ke sneh se jitni seva kar sakte ho utni karte ho to baapdaada kabhi ulhana nahin denge ki itna kaam kiya, itna nahin kiya। shaabaas milegi। samay pramaan, shakti pramaan sachchi dil se seva karte ho to sachche dil par saaheb raaji hain। jo aapka kaarya rah bhi jaayega to baap kahaan na kahaan se poora karaayega। jo seva jis samay mein honi hai woh hokar hi rahegi, rah nahin sakti। kisi na kisi aatma ko touch kar baapdaada apne bachchon ke sahayogi banaayenge। yogi bachchon ko sab prakaar ka sahayog samay par milta hi hai। lekin kisko milega? sachche dil vaale sachche sevaadhaari ko। to sabhi sachche sevaadhaari bachche ho? saaheb raazi hai hamaare oopar - aisa anubhav karte ho na। achha!

vardaan:- ek baap ke lav mein lavleen rah sada chadhti kala ka anubhav karne vaale saphaltaamoorta bhav

seva mein va svayan ki chadhti kala mein saphalta ka mukhya aadhaar hai - ek baap se atoot pyaar। baap ke sivaae aur kuchh dikhaai na de। sankalp mein bhi baba, bol mein bhi baba, karma mein bhi baap ka saath। aisi lavleen aatma ek shabd bhi bolti hai to uske sneh ke bol doosri aatma ko bhi sneh mein baandh dete hain। aisi lavleen aatma ka ek baba shabd hi jaadu ka kaam karta hai। woh roohaani jaadoogar ban jaati hai।

slogan:- yogi tu aatma woh hai jo antarmukhi ban light might roop mein sthit rehta hai।