Daily Murli for Monday 22 November 2021

22-11-2021 praatahmurli om shanti "baapdaada"' madhuban

“meethe bachche - abhi tum sangamayug par ho, tumhein is puraani kaliyugi duniya ka koi bhi khyaal nahin aana chaahiye।''

prashn:- baap ne bachchon ko shreshtha karma karne ki va karmo ko sudhaarne ki vidhi kya bataai hai?

uttar:- apne karmo ko sudhaarne ke liye sachche baap se sada sachche raho, yadi kabhi bhool se bhi koi ulta karma ho jaae to use baba ko phauran likh do। sachchaai se baba ko sunaayenge to uska asar kam ho jaayega। nahin to vriddhi hoti rahegi। baba ke paas samaachaar aayega to baba use sudhaarne ki shreemat denge।

om shanti। shivbaaba brahma dvaara bachchon se poochh rahe hain ki bachche tum yahaan savere se baithe kya kar rahe ho? tum student to ho hi। to zaroor yahaan baithe yeh khyaal karte honge ki hamko shivbaaba padhaane aaye hain। is padhaai se ham sooryavanshi banenge kyonki tum raajayog seekh rahe ho। vishnupuri ka maalik banne ke liye, is khyaal mein baithe ho ya kisko jimmevaari, baal-bachche, dhandha-dhori aadi yaad aata hai? buddhi mein yeh rehna chaahiye ki yeh hai geeta paathshaala, hamko bhagwan padhaate hain aur ham lakshmi-naaraayan athva unke kutumba ke bhaati banenge। yeh hai raajayog। bachchon ki buddhi mein rehna chaahiye ki ham baba se direct sunkar sooryavanshi gharaane ke bhaati banenge। lakshmi-naaraayan ka chitra saamne khada hai, hamaara raajya hoga। duniya mein logon ko maaloom nahin hai ki svarga kisko kaha jaata hai। tum bachche kehte ho ki ham abhi baba se svaraajya vidya, svarga ki seekh rahe hain। ham hi svarga ke maalik banne vaale hain। yeh andar mein sumiran karna hai। jaise school mein student ki buddhi mein rehta hai ki ham barrister-engineer aadi banne ke liye padh rahe hain। tumko itna bhi yaad rehta hai va bhool jaate ho? tum oonch te oonch bhagwan ke student ho। tumko oonch te oonch devta banaane ke liye baap padha rahe hain, tum unke bachche ho। aatmaayen is shareer dvaara apne bhavishya martabe ko yaad kar rahi hain ya shareer ke sambandhi, jismaani milkiyat, dhandha-dhori yaad karti hain? yahaan jab aate ho to yeh samajhna chaahiye ki hamko behad ka baap padhaane aata hai - behad ka maalik banaane। phir raaja-raani bano ya praja! maalik to bante hain na। nai duniya mein hai hi sooryavanshi gharaana। yeh to samajhte ho na ki ham apni raajaai karenge।

baba jaante hain ki bachchon ko baahar rehte, gharbaar, kheti-baadi mein rehte itni baba ki yaad nahin rah sakti। to yahaan jab aate ho to sab khyaalaat chhodkar aao। tum abhi us kaliyugi duniya mein ho hi nahin, ab tum sangam par ho। kaliyug ko chhod diya hai, baahar mein kaliyug hai। madhuban jo khaas hai, yeh hai sangam isliye madhuban ka gaayan hai। yahaan is murli ka hi simran karna hai। jo sunte ho woh repeat karo aur vichaar saagar manthan karo। jitna samay mile chitron ke aage aakar baith jaao। inhon ko dekhte aur padhte raho। braahmaniyaan jo le aati hain un par bahut jimmevaari hai। bahut ona rakhna chaahiye। jaise teachers ko ona rehta hai - hamaare school se agar kam paas honge to ijjat jaayegi। jab school se bahut paas hote hain to woh teacher achha maana jaata hai। braahmaniyon ko student par dhyaan dena chaahiye। yahaan tum jaise sangam par aaye ho, jahaan direct baba sunaate hain। yahaan ka prabhaav bahut achha hai। agar yahaan gharghaat, dhandha yaad pada to baba samjhenge yeh saadhaaran praja banega। aaye the raaja banne ke liye parantu… nahin to bachchon ko andar mein bahut khushi honi chaahiye। chitra bhi tumko bahut madad karte hain। log ashta dev-taaon ke aur gurooon ke chitra ghar mein rakhte hain, yaad ke liye। parantu unhon ko yaad karne se milta kuchh bhi nahin। bhakti maarga mein jo kuchh karte, neeche hi utarte aaye ho। tum bachchon ko oonch jaane ka purushaartha karna hai। ghar mein shiv-baba ka chitra rakh do to ghadi-ghadi yaad aayegi। pahle tum hanoomaan ko, krishna ko, raam ko yaad karte the। ab shivbaaba sammukh kehte hain ki mujhe yaad karo। trimoorti ka chitra bada achha hai, yeh chitra sadaiv pocket mein rakh do। ghadi-ghadi dekhte raho to yaad rahegi। baba bhagat tha to lakshmi-naaraayan ka photo pocket mein rakhta tha। gaddi ke neeche saath-saath rakhta tha, unse mila kuchh nahin। ab baba se bahut praapti ho rahi hai, unko hi yaad karna hai, ismen maaya saamna karti hai। gyaan to bhal bahut sunte sunaate hain, ismen teekhe jaate hain, aise nahin kehte ki 84 ka chakra bhool jaata hai। aise bhi nahin yahaan rahne vaale jaasti yaad karte hain। nahin, yahaan rehte bhi kai hain jo dhoolchhaani ko yaad karte rehte hain। jis baap se ham gore banne aaye hain unko jaante hi nahin। maaya ka parchhaaya bahut pad jaata hai। mool baat hai yaad ki। baba jaante hain bahut achhe-achhe bachche bhi yaad mein nahin rehte hain। yog mein rahne se hi deh-abhimaan kam hoga, bahut meethe rahenge। deh-abhimaan hone se meethe nahin bante, bigadte rehte hain। baba sabke liye nahin kehte। koi sapoot bhi hain, sapoot unko samjha jaata hai jo yog mein rehte hain। unse koi bhi ulti-sulti baat nahin hogi। mitra sambandhi aadi sabko bhool jaayenge। ham nange (ashareeri) aaye the, ab ashareeri ban ghar jaana hai। abhi tum bachchon ko gyaan ka teesra netra mila hai jisse tum apne ghar ko jaante ho, raajdhaani ko bhi jaante ho। yeh bhi tum bachche jaante ho shivbaaba koi kaala ling nahin hai। jaise woh dikhaate hain, woh to bindi misal hai। yeh bhi ham jaante hain। abhi ham ghar jaayenge, vahaan ham ashareeri rehte hain। ab hamko ashareeri banna hai। apne ko aatma samajh patit-paavan baap ko yaad karna hai। yeh to samjhaaya jaata hai aatma avinaashi hai। usmein 84 janmon ka part noondha hua hai, uska ant hota nahin। thoda samay muktidhaam mein jaakar phir part mein aana hai। tum all-round part bajaate ho, yeh sadaiv yaad rehna chaahiye। abhi hamko ghar jaana hai। baba ko yaad karne se ham tamopradhaan se satopradhaan ban jaayenge। yahaan dhandha-dhori ko yaad nahin karna hai। yahaan tum poore sagammayug par ho। abhi tum boat mein baithe ho। koi beech mein utar jaate hain phir phans marte hain। is par bhi shaastron mein ek kahaani hai। ab tum jaante ho us paar ja rahe hain, khivaiya shiv-baba hai। krishna ko khivaiya va baagvaan nahin kahenge। shiv bhagvaanuvaach hai। patit-paavan shivbaaba hai। krishna ki taraph buddhi ja na sake। manushyon ki buddhi to bhatakti rehti hai, baba aakar bhatakne se chhudaate hain। sirf kehte hain apne ko aatma samajh baba ko yaad karo tab hi tum svarga ke maalik banenge। yeh baaten bhoolni nahin chaahiye। yahaan se tum bahut refresh hokar jaate ho। anubhav bhi sunaate ho, baba, ham phir vaise ke vaise ho jaate hain। mitra sambandhi aadi ka munh dekhte hain, lubhaaymaan ho jaate hain। tum bachche aashik ho, kaam kaaj karte maashook ko yaad karo tab oonch pad paayenge। agar abhi purushaartha nahin karenge to single taaj bhi nahin milega। yahaan bachche jab aate hain to time vesta nahin karna chaahiye। aur to kuchh yahaan hai nahin। sirf delvaada mandir tumhaara yaadgaar hai, woh tum dekh sakte ho। oopar mein baikuntha khada hai। jhaad bhi tumhaara clear hai। neeche raajayog mein baithe ho, oopar raajaai khadi hai। hoobhu jaise dilvaala mandir bana hua hai। tum jaante ho shivbaaba hamko phir se gyaan dekar svarga ka maalik bana rahe hain। is kaliyug ka vinaash hona hai। yeh aadi dev, aadi naath kaun hain। tum sabke occupation ko jaante ho na। is samay ki charcha phir bhakti maarga mein chalti hai। tyohaar, vrat sab is samay ke hain। sachcha vrat hai manmanaabhav। baaki nirjal rakhna, khaana nahin khaana, yeh koi vrat nahin hai। duniya mein is samay maaya ka pomp bahut hai। pahle yeh bijli, gas aadi nahin thi phir nikli hai। 100 varsha hue hain, ismen manushya phans mare hain। kehte hain hamaare liye svarga yahaan hi hai। maaya ka itna jor hai jo baap ko bilkul hi yaad nahin karte hain, kehte hain tum chalkar dekho - ham kaise svarga mein baithe hain। ab svarga ke aage to yeh kuchh bhi nahin hai। kahaan svarga, kahaan narka। svarga ki ek bhi cheez yahaan ho nahin sakti। vahaan har cheez satopradhaan hogi। gaayen bhi first class hongi। tum bhi first class bante ho to tumhaara furniture, khaan-paan aadi sab first class hota hai। sookshm vatan mein phal aadi dekhkar aate ho na। naam hi rakhte hain shoobeeras। duniya vaalon ko yeh bhi maaloom nahin ki svarga hai kahaan? vahaan sab kuchh satopradhaan hota hai। yeh mitti aadi vahaan nahin padti। duhkh ki koi baat hi nahin hai। parantu bachchon ko yeh nasha ajun chadhta nahin hai ki baba hamko svarga ka maalik banaane ke liye yeh padhaai padha rahe hain। chitra kitne clear hain। chitra banne mein samay to lagta hai। baba sab kuchh service arth banvaate hi rehte hain। parantu koi to apne dhandhe-dhori mein itna phase hue hain jo baba ko yaad bhi nahin karte hain। pradarshani ke chitron ki magazine bhi hai, woh bhi padhni chaahiye। geeta ke jo niymi hote hain, woh kahaan bhi jaayenge to geeta zaroor padhenge। ab tumko sachchi geeta chitron sahit mili hai। ab achhi tarah mehnat karni chaahiye। nahin to oonch pad pa nahin sakenge। phir haay-haay karni padegi, jab saakshaatkaar hoga। imtahaan poora hua phir doosre class mein nambarvaar baith jaate hain। yahaan bhi jab saakshaatkaar ho jaayega to nambarvaar rudra maala phir vijay maala mein jaayenge। school mein koi bachche naapaas hote hain to kitne duhkhi ho jaate hain। tumhaari hai kalpa kalpaantar ki baazi।

kai bachche poori magazine padhte nahin hain। bachchon ko magazine padhkar service karni chaahiye। likhte hain baba phalaani ko badli kar do। achhi braahmani bhej do। koi-koi braahmani ke saath itna pyaar ho jaata hai, braahmani badli hone se gir padte hain। centre par aana hi chhod dete hain। koi ulta kaam ho jaae to sachchaai se phauran baba ko likhna chaahiye to paap ka asar kam ho jaayega। nahin to vriddhi hoti jaayegi। baba sudhaarne ke liye kehte hain parantu koi ko sudharna nahin hai to paap karma karna chhodte hi nahin hain। takdeer mein nahin hai to baba ko sachcha samaachaar nahin dete hain। baba ke paas report aane se sudhaarne ki koshish karenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ashareeri banne ka poora-poora abhyaas karna hai। koi bhi ulti-sulti baat nahin karni hai। bahut meetha banna hai। kisi baat mein bhi bigadna nahin hai।

2) murli ka simran karna hai। jo sunte ho us par vichaar saagar manthan karna hai। manmanaabhav ka vrat rakhna hai।

vardaan:- sada pharmaan ke tilak ko dhaaran kar first prize lene vaale pharmaanvardaar bhav

jin bachchon ke mastak par pharmaanbardaari ki smriti ka tilak laga hua hai, ek sankalp bhi pharmaan ke bina nahin karte unhein first prize praapta hoti hai। jaise seeta ko lakeer ke andar baithne ka pharmaan tha, aise har kadam uthaate hue, har sankalp karte hue baap ke pharmaan ki lakeer ke andar raho to sada safe rahenge। koi bhi prakaar ke raavan ke sanskaar vaar nahin karenge aur samay bhi vyartha nahin jaayega।

slogan:- kisi se bhi lagaav hai to woh lagaav purooshaartha mein albela avashya banaayega।