Daily Murli for Friday 3 December 2021

03-12-2021 praatahmurli om shanti "baapdaada"' madhuban

“meethe bachche - savere-savere uthkar shivbaaba se good morning zaroor karo, uthte hi shivbaaba ki yaad aaye, kisi dehdhaari ki nahin''

prashn:- kaun sa contract (theka) ek baap ke sivaae doosra koi nahin utha sakta hai?

uttar:- paavan duniya banaane ka contract ek baap ka hai। yeh contract doosra koi utha nahin sakta। sannyaasi paavan bankar is duniya ko thamaate avashya hain lekin woh paavan duniya banaane ka contract nahin uthaate। baap bachchon ko paavan banne ki yukti bataate hain। bachche dhandhaadhori karte ek baap ko yaad karo। ek baap se buddhiyog lagaao।

geet:- yeh kaun aaj aaya savere-savere…

om shanti। roohaani bachchon prati baap baith samjhaate hain। agar shiv bhagvaanuvaach kahen to bhi shiv naam ke manushya bahut hain isliye yeh kehna pade ki roohaani baap roohaani bachchon prati pahle-pahle yaad-pyaar de rahe hain। praatah ko pahle-pahle good morning kiya jaata hai। tumne bhi good morning suna। savere-savere kaun aakar good morning karte hain। baap aate hi hain savere। yeh hai behad ka savera aur raat, jisko koi manushya maatra nahin jaante। bachchon mein bhi nambarvaar purushaartha anusaar jaante hain। bhal bachche bane hain parantu savere uthkarke baap ko yaad nahin karte। savere uthkarke pahle-pahle shivbaaba se good morning karen arthaat yaad karen to bahut khushi bhi rahe, parantu bahut bachche hain jo savere uthkar baba ko bilkul yaad nahin karte। bhakti maarga mein bhi manushya savere uthkar bhakti karte, pooja karte, maala pherte, mantra japte। woh saakaar ki bhakti karte hain। moorti saamne aa jaati hai। shiv ka jo pujaari hoga unko bhi jo bada shivling banaate hain woh moorti yaad aa jaayegi। woh hai wrong। ab to tum bachchon ko apne ko aatma nishchay karna hai aur savere uthkar baba se baaten karni hain। baba good-morning, parantu baba jaante hain - yeh tev (aadat) kisko bhi nahin padi hui hai। baap kehte hain - bachche tumhaare sir par aadhaakalpa ka bojha hai, woh utarta hi nahin hai kyonki yaad nahin karte। koi-koi ke to aur hi paap badhte jaate hain। jaise chooha phoonk deta aur kaatta bhi hai। maaya bhi choohe misal kaatti rehti hai। sir ke baal kaat deti hai, pata bhi nahin padta। bhal koi apne ko gyaani samajhte hain parantu baba achhi reeti jaante hain ki yaad mein bilkul kachche hain। apni dil se poochhna hai ki ham savere uthkar baap ko yaad karte hain। behad ka baap tumko behad ke savere mein aakar mila hai। sannyaasi bhi uthkar brahm ko yaad karenge। manushya uthte hi mitra-sambandhi, doston aadi ko yaad karenge। koi bhagat hoga to apne devtaaon ko yaad karenge। paap aatmaayen, paap aatmaon se good morning karengi athva yaad karengi। yaad karna hota hai savere। bhakti bhi savere mein karte hain, parantu bhagwan ki bhakti koi bhi karte nahin kyonki bhagwan ko jaante hi nahin। bhal kehte hain ki bhakti ka phal dene vaala bhagwan hai। O god father bhi kehte hain। yeh aatma kehti hai parantu paramatma ko koi bhi yathaartha nahin jaante। jab bhagwan khud aakar apna parichay de tab yeh jaan saken। nahin to sab neti-neti kehte hain arthaat ham nahin jaante। to paramatma is samay hi aakar batlaate hain - main kaun hoon? parantu bachchon mein bhi bahut hain, bade-bade mahaarthi centre sambhaalne vaale baap ko poora nahin jaante। us lav se baap ko yaad nahin karte। savere uthkarke pyaar se good morning karna, gyaan ke chintan mein rehna, yeh bhi nahin karte। yaad karen to khushi ka paara chadhe, parantu maaya chadhne nahin deti। agar baap se kahaan beadbi ki to maaya ekdam buddhiyog tod daalti hai। phir vaahyaat, phaaltu baaton mein buddhi lagi rehti hai। svarga ka maalik banna koi maasi ka ghar thode hi hai। praja banna to sahaj hai। tum aage chalkar dekhenge - 30-40 varsha vaale bhi toot padenge। maaya ekdam uda degi। raajaai pad pa nahin sakenge। pahle se hi mar jaayenge to phir raajaai kahaan se milegi। yeh raaz baba kholte nahin hain। maaya bhi dekhti hai main aadhaakalpa raajya karne vaali, yeh mere oopar jeet paate hain। phir shivbaaba ko ekdam bhool jaate hain। kahaan-kahaan inke (brahma baba ke) bhi naam-roop mein phans padte hain। shivbaaba ko yaad nahin karte। jinmen krodh, lobh, moh ka bhoot hoga woh kya baba ko yaad karenge। naam-roop mein itna phansate hain baat mat poochho। deh-abhimaan mein latak padte hain। shivbaaba kehte hain ghar grihastha mein rahkar maashook ko yaad karte raho, tab karmaateet avastha bane। mool baat hai yaad ki, isi mein mehnat hai। yaad bigar satopradhaan ban nahin sakte, na oonch pad pa sakenge। buddhiyog aur taraph bhatakta rahega। koi bachche to bahut dil va jaan, sik va prem se baap ko yaad karte hain। baba se good morning karke kehna chaahiye baba ham aapki yaad mein rehte hain kyonki sir par paapon ka bojha bahut hai। agar baba ki yaad mein nahin rahenge to paapon ka bojha kaise utrega। aadhaakalpa deh-abhimaan raha hai to jaata nahin। devtaayen vahaan aatmaabhimaani rehte hain। bhal paramatma ko nahin jaante। yeh to samajhte hain ham aatma ek shareer chhod doosra lete hain। rachayita ko agar jaanen to rachna, baap ki jaaydaad ko bhi jaanen। vahaan yeh knowledge rehti nahin। baap kehte hain yeh knowledge main tumko deta hoon। phir yeh gyaan praayahlop ho jaata hai। yeh gyaan phir parampara chalne ka nahin hai। na aatma ko, na paramatma ko jaante hain। abhi tum jaante ho sab aatmaon ko kaise apna-apna part mila hua hai। achhe te achhe paartadhaari tum ho। is samay tum is vishwa ko apni baadshaahi banaate ho। hero and heroine part tumhaara hai। mool baat hai baap ko yaad karne ki। baba jaante hain pradarshani mein bahut hain jo service achhi karte hain, parantu yaad mein bahut kamjor hain। akla nahin hai ki kaise savere uthkar baba se good morning karni chaahiye। bhal topics par khyaalaat chalaate hain। woh to common hai। topics to roz-roz nai nikaal samjha sakte hain, parantu mukhya baat hai baap ko lav se yaad karna, to paap kat jaaen।

baba jaante hain bachchon ki aisi avastha abhi nahin hai। baba naam nahin sunaate hain। agar baba naam sunaaven to jo paise ki avastha hai so girkar paai ki ban jaaye। is gyaan mein samajh chaahiye। aise nahin koi kahe ki tum peela dikhaai padte ho, beemaar ho, to yeh sunne se hi bukhaar chadh jaae। aisa kachcha nahin banna hai। himmat chaahiye। serviceable bachche thode hi toot sakte hain। woh to phakhur mein rehte hain। dhandhaadhori karte baba ki yaad rakhni hai। baba se good morning karte rehna chaahiye। badi bhaari manzil hai। raajaai pad paana hai to mehnat bhi karni hai। jo kalpa pahle bane hain unhon ko aage chalkar maaloom padta jaayega। chhipa koi nahin rahega। school mein teacher student ko jaante hain aur register bhi rakhte hain। unse bhi pata pad jaata hai। usmein mukhya subject hoti hai bhaasha ki। yahaan mukhya subject hai yaad ki। knowledge to sahaj hai। bachche bhi samjha sakte hain। chhotepan mein buddhi teekhi hoti hai - dhaarna karne ki। budhiya itna nahin samjha sakti hain। yahaan bhi kumaariyon ka baba jaasti maan rakhta hai। sirf naam-roop mein phans ulta latak kahaan ullu na ban jaayen। is samay sab manushya ullu misal ulte latke hue hain। phir sulta hone se allaah ke bachche ban jaayenge। paramatma ko sarvavyaapi kahne se hi sab manushya paramatma se bemukh ho pade hain। sannyaasi khud apni pooja karaate hain। nahin to kehna chaahiye ki tum hamaare oopar phool kyon chadhaate ho। sab sannyaasiyon ko guru banaate hain। woh sannyaasi, vo grihasthi phir followers kaise ho sakte। jab sannyaasi banen tab followers kah saken। phir unhon ko koi samjha bhi nahin sakta ki tum apne ko follower kah nahin sakte। baba kisko kah na sake ki tum follower ho। jab guarantee karen paavan banne ki, tab hai baat। jab pratigya karte hain to khud likhkar bhej dete hain parantu jab girte hain, kaala munh karte hain to nahin likhte, kyonki lajja aati hai। yeh badi bhaari chot hai, phir baba se buddhi-yog lag na sake। patit se to ham naphrat karte hain। baba kehte hain vish khaane vaale bahut kharaab hain। pavitra banna achha hai na। main aakar pavitra banaane ka contract uthaata hoon - ki ham pavitra duniya banaakar hi dikhaayenge। kalpa-kalpa mujh contractor ko hi bulaate hain ki he patit-paavan aao। doosra koi aisa contractor hota nahin। ek mujhe hi contract mila hua hai, main hi paavan duniya banaaoonga। kalpa-kalpa main aakar yeh contract poora karta hoon। sannyaasiyon ko phir yeh contract mila hua hai ki pavitra rah bhaarat ko thamaana hai kyonki sabse pavitra bhaarat hi tha, jisko svarga kehte hain। vahaan devtaayen sarvagun sampanna, sampoorn nirvikaari the। unki mahima gaate hain। yeh gaayan aur deshon mein nahin hai। vahaan chitra to hain nahin। yeh svarga ke maalik the। lakshmi-naaraayan ko god-goddess kehte hain। bahut prem se puraane chitron ko khareed karte hain। lord krishna ka chitra maangate hain। sabse jaasti lord krishna ko pasanda karte hain।

tum bachchon ko yeh phurna rakhna hai ki humein satopradhaan banna hai। maaya phathkaati (tadphaati) to bahut hai। ek-dam naam-roop mein phans padte hain। shivbaaba ko yaad hi nahin karte। baba baar-baar samjhaate hain hamesha yeh samjho ki yeh shivbaaba hamko samjha rahe hain। yeh brahma kuchh nahin bolta। phir bhi shivbaaba ko bhool kar naam-roop ko yaad karte rehte hain। woh phir kya pad paayenge! pahle to shreemat par chalna hai। shivbaaba kehte hain bhooton ko bhagaao। deh-abhimaan ko bhagaao। ham aatma hain aur bahut meetha banna hai। baba kehte hain - deh sahit deh ke sabhi sambandhon ko bhoolte jaao। mujhe yaad karo। hath kaar de dil yaar de.. main puraana maashook hoon। aise koi aur ko samjhaane aayega hi nahin। baap hi is samay tumko aakar roohaani aashik banaate hain। ab tumhaari aatma jaanti hai ki hamaara maashook shivbaaba hai। unse svarga ka varsa paana hai। aise shivbaaba ko savere-savere uthkar good morning karo, yaad karo। jitna yaad karenge utna paap katte jaayenge। deh-abhimaan tootta jaayega। aisa abhyaas karte-karte woh avastha jam jaayegi। yaad mein baithe honge, graahak aayega us taraph khyaal nahin jaayega। phir unko bhi bataayenge ham yaad mein baithe the। bada maza aa raha hai। graahak ko sauda diya phir baba ki yaad mein। tumko karmaateet banne ka purushaartha karna hai। baba bahut yuktiyaan batlaate hain। inke (brahma ke) liye kehte hain - inke oopar to bahut maamle hain। tumko phursat jaasti milti hai - yaad karne ki। baba misaal bataate hain - bhojan par shivbaaba ko yaad karke baithte hain ki ham donon ikatthe khaate hain phir bhool jaata hoon। sabse jaasti jhanjhat is baap ke oopar rehte hain। tumhaara baap ke saath bahut lav rehna chaahiye। raatri 12 baje ke baad A.em. shuru hota hai। raatri ko jaldi so jaao - phir jaldi uthkar yaad karo। uthne se hi kaho -“baba good morning''। aur koi taraph buddhi na jaaye baba to har ek bachche ko jaante hain। tumhaari bhavishya ke liye badi bhaari kamaai hai। kalpa-kalpaantar yeh kamaai kaam mein aayegi। koi bhi bhoot nahin aana chaahiye। krodh bhi kam nahin hai, moh bhi kharaab hai। jitna ho sake baba ki yaad mein baith paavan banna hai। jaise baba gyaan ka saagar hai, bachchon ko bhi banna hai parantu saagar to ek hota hai na। baaki sab nadiyaan kahenge। krodh hai second number dushman। bada nuksaan kar dete hain। ek do ka ji jalaate hain। lobhi bhi ek do ka ji jalaate hain। moh ka bhoot to satyaanaash kar dete hain। moh ke kaaran shivbaaba ki yaad bhool apne bachchon ko yaad karte rahenge। nashtomoha vaale adol avastha mein rehte hain। achha!

meethe-meethe sikeeldhe bachchon prati maat-pita baapdaada ka nambarvaar purushaartha anusaar yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) achhi service karne ke saath-saath dil va jaan se baap ko yaad karna hai। savere uthte hi pyaar se kehna hai -“baba good morning''। karma karte bhi yaad ka abhyaas karna hai।

2) kisi dehdhaari ke naam-roop mein nahin atakna hai। gyaan ke chintan mein rehna hai। vyartha baaten nahin karni hai।

vardaan:- tadaphti hui bhikhaari, pyaasi aatmaon ki pyaas bujhaane vaale sarva khajaane se sampanna bhav

jaise lahron mein lahraati va doobti hui aatma ek tinke ka sahaara dhoondhati hai। aise duhkh ki ek lahar aane do phir dekhna anek sukh-shanti ki bhikhaari aatmaayen tadaphte hue aapke saamne aayengi। aisi pyaasi aatmaon ki pyaas bujhaane ke liye apne ko ateendriy sukh va sarva shaktiyon se, sarva khajaanon se bharpoor karo। sarva khajaane itne jama ho jo apni sthiti bhi kaayam rahe aur anya aatmaon ko bhi sampanna bana sako।

slogan:- kalyaan ki bhaavna rakh shiksha do to shikshaayen dil se lagengi।