Daily Murli for Thursday 6 January 2022

06-01-2022 praatahmurli om shanti "baapdaada"' madhuban

“meethe bachche - deh-abhimaan mein aane se hi vikarma bante hain, isliye pratigya karo aur sab sang tod ek sang jodenge

prashn:- kaun sa khel natural hai lekin manushya use godly act samajhte hain?

uttar:- drama mein yeh jo natural calamities aati hain, vinaash ke samay ek hi samudra ki lahar mein sab khanda taapu aadi khatma ho jaate hain, jiska rehearsal abhi bhi hota rehta hai, yeh sab natural khel hai। ise manushya godly act kah dete hain। parantu baba kehte main koi direction nahin deta hoon, yeh sab drama mein noondh hai।

geet:- kaun aaya mere man ke dvaare…

om shanti। kaun aaya arthaat kiski yaad aai? aise nahin ki aakar dil mein baith gaya phir to sarvavyaapi ho jaae। nahin, kaun aaya meri yaad mein? akaalmoorta। jisko kaal kha na sake। sikkha logon ke paas akaaltakhta bhi hai। unke paas akaali log bhi hain। vo log khud nahin samajhte ki sikkha dharma pravritti maarga ka dharma hai। ek hi aadi sanaatan devi-devta dharma praayah lop hai। doosra hai sannyaas dharma, nivritti maarga ka। gharbaar chhod had ka sannyaas kar pavitra bante hain। jangal mein to zaroor pavitra hi rehte honge। har ek dharma ki rasamrivaaj alag hai। shiksha bhi alag hai। woh hai nivritti maarga ka dharma, unko follow karne vaale ko bhi gharbaar chhod kaphni pahanni pade। phir bhal vo log kehte hain ghar grihastha mein rehte bhi gyaan pa sakte ho parantu woh koi gyaan nahin। na sannyaasi aise kara sakte hain। vaastav mein guru woh jo sadgati dene vaala ho। woh to ek hi hai। guroonaanak ne bhi shiksha di hai। woh bhi paramatma ki hi mahima karte hain। ekoankaar, akaalmoorta, tumko ab us akaalmoorta arthaat parampita paramatma ki hi yaad hai। mahima karte hain, akaalmoorta, ayoni hai। svayambhu arthaat rachta hai। nirbhay, nirvair, akaalmoorta... satguru prasaad, jap saaheb aadi yeh mahima hai - parampita paramatma ki। akaalmoorta ko hi maante hain। vahi bataate hain satayug aadi sat, hosi bhi sat, phir yeh bhi kehte hain moot paleeti... patit-paavan maana hi moot paleeti kapad dhoe, saaph karte hain tab unki mahima gaate hain। phir kehte hain ashankh chor haraam khor। yeh bhi is samay ki hi mahima hai। phir naanak kahe neench vichaar kar... phir unke oopar balihaar jaate hain। zaroor jab woh aaya tab to balihaar jaate hain। baba kehte main ahilyaaon, ganikaaon, saadhuon ka bhi uddhaar karne aata hoon। to zaroor sab patit thahre। ab yeh hai behad ki baat to zaroor behad ka maalik hi aakar samjhaayenge। brahma, vishnu, shankar bhi meri rachna hai। brahma dvaara aadi sanaatan devi-devta dharma ki sthaapna, shankar dvaara anek dharmo ka vinaash। doosre jo aate hain sirf apne dharma ki sthaapna karte hain। aise nahin ki vo guru log sadgati daata hain। sadgati kiski karenge? unki vanshaavli ki hi poori vriddhi nahin hui hai to sadgati kaise karenge। baap kehte hain main aakar aadi sanaatan dharma ki sthaapna aur adharmo ka vinaash karaata hoon। is samay sab tamopradhaan paap aatma ban gaye hain। manushya jo is behad drama ke paartadhaari hain, unhon ko maaloom hona chaahiye ki srishti chakra kaise phirta hai। baap aakar ham bachchon ko trikaaldarshi banaate hain। yeh bhi samajhte hain zaroor baap aakar svarga, sachkhanda ki sthaapna karenge aur jhooth khanda ka vinaash karenge। sachkhanda ki sthaapna karne vaala sachcha thahra na। yeh sab baaten baba hi samjhaate hain। sabhi to dhaaran kar nahin sakte kyonki deh-abhimaan bahut hai। jitna dehi-abhimaani honge, apne ko aatma ashareeri samjhenge, baba ko yaad karenge to dhaarna hogi। deh-abhimaani ko dhaarna nahin hogi। yog se hi aatma ke paap dagdha hote hain। din mein to deh-abhimaan rehta hai। to dehi-abhimaani banne ki practice kab karni chaahiye?

baap kehte hain neend ko jeetne vaala bano। baap kitni achhi points samjhaate hain। parantu kai aise bhi bachche hain jo murli sunte hi nahin। padhaai to mukhya hai। kaise bhi karke murli padhni chaahiye। parantu aise bhi nahin vikaaron mein girte rahen aur murli maangate rahen। jab tak guarantee na karen murli nahin bhejni chaahiye। jo murli nahin padhte to unki gati kya hogi। achhe-achhe bachche bhi murli nahin padhte, nasha chadh jaata hai। nahin to ek din bhi murli miss nahin karni chaahiye। dhaarna nahin hoti hai to samajhna chaahiye deh-abhimaan hai। woh oonch pad pa nahin sakenge। baba achhi reeti samjhaate hain, bachchon ko bhi samjhaana pade। baba to baahar ja na saken। baba bachchon ke aage hi samjhaate hain। yeh badi mama bhi hai gupta। shaktiyaan baahar ja sakti hain। conference hoti hai, unmein aadi sanaatan devi-devta dharma ka to koi pratinidhi hai nahi। yeh bhi point samjhaani hai। aur jo bhi dharma pita aate hain woh sirf dharma sthaapan karne aate hain, na ki adharmon ka vinaash karne। sat dharma ki sthaapna, anek adharmon ka vinaash sangam par hi hota hai। jab utarti kala ho jaati hai tab baap aate hain। chadhti kala to ek hi baar hoti hai। is par ek shlok bhi hai - chhotepan mein padha tha। guroonaanak ne kaha hai - sab nindak hai, jhoothe hain। koi bhi pavitra nahin rehte। sikkha dharma mein akaali hote hain jinke oopar kaala chakra bhi dikhaate hain। yeh hai svadarshan chakra। yeh bhi pavitrata ki nishaani hai। kangan bhi baandhate hain - donon pavitrata ki nishaani hain। parantu vo log iska arth nahin samajhte hain, na pavitra rehte hain। janeu bhi pavitrata ki nishaani hai। aajkal to sab kuchh uda diya hai। brahman kul hai uttam, usmein phir badi choti rakhte hain। parantu paavan to koi bante nahin। patit-paavan ek hi paramatma aakar sabko paavan banaate hain। aise nahin buddha, Christ aadi bhi koi patit-paavan the। nahin, guru to duniya mein anek hain, sikhlaane vaale, padhaane vaale। baaki sarva ka sadgati daata patit-paavan ek hi hai। sabko paavan banaakar saath mein le jaane ke liye main hi aata hoon। gyaan saagar ke saath madadgaar tum gyaan gangaayen bhi ho। ganga nadi par bhi devi ka chitra rakh diya hai। ab vaastav mein gyaan gangaayen tum ho। parantu tumhaari ab pooja nahin hoti kyonki tum ab laayak ban rahe ho। pujaari se poojya ban rahe ho phir tumhaara pujaareepna khatma ho jaayega। yeh raaz samjhaate hain parantu koi ki buddhi mein nahin baithta hai। kadam-kadam baba ki shreemat par chalna hai। deh-abhimaan chhodte raho। yeh sab mitra sambandhi aadi khatma hone vaale hain। ham sab chale jaayenge। parantu duniya to rahegi na। baap kehte hain main nai srishti ka rachayita hoon, parantu main aaoonga to patit duniya mein na, tab to mujhe patit-paavan kehte hain to zaroor patit duniya hogi। paavan duniya mein to patit honge nahin। paramatma ko heaven sthaapan karna hai isliye unko heavenly god father kehte hain। Christ heaven nahin sthaapan karte। haan, us samay jo aatmaaen oopar se aati hain woh satopradhaan hain, baaki aur koi bhi patit se paavan nahin banaate। tum bachchon ko abhi aisa koi vikarma nahin karna chaahiye jo patit kaha jaae। deh-abhimaan se hi vikarma bante hain। tum guarantee karte ho ki aur sang tod ek sang jodenge। ab tum pratigya poori karo। nahin to danda khaayenge। granth mein bhi hai chadhti kala tere bhaane sarva ka bhala। akshar achhe hain parantu jo kuchh padhe hain unko to bhoolna padta hai। baba ko to bachchon ke naam bhi poore yaad nahin kyonki shivbaaba ko yaad karna hai isliye baba kah dete hain, khush raho, aabaad raho, na bisro, na yaad raho। parantu serviceable bachchon ko baba yaad zaroor karte hain ki phalaana bahut achha madadgaar hai। saahookaar to ghor andhakaar mein pade hain। koi ko pata nahin padta ki maut saamne khada hai। bhagvaanuvaach - main raajayog sikhaata hoon to zaroor knowledge se goddess aaph wealth bante hain। yeh saari raajdhaani ban rahi hai nambarvaar। tum jaante ho nambarvaar ham sab padh rahe hain। baba kehte hain main raajdhaani sthaapan kar raha hoon। anek dharmon ka vinaash karaata hoon। param satguru ek hi hai। woh oonche te ooncha ek bhagwan hi gaaya hua hai। oonche te oonche brahma vishnu shankar ko bhi bhagwan nahin kehte, to raam krishna ko bhagwan kaise kahenge। woh to hai gyaan ka saagar patit-paavan। bhagat bhagwan ko yaad karte hain, brahma vishnu shankar ko thode hi yaad karte hain। yeh to abhi vyabhichaari ban gaye hain। to kitni achhi-achhi baaten dhaaran karne ki hain। jo karega so paayega। gyaan gangaayen tum ho। tum nadiyon ka hi chhor (kinaara) hai। saagar to kahaan ja nahin sakta। parantu woh hai jad saagar, yeh hai chaitanya। usmein to ek toofaan ki lahar uthi to bahut nuksaan ho jaata hai। vinaash ke samay jor se toofaan aayega, sab khanda taapu aadi khalaas ho jaayenge। deri nahin lagti। natural calamities ko godly act kah dete hain। tab kaha hai ki shankar dvaara vinaash to godly act hi hui na। parantu baap kehte hain main koi aisa direction aadi nahin deta hoon। yeh sab drama mein noondh hai। toofaan, natural calamities aadi-aadi sab apna kaam karengi। kalpa-kalpa yeh calamities aani hi hain aur sab khanda khatma honge। baaki ek bhaarat rah jaayega। uske liye taiyaari hoti hai। rehearsal hoti rahegi। yeh natural khel bana hua hai।

tum shiv shaktiyaan hi kahaan par jaakar samjha sakti ho ki tum sab chaahte ho shanti sthaapan ho, parantu tum jaante ho shanti hoti kahaan hai? sukh kahaan hota hai, duhkh kahaan hai - yeh sab samajhne ki baaten hain। abhi duhkhadhaam hai। yahi bhaarat sukhdhaam tha। aadi sanaatan devi devtaaon ka raajya tha। kaliyug hai duhkhadhaam, inka vinaash zaroor hona hai। pahle ant hokar phir aadi honi hai। madhya mein hain anek dharma। satayug mein ek dharma tha। yeh drama ka chakra hai। ismen 4 mukhya dharma hain। ek dharma ka paaya (taang) gum hai। devta dharma sthaapan karne vaala kaun hai - yeh bataao? parampita paramatma brahma dvaara sthaapna karaate hain। vaastav mein tum bhi prajaapita brahma ki aulaad ho। shiv ki bhi aulaad ho। brahma ki aulaad hone ke kaaran aapas mein bhaai-behen ho। tum jaante ho ham unke bane hain। parampita paramatma pahle brahman dharma rachte hain। brahman dharma hai choti aur sab dharma vaale baad mein aaye hain nambarvaar। aakhir mein tumhaari pratyakshata honi hai zaroor। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ki dhaarna ke liye jitna ho sake, dehi-abhimaani rehna hai। ashareeri banne ka abhyaas raat ko jaagkar karna hai।

2) kaise bhi karke murli roz sunni va padhni hai। ek din bhi miss nahin karni hai aur sang tod ek sang jodne ki pratigya karni hai।

vardaan:- bindu roop mein sthit rah udti kala mein udne vaale double light bhav

sada smriti mein rakho ki ham baap ke naynon ke sitaare hain, naynon mein sitaara arthaat bindu hi sama sakta hai। aankhon mein dekhne ki visheshta bhi bindu ki hai। to bindu roop mein rehna - yahi udti kala mein udne ka saadhan hai। bindu ban har karma karo to light rahenge। koi bhi bojh uthaane ki aadat na ho। mera ke bajaae tera kaho to double light ban jaayenge। sva unnati va vishwa seva ke kaarya ka bhi bojh anubhav nahin hoga।

slogan:- vishwa parivartak woh hai jo negative ko positive mein parivartan kar de।

lavleen sthiti ka anubhav karo

deh ki smriti se aise khoye hue raho jo deh-bhaan ka, din-raat ka, bhookh aur pyaas ka, sukh ke, aaraam ke saadhnon ka kisi bhi baat ke aadhaar par jeevan na ho, tab kahenge lav mein lavleen sthiti। jaise shama jyoti-swaroop hai, light might roop hai, aise shama ke samaan svayan bhi light-might roop ban jaao।