Daily Murli for Friday 6 May 2022

06-05-2022 praatahmurli om shanti "baapdaada"' madhuban

“meethe bachche - tum braahmanon ko eeshvar ki god mili hai, tumhein nasha rehna chaahiye baap ne is tan dvaara humein apna banaaya hai''

prashn:- baap ne kaun sa divya kartavya kiya hai? jis kaaran unki itni mahima gaai hui hai?

uttar:- patiton ko paavan banaana। sabhi manushyon ko maaya raavan ki janjeeron se chhudaana - yeh divya kartavya ek baap hi karte hain। behad ke baap se hi behad sukh ka varsa milta hai, jo phir aadhaakalpa tak chalta hai। satayug mein hai golden jubilee, treta mein hai silver jubilee। woh satopradhaan, woh sato। donon ko hi sukhdhaam kaha jaata hai। aise sukhdhaam ki sthaapna baap ne ki hai, isliye unki mahima gaai jaati hai।

geet:- insaaph ka mandir hai yeh…

om shanti। baap aur daada mil karke bachchon ko samjhaate hain। kabhi baap samjhaate hain, kabhi daada bhi samjhaate hain kyonki yeh shareer daada ka bhi ghar hai। parampita paramatma to rehte hain paramdham mein। zaroor koi samay mein unka yeh bhaarat hi ghar hota hai tab to shivraatri manaai jaati hai। shiv ke bahut mandir bhi hain। to siddha hota hai ki bhaarat khanda mein hi unka aana hota hai, patit ko paavan banaane va sabhi manushyon ko maaya raavan ki janjeeron se chhudaane kyonki ab raavan ka raajya hai। raavan ko jalaate bhi bhaarat mein hain। shivraatri aur krishna jayanti bhi bhaarat mein hi manaate hain। raavan ka raajya bhi aadhaakalpa chalta hai। phir baap aate hain patiton ko paavan banaane। bas ek hi baar paavan bana dete hain phir aate hi nahin। baap ka naam bhaarat mein prasiddha hai। zaroor koi divya kartavya kiya hai tab to unka naam hai। manushya, manushya ko to paavan bana na saken। patit-paavan ek hi baap ko kaha jaata hai। svarga narka yeh naam bhi bhaarat par hi pada hai। bhaarat 5 hajaar varsha pahle svarga tha, unko paristaan bhi kaha jaata hai, to zaroor baap se varsa mila hai। baap akshar bahut meetha lagta hai। unse hi behad sukh ka varsa milta hai jo sukh aadhaakalpa chalta hai। jiski golden jubilee, silver jubilee manaate hain। satayug ko golden jubilee, treta ko silver jubilee kehte hain। woh satopradhaan, woh sato, donon ko milaakar sukhdhaam kaha jaata hai। number one hain sooryavanshi, second number chandravanshi। baap jab is bhaarat khanda mein aate hain to bhaarat ko paavan banaate hain phir jab bhakti shuru hoti hai to kalaayen kamti hoti jaati hain। jhaad jadajdeebhoot tamopradhaan ban jaata hai। sab bhakta ban jaate hain। saadhu bhi saadhna karte hain baap ko paane ke liye arthaat mukti jeevanmuktidhaam jaane ke liye। aadhaakalpa bhakti karte hain baap ko paane ke liye। jab woh samay poora hota hai to phir baap aata hai bhakton ko sukhi banaane। satayug mein to sukh-shanti, sampatti sab hai। vahaan kabhi akaale mrityu nahin hoti hai। kabhi rote, peette nahin। yeh kaun samjhaate hain? behad ka baap, unka naam bhi chaahiye na। kaliyug mein hai hi andhiyaara। bhakti maarga ki thokren khaate rehte hain। svarga mein to duhkh ki baat hoti nahin, sab sukhi rehte hain isliye bhagwan ko pukaarte nahin। satayug ko sukhdhaam, kaliyug ko duhkhadhaam kaha jaata hai। vallabhaachaari vaishnav log samajhte hain ki satayug mein lakshmi-naaraayan ka raajya tha। yatha raaja raani tatha praja sukhi the, usko golden ej kaha jaata hai। satayug se lekar jo chakra mein aate hain unke hi 84 janma honge। bachchon ko samjhaaya hai ki yeh jhaad hai। sab patte ikatthe nahin aayenge। satayug mein ek hi aadi sanaatan devi-devta dharma tha, unko hindu nahin kahenge। devi-devtaayen to sarvagun sampanna, 16 kala sampoorn gaaye jaate hain.. jo unhon ke pujaari hain to woh zaroor usi dharma ke hone chaahiye। Christian Christ ko yaad karte to us dharma ke hain na। phir bhaaratvaasiyon ne apne devi-devta dharma ka naam kyon gum kar diya hai?

tum jaante ho ham so devta the। ham hi janma-maran mein aate hain। ham so devta, kshatriy bante hain। 84 janma lete-lete ant mein aakar shoodra bante hain। shoodra se phir brahman banna pade। brahman bante hain brahma ki aulaad। sabhi aatmaayen vaastav mein shiv ki aulaad to hain hi। woh hai behad ka baap। unko parampita paramatma, O god father athva heavenly god father kaha jaata hai। woh hai svarga ka rachayita। ab buddhi se bachchon ko kaam lena hai। jabki baap svarga sthaapan karte hain to ham kyon na nai duniya ka vaaris banen। ab woh nai duniya puraani ho gai hai phir nai duniya kaise banengi? gaandhi bhi gaate the na ki naya raam-raajya, naya bhaarat ho। ham jaante hain ki ab woh sthaapan ho raha hai। abhi tum braahmanon ko eeshvareey god mili hai, behad ke baap ko apna banaaya hai - practical mein। aise to sab kehte rehte hain O god father raham karo, parantu is samay baap ne aakar is tan dvaara tumko apna banaaya hai। woh kaliyugi brahman hain kukh ki santaan, ham hain brahma mukh vanshaavli। prajaapita brahma thahra tab to itne bachche paida karenge na। to yeh hai mukh vanshaavli। parampita paramatma ne adopt kiya hai - brahma mukh dvaara, to goya maata bhi ho gai। tum maat-pita... O baba aapne hamko brahma mukh dvaara apna banaaya hai। yeh bhi samajhne ki baaten hain। gyaan saagar ek hi baap hai। gyaan se hi sadgati arthaat din hota hai। agyaan se raat hoti hai। kaliyug to raat hai na, inko bhaktimaarga kaha jaata hai। shaastra sab bhaktimaarga ke hain। unse koi baap ke paas pahunchne ka raasta nahin milta hai। baap aate hi hain kalpa-kalpa। shivraatri manaate hain to zaroor woh aate hain। unko apna shareer nahin hai। brahma, vishnu, shankar ko bhi devta kaha jaata hai। brahma devta namah, vishnu devta namah phir shiv paramatma namah। brahma hai is saakaar sizre ka bada। abhi practical mein hai। baap aate hi hain sangamayug par। abhi yaadav bhi hain, kaurav bhi hain aur paandav to hain yogbal vaale shakti sena। to abhi tum bachche jaante ho shivbaaba practical mein brahma tan mein padhaara hai। us niraakaar shiv ka mandir bhi hai। shiv-raatri manaai jaati hai, parantu government ne shiv jayanti ki chhutti bhi nikaal di hai। auron ki jayantiyaan manaate rehte hain। dharma ki taakat to hai nahin isliye unrighteous, unlawful, insolvent ban pade hain। no purity, no pees, no prosperity। is hi bhaarat mein 5 hajaar varsha pahle jab golden jubilee thi to purity, pees, prosperity thi। kabhi akaale mrityu nahin hota tha। bhaarat jaisa oonch sampativaan aur koi ho nahin sakta। bhaarat khanda hai sabse oonch। unki history bhi bani hui hai। paavan bhi yeh bhaarat to patit bhi yeh bhaarat banta hai। aadi sanaatan devi-devta dharma vaale hi yeh chakkar lagaakar shoodra varna mein aaye। phir shoodra varna se ab brahman varna mein aaye ho। devtaaon se bhi brahman varna oonch choti par hai। satayugi devtaaon ki jo mahima hai, woh baap ki mahima se alag hai। baap ko kehte hain gyaan ka saagar, aanand ka saagar, phir devtaaon ko kahenge sarvagun sampanna.. vahaan vikaar ki baat nahin। shaastron mein to bahut gapode laga diye hain ki krishnapuri mein bhi kans, raavan aadi the। vaastav mein to is samay kansapuri hai। phir satayug mein hogi krishnapuri। yeh hai sangam isliye hi unhonne kans, jaraasandhi, raavan aadi ko satayugi devtaaon se mila diya hai। yeh hai hi aasuri raavan sampradaay। abhi tum eeshvareey sampradaay bane ho। eeshvareey god mein aakar pavitra ban phir 21janmon ke liye daivi god mein jaate ho। 8 janma daivi god phir 12 janma kshatriy god। bhaarat mein hi yeh gaaya hua hai ki kanya woh jo 21 kul ka uddhaar kare। so tum hi woh kumaariyaan ho।

abhi tum ho eeshvareey kul ke। daada hai shivbaaba, baap hai brahma। tum ho brahmaakumaar kumaariyaan। varsa us behad ke baap se milta hai। dene vaala woh hai। woh to niraakaar hai। woh raajayog ab kaise sikhlaave। nar se naaraayan banaane liye zaroor saakaar shareer chaahiye। to is patit tan mein aate hain jisne 84 janma liye hain। yeh bade se badi university hai। jahaan svayan god baith raajayog sikhlaate hain, raajaaon ka raaja banaane। geeta ka rachayita krishna nahin। geeta maata ne krishna ko janma diya। jo devta banen unhon ko janma mila shivbaaba se। Christian ko janma mila Bible se Christ dvaara। tumko bhi brahman se devta kisne banaaya? shivbaaba ne brahma mukh dvaara। yeh tumhaara hai behad ka sannyaas। woh hai had ka rajoguni sannyaas। woh nivrittimaarga ka sannyaas। tumko vairaagya aaya hai is puraani chhi-chhi duniya se। tum jaante ho ki yeh to ab khatma hone vaali hai। isse to kyon na ham svarga ke rachayita baap ko yaad karen। baap kehte hain laadle bachche, tum bahut janmon ke baad aakar mile ho। tumne 84 janma poore liye hain। ab tumko phir devta varna mein jaana hai। ismen parhej bhi bahut hai, ashuddha cheez kha na saken। baap kehte hain main sangam par aata hi hoon moot paleeti kapdon ko paavan banaane। ab maut saamne khada hai। yaadav, kaurav aur paandav bhi hain to zaroor paandavapti bhi hoga। paandav-pati/pita paramatma ko kahenge। tum phir ho pande। raah bataate ho sukhdhaam, shanti-dhaam ki, isliye tumko paandav shiv shakti sena kaha jaata hai। yaadav yooropvaasi to apne hi kul ka naash karte hain। bhaarat mein hain paandav aur kaurav - jinke liye kehte hain ki asur aur devtaaon ki yuddha chali। tum abhi to devta nahin ho, banna hai। shreemat se tum svarga ke maalik bante ho। baaki sabki hai aasuri raavan mat। aadhaakalpa raavan ki mat chalti hai। abhi to saari duniya tamopradhaan hai। yeh hai roodra gyaan yagya, jahaan baap baith raajayog sikhlaate hain। jab raajaai sthaapan ho jaati hai to yeh vinaash jvaala prajjavlit hoti hai, yeh gyaan praayah lop ho jaata hai। phir drama anusaar jo bhi shaastra hain bhakti maarga ke, vahi niklenge। sannyaasiyon ke followers bahut honge। sabhi paap dhone ganga par jaate hain। ab ganga nadi to kisi ko paavan kar nahin sakti। woh to paani ke saagar se nikli hui hai। gyaan gangaayen tum ho, jo gyaan saagar se nikli ho। baaki ganga koi patit-paavni hoti nahin hai। bachchon ko phir se bhakti ka phal behad sukh ka varsa dene aaya hoon। jo baap se aakar padhenge vahi svarga mein aayenge, baaki sab apne-apne section mein chale jaayenge। is drama-chakra ko bhi samajhna hai। chakra ko jaanne se tum chakravarti raaja bante ho। government ne bhi chakra nikaala hai। 3 sher dikhaakar phir neeche likhte hain satyamev jayte।

ab shivbaaba tum sab paarvatiyon ko aakar amar katha suna rahe hain - amarpuri ka maalik banaane। isko hi satya naaraayan ki katha va amar katha kaha jaata hai। yeh katha ek hi baar sunkar tum svarga ke maalik bante ho। baaki sab hain danta kathaayen। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) devta varna mein jaane ke liye bhojan ki bahut parhej rakhni hai। koi bhi ashuddha cheez nahin khaani hai।

2) is puraani chhi-chhi duniya, jo ki ab khatma hone vaali hai, isse behad ka vairaagya rakh svarga ke rachayita baap ko yaad karna hai।

vardaan:- apni shaktiyon va gunon dvaara nirbal ko shaktivaan banaane vaale shreshtha daani va sahayogi bhav

shreshtha sthiti vaale sapoot bachchon ki sarva shaktiyaan aur sarva gun samay pramaan sada sahayogi rehte hain। unki seva ka vishesh swaroop hai-baap dvaara praapta gunon aur shaktiyon ka agyaani aatmaon ko daan aur brahman aatmaon ko sahayog dena। nirbal ko shaktivaan banaana - yahi shreshtha daan va sahayog hai। jaise vaani dvaara va mansa dvaara seva karte ho aise praapta hue gunon aur shaktiyon ka sahayog anya aatmaon ko do, praapti karaao।

slogan:- jo dridh nishchay se bhaagya ko nishchit kar dete hain vahi sada nishchint rehte hain।