Daily Murli for Wednesday 13 July 2022

13-07-2022 praatahmurli om shanti "baapdaada"' madhuban

“meethe bachche - is shareer ka bhaan bhoolte jaao, ashareeri banne ki mehnat karo, kyonki ab ghar chalna hai''

prashn:- tum aastik bachche hi kaun sa shabd bol sakte ho?

uttar:- bhagwan hamaara baap hai, yeh aastik bachche hi bol sakte hain kyonki unhein hi baap ka parichay hai। naastik to jaante hi nahin। aastik bachche hi kahenge - mera to ek baba doosra na koi।

prashn:- teevra purushaarthi banne ke liye kaun si sthiti chaahiye?

uttar:- saakshi sthiti। saakshi hokar har ek ke part ko dekhte purushaartha karte raho।

geet:- marna teri gali mein…

om shanti। yeh kinhon ne kaha? jeev ki aatmaon ne kaha, jo sammukh baithe hain। yahaan yeh nahin kah sakte ki aatma baithi hai। nahin, jeev aatmaayen baithi hain। baap ne samjhaaya hai ki aatma hi shareer dvaara har kaarya karti hai, isko kaha jaata hai dehi-abhimaani। deh mein rahne vaale apne parmapriy paramatma ko kehte hain ki ham aatma ab aapke gale ka haar banenge arthaat ham yeh shareer chhod aapke paas aa jaayenge। baap ne samjhaaya hai jaise manushya ka genealogical tree hai। brahma sarasvati, Adam Eve aadi unhon ka sijra banta hai। vaise tumne dekha hai mool vatan mein bhi sizra hai। pahle-pahle hai shiv। tum aatma mere gale ka haar kaise banengi? mujhe yaad karne se। jitna jo mujhe yaad karte hain utna teekhi daudi pahante hain। mere saath bahut prem hai। mere paas aane bina rah nahin sakte kyonki aatma ko is shareer ke saath sukh nahin, duhkh hai। ab bhagwan to hai niraakaar। kehte bhi hain niraakaar aatmaon ko। woh parampita paramatma hi srishti ke aadi madhya ant ko jaante hain, trikaaldarshi hain। aur koi manushya bhal kitna bada pandit ho, ved shaastra padha hua ho parantu unko is srishti ke aadi madhya ant ka gyaan nahin hai। naastik hone ke kaaran trikaaldarshi ho nahin sakte। tum bachche abhi aastik ho। baap ne tumko parichay diya hai, isliye tum baba kahne ke hakdaar ho। woh to kah dete paramatma sarvavyaapi hai, phir isse kya mila! kuchh bhi nahin। baap to gyaan ka saagar hai। woh aise nahin kehte ki main sarvavyaapi hoon। phir to sab father ho jaate। father hood kaha jaata hai kya? ek baap ke bachche hain। unko prabhu eeshvar bhi kehte hain। brahma vishnu shankar ko rachne vaala hai। trimoorti brahma kehna wrong hai। brahma, vishnu, shankar ka bhi baap woh shiv hai। usne brahma ko adopt kiya hai। tum bhi jaante ho brahma ke mukh se parampita paramatma shiv dvaara ham trikaaldarshi va svadarshan chakradhaari ban rahe hain। sva arthaat aatma ka gyaan। aatma ko hi svaraajya milta hai। aatma avinaashi hai, shareer vinaashi hai। aatma hi achhe va bure sabhi sanskaar dhaaran karti hai। tum jaante ho ham aatma abhi tamopradhaan hain। kaha bhi jaata hai patit aatma va paavan aatma। shareer ka naam nahin liya jaata hai। punya aatma, mahaan aatma। aatma ki hi mahima ki jaati hai। aatma parampita paramatma baap se baith sunti hai। duniya mein koi ko pata nahin ki baap aise baith bachchon ko padhaate hain। abhi tum samajhte ho ki ham baap ke bane hain। baap se hamko varsa lena hai। doosre se hamaara koi kaam nahin। aatma kehti hai mera to ek shivbaaba doosra na koi। student samjhenge mera to ek teacher... tumhaara ek hi baap, shikshak hai। woh patit-paavan baap hai। sabhi aatmaon ka connection us baap, shikshak se hi hai। bhal koi braahmani padhaati hai। parantu woh bhi mujh baap se hi padhi hui hai। baap kehte hain tum mujhe yaad karo, na ki braahmani ko। ab tum bachche mujh baap ko jaan gaye ho, pahchaan gaye ho। ab tum aastik bane ho। jo nahin jaante woh hain naastik, nidhanke। baap ka naam, roop, desh, kaal kya hai? kuchh bhi nahin jaante। kah dete uska koi naam roop nahin hai। ab tum jaante ho zaroor unka naam hai shiv। woh apna shareer to dhaaran karte nahin, isliye unka naam kabhi badal nahin sakta। tum jaante ho hamaare 84 janmon ka naam-roop badalta jaata hai। unka naam to hai hi shiv। jaise aatma ka roop hai vaise paramatma ka bhi roop hai। aise nahin ki paramatma koi akhanda jyoti bahut bada hai। baap kehte hain jaise aatma star misal hai, vaise main bhi hoon। parantu mere mein gyaan hai isliye meri mahima hai। sat-chit-aanand swaroop, gyaan ka saagar hai। chaitanyata hai, tab to gyaan sunaate hain। woh hai chaitanya beej roop। woh jad beej to kuchh suna na sake। manushya hi jaante hain। jaise baap ki buddhi mein saare manushya srishti ka jhaad hai, vaise tumhaari buddhi mein hai। kitna variety hai। ek ka bhi feature na mile doosre se। har ek ka feature alag-alag hai। har ek ka apna-apna part hai। baap samjhaate hain kitna bada behad ka naatak hai। kitne variety features hain। sabhi is drama mein actors hain। jabki yeh drama avinaashi hai to koi bhi actor badli nahin ho sakta। tumko maaloom pada hai ki hamaare 84 janmon ke 84 naam padte hain। abhi naam bhi poore hue to varna bhi poore hue। ab phir repeat hoga arthaat geeta episode repeat ho raha hai। pahle-pahle shreemat bhagwan ki gaai hui hai। parantu bhagwan ko bhool gaye hain। shivbaaba ki jayanti ho tab krishna ki ho। aise thode hi ki baap ki jayanti hi gum ho jaae aur bachche ki jayanti ho jaae। tum bachchon ko samjhaaya jaata hai ki lakshmi-naaraayan vishwa ke maalik the। unhonne yeh varsa kaise paaya? parampita paramatma se। parampita paramatma hi raajayog sikhlaate hain। kab? baap kehte hain main kalpa-kalpa, kalpa ke sangamayug par aata hoon। jabki aasuri raajya ka vinaash, daivi raajya ki sthaapna hoti hai। jo aastik bane hain, unhon ko varsa mil raha hai। naastik ko varsa mil na sake। baap aaye hain sabko duhkh se mukta karte hain, ab yeh sukhdhaam mein jaate hain tab aur baaki aatmaayen hisaab-kitaab chuktu kar vaapis chali jaati hain। niraakaar baap sarva aatmaon ko ghar le jaane ke liye aaye hain। le jaane vaale ko mahaakaal, kaalon ka kaal kaha jaata hai। kaalon ka kaal mahaakaal ka bhi mandir hai। mahaakaal shiv hai va somnaath, roodra kaho। sammukh kehte hain main in sabhi aatmaon ka guide hoon। sabhi ko saath le jaaoonga। baap kehte hain tumko is raavan ke raajya se liberate karta hoon। yeh hai raavan raajya। ab raavan raajya murdaabaad ho raamraajya jindaabaad hona hai। raam raajya chaahte to sab hain na। to zaroor raavan ke raajya ka vinaash chaahiye।

baap samjhaate hain ab yeh puraani duniya hi khatma honi hai। aadi sanaatan devi-devta dharma ko bilkul hi bhool gaye hain। yeh vahi geeta episode chal raha hai। yaadav kaurav bhi barobar hain। yaadav vahi yooropvaasi hain। moosal invent karne vaale hain, yeh bhi likha hai international ladaai mein sab khatma honge। koi apne aadi sanaatan devi-devta dharma ko nahin jaante। gaaya bhi jaata hai religion is might। religious aadmi ko achha maana jaata hai। irreligious ko bura maana jaata hai। tum jaante ho bhaarat religious tha। aadi sanaatan devi-devta dharma tha। abhi bhaarat irreligious bana hai। apne dharma ko chhod diya। yeh drama anusaar aise chhodna hi hai। vahaan to mahaaraaja mahaaraani ka raajya chalta hai। vajeer aadi vahaan hote hi nahin। kaayda nahin। jab patit bante hain tab vajeer aadi ki darkaar rehti hai। abhi to ek-ek raajdhaani ko kitne vajeer (matri) hain। ek ki mat na mile doosre se, kitna matbhed mein aate rehte hain। abhi tum bachche jaante ho ki baba hamko padha rahe hain, manushya se devta banaane। baap kehte hain sabhi apne ko aatma samjho। deh ke in sab sambandhon ko bhool jaao। ekdam beggar ban gaye, sab kuchh de diya। shareer bhi de diya baaki kya raha। kuchh bhi nahin। parampita paramatma kehte hain main aatmaon se baat karta hoon। aatmaon ko le jaana hai। is shareer ke bhaan ko bhoolte jaao, ismen hi mehnat hai।

baap kehte hain meethe bachchon, saara kalpa tum deh-abhimaani rahe ho। laukik baap ko hi yaad kiya hai, ab dehi-abhimaani ban mere ko yaad karo। meri yaad se hi bal milega। he bachche, he aatmaayen maamekam yaad karo, doosra na koi। bhoole chooke bhi aur koi ko yaad nahin karna hai। tum yeh pratigya karte ho। baba mere to aap ek hi ho। ham aatma hain, aap paramatma ho। aapne batlaaya hai, aatma hamaare bachche ho। ab raavan ke duhkh se tumko liberate kar vaapis le jaane aaya hoon। ab bachchon ko dheeraj dharna hai। jab raajdhaani sthaapan ho jaayegi to phir yeh mahaabhaari mahaabhaarat ki ladaai lagegi। tab hi kaliyug badal satayug ho sakta। to main kaalon ka kaal thahra na। main baap bhi hoon to shikshak bhi hoon, patit-paavan bhi hoon, phir main mahaakaal bhi hoon। kahaan le jaaoonga? meethe bachche muktidhaam mein le jaaoonga। yahaan se mukta honge to svarga mein aayenge। tum padhte ho - bhavishya mein devi-devta banne। ab tum brahman eeshvareey santaan ho। sab kehte hain ham brahman eeshvareey santaan hain। brahma ki aulaad bhaai behen hain। vikaar mein ja nahin sakte। ham eeshvareey potre potriyaan hain, unse ham varsa le rahe hain। jitna jo purushaartha karenge utna pad paayenge। kalpa-kalpa purushaartha kiya hoga to ab tum purushaartha karne lag padenge। ismen saakshi rahne ka abhyaas chaahiye। saakshi hokar dekho har ek kitna purushaartha karte hain, kahaan tak follow karte hain। koi ke naam-roop mein nahin atakna hai। sivaae baap ke aur koi yaad na aaye। baba kehte hain bachche main tumhein raajayog sikhlaae paavan banaakar saath le jaaoonga। abhi tum samajhte ho barobar kalpa-kalpa hamko baap se shiksha milti hai drama anusaar। tum dropdiyaan hon, yeh koi sukh ka raajya nahin hai। is par kahaani bhi banaai hui hai। ab baap to reality mein samjhaate hain। tum ab baap se varsa le rahe ho, sabko duban (daldal) se nikaalte ho। sab kaam chita par baith jal mare hain। tumhaare sir par to gyaan ki varsha ho rahi hai। baap kehte hain yeh mere bachche jalkar khaak ho gaye hain। main aaya hoon sabko liberate kar saath le jaaoonga। manushyon ko yeh pata nahin। ab tum ghor andhiyaare se nikal aaye ho। ab baap kehte hain mujhe yaad karo, ghar ko yaad karo। tum aatmaayen ghar ko bhool gai ho। gaate bhi hain mool vatan, sookshm vatan। mool vatan mein sabhi aatmaayen rehti hain। aatma kya hai, paramatma kya hai, mool vatan kya hai..., kuchh bhi nahin jaante। woh to aatma so paramatma kah sab khel hi khalaas kar dete hain। baba kehte hain yeh bhi drama mein noondh hai। is samay jo bhi hota hai, jo second beetta woh drama phir se repeat hota hai। baap baith padhaate hain। yeh repetition ka raaz bhi baap ne samjhaaya hai। aise nahin ki drama mein jo mera bhaagya hoga, woh milega। drama anusaar act chalti hai to ham purushaartha kya karen, aisa samajhne vaale bhi hain। parantu nahin, purushaartha to karna hai na। baap aaye hi hain purushaartha karaane। tum bachchon ko poora purushaartha karna hai। saakshi ho dekhna bhi hai। kaun teevra purushaartha karte hain, kaun achha pad pa sakenge? baap dvaara kaun poora varsa lete hain? saakshi ho purushaartha karna aur karaana hai aur saakshi ho dekhna hai ki yeh kitni service karte hain। kitnon ko aap samaan banaate hain। baap ka parichay dete hain auron ke purushaartha ko dekh khud bhi teevra purushaartha karna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh aur deh ke sambandhon ko bhool poora beggar banna hai, mera kuchh nahin। dehi-abhimaani rahne ki mehnat karni hai। kisi ke naam roop mein nahin atakna hai।

2) drama mein hoga to purushaartha kar lenge, aisa sochkar purushaartha-heen nahin banna hai। saakshi ho doosron ke purushaartha ko dekhte teevra purushaarthi banna hai।

vardaan:- smriti swaroop ke vardaan dvaara sada shaktishaali sthiti ka anubhav karne vaale sahaj purushaarthi bhav

sada shaktishaali, vijayi vahi rah sakte hain jo smriti swaroop hain, unhein hi sahaj purushaarthi kaha jaata hai। ve har paristhiti mein sada achal rehte hain, bhal kuchh bhi ho jaae, paristhiti roopi bade se bada pahaad bhi aa jaae, sanskaar takkar khaane ke baadal bhi aa jaaen, prakriti bhi paper le lekin angad samaan man-buddhi roopi paanv ko hilne nahin dete। beeti ki halchal ko bhi smriti mein laane ke bajaae fullstop laga dete hain। unke paas kabhi albelaapan nahin aa sakta।

slogan:- gyaan ki paraakaashtha par pahunchna hai to gupta roop se purushaartha karo।