Daily Murli for Friday 28 October 2022

28-10-2022 praatahmurli om shanti "baapdaada"' madhuban

“meethe bachche - bholaanaath baap ek hai jo tumhaari jholi gyaan ratnon se bharte hain, vahi kalpa vriksha ka beejroop hai, unki bhent aur kisse kar nahin sakte''

prashn:- bahut bachche baap ko bhi thagne ki koshish karte hain, kaise aur kyon?

uttar:- baap ko yathaartha na pahchaanne ke kaaran bhool karke bhi chhipaate hain, sach nahin bataate hain, sabha mein chhipkar baith jaate hain। unhein pata hi nahin ki dharmaraaj baba sab kuchh jaanta hai। yeh bhi sajaaon ko kam karne ki yukti hai ki sachche baba ko sach sunaao।

geet:- bholenaath se niraala…

om shanti। bachche samajh gaye hain ki bholaanaath sada shiv ko kaha jaata hai। shiv bhola bhandaari। shankar ko bholaanaath nahin kahenge। na aur koi ko gyaan saagar kah sakte hain। baap kehte hain main hi aakar bachchon ko aadi-madhya-ant ki knowledge athva gyaan sunaata hoon। to ek hi gyaan ka saagar thahra, na shankar, na avyakt brahma। avyakt brahma to sookshm vatan mein rehta hai। bahut is baat mein moonjhate hain ki daada ko bhagwan brahma kyon kehte hain? lekin avyakt brahma ko bhi bhagwan nahin kah sakte। ab baap samjhaate hain ki main hi tumhaara paarlaukik pita hoon। parlok na svarga ko, na narka ko kahenge। parlok hai pare te pare lok, jahaan aatmaayen nivaas karti hain isliye unko kehte hain parmapriy paarlaukik parampita kyonki woh parlok mein rahne vaale hain। bhakti-maarga vaale bhi praarthana karenge to aankhe oopar zaroor jaayengi। to baap samjhaate hain ki main saare kalpa vriksha ka beejroop hoon। ek shiv ke sivaay kisko bhi creator nahin kah sakte। vahi ek creator hai baaki sab unki creation hain। ab creator hi creation ko varsa dete hain। sab kehte hain hamko eeshvar ne athva khuda ne paida kiya hai। to us ek eeshvar ko sab father kahenge। gaandhi ko to father nahin kahenge। behad ka rachta baap ek hi hai। vahi samjhaate hain ki main tumhaara paarlaukik parampita hoon। baaki aatmaayen to sab ek jaisi hain, koi badi chhoti nahin hoti। jaise gyaan soorya, gyaan chandrama, gyaan sitaare.. to us soorya chaand ki size mein to pharka hai lekin aatmaon ka size ek jaise hai। baba kehte hain main koi size mein bada nahin hoon lekin paramdham ka rahne vaala hoon isliye mujhe param aatma kehte hain। paramatma mein hi saara gyaan hai। woh kehte hain jaise main ashareeri hoon vaise aatma bhi kuchh samay paramdham mein ashareeri rehti hai। baaki stage par jaasti samay rehti hai। to jaise tum aatma sitaare sadrishya ho vaise main bhi hoon। agar main bada hota to is shareer mein fit nahin hota। jaise aur sabhi aatmaayen part bajaane aati hain, vaise main bhi aata hoon। baba ka bhakti-maarga se part shuru hota hai। satayug treta mein to part hi nahin। ab khud aakar hamko poora varsa dete hain। apne se bhi do ratti oopar le jaate hain। hamko brahmaanda aur srishti donon ka maalik banaate hain। yeh to har ek baap ka farja hota hai bachchon ko laayak banaana, kitni seva karte hain। koi ke 7 bachche hote hain, koi doctor, engineer, vakeel banta hai to baap phoola nahin samaata। log bhi unki saraahna karte hain ki baap ne sab bachchon ko padhaakar laayak banaaya hai। parantu sab ek jaise to nahin bante। koi kya banta, koi kya। vaise baba kehte hain main tumko kitna laayak banaata hoon। yeh baba dekho kaisa hai! iska sthool naam roop koi hai nahin। doosre ke tan mein pravesh kar padhaate hain। yeh hoobhu kalpa pahle vaali paathshaala hai, to zaroor geeta ke bhagwan ne geeta paathshaala banaai hai। jahaan sabko gyaan ghaas, gyaan amrit khilaaya hai। koi kehte shreekrishna ki gaooshaala, koi kehte brahma ki। lekin hai kya, jo shivbaaba ko shareer na hone kaaran brahma se mila diya hai। baaki shreekrishna ko to gau paalne ki darkaar nahin। shreekrishna ko patit-paavan nahin kehte। gaandhi bhi geeta ko uthaae mukh se seetaaraam uchchaarte rehte the kyonki woh raam, krishna, kachchha-machchha sabmen bhagwan maante hain। pahle ham bhi aise samajhte the। hamaara bhi buddhi ka taala banda tha। ab baap ne aakar jagaaya। sabhi ko kabra se nikaal vaapis le jaate hain, machchharon ke sadrishya। phir utarte dheere-dheere apne samay par hain।

tumko baap samjhaate hain ki mujh ek ko yaad karo। student ko bhi baap teacher yaad rehta hai। tumko to baap padhaate hain। yahi tumhaara guru bhi hai। teenon ka hi force hai। phir bhi aise baap ko bhool jaate ho! aise bhi (phulkaasta kahlaane vaale) bachche hain - jo 5 minute bhi yaad nahin karte hain। tab kehte hain aho mam maaya main bachchon ka taala kholta hoon, tum band kar deti ho। jara bhi vikaar mein gaya to buddhi ka taala lock up ho jaata hai। phir bhi sach sunaane se saza kam ho jaati hai। agar aapehi jaakar judge ko apna dosh bataaye to kam saja denge। baba bhi aise karte hain, agar koi bura kaam kar chhipaata hai to usko kadi saja milti hai। to dharmaraaj se kuchh chhipaana nahin chaahiye। aise bahut hain jo vikaar mein jaakar phir chhipkar sabha mein baith jaate hain lekin dharmaraaj se kya chhipa sakte hain? nishchay nahin hai to aise baap ko bhi thagne ki koshish karte hain। lekin saakaar ko bhal thag len, niraakaar baba to sab jaante hain, tumhein is tan se shiksha bhi vahi de rahe hain। tumse bahut poochhte hain ki daada ke tan mein paramatma kaise aate hain? yeh to grihasthi tha। baal bachche the, ismen kaise aate hain, kyon nahin koi saadhu santa ke tan mein aate hain? lekin paramatma ko to patiton ko paavan banaana hai। jo pujaari se poojya bana rahe hain, ye bhi jaise baajoli khelte hain। brahman hi devta phir kshatriy, vaishya.... yeh varna bhi bhaarat mein hain। aur kahaan varna nahin। ab mainen 15 minute bhaashan kiya। aise tum bhi samjha sakte ho। baba karke direct baat karte hain। tum kahenge shivbaaba aise samjhaate hain shiv alag hai, shankar alag hai - yeh bhi saaph-saaph samjhaana hai। yeh hai baba ka parichay dena। jab government ka kitaab nikalta hai - hu is hu। vaise hi hu is hu preordinate drama। ham kahenge oonche te ooncha shivbaaba phir brahma, vishnu, shankar phir lakshmi-naaraayan, raam-seeta phir dharma sthaapan karne vaale। is reeti duniya puraani hoti jaati hai। tum devtaayen vaammaarga mein chale jaate ho। ab baap aakar jagaate hain kehte hain sab mere havaale kar do aur meri mat par chalo। shreemat to unki kahenge।

baaki lakshmi-naaraayan, seeta-raam, jinko yaad karte woh sab vaammaarga mein chale gaye aur kaun shreemat de sakta hai। bhakton ki manokaamna bhi baba hi poori karte, bhal koi kachchha-machchha mein bhaavna rakhe to unki bhi bhaavna main poori karta hoon। uska arth yeh nikaala hai ki kachchha-machchha sabmen bhagwan hai। baba bahut raaz samjhaate hain। lekin samajhne vaale nambarvaar hain to pad bhi nambarvaar hain। ye deity kingdom sthaapan ho rahi hai, dharma nahin। dharma to doosre dharma vaale sthaapan karte hain। shivbaaba to brahma dvaara raajaaon ka raaja banaate hain। raajaaon ka raaja ka arth bhi tumko samjhaaya hai। tumko vikaari raajaayen poojte hain, to kitna bada pad tumko milta hai। baba ki meethi-meethi baaten tumko bahut achhi lagti hain parantu phir uthkar chaay pi to nasha kam ho jaata hai। gaanv mein gaye to ekdam utar jaata hai। yahaan to jaise tum shivbaaba ke ghar mein baithe ho। vahaan bahut farka pad jaata hai। jaise pati jab pardesh jaate hain to patni aansu bahaati hai। woh to koi sukh dete nahin, yeh baba to tumhein kitna sukh dete hain, to inko chhodne mein bhi rona aata hai! bahut kehte hain ham yahaan hi baith jaayen। phir aapke baal bachche kahaan jaayenge? kehte hain aap sambhaalo। ham kitnon ke bachche sambhaalenge! lekin thahro, serviceable bano to tumhaare bachchon ka bhi prabandha ho jaayega। shuru mein thode the to unke bachche sambhaale, ab kitne hain। unhon ke bachche baith sambhaalen, unse koi gum ho jaaye to kahenge hamaara bachcha gum kar diya। jisko sambhaalne rakhen - woh bhi kahenge ham auron ka karmabandhan kyon sambhaalen। achha phir to ek hi shiv bachche ko sambhaalo to woh tumhaare bachche sambhaalenge। baaki aise baba ko kabhi phaarakti mat dena। aise bahuton ne phaarakti di hai। unhon ko moorkhon ke avtaar kahen। bhal koi brahmaakumaar kumaari se rooth jaao lekin shivbaaba se kabhi nahin roothna। woh to tumko raajya-bhaagya dene aaya hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna sab kuchh baap havaale kar poora shreemat par chalna hai। koi bhi bura kaam karke chhipaana nahin hai, judge ko sach bataane se saja kam ho jaayegi।

2) baap se kabhi roothna nahin hai, serviceable banna hai। apne karmabandhan svayan kaantane hain।

vardaan:- sangamayug ki har ghadi ko utsav ke roop mein manaane vaale sada umang-utsaah sampanna bhav

koi bhi utsav, umang utsaah ke liye manaate hain। aap brahman bachchon ki jeevan hi utsaah bhari jeevan hai। jaise is shareer mein shvaans hai to jeevan hai aise brahman jeevan ka shvaans hi umang-utsaah hai। isliye sangamayug ki har ghadi utsav hai। lekin shvaans ki gati sada ekras, normal honi chaahiye। agar shvaans ki gati bahut tej ho jaae ya slow ho jaae to yathaartha jeevan nahin kahi jaayegi। to check karo ki brahman jeevan ke umang-utsaah ki gati normal arthaat ekras hai!

slogan:- sarva shaktiyon ke khajaane se sampanna rehna - yahi brahman swaroop ki visheshta hai।

maateshvari ji ke anmol mahaavaakya

1) yeh jo manushya geet gaate hain O geeta ke bhagwan apna vachan nibhaane aa jaao। ab vo svayan geeta ka bhagwan apna kalpa pahle vaala vachan paalan karne ke liye aaya hai aur kehte hain he bachche, jab bhaarat par ati dharma glaani hoti hai tab main isi samay apna anjaam paalan karne (vaayda nibhaane) ke liye avashya aata hoon, ab mere aane ka yeh matlab nahin ki main koi yuge yuge aata hoon। sabhi yugon mein to koi dharma glaani nahin hoti, dharma glaani hoti hi hai kaliyug mein, to maano paramatma kaliyug ke samay aata hai। aur kaliyug phir kalpa kalpa aata hai to maano main kalpa kalpa aata hoon। kalpa mein phir chaar yug hain, isko hi kalpa kehte hain। aadhaakalpa satayug treta mein satogun satopradhaan hai, vahaan paramatma ke aane ki koi jaroorat nahin। aur phir teesra dvaapar yug se to phir doosre dharmon ki shurooaat hai, us samay bhi ati dharma glaani nahin hai isse siddha hai ki paramatma teenon yugon mein to aata hi nahin hai, baaki raha kaliyug, uske ant mein ati dharma glaani hoti hai। usi samay paramatma aae adharma vinaash kar sat dharma ki sthaapna karta hai। agar dvaapar mein aaya hua hota to phir dvaapar ke baad to ab satayug hona chaahiye phir kaliyug kyon? aise to nahin kahenge paramatma ne ghor kaliyug ki sthaapna ki, ab yeh to baat nahin ho sakti isliye paramatma kehte hain main ek hoon aur ek hi baar aae adharma ka vinaash kar, kaliyug ka vinaash kar satayug ki sthaapna karta hoon to mere aane ka samay sangamayug hai।

2) ab yeh to ham jaante hain ki manushya aatma ki kismat banaane vaala kaun hai aur kismat bigaadne vaala kaun hai? ham aise nahin kahenge ki kismat banaane vaala, bigaadne vaala vahi paramatma hai। baaki yeh zaroor hai ki kismat ko banaane vaala paramatma hai aur kismat ko bigaadne vaala khud manushya hai। ab yeh kismat bane kaise? aur phir gire kaise? is par samjhaaya jaata hai। manushya jab apne ko jaante hain aur pavitra bante hain to phir se vo bigdi hui takdeer ko bana lete hain। ab jab ham bigdi hui takdeer kehte hain to isse saabit hai koi samay apni takdeer bani hui thi, jo phir bigad gai hai। ab vahi phir bigdi takdeer ko paramatma khud aakar banaate hain। ab koi kahe paramatma khud to niraakaar hai vo takdeer ko kaise banaayega? is par samjhaaya jaata hai, niraakaar paramatma kaise apne saakaar brahma tan dvaara, avinaashi knowledge dvaara hamaari bigdi hui takdeer ko banaate hain। ab yeh knowledge dena paramatma ka kaam hai, baaki manushya aatmaayen ek do ki takdeer ko nahin jaga sakti hain। takdeer ko jagaane vaala ek hi paramatma hai tabhi to unhon ka yaadgaar mandir kaayam hai। achha। om shanti।