Daily Murli for Thursday 3 November 2022

03-11-2022 praatahmurli om shanti "baapdaada"' madhuban

“meethe bachche - yeh anaadi khel bana hua hai, ismen har ek paartadhaari ka part apna-apna hai, ek ka part doosre se nahin mil sakta, yeh bhi kudrat hai''

prashn:- bhaktimaarga mein gangaajal ko itna maan kyon dete hain? bhakton ki itni preet gangaajal se kyon?

uttar:- kyonki tum bachche abhi gyaan jal (amrit) se sadgati ko paate ho, tumhaari preet gyaan se hai, jisse tum gyaan ganga ban jaate ho isliye bhakton ne phir paani ko itna maan diya hai। vaishnav log hamesha ganga jal hi kaam mein laate hain। parantu paani se koi sadgati nahin hoti। sadgati to gyaan se hoti hai। gyaan saagar baap tumhein srishti ke aadi-madhya-ant ka gyaan dete hain। aatma ko paavan banaane ka saadhan paani nahin, uske liye to gyaan aur yog ka injection chaahiye jo ek baap ke paas hi hai।

geet:- takdeer jagaakar aai hoon…

om shanti। meethe-meethe bachche jaante hain ki yeh gyaan maarga hai jisse sadgati hoti hai athva svarga ka raajya bhaagya milta hai, isliye inko paathshaala kaho athva college kaho, university kaho baat ek hi hai। university mein badi vidya, unmein chhoti vidya milti hai। hain to sab paathshaalaayen, paathshaala mein kamaai ke liye padhte hain। tum bachche jaante ho hamaari yeh gupta padhaai hai। behad ka baap aakar aatmaon ko padhaate hain। aatmaayen hi padhti hain। agar shreekrishna bhagwan hota to tumhaara buddhiyog unke chitra ki taraph jaata, unki taraph kashish hoti। unke chitra bigar tum rah nahin sakte। parantu shreekrishna to bhagwan hai nahin। to ulta samajhne ke kaaran manushyon ko shreekrishna ki hi yaad rehti hai। jismaani yaad to badi sahaj hai। roohaani yaad mein mehnat hai। poochhte hain baba kaise yaad karen? kisko yaad karen? shreekrishna ka chitra to sweet hai, parampita paramatma to niraakaar hai। woh khud kehte hain, main is bujurga shareer mein baith tum bachchon ko phir se sahaj raajayog aur gyaan sikhlaata hoon। hai bahut sahaj sirf baba ko yaad karna hai। shivbaaba ko yaad to karte hain na। banaaras mein kehte hain shiv kaashi, phir kehte hain vishvanaath ganga। vishvanaath ne ganga laai। ab paani ke ganga ki to baat nahin। gyaan saagar ne yeh gyaan gangaayen laai hain। to gyaan gangaaon ko zaroor gyaan dene vaale gyaan saagar baap ki yaad rahni chaahiye। he gyaan gangaayen, agar tum apne ko gyaan ganga samajhti ho to gyaan saagar ko yaad karo। jo apne ko gyaan ganga nahin samajhte woh agyaani thahre। tum bachche jaante ho hamko gyaan saagar ne srishti ke aadi-madhya-ant ka gyaan diya hai। ab hamko phir sabko jaakar gyaan amrit dena hai। phir koi anchali lete, koi lota bharte। vaishnav jo hote hain unki ganga jal se preet rehti hai। woh hamesha gangaajal kaam mein laate hain। tumhaari phir is gyaan se preet hai kyonki is gyaan se tum sadgati ko paate ho। shivbaaba ne yeh gyaan diya hai ki tum aatma mujh baap ko yaad karo। varse ko bhi tum jaan gaye ho। yeh kaun samjhaate hain? parampita paramatma। kab svapna mein bhi kisko yeh khyaal nahin aayega ki paramatma se varsa kaise milta hai। parampita paramatma ke bigar yeh behad ka varsa mil na sake। parampita maana sabhi manushya maatra ka creator। to rachna ka pita hua na। sirf niraakaar ko hi parampita param aatma kaha jaata hai, unko in aankhon se dekh nahin sakte। bhakti maarga mein divya drishti se dekha jaata hai। yahaan bhi tumne aatma ka saakshaatkaar nahin kiya hai, phir bhi apne ko aatma nishchay karte ho। jaante ho aatma avinaashi hai। aatma nikalne se shareer koi kaam ka nahin rehta। yeh to sab jaante hain aatma ek shareer chhod doosra leti hai। parantu aatma kya cheez hai, yeh koi ko pata nahin। aatma bindi misal ati sookshm te sookshm hai, jo bhrakuti ke beech nivaas karti hai। bilkul chhoti si aatma hai, vahi sab kuchh karti hai। aatma nahin hoti to yeh karmendriyaan bhi chal na saken। aatma ek shareer chhod doosra lekar apna part bajaati hai। har ek ka part apna-apna hai। ek na mile doosre se। actor kabhi ek jaise nahin hote hain। is khel ko koi bhi samajh nahin sakte hain। har ek aatma ka apna-apna part hai। aatmaayen sabhi ek hi roop ki hain। baaki shareer bhinna-bhinna hain। yeh anaadi khel bana hua hai। in baaton ko vishaalbuddhi hi samajh sakte hain। wonder khaana chaahiye - aatma bindi misal unmein 84 janmon ka part avinaashi noondha hua hai jo kabhi vinaash nahin hota, isko kaha jaata hai kudrat। aatma khud kehti hai main ek shareer chhod doosra part bajaata hoon। ham saakshi ho saari srishti ke paartadhaariyon ka act dekhte hain। ham parampita paramatma se apna 21 janmon ke sukh ka varsa phir se le rahe hain jiske liye hamne 2500 varsha (aadhaakalpa) bhakti ki hai। to zaroor bhakton ko bhagwan milna hi hai। ab tumko pata pada hai - number one bhakta, pujaari tum thahre। is drama mein pahle-pahle satayug mein tum devi-devtaaon ka part bajaane aate ho। is samay tum brahman varna mein ho। ham aatma brahma mukh vanshaavli brahman dharma ke hain। abhi padhte isliye hain ki ham brahman dharma se badal daivi dharma mein jaayen। aatma ko gyaan mila hai। gyaan se sadgati hoti hai। jab sadgati milni hoti hai to sabko milti hai। baap kehte hain main hi sarva ka sadgati daata hoon। manushya guru kab hota nahin। hamesha dehi-abhimaani rehna hai। samjho kisko bachcha hai, to samajhna chaahiye yeh karmo ke hisaab-kitaab se bachcha bana, mar gaya to bas ek shareer chhod jaakar doosra liya, hisaab-kitaab itna hi tha, poora kiya, ismen aphsos karne va rone ki baat hi nahin। saakshi ho khel dekhna hai।

tum bachche jaante ho ham 84 janma lete hain। satayug mein ham devi devta the। pahle tum kuchh nahin jaante the। brahma ne bhi bahut guru kiye the parantu inko bhi kuchh pata nahin tha। samajhte the 84 laakh janma hote hain। abhi tum aise nahin kahenge - baap samjhaate hain meethe-meethe sikeeldhe bachche ham hi aakar sabki sadgati karte hain। sabhi dharma vaale bhakta bhagwan ko kis na kis prakaar se yaad zaroor karte hain। kehte hain - O god father, he parampita paramatma... parantu paramatma ko jaante nahin। sirf itna samajhte hain parampita paramatma paramdham mein rehte hain। parantu ham vahaan kaise jaayen, ham to ja nahin sakte। satayugi devtaayen bhi nahin ja sakte, unko 84 janma lene hain। vahaan sukh hai, vahaan khyaal bhi nahin hota, kahaan jaane ka hai। baap ko bhi yaad nahin karte। kehte hain duhkh mein simran sab karen... baap samjhaate hain ham tumko svarga ka maalik banaate hain। vahaan tum sada sukhi rahenge। kalpa ko laakhon varsha aayu de di hai, yeh hai bhool। bhakti mein munjhaara bahut hai। dar-dar dhakka khaana, jap tap teertha aadi karna sab bhakti maarga hai। aadhaakalpa bhakti maarga chalta hai, yeh bhi khel bana hua hai। baap kehte hain sab bachche drama ke vash hain। main bhi bhal creator, director, karnakraavanhaar hoon। parantu main bhi drama ke vash hoon। sivaae ek time, ek shareer ke doosre koi shareer mein aa nahin sakta hoon। kehte hain sadaiv daada ke tan mein aayega aur inko hi brahma banaayega? haan, pahle-pahle inka hi janma lakshmi-naaraayan tha na phir inko hi aadi dev, aadi devi banaayenge। is delvaada mandir mein shiv ka bhi chitra hai। aadi dev, aadi devi bhi hain, bachche bhi hain। sab tapasya mein baithe hain। oopar mein svarga bhi hai, poora yaadgaar khada hai। tum yahaan baithe-baithe daivi jhaad ki sthaapna kar rahe ho। woh hai jad chitra। yahaan tum chaitanya mein baithe ho। tum svarga ki sthaapna kar rahe ho shreemat par। jo achhi tarah padhte padhaate hain woh oonch pad paate hain। lakshmi-naaraayan ne kya purushaartha kiya hoga। tum bhi purushaartha kar rahe ho phir se devta banen to zaroor devtaaon ne pichhle janma mein purushaartha kiya hoga? manushya mrityulok mein rehte hain, devtaayen amarlok mein rehte hain। bhaarat amarlok tha, phir mrityulok hua hai। abhi hai sangam, inko kumbha ka mela kaha jaata hai। kumbha ka sachcha-sachcha mela yeh hai। aatma paramatma milte hain। anek baar mile honge, anek baar milne vaale hain। koi to purushaartha kar poora varsa lenge। koi phir chale jaayenge। (parvaanon ka misaal) aate to bahut hain। tum bachchon ko nishchay hai ki yeh hamaara baapdaada hai। ham brahmaakumaar kumaariyaan hain। brahma bhi shiv ka bachcha hai। ham dharma ke bachche hain। baap ke bachche to sab kahlaate hain। parantu jo ham bi.ke. kahlaate hain to goya ham shivvanshi brahmaakumaar kumaariyaan ho gaye। shivbaaba hai daada, unko mukhya baalak ek hai, ek se phir doosre paida hote hain।

tum jaante ho ham brahma mukh vanshaavli dher hain। dher hote jaayenge, padhaane vaala shivbaaba hai। brahma ki aatma bhi mujhko yaad karti hai, tumhein bhi yaad karna hai। srishti chakra ko yaad karenge to chakravarti raaja banenge। abhi tum svadarshan chakradhaari bante ho। tumhaare mein bhi nambarvaar yeh simran karte hain। gaaya jaata hai na - simar-simar jeevanmukti paao, vahaan duhkh hota nahin। yeh to puraani duniya hai। yeh shareer bhi puraani jutti hai। ghadi-ghadi chattiyaan lagti rehti hain। sarpa ka misaal dete hain na। woh puraani khaal chhod nai le lete hain। nai khaal chamakne lag padti hai। to yeh tumhaare 84 janmon ki puraani khaal bilkul jadajdeebhoot, tamopradhaan hai। ab tumhaari aatma aur shareer donon satopradhaan kaise banen, yeh baap aakar samjhaate hain। meethe-meethe bachche maamekam yaad karo। is yaad roopi agni se jo tumhaare mein khaad padi hai, woh jalkar bhasma ho jaayegi। tumhaari aatma satopradhaan ban jaayegi। phir yeh puraana shareer chhod aatma jaakar doosra shareer legi। baap ki yaad se hi vikarma vinaash honge। bhakti maarga mein bhi simran karte hain na। naam japte hain। pooja karte hain। unko snaan aadi karaate hain। yahaan to shivbaaba ko snaan aadi nahin karaana hai। woh to ashareeri hai। shiv ke mandir mein kabhi shiv ko kapda aadi pahnaakar shrringaarte hain kya? shreekrishna ko, lakshmi-naaraayan aadi ko to kitna shrringaarte hain। niraakaar ka kya shrringaar karenge! to baap kehte hain tum mujh niraakaar shiv ki pooja kyon karte the? zaroor kuchh main karke gaya hoon tab to tum pooja aadi karte ho। tum aatmaayen niraakaar ho - main bhi niraakaar hoon। tum punarjanma lete ho, main punarjanma nahin leta hoon। main aakar tumko svarga ka, 21 janmon ka varsa deta hoon। sannyaasi aadi to gharbaar chhodkar jaate hain। tumko to kuchh chhodna nahin hai। sirf yeh antim janma pavitra ban baap ko yaad karo, bas। yaad se hi tumhaari aatma kanchan ho jaayegi। aatma ko lohe se sona paarasnaath bana dete hain।

tum hi sachchi-sachchi kamaai karte ho। woh jhoothi kamaai bhi bhal karte raho, saath-saath yeh bhi karo। koi bhi paap nahin karna hai। surgeon to ek hai। har ek ke karmo ke hisaab ki beemaari apni hai। baap se koi poochhe to jhat bataayenge ki aise-aise karo। ek baap hi karmaateet avastha mein le jaane vaala hai। yeh hai avinaashi surgeon ki mat। har ek ke jo-jo bandhan hain, woh aakar poochho। bachchiyaan to pati ko bhoon-bhoon kar saath mein le aati hain। unko samjhaati hain - pavitra banne bigar to svarga mein ja nahin sakenge। marna to sabhi ko hai hi। yeh bhi samajh ki baat hai। mrityulok ka yeh ant hai। yeh hai sangam। amarlok ki sthaapna ho rahi hai। abhi ham baap ka bankar arthaat brahman bankar phir devta banenge। phir kshatriy, vaishya, shoodra banenge। yeh mantra kitna achha hai phir bhi tum bhool jaayenge। yog mein nahin rahenge to jo 63 janmon ke paapon ka bojha sir par hai woh kaise bhasma hoga। ganga ke paani se thode hi paap dhulenge। paap aatma par lage hue hain। paapaatma, punyaatma kehte hain na। to tum aatmaon ko paavan banne ka injection chaahiye। woh injection patit-paavan baap ke hi paas hai aur koi ke paas yeh injection hai nahin isliye sab pukaarte hain he patit-paavan aao - aakar ke ham patiton ko gyaan injection do to ham paavan banen। ab bachchon ko yaatra par to chalna hai na। uthte-baithte sadaiv yaatra par raho। baap aur ghar ko yaad karo to kamaai jama hoti rahegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) saakshi ho har ek paartadhaari ka part dekhna hai। baap se 21 janmon ka varsa lene ke liye poora purushaartha karna hai।

2) aatma ko sachcha sona (kanchan) banaane ke liye is antim janma mein pavitra ban baap ko yaad karna hai। sachchi kamaai karni hai।

vardaan:- daata ban akhut khajaanon ka daan karne vaale mahaadaani so vishwa sevaadhaari bhav

sada yaad rakho ki baap dvaara jo bhi akhut khajaane mile hain, woh dene hi hain। khajaanon ko kaarya mein lagaao। chaahe mansa, chaahe vaacha, chaahe sambandh-samparka mein saphal karte chalo, daata ke bachche ek din bhi dene ke bina rah nahin sakte। vishwa sevaadhaari ko har din seva karni hi hai। agar vaacha ka chance nahin milta to mansa karo, mansa nahin kar sakte to apne karma va practical life dvaara karo। jitna aap mansa se, vaani se, svayan sample banenge to sample ko dekhkarke svatah sab aakarshit honge।

slogan:- jiske paas dridhta ki shakti hai uske liye asambhav bhi sambhav ho jaata hai।