Daily Murli for Wednesday 2 November 2022

02-11-2022 praatahmurli om shanti "baapdaada"' madhuban

“meethe bachche - ab shreemat par man aur buddhi ko bhatkaana band karo, ek baap se sambandh jod buddhiyog lagaao to sab bandhan samaapta ho jaayenge''

prashn:- baap sangam par tumhein kaun sa purushaartha karaate hain, jo saare kalpa mein nahin hota hai?

uttar:- bandhanon se buddhiyog nikaal sambandh se buddhiyog jodne ka purushaartha abhi baap tumhein karaate hain। is samay hi ek taraph tumhein sambandh kheenchata to doosre taraph bandhan। yeh yudva chalti rehti hai। aasuri bandhan se eeshvareey sambandh mein aane ka yahi samay hai kyonki eeshvar ko yathaartha roop se tum abhi jaante ho। eeshvar ko sarvavyaapi kahne se sambandh zudne ke bajaae toot jaata hai, buddhi vipreet ho jaati hai isliye jab yathaartha pahchaan mili to sambandh mein aane ka purushaartha karo।

geet:- dheeraj dhar manua …

om shanti। manushya maatra ka man aur buddhi arthaat aatma ka jo man aur buddhi hai woh anek prakaaron ke bhramon mein bhatakta rehta hai। yahaan tum bachche anek prakaar ke bhatakne se chhootne ka purushaartha kar rahe ho। aatma kehti hai mera man bhatakta hai। ab baap kehte hain tumko bhatakne ki darkaar nahin hai। aadhaakalpa tumhaara man buddhi bhatakte-bhatakte hairaan ho gaya। ab shreemat par man buddhi ko bhatkaana banda karo। ek taraph buddhi ka yog lagaao, deh-abhimaan mein aakar bahut bhatke ho। anek prakaar ke mitra sambandhiyon aadi ka bandhan rehta hai। baap kehte hain - un sabko chhodo, ek ke saath sambandh jodo। kehte hain hamaara man bahut bhatakta hai। ek ke sambandh mein jut nahin sakta। ham chaahte bhi hain aise meethe-meethe behad ka sukh dene vaale baap ke saath yog pakka rakhen, kahaan bhi buddhi bhatke nahin। baap kehte hain aadhaakalpa se aasuri mat par bhatakte-bhatakte tum hairaan ho gaye ho। ab yeh bhatakna chhod do। main aatma hoon - yeh bhoolne se samajhte hain main deh hoon। to dehon ke saath sambandh ho jaata hai। baba aise nahin kehte hain ki tod do lekin tum is mrityulok ke bandhan mein rehte hue eeshvareey sambandh ko yaad karo। yeh hai bandhan, woh hai sambandh। bandhan hota hai duhkh ka। sambandh hota hai sukh ka। bandhan aur sambandh donon alag-alag hain। bandhan akshar puraani duniya se, sambandh akshar nai duniya se lagta hai। ab tum nai duniya ke maalik banne vaale ho to nai duniya ke saath sambandh jodo। is bandhan mein rehte hue sambandh ke liye purushaartha karna hai। sambandh kiske saath rakhna hai? aisa to koi hai nahin jo kahe manamnaabhav, madhyaaji bhav aur kahe ki behad ke baap se aur behad sukh ke varse se sambandh rakho। baap hi yeh sambandh judaate hain। jab tum bandhan mein ho to tumko purushaartha karaane vaala koi manushya nahin hai। ek hi baap hai jo bandhan se chhudaakar sambandh mein le jaate hain। bandhan hai maayaavi raajya mein, sambandh hai raamraajya mein va eeshvareey raajya mein, unko eeshvareey raajya aur inko aasuri raajya kaha jaata hai kyonki satayug eeshvar sthaapan karte hain। usmein oonch pad paane ke liye tum bachchon ko purushaartha karaate rehte hain। ab tum sangamayug par ho। sirf sangam par hi sambandh ka purushaartha hota hai aur koi yug mein yeh purushaartha nahin hota।

baap kehte hain main aakar bandhan se chhudaae sambandh mein buddhiyog lagvaata hoon। satayug mein naye sambandh ki praalabdha abhi ke purushaartha se milti hai। jo sambandh ko jaante hi nahin to purushaartha kaise karenge। yeh to zaroor hoga, ek taraph sambandh kheenchega doosre taraph bandhan kheenchega। yeh ladaai hoti hai। satayug, treta mein sambandh ki baat hi nahin। dvaapar, kaliyug mein bhi sambandh ki baat nahin। sangam par hi sambandh aur bandhan ka dhyaan rehta hai। ab tum jaante ho aasuri bandhan se eeshvareey sambandh mein ja rahe hain। sangam hai hi purushaartha ka yug। tumko hi bandhan aur sambandh ka pata hai। aasuri bandhan mein raavan ne laaya। eeshvar phir eeshvareey sambandh mein le jaate hain। baap tumhaara buddhiyog apne saath jodte hain, jisse tum svarga ke maalik bante ho। bhakti mein jo purushaartha karte hain woh hai aythaartha। yathaartha purushaartha parampita hi karaate hain। sarvavyaapi ke gyaan se paramatma se sambandh nahin ho sakta aur hi toot padta hai। ab tumne ek baap ke saath buddhiyog joda hai aur svarga vaikuntha ki raajaai ke liye tum purushaartha kar rahe ho। shaastron mein to bhagvaanuvaach arjun ke prati likh diya hai। sirf ek arjun thode hi hoga। bhagwan ne raajayog to bahuton ko sikhaaya hoga na। nahin to svarga ki raajdhaani kaise sthaapan ho। duniya mein aisa koi manushya nahin jo kahe ki ham bhavishya janma-janmaantar ke liye purushaartha karte hai। yeh sirf tum brahman hi kar sakte ho। yeh nishchay hai ki hamaari daivi raajdhaani drama anusaar zaroor sthaapan honi hi hai। ham na chaahen to bhi zaroor hogi। impossible hai jo sthaapna na ho। drama zaroor sthaapan karaayega। drama hamko zaroor purushaartha karaayega, kalpa pahle muaaphik। parantu chalna hai shreemat par। drama kahkar apni mat nahin chalaani hai। jaante hain drama anusaar bhaarat ko svarga zaroor banna hai, phir bhi oonch martabe ke liye shreemat par purushaartha karaate hain। time bhi batlaate hain। drama plen anusaar baap aaya hai। woh kehte hain yeh sangamayug purushaartha karne ka hai। patit se paavan banna hai। sangam ki bahut mahima hai। woh hai nadiyon aur saagar ka sangam, yeh sangam to tumhaara abhi hota hai। baap kehte hain main is sangam yuge yuge aata hoon। saari duniya patit zaroor banne ki hai। phir patit se paavan duniya zaroor banni hai। jo bhi manushya maatra hain sabko hisaab-kitaab chuktu kar zaroor paavan banna hai। yeh kayaamat ka samay hai, bigar paavan bane koi bhi sazni parampita paramatma saazan ke pichhaadi ja nahin sakti। tumne dekha hai, makkad (tidiyaan) jab udti hain to unka ek leader hota hai, unke pichhaadi hi saara jhunda udta hai। yeh bhi aise hai। saazan aaya hai gul-gul banaane। tum sabhi paavan ban jaayenge phir jab main jaaoonga to tum sabhi aatmaayen sazniyaan dher ke dher mere pichhaadi bhaagengi। tum sajniyaan bhi jaanti ho ki ham yeh shareer chhodkar bhaagenge - saazan ke pichhaadi। bhagwan hai ek, bhaktiyaan hain anek। koi kisko maante, koi kisko maante। koi kehte hain sansaar bana hi nahin hai। jisne jo kaha so maan liya, apni mat athva manushya mat ko bhram kaha jaata hai। baap aakar sabhi bhramon se chhuda dete hain। yeh hai hi duhkhadhaam। ab sukhdhaam jaane ke liye shreemat mil rahi hai। niraakaar baap ki mat mil rahi hai। saakaar manushya se kabhi shreemat nahin mil sakti hai। raavan raajya mein aasuri sampradaay ko sivaae parampita paramatma ke shreemat koi de nahin sakte, jisse woh shreshtha banen। din pratidin manushya aur hi bhrashta hote jaate hain। un sabki utarti kala hai, tumhaari ab chadhti kala hai। tum brahman se devta bante ho phir utarti kala shuru hoti hai। devta se kshatriy, vaishya, shoodra banenge। ab chadhti kala hai। chadhti kala tere bhaane sarva ka bhala। sab muktidhaam mein chale jaayenge aur tum jeevanmukti mein chale jaayenge। bhaarat kabhi khaali nahin hota। svarga jab hota hai tab aur khanda nahin rehta। islaami, bauddhi aadi to baad mein aate hain। unke pahle chandravanshi raamraajya tha। unke pahle sooryavanshi lakshmi-naaraayan ka raajya tha। Christ nahin tha to bauddhi the, bauddhi nahin the to islaami the। islaami nahin the to raamraajya tha। unke pahle sooryavanshi the। ab sooryavanshi, chandravanshi donon gharaane nahin hain। baap aakar 3 dharma sthaapan karte hain। tum brahma mukh vanshaavli sachche brahman devta banne liye purushaartha kar rahe ho। shoodra purushaartha nahin karte, braahmanon ko hi brahma dvaara shreemat milti hai, jisse tum shreshtha devta bante ho। baaki thoda samay hai - vinaash aaya ki aaya। haalten bigadti rehti hain। bigadne mein time nahin lagta। agar ek ne bomb chalaaya to doosre bhi chalaane lag padte। tum sookshm vatan, mool vatan, vaikuntha dekhkar aate ho। saakshaatkaar hota hai। krishnapuri ka bhi saakshaatkaar hota hai, baaki vahaan ja nahin sakte hain। jaane ka samay to tab hoga jab shivbaaba saath mein le jaayenge, baaki saakshaatkaar hota hai।

ab tumhaara mujh eeshvar ke saath sambandh juta hai। tumhaari raavanraajya taraph peeth hai। munh hai raamraajya taraph। abhi tum brahman varna mein ho। varna avinaashi hain। prajaapita brahma ke bachche brahman zaroor chaahiye। tum braahmanon ko varsa daade se milta hai। svarga ki sthaapna karne vaala, raajayog sikhlaane vaala shivbaaba hai। yeh eeshvareey varsa aadhaakalpa chalta hai, phir milta hai aasuri varsa। chadhti kala 21 janmon ke baad poori hogi। phir aasuri raajya shuru hoga, asur yeh raavan hai। parampita paramatma ko kaha jaata hai bindi misal। duniya yeh nahin jaanti ki shiv ka roop kya hai। woh samajhte hain itna bada ling hai। baba kehte hain jaise tum aatma ka roop bindi misal hai। vaise mujh paramatma ka bhi roop bindi misal hai। jaisa tum chamakta hua sitaara ho, vaise main bhi chamakta hua sitaara hoon। main sadaiv paramdham mein rehta hoon, janma-maran mein nahin aata hoon। tum janma-maran mein aate ho। main patit-paavan hoon to zaroor mujhe paramdham mein rehna pade। abhi tumko main paavan bana raha hoon। badi bhaari bheeti hai। (praapti bahut hai) 21 janmon ke liye tum vishwa ke maalik bante ho। puraani duniya ko sirf buddhiyog se bhoolna hota hai। kehte bhi hain yeh bachcha athva yeh dhan eeshvar ne diya hai। ab baap kehte hain ki yeh sab to ab khatma ho jaana hai। yeh to kuchh nahin hai, isse mamatva tod do। bhagwan tumse lekar kya karenge? sirf tum mamatva nikaal do। yeh to bahut thoda hai। ham to return mein tumko svarga ka varsa dete hain। jaise baap naya makaan banaate hain to puraane se mamatva nikal naye se jut jaata hai। tum bachche jaante ho yeh puraani duniya bhasma honi hi hai। abhi hamko nai duniya mein jaana hai isliye mamatva mitaae naye mein jodna hai। kaliyug ke baad satayug aana hai। jaise raat ke baad din aur din ke baad raat aati hai। yeh phir behad ke din aur raat ki baat hai। aadhaakalpa hai gyaan ki praalabdha। aadhaakalpa hai bhakti। jab tamopradhaan, jadajdeebhoot ho jaate hain tab main aata hoon। abhi to bhakti bhi vyabhichaari hai। mujhe kan-kan mein thikkar bhittar mein kah dete hain। patthar ko pooja ke liye rakhte hain। patthar ko hi shiv kehte hain। pooja ke liye yeh patthar ki pratimaayen banaai hain। yeh bhakti maarga ki saamagri bahut hai। janma-janmaantar yagya tap teertha aadi karte, shaastra padhte aaye hain। baap kehte hain ki in sabse tum mujhe praapta nahin kar sakte ho। tum khud hi kehte ho ki he patit-paavan aao। patit aatmaayen to ja nahin sakti। samjhaate to bahut achhi tarah se hain। geet bhi hai ki ab thoda dheeraj dharo। shreemat par chalte chalo to tumhaare sab duhkh door ho jaayenge। 21 janmon ke liye tum phir vishwa ke maalik ban jaayenge। ek hi paarlaukik baap svarga ka varsa dete hain। vahaan duhkh ki koi baat nahin। tum 5 hajaar varsha baad baap se varsa lene aaye ho। jo aakar thoda bahut sunte hain woh bhi svarga mein aayenge, parantu oonch pad nahin pa sakenge। jitna yog mein rahenge utna pavitra hote jaayenge aur oonch pad paayenge। shivbaaba ki yaad mein rehna hai aur srishti chakra ko phiraana hai, doosron ko bhi samjhaana hai isse bahut oonch pad milega। baap kehte hain ajaamil jaise paapiyon ka bhi uddhaar ho jaata hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) mrityulok ke bandhanon mein rehte sukh ke sambandh ko yaad karna hai। apne ko aatma samajh man-buddhi ko bhatkaane se chhudaana hai।

2) puraani duniya khatma honi hai isliye isse mamatva mita dena hai। sab bhramon se buddhiyog nikaalne ke liye shreemat par chalna hai।

vardaan:- kisi bhi baat ko fullstop ki bindi lagaakar samaapta karne vaale sahajyogi bhav

sabhi points ka saar hai - point banna। point roop mein sthit raho to question mark ki queue samaapta ho jaayegi। jab kisi bhi baat mein question aaye to bindi (fullstop) laga do। fullstop lagaane ka sahaj slogan hai -jo hua, jo ho raha hai, jo hoga woh achha hoga, kyonki sangamayug hai hi achhe se achha। achha kahne se achha ho hi jaata hai, isse sahajyogi jeevan ka anubhav karte rahenge।

slogan:- sneh hi sahaj yaad ka saadhan hai, sneh mein sama jaana arthaat sahajyogi banna।