Daily Murli for Thursday 17 November 2022

17-11-2022 praatahmurli om shanti "baapdaada"' madhuban

meethe bachche - tumhein jitna baba kahne se sukh feel hota hai, utna bhakton ko bhagwan va eeshvar kahne se nahin feel ho sakta।

prashn:- lobh ke vash laukik bachchon ki bhaavna kya hoti jo tumhaari nahin ho sakti?

uttar:- laukik bachche jo lobhi hote woh sochte hain ki kab baap mare to property ke ham maalik banen। tum bachche behad ke baap ke prati aisa kabhi soch hi nahin sakte kyonki baap to hai hi ashareeri। yahaan tumko avinaashi baap se avinaashi varsa milta hai।

geet:- mukhda dekh le praani…

om shanti। om shanti। jab do baari kahen to ek baba kehte hain, ek daada kehte hain। ek ko aatma, doosre ko param aatma kaha jaata hai arthaat paramdham mein nivaas karne vaale hain isliye unko param aatma (paramatma) kaha jaata hai। ab aatma aur paramatma ka sambandh kya hai? ek baap aur anek bachche hain। manushya jab pukaarte hain to angreji mein bhi kehte hain O god father। to pita hua na। sirf paramatma va prabhu, eeshvar aadi kahne se itna maza nahin aata। baap kahne se sukh milta hai। paarlaukik baap hai hi sukh dene vaala tab to bhakti maarga mein itna yaad karte hain। god father arthaat woh hamaara pita hai। yeh bhi kehte hain ham sab brothers hain। brotherhood kehte hain। yeh bhaaratvaasi jab kehte hain ham sab bhaai-bhaai hain to aatma ki taraph dhyaan nahin jaata। deh-abhimaan mein chale jaate hain। yeh samajhte nahin ki ham aatmaayen aapas mein bhaai-bhaai hain। ham sabka baap ek hai। agar paramatma sarvavyaapi hota to bhaai-bhaai nahin kehte। aatma hi samajhkar bhaai-bhaai kehte hain। abhi tum bachche baap ke sammukh baithe ho aur baap tumko padhaate hain। ab aatma kehti hai hamko baap mila hai। baap mila goya sab kuchh mila। baap dvaara varsa milta hai। bachcha paida hua aur samajhte hain vaaris aaya। baba kahne se hi bachche ka vaarisapna siddha ho jaata hai। aksar karke bachchiyaan maa, maa kehti hain। maa taraph jaasti lav rehta hai। bachcha hoga to ba,ba kehta rahega। bachche ka baap ki taraph lav jaata hai, maa se varsa nahin mil sakta। baap se varsa milta hai। ab yahaan to tum sab aatmaayen bhaai-bhaai ho। tum har ek baap se varsa le rahe ho। baap ki shreemat hai har ek apne ko baap ka bachcha samajh aur sabko baap ka parichay dete rahen aur srishti chakra ka raaz bhi samjhaayen। baap se hi svarga ka varsa milta hai। behad ka baap kehte hain tum svargavaasi the phir tum narkavaasi kaise banen, 84 janmon ka chakra kaise lagaaya - yeh hai detail ki baaten। baaki baap ne pahchaan to di hai aur baap se zaroor satayug ka varsa milega। achha kisko mila hua hai? yeh lakshmi-naaraayan ke chitra khade hain। inhon ko baap ka varsa mila tha phir kahaan gaya? yeh hai chakra ki baat। tumko abhi satayug ka varsa milta hai phir punarjanma lete-lete 84 janma to bhogne hi hain। ab tumko nambarvaar purushaartha anusaar 84 ka chakra buddhi mein hai aur yeh bhi nishchay hai ki hamaara antim janma hai। 84 janmon ka chakra lagaakar poora kiya hai। ab tum jaayenge to tumhaare peechhe sab chale jaayenge। tum bachche to baap se apna varsa pa chuke ho, raajayog seekh chuke ho। to tum jaante ho ham phir nai duniya mein raajya karne aayenge। phir yeh sab itne dharma vahaan honge nahin, sab vaapis chale jaayenge। phir pahle-pahle hamko yaani Deityism ko aana hai। ham shoodra kul ke the, ab brahman kul ke bane hain। phir sooryavanshi, chandravanshi kul ke banenge। ham brahman kul, sooryavanshi kul aur chandravanshi kul ke teenon varse ek hi baap se le rahe hain। satayug treta mein koi dharma sthaapan karne aata hi nahin hai। bhaarat ka ek hi dharma rehta hai। peechhe baahar vaale islaami, bauddhi aadi aate hain। bhaarat bahut praacheen desh hai। pahle devi-devta hi the, abhi aur dharmon mein convert ho gaye hain। kitni bhinna-bhinna bhaashaayen hain। jaise european hain to America ki bhaasha alag, France ki alag। hain to sab Christian log। vaise cheen ki dekho। ek hi bauddha dharma ke hain, parantu cheen ki bhaasha aur, jaapaan ki bhaasha aur। hain to sab bauddha parantu vriddhi ho jaane se alag-alag ho jaate hain। aapas mein dushman bhi ban jaate hain, bhaarat ka dushman koi nahin hai। yeh to doosre dharma vaale aakar ladte hain। aapas mein phoot daal bhaarat ko bhi lada dete hain, nahin to bhaaratvaasiyon ki aapas mein ladaai aise kabhi hui nahin hai। doosron ne ladaaya, lobh ke kaaran। yeh bhi khel hai। bhaaratvaasi yeh bhi bhool gaye hain ki ham hi vishwa ke maalik the। hamko baap ne raajya diya tha। satayug mein yeh knowledge rehti nahin ki yeh raajya hamne kaise paaya। abhi tum jaante ho ham yeh raajya kaise pa rahe hain। yeh baap baith samjhaate hain। hai bhi bahut sahaj। parantu manushyon ki buddhi ko aisa taala laga hua hai jo yeh nahin jaante ki in lakshmi-naaraayan ko raajya kisne aur kab diya? inhon ke bachche kitne hue, kuchh nahin jaante। satayug mein lakshmi-naaraayan ka raajya tha। satayug ki aayu kitni hai? kah dete laakhon varsha phir laakhon varsha mein gaddiyaan kitni hui? vriddhi kitni hui hogi? kitne mahaaraaja mahaaraani honge। laakhon varsha mein to anginat ho jaaen। laakhon varsha satayug ke, phir treta ke laakhon varsha, kaliyug ke bhi abhi 40 hajaar varsha aur kah dete hain। in baaton mein kiski buddhi nahin chalti। itni lambi aayu de di hai। creator, director, samay aadi sabka maaloom hona chaahiye। parantu kisko bhi pata nahin hai। kehte hain Christ se 3 hajaar varsha pahle bhaarat svarga tha। god goddess ka raajya tha। kitna varsha chala, kaise chala? yeh kuchh bhi jaante nahin। agar raadhe-krishna satayug ke prince princess hain to unhonne bhi koi dvaara pad paaya hoga? agar shreekrishna ne geeta sunaai to kab? yeh sab baaten baap hi samjhaate hain। school mein pahle alpha be padhaaya jaata hai। phir dheere-dheere bada imtahaan paas karte hain। to alpha be ki padhaai aur pichhaadi ki padhaai mein kitna farka hoga। yahaan bhi aise hai। jitna pahle samjhaate the, usse sahaj abhi samjhaate hain, usse jaasti aage samjhaayenge। koi naya aata hai to pahle unse form bharaaya jaata hai, phir samjhaate hain। parampita paramatma ke saath aapka kya sambandh hai? zaroor sabka baap hua na। in baaton ko samajhne vaale hi samajhte hain। jab tak haddi nishchay ho ki behad ke baap se varsa lena hai। baap svarga rachte hain to zaroor svarga ka varsa denge। yeh unhon ki buddhi mein baithega - jinhonne kalpa pahle nishchay kiya hoga।

tum dekhte ho kai bachche savere uth nahin sakte। 10-15 varsha mehnat karte aaye hain to bhi samay par uth nahin sakte। kam se kam 3-4 baje utho। bhakta log bhi savere uthkar dhyaan karte hain। jaap karte hain hanumaan ka, shiv ka। parantu unse koi phaayda nahin। bhal karke koi ke lakshan achhe hote hain parantu unse koi ko mukti-jeevanmukti nahin mil sakti hai। utarti kala hoti hai। lakshmi-naaraayan jo satayug mein raajya karte the। woh bhi doosre teesre janma mein neeche aate jaate hain, utarti kala hoti jaati hai। aadhaakalpa poora hoga to vaam maarga mein chale jaayenge। phir bhaktimaarga shuru hoga, kitne dher mandir bante hain। abhi bhi kitne mandir hain। koi toot bhi gaye hain। vaam maarga mein jaane ke chitra bhi hain। dress devtaaon ki padi hai। vaastav mein dress unhon ki alag thi। peechhe badalti aai hai। koi ki paag kaisi, koi ki kaisi, koi ka taaj kaisa, alag-alag taaj pahanne ka bhi alag-alag namoona hota hai। sooryavanshi raajaayen jo hain unki paharvaais apni-apni hoti hai। yeh phalaane ki pagdi hai। baba ne saakshaatkaar bhi kiya hai। dvaarikaadheesh ki tedhi pagdi thi। yeh sab drama aadi se ant tak jo kuchh ho raha hai, woh phir bhi aise hi hoga। phir vaam maarga mein jaayenge, sabka matbhed ho jaayega। rasam-rivaaj alag ho jaayega। sooryavanshi alag, chandravanshiyon ka alag.... yeh bana banaaya khel hai jo phir repeat hona hai।

tum jaante ho ham bhi behad ke baap se phir se gati sadgati ko paate hain। puraani duniya ka vinaash hona hai। behad ka baap raajayog sikhla rahe hain। yeh duniya nahin jaanti ki raajayog sikhaate hain। tum bachche achhi reeti jaante ho aur tumhaara baap se lav hai। sabka ek jaisa to ho nahin sakta। agyaan mein bhi sabka ek jaisa lav nahin hota। koi lobh vash kehte hain baap mare to property mile..yahaan shivbaaba ka shareer to hai nahin। baba to avinaashi hai। yeh shareer loan par liya hai। tum jaante ho hamne poore 84 janma liye hain। baba to punarjanma nahin lete, is shareer mein pravesh kar aate hain। nahin to kya lakshmi-naaraayan ke tan mein aaye? woh to hain hi paavan duniya ke maalik। yeh to hai hi patit duniya, patit shareer kyonki vish se paida hote hain। baba kalpa pahle muaaphik kehte hain main saadhaaran tan mein pravesh karta hoon। mujhe zaroor anubhvi rath chaahiye। koi achhe actor hote hain to unko achha inaam milta hai। yeh bhi baba ka rath gaaya hua hai। brahma dvaara sthaapna, brahma ko boodha bhi dikhaate hain। prajaapita brahma, vishnu aur shankar ka roop hi alag hai। brahma ka roop bilkul theek hai। baap ne hi inka naam rakha hai prajaapita brahma, isne poore 84 janma liye hain। tum bhi kahenge ham sabne poore 84 janma liye hain tab pahle-pahle baap se mile hain । hamaari raajaai phir se sthaapan ho rahi hai। samjhaana bhi padta hai he parampita paramatma, he bhagwan। to bhagwan zaroor baap ko samajhna chaahiye। parantu manushyon ki samajh mein nahin aata hai ki sabhi aatmaon ka baap niraakaar hai। pita hai tab to bhakti maarga mein sab yaad karte hain। aatmaon ko sukh mila tha tab duhkh mein yaad karte hain। tum bhi aadhaakalpa baap ko yaad karte aaye ho। shuru-shuru mein hi somnaath ka mandir banta hai। to zaroor baap ko hi yaad karenge। jaante hain yeh baap ka mandir hai। baap ne hi varsa diya hai। to pahle-pahle mandir bhi baap ka bana hai। tum abhi baap ke vaaris bane ho। baap vishwa ka rachayita hai। unse hi varsa milta hai। baaki jo bhi hain unhonne kya kiya? ham unki pooja kyon karte hain? 84 janma woh lete hain। parantu bhakti bhi vyabhichaari honi hi hai। aadhaakalpa ke liye saamagri chaahiye। satayug treta mein saamagri ki darkaar nahin hoti। yeh sab buddhi mein dhaaran karna hai। vaastav mein kuchh bhi likhne ki darkaar nahin hai। agar solvent buddhi hain to jhat dhaarna ho jaati hai। baaki kisko sunaane liye notes lete hain। kitaaben aadi rakhne ki jaroorat nahin। hamaare kitaab pichhaadi mein kaun padhega? auron ke shaastra to pichhaadi mein chale aate hain। padhne vaale hain। tumko to padhna hi nahin hai, praalabdha mil gai। aadhaakalpa to shaastra aadi ki koi baat nahin। yeh gyaan praayahlop ho jaata hai। shaastra sab khatma ho jaate hain। pahle sabko yeh samjhaao ki tumko do baap hain। jismaani baap to hai, woh bhi us baap ko yaad karte hain। gaaya jaata hai - duhkh mein simran sab karen... yeh bhaarat ki baat hai। baap bhi bhaarat mein aate hain। shiv jayanti aati hai। tum kahenge ham apne baap ka phalaana janma mana rahe hain। bhal poochhen brahmaakumaar kumaariyaan hain to zaroor baap aaya hoga। yeh hai shiv ka gyaan yagya। to brahman zaroor chaahiye। brahma kahaan se aaya? brahma ko adopt kiya phir bachche paida hote hain to bhi inke mukh kamal se rachte hain। pahle sabko baap ka parichay dena hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uthkar baap ko pyaar se yaad karne ki aadat pakki daalni hai। kam se kam 3-4 baje zaroor uthna hai।

2) behad baap se sachcha lav rakhna hai। shreemat par chal poora varsa lena hai।

vardaan:- companion ke saath dvaara sada manoranjan ka anubhav karne vaale combined roopdhaari bhav

jab bhi akelepan ka anubhav ho to us samay bindu roop ko yaad nahin karo। woh mushkil hoga, usse bor ho jaayenge। us samay apne ramneek anubhvon ki kahaani ko smriti mein laao, apne svamaan ki, praaptiyon ki list saamne laao। sirf dimaag se yaad nahin karo lekin dil se companion ke saath combined ban sarva sambandhon ke sneh ka ras anubhav karo - yahi manamnaabhav hai aur yeh manamnaabhav hona hi manoranjan hai।

slogan:- baap ki shreemat pramaan ji-haazir karte raho to sarvashaktiyon ka adhikaar mil jaayega।