Daily Murli for Friday 18 November 2022

18-11-2022 praatahmurli om shanti "baapdaada"' madhuban

meethe bachche - tumne jeete ji behad ke baap ki god li hai, unki santaan bane ho to shreemat par zaroor chalna hai, har direction amal mein laana hai

prashn:- srishti ki vaanaprastha avastha kab se shuru hoti hai aur kyon?

uttar:- jab shivbaaba is brahma tan mein pravesh karte hain tab se saari srishti ki vaanaprastha avastha shuru hoti hai kyonki baap sabko vaapis le jaane ke liye aaye hain। is samay chhote bade sabki vaanaprastha avastha hai। sabko meethe ghar muktidhaam vaapas jaana hai phir jeevanmukti mein aana hai। vaise bhi baap jab is brahma tan mein pravesh karte hain to inki aayu 60 varsha ki hoti hai। inki bhi vaanaprastha avastha hoti hai।

geet:- marna teri gali mein…

om shanti। yeh kiski gali mein aakar marna hota hai? manushya chaahte hain ki ham muktidhaam mein jaayen। parampita paramatma, shivbaaba ki vijay maala mein piro jaaen। bachche jaante hain jo bhi manushya maatra ki aatmaayen hain woh baap ke gale ka haar zaroor hain। jaise laukik baap ki rachna, laukik baap ke gale ka haar hai। bachche baap ko, baap bachche ko yaad karte hain। vaise vaastav mein jo bhi aatmaayen hain woh sab yaad karti hain parampita paramatma baap ko। woh hai had ka baap, yeh hai behad ka baap। har ek manushya chaahte hain - ham mukti praapta karen kyonki niraakaar ke gale ka haar arthaat mukti aur vishnu ke gale ka haar arthaat jeevanmukti। baap mukti aur jeevanmukti dete hain। behad ke baap ke bachche banenge to unke gale ka haar honge। laukik maa baap ke gale ka haar hain bachche। woh khud maa baap bhi kisi ke bachche hote hain। gaate hain tum maat-pita.. jab ham tumhaare gale ka haar banenge tab ham sada sukhi honge। behad ke baap ko yaad karte hain parantu unke gale ka haar kaise banenge, woh aash rehti hai। so to jab trimoorti shivbaaba aaye, aakar teenon ko rache - brahma, vishnu, shankar ko, tab brahma dvaara behad baap ke gale ka haar ban saken। pahle laukik maa baap ke gale ka haar hain। unse jeete ji markar paarlaukik baap ka banen tab varsa mile। jaise koi saahookaar, gareeb ke bachche ko adopt karte hain to aakar saahookaar ki god lete hain - jeete ji। woh gareeb bhi jeete to hain na। donon yaad rehte hain। tumko bhi laukik aur paarlaukik donon sambandh yaad hain। donon se milan hota hai। tumne paarlaukik maa baap ki god li hai, unse sukh ghanere lene liye। woh hui had ki god, yeh hai behad ki god। jeete ji god li hai। jaante ho inki god lene se ham devi-devta kul mein sukh ghanere paayenge। to jis maat-pita ki santaan bane ho unko zaroor yaad karna pade। shreemat to gaai hui hai na। ab tum practical unki mat par chal rahe ho। aise bhi nahin jhat se sab adopt ho jaate hain। nahin। aahiste-aahiste bante hain। ab devi-devta dharma ki sthaapna ho rahi hai। jhaad dheere-dheere vriddhi ko paata hai। Christian ka bhi pahle Christ aata hai। phir 10-20-50 badhte jaate hain। yeh jhaad yahaan saamne badhta hai। Christ chala jaata hai phir bhi aakar ant mein shaamil hota hai। yeh to behad ka baap hai। bahuton ko shivbaaba ke gale ka haar banna padega tab phir vishnu ke gale ka haar banenge। shivbaaba to hai niraakaar। brahma dvaara mukh vanshaavli rachte hain। trimoorti shiv ka bhi arth hai। trimoorti brahma ka arth nahin nikalta। baba correction bhi karte rehte hain। gole ke neeche likhna hai svadarshan chakra (na ki charkha) us government ka charkha laga hua hai। yahaan svadarshan chakra hai। din-pratidin correction hoti rehti hai।

baba ne samjhaaya hai - hamesha trimoorti shiv jayanti kehna hai। shivbaaba brahma dvaara varsa dete hain। shiv baba hai to varsa bhi saath mein zaroor chaahiye। to yeh vishnu hai varsa। phir shankar dvaara vinaash gaaya hua hai, isliye trimoorti ka chitra hai mukhya। trimoorti chitra chala aaya hai। vahaan bhi tum raajya karte ho to takhta ke pichhaadi vishnu ka chitra rehta hai। yeh jaise kot oph arms hai। iska arth manushya nahin jaante। baap ne tum bachchon ko samjhaaya hai, yeh gyaan abhi tumko mila hai, devtaaon ke paas yeh gyaan nahin rehta। teesra netra tum braahmanon ka khulta hai। baap kitna sahaj samjhaate hain, manamna-bhav। baap aur varse ko yaad karo। brahma mukh vanshaavli ho na। tum gyaan gangaayen bhi thahre। tum ho gyaan saagar dvaara brahma mukh kaval se nikli hui mukh vanshaavli, gyaan kumaar, kumaariyaan। to tum ho gyaan saagar ke bachche।

vaastav mein sachcha-sachcha teertha to yeh hai। aatmaon aur paramatma ka yeh hai sachcha sangam। gyaan saagar aur gyaan gangaayen। yeh badi gupta samajhne ki baaten hain। moti buddhi vaale yeh nahin samajh sakenge। unhon ke liye phir sahaj yukti hai - shivbaaba aur varse ko yaad karo - in dvaara। yeh buddhi mein hone se khushi ka paara chadhega। godly student life hai na। behad ka baap hamko padha rahe hain। abhi tumhaari buddhi mein raajayog ka gyaan hai, jisse tum praalabdha paate ho। vahaan is knowledge ki darkaar nahin। darkaar yahaan hai। baap kehte hain kalpa-kalpa main aakar raajayog sikhlaata hoon। rachna ke aadi-madhya-ant ka raaz samjhaata hoon ki yeh chakra kaise phirta hai। mahima saari sangam ki hai, jabki patit-paavan baap aakar puraani duniya se nai duniya mein le jaate hain। puraani duniya ke vinaash ke liye taiyaariyaan ho rahi hain। dekhte ho aajkal duniya mein kya ho raha hai। aaj baadshaah hai kal military bigadti to baadshaah ko bhi kaidi bana dete hain। koi ko bhi maar daalte hain। aise bahut case hote rehte hain। aajkal koi baat par bharosa nahin। duhkh hi duhkh hai। aaj kisko bachcha hua, khushi hogi। kal mar gaya to duhkh। hai hi duhkh ki duniya। ab baap nai sukh ki duniya ka laayak bana rahe hain। baap samjhaate hain bachche tum so devi-devta the, abhi asur ban pade ho। kal tum devtaaon ki mahima gaate the, apne ko paapi neech kehte the। kehte hain ham nirgun haare mein... to zaroor koi par taras kiya hoga। in devtaaon ko kisne gunvaan banaaya, yeh abhi tum jaante ho। parampita paramatma bigar koi devta bana na sake। manushya bilkul vikaari patit ban pade hain। boodhe ho jaate hain to bhi vikaar nahin chhodte। nahin to kaayda hai 60 varsha ke baad vaanaprastha lena chaahiye। pahle aise karte the। 60 varsha ke andar apna bojha utaarkar bachchon ko de dete the। ab 60 varsha ki aayu mein bhi bachche paida karte rehte hain। baap kehte hain inki 60 varsha ki aayu mein bahut janmon ke ant ke ant mein, jab inki vaanaprastha avastha hui tab mainne pravesh kiya, tab isne bhi sab kuchh chhoda। baap ke aane se saari duniya ke liye vaanaprastha avastha ho jaati hai kyonki sabko jaana hai vaapis isliye baap kehte hain maamekam yaad karo। chhota va bada koi bhi rahega nahin।

baap aakar sabko meetha banaate hain। mukti-jeevanmukti donon meethe dhaam hain। vinaash sabka hona hai। hisaab-kitaab chuktu bhi sabka hota hai। saza khaane mein deri nahin lagti। jaise kaashi kalvat khaate hain to paapon se mukta ho jaate hain। phir nayesir hisaab shuru ho jaata hai। baaki mukti mein ek bhi nahin jaate। woh samajhte hain shiv par kurbaan ho nirvaan-dhaam chale jaayenge। baap kehte hain vaapis koi ja nahin sakte। punarjanma to sabko lena hai। yeh pahla number hi poore punarjanma lete hain। to zaroor peechhe vaale bhi lenge। tumne 84 janma liye hain। shuru se hi tumhaara part chalta hai। tumhaara yeh hai kalyaankaari leap janma। is janma mein athva is dharmaau yug mein tum dharmaatma bante ho। woh sab hain had ki baaten। woh hai dharmaau maas, dharmaau varsha, yeh hai dharmaau yug। yeh leap janma braahmanon ka ek hi hai। brahman hain choti phir tum devta banenge। ab tum jaante ho baba hamko gale ka haar banaate hain। ham aatmaayen niraakaari duniya mein rehti hain। baap khud kehte hain tum jab ashareeri the to mere paas rehte the। abhi tum samajh gaye ho - ham pahle-pahle satayug mein aayenge। vahaan hai devi-devta dharma। vahaan purushaartha karne ki jaroorat nahin। purushaartha sangam par hi kiya jaata hai। sangamayug yeh hai aur jo sangam hote hain, unki aayu nahin gini jaati। is sangam ki aayu hai। bahut chhota sa yug hai। is sangamayug mein hi baap aakar inko badli karte hain। baaki un yugon ka kuchh nahin hai। do kala kam hone se raajya badli hota hai। yeh tumko saakshaatkaar hota hai, kaise raajya dete hain। sangamayug mein baap aakar patiton ko paavan banaate hain isliye is yug ki aayu - jab se baap aaya hai tab se ginenge। to zaroor woh aaya hua hai, vahi gyaan ka saagar hai। unki mukh vanshaavli, gyaan nadiyaan yeh brahmaakumaar, kumaariyaan hain, inse hi gyaan paana hai। baba ne kaha hai koi aisi nai cheez banaao jo samjhaana sahaj ho। usmein trimoorti shiv jayanti likho। baba direction dete hain parantu banaane vaala hoshiyaar chaahiye। is gyaan yagya mein vighna bhi kisam-kisam ke padte hain, phir service dheeli ho jaati hai। shivjayanti aai ki aai। bade dhoom-dhaam se manaani hai। dehli mein to bahut dhoomdhaam ho sakti hai। donon ke kot oph arms dikhaayenge। ham apni eeshvareey baat karte hain। baap hai hi kalyaankaari। bachche bhi auron ka kalyaan karte rehte hain। to baap dekhkar khush hota hai। kaha jaata hai charity begins at hom। mitra sambandhiyon ko bhi samjhaana hai। nahin to ulhana denge। points bahut achhi milti hain। chitra bhi achhe hain। maala bhi kitni achhi hai। rudra maala ban phir vishnu ki maala banti hai।

tum brahman ho sachchi-sachchi geeta sunaane vaale। sachchi-sachchi yaatra ka raaz tum samjhaate ho। yahaan baithe tum yaad ki yaatra mein raho to paap bhasma ho jaayenge। tamopradhaan se satopradhaan banne ka aur koi upaay nahin। yog ki bahut mahima hai। mehnat bhi ismen hai। bahut toofaan aate hain। sahaj bhi hai to mushkil bhi hai। tumhaari yog tapasya ke bhi chitra hain। raajaai ka bhi chitra hai। raajayog se tum devta bante ho। tum raajarishi ho, woh hathayog rishi hain। tumko natural jataayen hain। abhi ham sab baba ke gale ka haar hain, sab bhaai-bhaai hain। baap se varsa bhi milta hoga। prajaapita brahma bhi gaaya hua hai। woh niraakaar pita yeh saakaar pita। shankar ke liye dikhaate hain aankh kholi vinaash hua। shankar ko paarvati, ganesh aadi dikhlaakar grihasthi bana diya hai। andhashradha bahut hai। baap kehte hain mainne tumko saahookaar banaaya tha। tumne mandir banaakar, shaastra banaakar, daan kar phaaltu kharcha karte-karte durgati ko pa liya। yeh bhi drama mein noondh thi tab to baap baith samjhaate hain। baba tumko trikaaldarshi banaate hain। teenon kaalon ka gyaan tumhaari buddhi mein hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yeh dharmaau yug hai। is samay dharmaatma banna hai। sabka kalyaan karna hai। mukti aur jeevanmukti mein chalne ka raasta bataana hai।

2) hamaari yeh godly student life hai। behad ka baap hamko padha raha hai। is khushi mein rehna hai।

vardaan:- yog ki current ke vibration dvaara kile ko majboot karne vaale yagya rakshak bhav

jaise brahman family badhaane ki planning karte ho, aise ab yeh bhi plan karo jo koi bhi aatma brahman parivaar se kinaare nahin ho jaae। kile ko aisa majboot banaao jo koi ja hi nahin sake। jaise chaaron or current ki taaren laga dete hain to aap bhi yog ke vibration dvaara current ki taaren laga do। jab is yagya ke kile ko apne yog ke powerful vibration dvaara majboot banaane ka sankalp emerge ho tab kahenge yagya rakshak।

slogan:- gyaani tu aatma woh hai jiska karma saadhaaran hote bhi sthiti purooshottam ho।