Daily Murli for Tuesday 20 December 2022

20-12-2022 praatahmurli om shanti "baapdaada"' madhuban

“meethe bachche - tumhein khushi honi chaahiye ki ham abhi yeh duniya, yeh sab kuchh chhod apne ghar shantidham jaayenge phir sukhdhaam mein aayenge''

prashn:- is naazuk raaste mein nirantar aage badhne ke liye kaun si khabardaari zaroor rakhni hai?

uttar:- kabhi bhi koi vyartha va shaitaani baaten sunaaye to uska mitra nahin bano। haan ji karke glaani ki baaten sunna maana baap ka naapharmaanbardaar banna, isliye merciful ban uski aadat ko mitaana hai। baap ka pharmaanbardaar banna hai। gyaan ka surma pahan lena hai। yahi bahut naazuk raasta hai jismen khabardaar hokar chalne se hi aage badhte rahenge।

geet:- is paap ki duniya se…

om shanti। meethe bachche ab tum samajhdaar bane ho aur feel karte ho ki pahle ham kitne besmajh the। yeh bhi samajh mein nahin aata tha ki yeh patit duniya hai aur isi bhaarat mein jab devi devtaaon ka raajya tha to paavan sukhi the। usmein koi duhkh ki baat nahin thi। parantu yeh bhi nishchay nahin hota tha ki svarga mein sadaiv sukh hoga। svarga ka kisko pata nahin tha। manushya to samajhte hain vahaan bhi duhkh tha। yeh hai besamjhi। ab tum bachche samajhdaar bane ho। baap ne aakar samjhaaya hai। unki shreemat par tum chal rahe ho। manushya kehte bhi hain ki yeh patit duniya hai। svarga paavan duniya thi। paavan duniya mein bhi duhkh ho phir to duhkh ki hi duniya hui। phir geet bhi wrong ho jaata hai। kehte hain he baba aisi jagah le chalo jahaan aaraam, sukh chain ho। bachche yeh bhi jaante hain svarga sone ki chidiya thi। devi-devta the, kehte bhi hain ham ek do ko duhkh nahin dete the। parantu phir kah dete ki yeh duhkh sukh sab parampara se chala aata hai। krishna par bhi jhoothe kalank laga diye hain। kaha jaata hai jaisi patiton ki drishti vaisi srishti, samajhte hain saari srishti patit hi hai। is samay unhon ki drishti hi patit hai to saari srishti ko hi patit samajhte hain। kah dete hain parampara se yeh patitapna chala aata hai।

abhi tum bachchon mein samajh aati jaati hai - so bhi nambarvaar purushaartha anusaar। bachchon ko parampita paramatma ke direction milte hain। aatmaon ko baap baith samjhaate hain, sab aatmaayen patit hain isliye patit aatma ko paap-aatma kaha jaata hai। baap aatmaon se baat karte hain - tum hamaare avinaashi bachche ho। phir mama baba bhi kehte ho। is duniya mein kisko bhi pitaashri nahin kah sakte। shri maana shreshtha parantu yahaan ek bhi manushya shreshtha hai nahin। yeh to ek ki hi mahima ho sakti hai। bhal tum inko is samay kehte ho kyonki sannyaas kiya hua hai shreshtha banne ke liye। tum jaante ho ham abhi pharishte banne vaale hain। lekin chalte-chalte, shreshtha bante-bante jhat maaya raavan thappad lagaakar bhrashta bana deti hai। bhrashta ko shri kah nahin sakte। shri lakshmi, shri naaraayan। shri raadhe, shreekrishna kehte hain। mandiron mein bhi jaakar unhon ki mahima gaate hain। apne ko shreshtha kah nahin sakte। ab tum bachchon ne samjha hai bhaarat shreshtha tha। vahaan moot paleeti nahin the। shuddh shreshtha the। baap ki mahima hai na - moot paleeti kapdon ko dhokar kanchan kar dete hain। is samay to sabhi patit hain। barobar hai bhi raavan raajya। manushya raavan ko varsha-varsha jalaate hain। parantu jalta hi nahin phir phir khada ho jaata hai। yeh bhi manushyon ko samajh mein nahin aata jabki jala dete hain phir har varsha naya kyon banaate hain? isse siddha hota hai raavan raajya gaya nahin hai। svarga mein jab raamraajya hota hai tab vahaan raavan ki effigy nikaalenge nahin। kehte hain raavan ko jalaaya phir lanka ko loota। raavan ki lanka soni bataate hain। parantu aisa hai nahin। yeh to saari duniya lanka hai। yeh island hai na। saare world par raavan ka raajya hai। yeh bhi tum bachche samajhte ho। college mein koi besmajh jaakar baithe to kya samajh sakenge। kuchh bhi nahin। vesta aaph time karenge। yeh eeshvareey college hai, inmen naya aadmi koi samajh nahin sakenge isliye 7 roj quarantine mein bithaana pade। jab tak laayak banen। phir bhi achha aadmi, religious minded hai to unse poochhna hai parampita paramatma tumhaara kya lagta hai? woh hai aatmaon ka pita aur prajaapita bhi to baap hai। yeh point badi achhi hai। parantu bachche is par itna harshit nahin hote hain। baap kehte hain tumko nai-nai point sunaata hoon jisse tumko nasha chadhe। kisko samjhaane ki yukti aaye। tum form bharaakar poochh sakte ho ki parampita paramatma se tumhaara kya sambandh hai? kahega parampita to pita hua na, phir us samay sarvavyaapi ka gyaan hi ud jaayega। tum jab prashn poochhenge to kahenge woh to baap hai। ham sab bachche hain। itna maan le to likha lena chaahiye। prajaapita ke bhi bachche thahre। woh shiv ho gaya daada aur woh baba। shivbaaba svarga ki sthaapna karne vaala hai to zaroor unse hi varsa milega। bahut sahaj te sahaj baaten nikaalni padti hain। mitra-sambandhiyon aadi ke paas jaao, unko bhi yeh samjhaao। yeh to nasha hai na ham baapdaada se varsa paate hain। maata se varsa nahin milega। baap ko hi svarga ki sthaapna karni hai na। vahi maalik hai। jaise inko daade ke varse ka hak hai, vaise potre-potriyon ko bhi hak hai। baap kehte hain mujhe yaad karo। aise nahin kehte ki is dehdhaari ko bhi yaad karo। baap sammukh baat kar rahe hain। kalpa pahle bhi aise samjhaaya tha। parantu bachchon ko deh-abhimaan bahut aa jaata hai। dehdhaariyon se lav ho jaata hai। baap kehte hain he aatmaayen tum to ashareeri aai thi phir part bajaate ab 84 janma poore kiye hain। abhi main kehta hoon tumko vaapis chalna hai। maamekam yaad karo to vikarma vinaash honge। dehdhaari ko yaad karne se vikarma vinaash nahin honge। tum vaayda karte ho baba ham aapko hi yaad karenge। tumko is puraani duniya mein ab rehna hi nahin hai, ismen koi chain nahin isliye kehte ho aisi jagah le chalo jahaan sukh chain ho। tum bachche jaante ho ham pahle jaayenge shantidham mein। vahaan sukh ka naam nahin lenge। shanti hi shanti hogi। phir jaayenge sukhdhaam mein। vahaan phir shanti ka naam nahin lenge। jab duhkh hai to ashaanti hai। sukh mein to shanti hai hi। parantu woh shantidham nahin। shantidham hai aatmaon ka sweet hom। baap saare aadi madhya ant ko jaanne vaala hai। ab tum bachchon ka dhandha hi hai padhna-padhaana aur phir apne shareer nirvaah arth karma bhi karna hai।

tum jaante ho ham is mrityulok se amarlok chale jaayenge via shantidham। yeh buddhi mein yaad rakhna hai jab tak tum transfer ho jaao। apni padhaai ki result tak padhna pade। jab tak mrityu nahin hua hai, padhna hi hai। yeh to yaad kar sakte ho na ki ab hamko jaana hai ghar। yeh duniya, yeh sab kuchh chhodna hai। khushi honi chaahiye। behad naatak ka raaz bhi samajh gaye ho। had ka naatak poora hota hai to kapde badli kar ghar chale jaate hain। vaise hamko bhi jaana hai। 84 janmon ka chakra poora hota hai। yaad bhi karte hain he patit-paavan aao। shivbaaba ko hi yaad karenge। ek taraph kehte patit-paavan aao doosre taraph phir sarvavyaapi kah dete। koi arth hi nahin nikalta। bachchon ko kitna sahaj reeti samjhaate hain - shantidham ko yaad karo। yeh duhkhadhaam hai, iska vinaash bhi saamne khada hai। yeh vahi mahaabhaarat ladaai hai। yooropvaasi yaadav bhi hain aur kaurav paandav bhaai-bhaai hain। ham ek hi ghar ke hain na। bhaai-bhaai mein yuddha ho nahin sakti। yahaan to yuddha ki baat hi nahin। parantu manushyon ka bhi dhandha hai ek do ko ladaana। yeh to ek rasam hai। sab ek do ke dushman hain। bachcha bhi baap ka dushman ban padta hai। mrityulok ki rasam-rivaaz bhi sabki apni-apni hai। baap ka plan dekho kitna bada hai। sabke plans khatma kar dete aur sukhdhaam ki sthaapna karte hain। baaki sabko shantidham mein bhej dete hain। tum bachche dekhte ho ham kiske saamne baithe hain। nishchay hai parampita paramatma gyaan ka saagar hai। in organs dvaara hamko knowledge de rahe hain aur koi satsang aisa hoga kya। yahaan baap saamne baith samjhaate hain। jaante ho baap ham aatmaon se baat karte hain। ham kaanon se sunte hain। baba is daada ke mukh dvaara bolte hain। jo ratna baba ke mukh se nikalte vahi tum bachchon ke mukh se nikalne chaahiye। sadaiv mukh se ratna hi nikle। phaaltu shaitaani baaten sunni bhi nahin chaahiye। kai to badi khushi se baith sunte hain। baap kehte hain aisi baaten suno va kisko karte hue dekho to baba ko bataao to baba samjhaani denge। nahin to woh pakke ho jaate hain। parantu aisa hota rehta hai। baba ko sunaate nahin hain ki baba yeh phaaltu baaten sunaate hain, inko mana ki jaaye to aadat mit jaae। baap sabha mein samjhaayenge parantu aise ke phir mitra ban jaate hain। maaya achhe-achhe bachchon ki buddhi bhi patthar bana deti hai। baap ke pharmaanbardaar bachche bante hi nahin hain, bada naazuk raasta hai। ismen badi khabardaari rakhni chaahiye। merciful ban kismen aadat hai to mitaani chaahiye। haan ji karke sunna nahin chaahiye। baba jo sukhdhaam ka maalik banaate hain, aise baba ki glaani to ham kabhi nahin sunenge। hamko to shivbaaba se varsa lena hai aur baaton se kya tailuk। koi sune na sune ham to gyaan ka surma pahan len। koi gyaan anjan paate hain koi to phir dhool anjan paate hain। usse gyaan ka teesra netra khulta hi nahin hai। baba itna to sahaj kar samjhaate hain jo kaisa bhi rogi, andha, langada ho woh bhi samajh jaaye। alpha aur be do akshar hain। baap samjhaate hain bachche, mitra-sambandhiyon aadi se bhi dosti rakho। bahut meetha bano। tumhaara kaam hi hai baap ka parichay dena। bhal dushman ho to bhi mitrata rakhni hai। bahut meetha banna hai। baap kehte hain tumne aasuri mat par mujhe kitni gaali di hai, mera apkaar kiya hai phir bhi main tum par kitna upkaar karta hoon। eeshvar ka apkaar hona bhi drama mein noondh hai। tab to kehte hain yada yadaahi.. aaya bhi bhaarat mein hai। samjha bhi rahe hain। bachchon ko har ek baat achhi reeti samajhni hai। kiski takdeer mein nahin hai to phir vahi aasuri dhandha karte rahenge। yahaan se baahar gaye aur in baaton ko bhool jaayenge। ninda karte-karte yeh haal ho gaya hai। ab yeh ninda karna to chhod do। tumhaara naam to likha hua hai prajaapita brahmaakumaar-kumaariyaan। samajh jaayenge shiv ke potre potriyaan thahre। zaroor svarga ka varsa milta hoga। bhaarat ko varsa tha ab nahin hai phir ab milta hai। satayug mein sirf sooryavanshi hi the। ab tum baap ko yaad karo to vikarma vinaash honge aur vahaan pahunch jaayenge। kitna achhi reeti samjhaate hain। tum bachchon ko bhi service karni hai parantu pahle apni vritti bhi achhi chaahiye। sirf pandit nahin banna hai। pakke yogi, raajarishi honge to doosre ko teer lagega। khud mein hi koi kami hogi to doosre ko bol nahin sakenge। lajja aati rahegi, apna paap andar khaata rahega। har baat ke liye baba samjhaate bahut achha hain। kalpa pahle bhi aise hi samjhaaya tha। devi-devta dharma to zaroor sthaapan hoga koi padhe na padhe। phir bhi baap kehte hain kuchh samajhdaar bano। is kamaai aur us kamaai ko buddhi mein rakho। sachchi kamaai baap hi karaate hain। baap aur svarga ko yaad karna, yeh bhoolo mat। simran karte-karte ant mati so gati ho jaayegi। savere uth baap ki yaad mein baitho। agar susti aati hai to samjha jaata takdeer mein nahin hai। aisi practice karni hai jo ant mein deh bhi yaad na pade। ham aatma hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni vritti ko shuddh rakh dushman ko bhi mitra banaana hai। apkaari par bhi upkaar kar baap ka sachcha parichay dena hai।

2) jo ratna baba ke mukh se nikalte hain vahi ratna nikaalne hain। koi bhi vyartha baaten na sunni hai na sunaani hai।

vardaan:- sangamayug ke samay ka mahatva jaan parmaatma duaaon se jholi bharne vaale maayaajeet bhav

sangamayug ka ek second aur yugon ke ek varsha se bhi jyaada hai, is samay ek second bhi ganvaaya to second nahin lekin bahut kuchh ganvaaya। itna mahatva sada yaad rahe to har second parmaatma duaayen praapta karte rahenge aur jiski jholi parmaatma duaaon se sada bharpoor hai uske paas kabhi maaya aa nahin sakti। door se hi bhaag jaayegi। to samay ko bachaana - yahi teevra purooshaartha hai। teevra purooshaarthi arthaat sada maayaajeet।

slogan:- jo aagyaakaari hain vahi baap ki va parivaar ki duaaon ke paatra hain।