Daily Murli for Saturday 21 January 2023

21-01-2023 praatahmurli om shanti "baapdaada"' madhuban

“meethe bachche - baap ki duaayen leni hain to har kadam shreemat par chalo, chaal-chalan achhi rakho''

prashn:- shivbaaba ki dil par kaun chadh sakta hai?

uttar:- jinki guarantee brahma baba leta ki yeh bachcha serviceable hai, yeh sabko sukh deta hai। mansa, vaacha, karmana kisi ko duhkh nahin deta। aise jab yeh (brahma baba) bole, tab shivbaaba ki dil par chadh sakte hain।

prashn:- is samay tum roohaani servant baba ke saath kaun si seva karte ho?

uttar:- saare vishwa ki to kya lekin 5 tatvon ko bhi paavan banaane ki seva tum roohaani servant karte ho isliye tum ho sachche-sachche social worker।

geet:- le lo duaayen maa baap ki…

om shanti। bachchon ne geet suna। aise to laukik maa-baap ki duaayen anek lete hain। bachche paanv padte hain maa-baap aasheervaad karte hain। yeh dhindhora laukik maa-baap ke liye nahin pitaaya jaata hai। dhindhora arthaat jisko bahut sunen। yeh to behad baap ke liye hi gaaya jaata hai tum maat-pita ham baalak tere... tumhaari kripa va dua se sukh ghanere। bhaarat mein hi yeh mahima gaai jaati hai। zaroor bhaarat mein hi yeh hua hai tab to gaaya jaata hai। ekdam behad mein chala jaana chaahiye। buddhi kehti hai svarga ka rachayita baap ek hi hai। svarga mein to sabhi sukh hain। vahaan duhkh ka naam-nishaan ho nahin sakta isliye hi gaate hain ki duhkh mein simran sab karen sukh mein kare na koi। aadhaakalpa duhkh hai to sabhi simran karte hain। satayug mein athaah sukh hain, to vahaan simran nahin karte hain। manushya pattharbuddhi hone kaaran kuchh bhi samajhte nahin hain। kaliyug mein to athaah duhkh hain। kitni maaraamaari hai। kitne bhi padhe likhe viddhaan hain, parantu in geeton ka arth bilkul nahin jaante hain। gaate hain tum maat pita... parantu samajhte nahin hain ki kaun se maata pita ki mahima hai। yeh to bahuton ki baat hai na। eeshvar ki santaan to sabhi hain, parantu is samay to sabhi duhkhi hain। sukh ghanere to kisko nahin hain। kripa se to sukh milna chaahiye। akripa se duhkh hota hai। baap to kripaalu gaaya hua hai। saadhu santon ko bhi kripaalu kehte hain।

ab tum bachche jaante ho bhakti maarga mein gaate hain tum maat pita... yeh bilkul yathaartha hai, parantu koi buddhivaan hoga to poochhega ki paramatma ko to god father kaha jaata hai, unko phir mother kaise kehte hain? to unki buddhi jagat amba ke taraph jaayegi। jab jagat amba ki taraph buddhi jaati hai to phir jagat pita ke taraph bhi buddhi jaani chaahiye। ab brahma sarasvati yeh koi bhagwan to nahin hain। yeh mahima unki ho nahin sakti। unke aage bhi maata-pita kehna wrong hai। manushya gaate to parampita paramatma ke liye hain, parantu jaante nahin hain ki woh maat-pita kaise bante hain। ab tum bachchon ko kaha jaata hai le lo, le lo duaayen maa baap ki... arthaat shreemat par chalo। apni chaal-chalan achhi ho to apne par aapehi duaayen ho jaayengi। agar chalan achhi nahin hogi, kisko duhkh dete rahenge, maat-pita ko yaad nahin karenge athva doosron ko yaad nahin karaayenge to duaayen mil nahin sakti। phir itna sukh bhi nahin pa sakenge। baap ki dil par chadh nahin sakenge। is baap ki (brahma ki) dil par chadhe to goya shivbaaba ki dil par chadhe। yeh gaayan hai hi us maat-pita ka। buddhi us behad ke maat-pita ke taraph chali jaani chaahiye। brahma ki taraph bhi koi ki buddhi nahin jaati hai। bhal jagat amba ki taraph koi ki jaati hai। unka bhi mela lagta hai, parantu occupation ko koi jaante hi nahin। tum jaante ho hamaari sachchi-sachchi maata kaayde anusaar yeh brahma hai। yeh bhi samajhna hai। yaad bhi aise karenge। yeh maata bhi hai to brahma baba bhi hai। likhte hain shivbaaba care of brahma। to maata bhi ho jaati hai to pita bhi ho jaata। ab bachchon ko is pita ki dil par chadhna hai kyonki inmen hi shivbaaba pravesh hote hain। yeh jab guarantee dete hain ki haan baba yeh bachcha bahut achha serviceable hai, sabhi ko sukh dene vaala hai। mansa-vaacha-karmana kisko duhkh nahin deta hai tab hi shivbaaba ki dil par chadh sakta hai। mansa-vaacha-karmana se jo karo, jo bolo usse sabko sukh mile। duhkh kisko nahin dena hai। duhkh dene ka vichaar pahle mansa mein aata hai phir karmana mein aane se paap banta hai। mansa toofaan to zaroor aayenge parantu karmana mein kabhi nahin aao। agar koi ranja (naaraaj) hota hai to baap se aakar poochho - baba is baat se hamaare se yeh naaraaj rehte hain, to baba samjhaayenge। koi bhi baat pahle mansa mein aati hai। vaacha bhi karmana hi ho gaya। agar bachchon ko maa-baap ki aasheervaad leni hai to shreemat par chalna hai। yeh badi guhya baat hai jo ek ko hi maata pita kehte hain। yeh brahma baap bhi hai to badi maa bhi hai। ab yeh baba kisko maa kahe? yeh maata (brahma) ab kisko maa kahe? is maa ki to maa koi ho nahin sakti। jaise shivbaaba ka koi baap nahin, aise inhen apni koi maa nahin।

mukhya baat bachchon ko yeh samjhaate hain ki agar mansa, vaacha, karmana kisko duhkh denge to duhkh paayenge aur pad bhrashta ho padenge। sachche saaheb ke aage sachcha rehna hai, inse bhi sachcha rehna hai। yeh daada hi certificate denge ki baba yeh bachcha bada sapoot hai। baba mahima to karte hain। jo serviceable bachche hain tan-man-dhan se service karte hain, kabhi bhi kisko duhkh nahin dete hain, vahi baapdaada aur maa ki dil par chadhte hain। inki dil par chadhe maana unke takhta par chadhe। hamesha sapoot bachchon ko yeh vichaar rehta hai ki ham gaddi nasheen kaise banen। yahi taat lagi rehti hai। gaddi to nambarvaar 8 hain। phir 108 phir 16108 bhi hain, parantu abhi ham oonch pad paayen। aise to shobhta nahin jo do kala kam hon tab gaddi par baithen। sapoot bachche bahut purushaartha karenge ki hamne agar abhi laadle baba se sooryavanshi ka poora-poora varsa nahin liya to kalpa-kalpa nahin lenge। abhi agar vijay maala mein nahin piroye to kalpa-kalpa nahin piroyenge। yeh kalpa-kalpa ki race hai। abhi agar ghaata pada to kalpa-kalpa padta hi rahega। pakka vyaapaari woh jo shreemat par maa baap ko poora follow kare, kabhi kisko duhkh na de। usmein bhi number one duhkh hai kaam kataari chalaana।

baap kehte hain achha shreekrishna bhagvaanuvaach samjho, to woh bhi number one hai। unki baat bhi maanni chaahiye tab to svarga ke maalik banenge। samajhte hain shreekrishna bhagwan ne shreemat se shiksha di hai। achha unki mat par chalo। usne bhi kaha hai ki kaam mahaashatru hai, bhala unko jeeto। in vikaaron ko jeetenge tab hi krishnapuri mein aa sakenge। ab shreekrishna ki to baat nahin। shreekrishna to bachcha tha, woh kaise mat denge। jab bada hokar gaddi par baithega tab woh mat dega। mat dene ke laayak banenge tab to raajya chalaayenge na। ab shivbaaba to kehte hain mujhe niraakaari duniya mein yaad karo। shreekrishna phir kahenge ki mujhe svarga mein yaad karo। woh bhi kehte hain kaam mahaashatru hai, in par jeet pahno। vahaan vish nahin milega, to vish ko chhod pavitra bano। yeh to shreekrishna ka baap baith samjhaate hain। achha samjho manushyon ne mera naam nikaal bachche ka naam daal diya hai, woh bhi to sarvagun sampanna hai। woh bhi kehte hain, geeta mein likha hua hai ki kaam mahaashatru hai। unko bhi maante thode hi hain। un par bhi chalte thode hi hain। samajhte hain shreekrishna khud aaye tab ham unki mat par chalenge tab tak to gota hi khaate rahenge। sannyaasi aadi kah nahin sakte ki main tumko raajayog sikhlaane aaya hoon। yeh to baap hi samjhaate hain aur sangam ki hi baat hai। shreekrishna hai satayug mein। unko bhi aisa laayak banaane vaala koi to hoga na। to shivbaaba khud kehte hain shreekrishna aur unke saare gharaane ko ab main svarga mein jaane laayak bana raha hoon। baba kitni mehnat karte hain ki bachche svarga mein chal oonch pad paayen। nahin to padhe likhe ke aage jaakar bhari uthaayenge। baap se to poora varsa lena hai। apne se poochho ham itne sapoot hain? sapoot bhi nambarvaar hote hain। uttam, madhyam, kanishta। uttam to kabhi chhipe nahin rehte। unki dil mein raham aayega ham bhaarat ki seva karen। social workers bhi nambarvaar hote hain - uttam, madhyam, kanishta। kai to bahut lootte hain, maal bechkar kha jaate hain। phir unko sapoot social worker kaise kahenge? social workers to apne ko bahut kahlaate hain kyonki society ki seva karte hain। sachchi seva to baap hi karte hain।

tum kehte ho ki ham bhi baba ke saath roohaani servant hain। saari srishti to kya tatvon ko bhi pavitra karte hain। sannyaasi to yeh nahin jaante ki tatva bhi is samay tamopradhaan hain, inko bhi satopradhaan banaana hai। satopradhaan tatvon se tumhaara shareer bhi satopradhaan ban jaayega। baba samjhaate to bahut hain parantu bachche phir bhi bhool jaate hain। yaad unko rahega jo auron ko sunaate rahenge। daan nahin karenge to dhaarna bhi nahin hogi। jo achhi service karte hain, unka baapdaada bhi naam baala karte hain। yeh to bachche bhi jaante hain ki service mein kaun-kaun teekhe hain। jo service par hain woh dil par chadhte hain। sadaiv follow maa-baap ko karna hai। unke hi takhtansheen banna hai। jo service par honge woh doosron ko sukh denge। apna munh darpan mein dekho ki baba ka sapoot bachcha bana hoon? khud bhi likh sakte hain ki hamaari service ka yeh chart hai। main yeh-yeh service kar raha hoon, aap judge karo। to baap ko bhi maaloom pade। khud bhi judge kar sakta hai ki main uttam hoon, madhyam hoon ya kanishta hoon? bachche bhi jaante hain kaun mahaarthi hain, kaun ghodesvaar hain। koi bhi chhipa nahin rah sakta hai। baap ko potaamel bheje to baba saavdhaan bhi kare। bigar potaamel bhi saavdhaani to milti rehti hai। ab jitna varsa lena ho poora-poora le lo। phir baapdaada se bhi certificate milega। yeh badi maa baithi hai, inse certificate mil sakta hai। is wonder-full mummy ko koi mummy nahin। jaise us baap ko koi baap nahin। phir mama females mein number one hai। drama mein jagat amba gaai hui hai। service bhi bahut ki hai। jaise baba jaate hain, mama bhi jaati thi। chhote-chhote gaanvon mein service karti thi। sabmen teekhi gai। baba ke saath to bada baba hai, isliye bachchon ko inki sambhaal rakhni padti hai। satayug mein praja bahut sukhi rehti hai। apne mahal, gaayen, bail aadi sab kuchh hote hain।

achha - bachche, khush raho aabaad raho, na bisro na yaad raho kyonki yaad to shivbaaba ko karna hai। apne shareer ko bhi bhool jaana hai to auron ko kaise yaad karen। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi ko bhi naaraaj nahin karna hai। mansa-vaacha-karmana sabko sukh de baap ki aur parivaar ki duaayen leni hain।

2) sapoot bachcha ban bhaarat ki roohaani seva karni hai। merciful ban roohaani social worker banna hai। tan-man-dhan se seva karni hai। sachche saaheb ke saath sachcha rehna hai।

vardaan:- bol par double underline kar har bol ko anmol banaane vaale ma. satguru bhav

aap bachchon ke bol aise hon jo sunne vaale chaatrak hon ki yeh kuchh bolen aur ham sunen - isko kaha jaata hai anmol mahaavaakya। mahaavaakya jyaada nahin hote। jab chaahe tab bolta rahe - isko mahaavaakya nahin kahenge। aap satguru ke bachche master satguru ho isliye aapka ek-ek bol mahaavaakya ho। jis samay jis sthaan par jo bol aavashyak hai, yuktiyukta hai, svayan aur doosri aatmaon ke laabhdaayak hai, vahi bol bolo। bol par double underline karo।

slogan:- shubhchintak mani ban, apni kirnon se vishwa ko roshan karte chalo।