Daily Murli for Wednesday 1 February 2023

01-02-2023 praatahmurli om shanti "baapdaada"' madhuban

“meethe bachche - tumhaari nazar kisi bhi deh-dhaari ki taraph nahin jaani chaahiye, kyonki tumhein padhaane vaala svayan niraakaar gyaan saagar baap hai''

prashn:- oonch pad ke liye kaun si ek mehnat tum bachche grihastha vyavhaar mein rehte bhi kar sakte ho?

uttar:- grihastha vyavhaar mein rehte sirf gyaan kataari chalaao। svadarshan chakradhaari bano aur shankh dhvani karte raho। chalte-phirte behad ke baap ko yaad karo aur usi sukh mein raho to oonch pad mil jaayega। yahi mehnat hai।

prashn:- yog se tumhein kaun sa double faayda hota hai?

uttar:- ek to is samay koi vikarma nahin hota hai, doosra past ke kiye hue vikarma vinaash ho jaate hain।

geet:- maata tu hai sabki bhaagya vidhaata…

om shanti। satsang va college aadi jo hote hain vahaan dekhne mein aata hai - kaun padhaate hain। nazar padti hai jisma par। college mein kahenge phalaana professor padhaate hain। satsang mein kahenge phalaana vidvaan sunaate hain। manushya par hi nazar jaati hai। yahaan tumhaari nazar kisi dehdhaari par nahin jaati hai। tumhaari buddhi mein hai ki niraakaar parampita paramatma is tan dvaara sunaate hain। buddhi chali jaati hai maat-pita aur baapdaada taraph। bachche sunaate hain - to kahenge gyaan saagar baap dvaara suna hua sunaate hain। farka pad gaya na। satsangon mein kuchh bhi sunte hain to samajhte hain phalaana yeh ved sunaate hain। manushyon ki martabe par, jaati-paanti par drishti jaati hai। yeh hindu hai, yeh musalmaan hai, drishti vahaan chali jaati hai। yahaan tumhaari drishti jaati hai shivbaaba taraph। shivbaaba padhaate hain। abhi baap bhavishya nai duniya ke liye varsa dene aaye hain aur koi aise kah na sake ki he bachchon tumko svarga ke liye raajayog sikhla rahe hain। ab yeh geet bhi suna। geet to hai past ka। aise jagat amba thi। barobar usne saubhaagya banaaya, jiske mandir bhi hain। parantu woh kaun thi, kaise aai, bhaagya kaunsa banaaya, kuchh bhi nahin jaante। to is padhaai aur us padhaai mein raat-din ka farka hai। yahaan tum samajhte ho gyaan saagar parampita paramatma brahma mukh dvaara padhaate hain। baap aaya hua hai। bhakton ke paas bhagwan ko aana hi hai। nahin to bhakta bhagwan ko kyon yaad karte hain? sab bhagwan hain - yeh to wrong ho jaata hai। woh sarvavyaapi ke gyaan vaale apni baat ko siddha karne liye bhi apna 20 naakhoonon ka jor dete hain। tumhaara samjhaana alag ho jaata hai। behad ke baap se bachchon ko hi varsa milta hai। sannyaasiyon ka hai hi vairaagya maarga, nivritti maarga। unse kabhi bhi property ka hak mil na sake। woh property chaahte hi nahin। tum to sada sukh ki property chaahte ho। narka ke dhan daulat mein duhkh hai। bhal dhanvaan hain parantu chalan aisi gandi chalte hain, paisa udaate rehte hain। phir bachche bhookh marte hain। to apne ko bhi duhkhi, bachchon ko bhi duhkhi karte hain। yeh hai behad ka baap, woh baith bachchon ko samjhaate hain। woh to bhinna-bhinna anek baap hain, jinse alpakaal ke liye varsa milta hai। bhal raajaayen hain woh bhi had ke ho gaye। had ka alpakaal ka sukh hai। yeh behad ka baap avinaashi sukh dene aate hain। samjhaate hain bhaaratvaasi jo double sirtaaj the svarga ke maalik the, ab narka ke maalik ban pade hain। narka mein hai duhkh, baaki aise koi nadiyaan aadi nahin hain jaise raurav narka, vishay vaitarni nadi aadi ke chitra garud puraan mein dikhaate hain। yeh to sazaayen khaani hoti hain। to woh rochak baaten likh di hain। aage to jo jis ang se bura kaam karte the to woh ang unka kaata jaata tha। bahut kadi saja milti thi। ab itni kadi saja nahin milti hai। phaansi ki saja koi kadi nahin hai। woh to bahut easy hai। manushya aapghaat bhi bahut khushi se karte hain। shiv par devtaaon par jhat bali chadh jaate hain। tum jaante ho aatma duhkhi hoti hai to chaahti hai ek shareer chhod jaakar doosra le leven। woh aapghaat karne vaale aise nahin samajhte hain। woh to yahaan hi ek shareer chhod phir bhi yahaan hi ganda janma le lete hain। gyaan to hai nahin, sirf shareer ko khatma kar dete hain - duhkh ke kaaran। phir bhi duhkhi janma hi paate hain। tum to jaante ho ham to nai duniya ke laayak ban rahe hain। jeevghaat karne vaalon mein bhi variety hoti hai। jaise koi-koi stri pati ke pichhaadi apna shareer homti hai। (sati ho jaati hai) woh baat alag hai। samajhte hain ham patilok mein jaayengi kyonki suna hua hai, bahuton ne kiya hai। shaastron mein bhi hai ki pati lok mein jaati hai। parantu woh pati to kaami thahra। phir bhi isi mrityulok mein hi aana pade। yahaan to gyaan chita par baithne se svarga mein chale jaate hain।

abhi tum bachche jaante ho ki yeh jagat amba, jagat pita jo sthaapna arth nimitta bane hue hain, yahi phir svarga mein paalan-karta banenge। manushya to jaante nahin vishnu kul kisko kaha jaata hai। vishnu to hai sookshmavtanvaasi, unka phir kul kaise ho sakta? abhi tum jaante ho vishnu ke do roop lakshmi-naaraayan ban paalna karte hain, raajya karte hain। yeh hai gyaan chita। tum yog lagaate ho us ek patiyon ke pati saath। woh hai shivbaaba, vahi patiyon ka pati, pitaaon ka pita hai। sab kuchh woh ek hi hai। usmein sarva sambandh aa jaate hain। baap kehte hain is samay ke jo bhi chaache kaake aadi tumhaare hain, woh sab tumko duhkh ki raay bataayenge। ulte raaste ki aasuri mat hi denge। behad ka baap aakar bachchon ko sulti mat dete hain। samjho laukik baap kehte hain college mein padhkar barrister aadi bano। woh koi ulti mat thode hi hai। shareer nirvaah arth to woh right hai। woh purushaartha to karna hi hai। unke saath-saath phir bhavishya 21 janmon ke shareer nirvaah arth bhi purushaartha karna hai। padhaai hoti hi hai shareer nirvaah ke liye। shaastron ki padhaai bhi hai nivritti maarga vaalon ke shareer nirvaah arth। woh apne shareer nirvaah arth hi padhte hain। sannyaasi bhi shareer nirvaah arth koi 50, koi 100, koi hajaar bhi kamaate hain। ek hi kashmeer ka raaja mara to kitne paise mil gaye aarya samaajiyon aadi ko। to yeh sab karte hi hain pet ke liye। sampatti bigar to sukh hota nahin। dhan hai to motor aadi mein ghoomte hain। aage sannyaasi paise ke liye sannyaas nahin karte the, woh to chale jaate the jangal mein। is duniya se tang ho apne ko chhudaate hain। parantu chhoot nahin sakte। baaki pavitra rehte hain। pavitrata ke bal se bhaarat ko thamaate hain। yeh bhi bhaarat ko sukh dete hain। yeh pavitra nahin bante to bhaarat tu mach veshyaalay ban jaata। pavitrata sikhlaane vaale ek yeh nivritti maarga vaale hain, doosra hai baap। woh hai nivritti maarga vaali pavitrata। yeh hai pravritti maarga ki pavitrata। bhaarat mein pavitra pravritti maarga tha। ham devi-devtaayen pavitra the। ab apvitra ban gaye hain। poora aadhaakalpa 5 vikaaron dvaara ham apvitra bante hain। maaya ne thoda-thoda karte poora hi apvitra, patit bana diya hai। duniya mein yeh koi bhi manushya nahin jaante ki ham paavan se patit kaise bante hain। samajhte bhi hain ki yeh patit duniya hai। samjho kisi makaan ki aayu 100 varsha hai, to kahenge 50 varsha naya, 50 varsha puraana, aahiste-aahiste puraana hota jaata hai। is srishti ka bhi aise hai। ekdam nai duniya mein sukh hota hai phir aadha ke baad puraani hoti hai। gaaya bhi jaata hai satayug mein athaah sukh hai। phir puraani duniya hoti hai to duhkh shuru hota hai। raavan duhkh dete hain। patit raavan ne kiya hai, jiska but jalaate hain। yeh bada dushman hai। koi ne government ko apply kiya ki raavan ko nahin jalaaya jaae, bahuton ko duhkh hota hai। raavan ko vidvaan bataate hain। minister aadi koi bhi samajhte nahin hain। abhi tum jaante ho ki raavan ka raajya dvaapar se shuru hota hai। bhaarat mein hi raavan ko jalaate hain। baap samjhaate hain dvaapar se yeh bhakti, agyaan maarga shuru hota hai। gyaan se din, bhakti se raat।

ab dekho jagat amba ka geet gaate hain। parantu samajhte nahin ki saubhaagya vidhaata kaise hai। kitna bada mela lagta hai। parantu jagdamba hai kaun, yeh bhi jaante nahin। bangaal mein kaali ko bhi bahut maante hain, parantu jaante nahin hain ki kaali aur jagdamba mein kya farka hai। jagdamba ko gora dikhaate hain, kaali ko kaala bana diya hai। jagdamba hi lakshmi banti hai to gori hai। phir 84 janma lete-lete kaali ho jaati hai। to manushya kitne moonjhe hue hain। vaastav mein kaali athva amba hai to ek hi। kuchh bhi nahin jaante - isko kaha jaata hai andhashraddha। abhi tum bachche jaante ho jo past mein jagat amba thi - usne bhaarat ka bhaagya banaaya tha। tum bhi bhaarat ka saubhaagya bana rahe ho। maataaon ka hi mukhya naam hai। sannyaasiyon ka bhi maataaon ko uddhaar karna hai। yeh bhi noondh hai। parampita paramatma ne direction diya hai, inhon ko gyaan baan maaro। tum bachchiyaan bhi sannyaasiyon aadi se milti ho to samjhaati ho ki hamko gyaan saagar parampita paramatma padhaate hain। tum had ke sannyaasi ho, ham hain behad ke। hamko baap raajayog sikhlaate hi tab hain jabki tumhaara hathayog poora hona hai। hathayog aur raajayog donon ikatthe rah nahin sakte। to time koi ab jaasti nahin hai, bahut thoda time hai। baap kehte hain bachche grihastha vyavhaar mein rehte kamalphool samaan bano। braahmanon ko hi kamalphool samaan rehna hai। kumaariyaan to hain hi pavitra, kamalphool samaan। baaki jo vikaar mein jaate hain unko kehte hain pavitra bano। grihastha vyavhaar mein rehte kamal phool samaan bano। har ek svadarshan chakradhaari bano। shankh bajaao। gyaan kataari chalaao to beda paar ho jaayega। mehnat hai, mehnat bigar itna ooncha pad pa nahin sakte। chalte-phirte usi sukh mein raho। baap ko yaad karo। jo bahut sukh dete hain unki yaad rehti hai na। ab tumhein yaad karna hai behad ke baap ko। unka hi parichay dena hai। samjhaana hai bolo, tum raaj-vidya is janma mein padhkar barrister aadi banenge। achha samjho, padhte-padhte athva imtahaan paas karte tumhaari aayu poori ho jaaye, shareer chhoot jaaye to padhaai yahaan hi khatma ho jaayegi। koi imtahaan paas kar london gaya, vahaan mar pada to padhaai khatma ho jaayegi। woh hai hi vinaashi padhaai। yeh hai avinaashi padhaai। iska kabhi vinaash nahin hota hai। tum jaante ho nai duniya mein aakar hamko raajya karna hai। woh hai alpakaal ka sukh। so bhi jab naseeb me ho। pata nahin kitna samay chale। yahaan to certain hai। imtahaan poora hua aur tum jaakar 21 janma ka raajya-bhaagya lenge। had ke baap, teacher, guru se had ka hi varsa milta hai। samajhte hain guru se shanti mili। are yahaan thode hi shanti ho sakti hai। organs se kaam karte-karte thak jaate hain to aatma shareer se detach ho jaati hai। baap kehte hain shanti to tumhaara svadharma hai। yeh organs hain, kaam nahin karne chaahte ho to chup ho baith jaao। ham ashareeri hain, baap se yog lagaate hain to vikarma vinaash ho jaayen। bhal koi sannyaasi se tumko shanti mile parantu usse vikarma vinaash nahin ho sakta। yahaan baap ko yaad karne se vikarmaajeet bante jaayenge। achha vo shanti mein baithe hain, karke vikarma bhi vinaash honge। double faayda hoga। puraane vikarma bhi vinaash hote hain। sivaae is yogbal ke puraane vikarma kisi bhi haalat mein kiske vinaash ho nahin sakte। praacheen yog bhaarat ka hi gaaya hua hai। isse hi janma-janmaantar ke vikarma vinaash hote hain aur koi upaay hai nahin। abhi yeh vriddhi banda honi hai। government bhi chaahti hai vriddhi jaasti na ho। ham to vriddhi itni kam karte hain jo bahut thode rahenge, baaki sab chale jaayenge। manushya samajhte bhi hain ki vinaash hoga parantu ladaai ko banda dekh phir samajhte hain pata nahin hoga ya nahin। thande ho jaate hain। baap samjhaate hain - bachche samay baaki thoda hai isliye gaphlat mat karo। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shareer se detach ho, ashareeri ban sachchi shanti ka anubhav karna hai। baap ki yaad se svayan ko vikarmaajeet banaana hai।

2) avinaashi praalabdha banaane ke liye avinaashi padhaai par poora dhyaan dena hai। ulti sab maton ko chhod ek baap ki sulti mat par chalna hai।

vardaan:- oonchi stage par rah prakriti ki halchal ke prabhaav se pare rahne vaale prakritijeet bhav

maayaajeet to ban rahe ho lekin ab prakritijeet bhi bano kyonki abhi prakriti ki halchal bahut honi hai। kabhi samudra ka jal apna prabhaav dikhaayega, to kabhi dharni apna prabhaav dikhaayegi। agar prakritijeet honge to prakriti ki koi bhi halchal hila nahin sakegi। sada saakshi hokar sab khel dekhenge। jaise pharishton ko sada oonchi pahaadi par dikhaate hain, aise aap pharishte sada oonchi stage par raho to jitna oonchen honge utna halchal se svatah pare ho jaayenge।

slogan:- apne shreshtha vibration se sarva aatmaon ko sahayog ki anubhooti karaana bhi tapasya hai।

is maas ki sabhi murliyaan (eeshvareey mahaavaakya) niraakaar paramatma shiv ne brahma mukhakmal se apne brahmaavatson arthaat brahmaakumaar evan brahmaakumaariyon ke sammukh 18-1-1969 se pahle uchchaaran ki thi। yeh keval brahmaakumaareez ki adhikrit teacher bahnon dvaara niymit BK vidyaarthiyon ko sunaane ke liye hain।