Daily Murli for Saturday 25 February 2023

25-02-2023 praatahmurli om shanti "baapdaada"' madhuban

“meethe bachche - shri shri ki shreshtha mat par chalne se hi tum nar se shri naaraayan banenge, nishchay mein hi vijay hai''

prashn:- eeshvar ki direct rachna mein kaun si visheshta avashya honi chaahiye?

uttar:- sada harshit rahne ki। eeshvar ki rachna ke mukh se sadaiv gyaan ratna nikalte rahen। chalan badi royal chaahiye। baap ka naam badnaam karne vaali chalan na ho। rona, ladna-jhagadna, ulta sulta khaana… yeh eeshvareey santaan ke lakshan nahin। eeshvar ki santaan kahlaane vaale agar rote hain, koi akartavya karte hain, to baap ki ijjat ganvaate hain isliye bachchon ko bahut-bahut sambhaal karni hai। sada eeshvareey nashe mein harshitmukh rehna hai।

om shanti। bachchon ka mukhda dekhna padta hai। yeh koi saadhu santa nahin, baapdaada aur bachche hain। isko kaha jaata hai eeshvareey kutumba parivaar। eeshvar yaani parampita, jinka bachcha hai yeh brahma, phir tum ho brahmaakumaar kumaariyaan। woh hai world ka father। yoon saari duniya ke teen father to hote hi hain। ek niraakaar baap, doosra prajaapita brahma, teesra phir laukik baap। parantu yeh kisi ko bhi pata nahin hai। chitra aadi bhi banaate hain lekin jaante nahin ki yeh kab aaye the? shiv ka bhi chitra hai। brahma, vishnu, shankar ka bhi chitra hai। parantu woh kya part bajaate hain? unhon ka naam kyon gaaya jaata hai.... yeh koi bhi nahin jaante। bhal bahut padhe hue hain, laakhon ki sankhya lecture sunne jaati hai। parantu tum bachchon ke aage jaise kuchh bhi nahin jaante। bilkul hi tuchchha buddhi hain। baba aakar tumko svachchha buddhi banaate hain। tum sab kuchh jaante ho। oonch te oonch baap hai। ab nai rachna rach rahe hain। nai duniya mein nai rachna chaahiye na। gaandhi ji bhi kehte the nai duniya, naya raajya chaahiye। bhaarat hi hai jismen ek raajya satayug mein hota hai। sirf sooryavanshi lakshmi-naaraayan ka raajya hota hai phir chandravanshi ka raajya hota hai to sooryavanshi praayahlop ho jaata hai। phir kaha jaata hai chandravanshi raajya। haan, woh jaante hain ki lakshmi-naaraayan ho karke gaye hain। parantu kahlaayega raam-seeta ka raajya। to brahma koi creator nahin hai। rachayita ek baap hai। shivbaaba rachta aate hain, aakar batlaate hain ki main kaise nai rachna rach raha hoon। brahma dvaara tum braahmanon ko rach raha hoon। to baap se zaroor varsa milna chaahiye। yeh thodi si baat bhi koi samajh jaae to 21 janmon ke liye aho saubhaagya। kabhi bhi duhkhi va vidhva nahin honge। yeh kiski buddhi mein poora nasha hi nahin hai। hai bahut sahaj।

geet:- takdeer jagaakar aai hoon...

om shanti tum aate ho is paathshaala mein, kiski paathshaala hai? shreemat bhagvat ki paathshaala। phir unka naam geeta rakh diya hai। shreemat shreshtha te shreshtha paramatma ki hai, woh apne bachchon ko shreshtha mat de rahe hain। aage to tum raavan ki aasuri mat par chalte aaye ho। ab eeshvar baap ki mat milti hai। main sirf tumhaara baap nahin hoon। tumhaara baap bhi hoon, teacher bhi hoon, satguru bhi hoon। jo hamaare bante hain, kehte hain shivbaaba brahma mukh dvaara ham aapke ban gaye। pratigya karte hain main aapki hoon, aapki hi rahoongi। baba bhi kehte hain tum hamaare ho। ab meri mat par chalna। shreemat par chalne se tum so shreshtha lakshmi-naaraayan ban jaayenge। guarantee hai। kalpa pahle bhi tumko nar se naaraayan, naari se lakshmi banaaya tha। aisa koi manushya kah na sake। kisko kahne aayega nahin। yeh baap hi kehte hain mere bachche main tumko raajayog sikhlaakar phir se svarga ka maalik banaata hoon। satayug hai allaah ki duniya। bhagavti, bhagwan ko allaah kahenge। is samay sab ulte latke hue hain। cheel aakar toonga lagaati hai na। yahaan bhi maaya toonga laga deti hai। duhkhi hote rehte hain। abhi baap kehte hain tumko in duhkhon se, vishay saagar se ksheer saagar mein le chalte hain। ab ksheer-saagar to koi hai nahin। kah dete hain vishnu sookshm vatan mein ksheersaagar mein rehte hain। yeh akshar mahima ke hain। ab main gyaan saagar tum bachchon ko svarga ka maalik banaata hoon। tum kaam chita par baithne se jalkar kaale ban jaate ho, main aakar tum par gyaan varsha karta hoon, jisse tum gore ban jaate ho। shaastron mein yeh akshar hain, sagar raaja ke bachche jal mare the। baaten to bahut bana di hain। abhi baap kehte hain yeh sab baaten buddhi se nikaalo। ab meri suno। sanshaybuddhi vinashyanti। ab mujh par nishchay rakho to nishchaybuddhi vijayanti। vijay maala ke daane ban jaayenge। maala ka raaz bhi samjhaaya hai। jo achhi service karte hain unki vijay maala banti hai। sabse achhi service karne vaale daane roodra maala mein aage jaate hain। phir vishnu ki maala mein aage jaayenge। nambarvaar 108, phir 16000 ki bhi maala add karo। aise nahin satayug treta mein sirf 108 hi prince-princess honge। vriddhi hote maala badhti jaati hai। praja ki vriddhi hogi to zaroor prince-princess ki bhi vriddhi hogi। baap kehte hain kuchh bhi nahin samjho to poochho। he mere laadle bachche mujhe jaanne se tum srishti jhaad ko jaan jaayenge। yeh jhaad kab puraana nahin hota hai। bhaktimaarga kab shuru hota hai - yeh tum jaante ho। yeh hai kalpa vriksha। neeche kaamdhenu baithi hai। zaroor unka baap bhi hoga। abhi tum bhi kalpa vriksha ke tale mein baithe ho, phir tumhaara naya jhaad shuru ho jaayega। praja to laakhon ki andaaj mein ban gai aur banti jaayegi। baaki raaja banna yeh jara mushkil hai। ismen bhi saadhaaran, gareeb uthte hain।

baba kehte hain gareeb-nivaaz main hoon। daan bhi gareeb ko kiya jaata hai। ahilyaayen, kubjaayen, paap aatmaayen jo hain, aise-aise ko main aakar vardaan deta hoon। tum ekdam sanyaasiyon ko bhi baith gyaan denge। brahman banne bigar devta koi bhi ban na saken। jo devta varna ke the, woh brahman varna mein aayen, tab phir devta varna mein ja saken। tum maat pita... gaate to sab hain parantu ab tum practical mein ho। yeh hai braahmanon ki nai rachna। oonch te oonch choti brahman, oonch te oonch bhagwan phir eeshvareey sampradaay। to tumko itna nasha rehna chaahiye। ham eeshvar ke potre-potriyaan prajaapita ke bachche hain। ab eeshvar ke bachche to sadaiv harshit rahne chaahiye। kabhi rona nahin chaahiye। yahaan bahut brahmaakumaar kumaariyaan kahlaane vaale bhi rote hain। khaas kumaariyaan। purush rote nahin hain। to rone vaale naam badnaam kar dete hain। woh maaya ke mureed dekhne mein aate hain। shivbaaba ke mureed nahin dekhne mein aate। baba andar mein to samajhte hain parantu baahar se thode hi dikhlaayenge। nahin to aur hi gir paden। baba kehte apni sambhaal karo। satguru ki ninda karaane vaala kabhi thaur nahin paayega। woh samajh leve ham raajgaddi kabhi nahin paayenge। tumhein to sadaiv harshit rehna chaahiye। jab tum yahaan harshit rahenge tab 21 janma harshit rahenge। bhaashan karna koi badi baat nahin, woh to bahut sahaj hai। shreekrishna jaisa banna haito abhi sada harshitmukh raho aur mukh se ratna nikalte rahen। mujh aatma ko parampita paramatma ka dhan mila hai, jo mujh aatma mein dhaaran hota hai, so main apne mukh se daan karta jaata hoon। jaise baba shareer ka loan le daan karte rehte hain, aisi avastha chaahiye। baba baahar se bhal pyaar dete hain, parantu dekhte hain inki chalan badnaami karne vaali hai to dil mein rehta hai yeh thaur nahin pa sakenge। baba ko ulhanen bhi milte hain eeshvareey santaan phir rote kyon? aabru (ijjat) to yahaan eeshvar ki jaayegi na। rote hain, jhagadte hain। ulta sulta khaate hain। devtaayen rote to bhi aur baat, yeh to direct eeshvar ki santaan rote hain to kya gati hogi! aisa akartavya kaarya nahin hona chaahiye, jo baap ki aabru ganvaao। har baat mein sambhaal chaahiye। tumko eeshvar padhaate hain।

is samay to jitne manushya utni maten hain - ek na mile doosre se। to baap samjhaate hain yahaan tum baithe ho apni oonch te oonch takdeer banaane। oonch takdeer sivaae paramatma ke aur koi bana na sake। satayugi srishti ke aadi mein hain lakshmi-naaraayan। woh to bhagwan hi rachte hain। usne lakshmi-naaraayan ko raajya kaise diya? yatha raaja raani tatha praja kaise hui, yeh koi nahin jaante। baba samjhaate hain kalpa ke sangamayug par hi main aakar lakshmi-naaraayan ka raajya sthaapan karta hoon। baba kehte hain tumko raajtilak de raha hoon। main svarga ka rachayita tumko raajtilak nahin doonga to kaun dega? kehte hain na tulseedaas chandan ghisen.. yeh baat yahaan ki hai। vaastav mein raam shivbaaba hai। chandan ghisne ki baat nahin hai। andar buddhi se baap ko aur varse ko yaad karo। maayaapuri ko bhoolo, inmen athaah duhkh hain। yeh kabristaan hai। meethe baba aur meethe sukhdhaam ko yaad karo। yeh duniya to khatma honi hai। videshon mein to bombs aadi giraayenge to sab makaan gir jaayenge, sabko marna hai। kichadpatti khalaas honi hai। devtaayen kichadpatti mein nahin rehte hain। lakshmi ka aahvaan karte hain to saphaai aadi karte hain na। ab lakshmi-naaraayan aayenge to saari srishti saaph ho jaayegi aur sab khanda khatma ho jaayenge, phir devtaayen aayenge। woh aakar apne mahal banaayenge। baambe itni thi nahin। gaanvada tha। ab dekho kya ban gaya hai to phir aisa hoga aur khanda nahin rahenge। satayug mein khaare paani par gaanv nahin hote hain। meethi nadiyon par hote hain। phir dheere-dheere vriddhi ko paate hain। madraas aadi hote nahin। vrindaavan, gokul aadi nadiyon par rehte hain, vaikuntha ke mahal vahaan dikhaate hain। tum jaante ho ham yahaan aaye hain nar se naaraayan banne। sirf manushya se devta bhi nahin kaho। devtaaon ki to raajdhaani hai na। ham aaye hain raajya lene। isko kaha hi jaata hai raajayog। yeh koi praja yog nahin hai। ham purushaartha karke baap se sooryavanshi raajya lenge। bachchon se roz poochhna chaahiye ki koi bhoolchook to nahin ki? kisko duhkh to nahin diya? disservice to nahin ki? thodi service mein thak nahin jaana chaahiye। poochhna chaahiye saara din kya kiya? jhooth bolenge to gir padenge। shivbaaba se kuchh chhip na sake। aisa mat samajhna - kaun dekhta hai? shivbaaba to jhat jaan jaayega। muphta apni satyaanaash karenge। sach bataana chaahiye, tab hi satayug mein naach karte rahenge। sach to bitho nach.. khushi mein bahut harshit mukh rehna chaahiye। dekho stri purush hain। ek ke saubhaagya mein svarga ki baadshaahi ho, doosre ke bhaagya mein nahin bhi ho sakti hai। koi ka saubhaagya hai jo donon hathiyaala baandhate, ham gyaan chita par baith ikatthe jaayenge।

tum bachche jagdamba maa ki biography ko jaante ho aur koi 84 janma maanenge nahin। unko bhujaayen bahut de di hain। to manushya samjhenge yeh to devta hai, janma-maran rahit hai। are chitra to manushya ka hai na। itni baahen to hoti nahin। vishnu ko bhi 4 bhujaayen dikhaate hain - pravritti ko siddha karne ke liye। yahaan to do bhujaayen hi hoti hain। manushyon ne phir naaraayan ko 4 bhuja, lakshmi ko do bhujaayen di hain। kahaan phir lakshmi ko 4 bhujaayen di hain। naaraayan ko saanvara, lakshmi ko gora bana diya hai। kaaran ka kuchh bhi pata nahin padta। tum abhi jaante ho - devtaayen jo gore the, dvaapar mein aakar jab kaam chita par baithte hain to aatma kaali ban jaati hai। phir baap aakar unhein kaale se gora banaate hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) meethe baba aur meethe sukhdhaam ko yaad karna hai। is maayaapuri ko buddhi se bhool jaana hai।

2) service mein kabhi thakna nahin hai। vijay maala mein aane ke liye athak ho service karni hai। shivbaaba se sachcha rehna hai। koi bhool-chook nahin karni hai। kisi ko duhkh nahin dena hai।

vardaan:- ek ke paath dvaara niraakaar, aakaar ko saakaar mein anubhav karne vaale vardaani moorta bhav

sirf ek ka paath pakka karke vardaata ko raazi kar lo to amritvele se raat tak har dincharya ke karma mein vardaanon se hi palte, chalte, udte rahenge। woh ek ka paath hai - ek bal ek bharosa, ekmat, ekras, ekta aur ekaantapriy ...yeh “ek'' shabd hi baap ko priy hai। jo is ek ka paath pakka kar lete hain unhein kabhi mushkil ka anubhav nahin hota। aisi vardaani aatma ko vishesh vardaan praapta hota hai isliye ve niraakaar-aakaar ko jaise saakaar anubhav karte hain।

slogan:- kisi se kinaara karke apni avastha banaane ke bajaae sarva ka sahaara bano।