Daily Murli for Thursday 6 April 2023

06-04-2023 praatahmurli om shanti "baapdaada"' madhuban

“meethe bachche - aisi koi gaphlat mat karo jisse maaya ko thappad lagaane ka chance mile, agar shreemat par nahin chalenge to maaya thappad maar munh pher degi।

prashn:- sooryavanshi raajdhaani mein air-condition ticket lene ka aadhaar kya hai, woh kinhen praapta hoti hai?

uttar:- sooryavanshi raajdhaani mein air-condition ticket lene ke liye har kadam shreemat par chalna pade। apna sab kuchh baap par arpan karna pade। jo poore arpan hote hain vahi saahookaar bante hain। sooryavanshi raajdhaani hai hi air-condition। tumhaari em object hi hai sooryavanshi pad praapta karna। baaki nambarvaar pad to hain hi।

geet:- woh bada khushanseeb hai…

om shanti। is geet ke arth ko tum brahman kul bhooshan bachche hi jaante ho। abhi tum bachche ho brahman sampradaay phir daivi sampradaay banenge। bachchon ko baap baith samjhaate hain, jabki behad ka baap sammukh hai aur usse behad ka varsa mil raha hai। baaki aur kya chaahiye। bhakti maarga kab se chalta hai! yeh bhi koi ko pata nahin। bhakti maarga vaale bhakta bhagwan ko athva brides bridegroom ko yaad karti hain। parantu wonder yeh hai - baap ko jaante nahin। aisa kab dekha? sajni saajan ko nahin jaane to yaad kar kaise sake? bhagwan to sabka baap thahra। bachche baap ko yaad karte hain parantu pahchaan bigar yaad karna sab vyartha hai iseelie yaad karne se koi faayda nahin nikalta। yaad karte-karte koi bhi us em object ko paate nahin। bhagwan kaun hai, usse kya milega, kuchh bhi nahin jaante। itne sab dharma hain। Christ, bauddha aadi preceptor athva dharma sthaapan karne vaalon ko unke followers yaad karte hain parantu unko yaad karne se hamko kya milna hai! kuchh bhi pata nahin hai। isse to jismaani padhaai achhi hai। em object to buddhi mein rehti hai na। baap se kya milta hai, teacher se kya milta hai - woh samajh sakte hain। guru se kya milta hai - yeh koi bhi nahin samajh sakte। ab tum bachchon ko nishchay hua hai ki ham baap ke bane hain। baba hamko 5 hajaar varsha pahle muaaphik aa karke svarga ka maalik banaate hain athva shantidham ka maalik banaate hain। baap kehte hain laadle bachchon tum mujhse apna varsa lenge na। sab kehte hain haan baba kyon nahin lenge। achha chandravanshi raam pad paane mein raazi honge? tumko kya chaahiye? baap saugaat le aaye hain। tum sooryavanshi lakshmi ko varenge ya chandravanshi seeta ko? shreeraam ke pujaari shreekrishna ka naam sunna nahin chaahte hain। shreeraam ko treta mein, shreekrishna ko dvaapar mein le gaye hain। woh samajhte hain raam bada hai। yeh unhon ka aapas mein jhagda ho jaata hai। jaise chhote bachchon ka jhagda hota hai na।

baap baith samjhaate hain - hoobhu jaise kalpa pahle samjhaaya tha phir se samjha rahe hain। tum phir se aakar varsa le rahe ho। tumhaari em object hai hi behad ka varsa lene ki। woh hai sooryavanshi raajya pad। second grade hai chandravanshi। jaise air-condition se oonch to kuchh hota nahin। air-condition, first class, second class hota hai na। to satayug ki poori raajdhaani air-condition samjho phir hai first class। to baap kehte hain tum air-condition ka sooryavanshi raajya lenge va chandravanshi first class ka? usse bhi kam to phir second class mein nambarvaar vaaris bano phir tum peechhe-peechhe aakar raajya paayenge। nahin to third class praja। phir unmein bhi ticket reserve hoti hain। first class reserve, second class reserve। nambarvaar darje to hote hain na। sukh to vahaan hai hi। baaki compartment to alag-alag hain। saahookaar aadmi ticket lenge air-condition ki। tumhaare mein saahookaar kaun bante hain? jo sab kuchh baap ko de dete hain। baba yeh sab kuchh aapka hai। bhaarat mein hi mahima gaai hui hai। saudaagar, ratnaagar, jaadoogar.. yeh mahima hai baap ki, na ki shreekrishna ki। shreekrishna ne to varsa liya। satayug mein praalabdha paai। woh bhi baap ka bana। praalabdha kahin se to paai hogi na। lakshmi-naaraayan satayug mein praalabdha bhogte hain। ab tum bachche achhi reeti jaante ho zaroor unhonne past mein praalabdha banaai hogi na। bhaarat ki mahima bahut hai, bhaarat jitna oonch desh koi ho nahin sakta। bhaarat hi parampita paramatma ka birth place hai। yeh raaz koi ki buddhi mein nahin baithta। paramatma hi sabhi ko sukh-shanti dete hain aadhaakalpa ke liye। bhaarat number one teertha hai। parantu geeta mein naam daal diya hai shreekrishna ka, isliye iska martaba kam ho gaya hai। nahin to sabhi manushya us baap ko hi maante aur koi par phool nahin chadhaate। sarva ka patit-paavan baap, unka somnaath mandir hai। shiv par hi sabhi aakar maatha tekte hain। parantu drama anusaar ek baap ko bhoolne se srishti ki haalat kaisi ho jaati hai, isliye shivbaaba aate hain। koi to nimitta bante hain na। ab baap kehte hain ashareeri bhav। apne ko aatma nishchay karo। main aatma kiski santaan hoon, yeh koi jaante nahin hain। wonder hai na। kehte bhi hain O god father, raham karo। shiv jayanti bhi manaate hain parantu woh kab aaye the, yeh koi ko pata nahin hai। yeh paanch hajaar varsha ki baat hai, baap hi aakar nai duniya satayug sthaapan karte hain। satayug ki aayu laakhon varsha to hai nahin।

baap bachchon ko kitna sahaj kar samjhaate hain - sirf yaad karo, grihastha vyavhaar mein rehte kamal phool samaan bano। vishnu ko hi sabhi alankaar diye hain। shankh bhi diya hai, kamal pushpa bhi diya hai। vaastav mein devtaaon ko yeh alankaar thode hi diye jaate hain। yeh kitni guhya gambheer baaten hain। hain braahmanon ke alankaar parantu braahmanon ko kaise deven। aaj brahman hain, kal shoodra ban padte hain। brahma-kumaar se shoodra kumaar ban padte। maaya deri nahin karti। agar koi gaphlat ki, baap ki shreemat par na chala, buddhi kharaab hui to maaya achhi tarah chamaat maar munh pher deti hai। manushya gusse mein aakar kehte hain na - thappad maar munh pher doonga। to maaya bhi aisi hai। baap ko bhoole aur maaya ek second mein thappad lagaae munh pher deti hai। jaise ek second mein jeevanmukti paate hain, aise second mein jeevanmukti khatma kar dete hain। kitne achhe-achhe ko maaya pakad leti hai। dekhti hai ki yeh kahaan gaphlat mein hai to jhat thappad laga deti hai। baap to bachchon ka munh puraani duniya se pherkar nai duniya taraph karte hain।

laukik baap koi gareeb hota hai, puraani jhopdi mein rehta hai, phir naya banaate hain to bachche ki buddhi mein baith jaata hai ki bas ab naya makaan taiyaar hoga, ham baithenge। yeh puraana tod denge। tumhaare liye bhi ab baap ne hatheli par bahishta laaya hai va vaikuntha laaya hai। kehte hain laadle bachche... aatmaon se baat karte hain। in okhon dvaara tum bachchon ko dekh bhi rahe hain। kashmeer mein brahman log bahut hote hain। shraadh aadi bhi vahaan khilaate hain, brahman mein aatma ko bulaate hain, yeh sabhi saakshaatkaar ka raaz rakha hua hai। aise nahin ki aatma koi se nikalkar aati hai। apne badon ki aatma ko bulaate hain। unke liye sabhi kuchh taiyaar rakhte hain। samajhte hain phalaane ki aatma aayegi। phir unse poochha bhi jaata hai, aage aatma bolti thi। phir unse poochha jaata hai aap raazi khushi hain? woh sunaati hai। yeh bhi drama anusaar chalta hai। kabhi-kabhi bataate bhi hain mainne phalaane ghar mein janma liya hai। yeh sab saakshaatkaar ki reeti drama mein bani hai, jo repeat hoti hai। baaki aatma koi aati nahin hai। aage table mein bhi bulaate the। baba ko sabhi anubhav hai। ab table mein to aatma aa na sake। jisne jo kuchh kiya woh drama mein tha, so hua। drama ko kitna achhi reeti pakadna padta hai। bhog lagaaya jaata hai, aatma ko bulaaya jaata hai। yeh sabhi drama mein noondh hai। ismen sanshay ki koi baat nahin। naye aadmi na samajhne ke kaaran moonjhate hain। baap jaadoogar bhi hai na। samjhaate hain main bhi drama ke vash mein hoon। aise nahin drama ke bigar kuchh kar sakta hoon। nahin। bachche beemaar padte hain, aise nahin main theek kar doonga, operation karaane se chhuda doonga। nahin, karmabhog to sabhi ko bhogna hi hai। tumhaare oopar to bojha bahut hai kyonki tum sabhi se puraane ho। satopradhaan se ekdam tamopradhaan bane ho।

ab tum bachchon ko baap mila hai to baap se varsa lena chaahiye। tum jaante ho kalpa-kalpa ham drama anusaar baap se varsa lete hain। jo sooryavanshi-chandravanshi gharaane ke honge woh avashya aayenge। jo devi-devta the phir shoodra ban gaye hain phir vahi brahman ban daivi sampradaay banenge। yeh baaten baap bigar koi samjha na sake। baap ko bachche kitne meethe lagte hain! kehte hain tum vahi kalpa pahle vaale mere bachche ho। main kalpa-kalpa aakar tumko padhaata hoon। kitni wonderful baaten hain! niraakaar bhagvaanuvaach shareer se vaach karenge na। shareer alag ho jaata to aatma vaach kar na sake। aatma detach ho jaati hai। ab baap kehte hain ashareeri bhav। aise nahin ki praanaayaam aadi chadhaana hai। nahin। samajhna hai main aatma avinaashi hoon। meri aatma mein 84 janmon ka part bhara hua hai। baap khud kehte hain meri aatma bhi jo act karti hai woh part saara bhara hua hai। bhakti maarga mein bhi vahi part chalta hai। koi ne sharaab piya hi nahin hai to taste ka pata kaise ho sakta hai। gyaan bhi jab leve tab pata pade। gyaan se hi sadgati hoti hai। baap kehte hain mai sarva ka sadgati daata hoon। sarvodaya leaders hain na। kitne kisma-kisma ke hain! vaastav mein to sarva par daya karne vaala baap hai na। sabhi kehte hain he bhagwan raham karo। to sabhi par raham woh karte hain। baaki sab hain khud ke raham karne vaale। baap to saari duniya ko satopradhaan banaate hain। usmein tatva bhi aa jaate hain। yeh kaam ek paramatma ka hi hai। to sarvodaya ka arth kitna bada hai, ekdam sarva par daya kar dete hain। svarga ki sthaapna mein koi bhi duhkhi nahin hota hai। vahaan number one furniture, vaibhav aadi milte hain। duhkh dene vaale jaanvar, makkhi, machchhar aadi koi nahin hota। yahaan bhi bade aadmi ke ghar mein kitni saphaai hoti hai! kabhi tum makkhi nahin dekhenge। koi machchhar ghus na sake। svarga mein koi ki taakat nahin jo aise ganda karne vaali koi cheez ho। nahin। natural phoolon aadi ki khushbu rehti hai। tumko sookshm vatan mein shivbaaba shoobeeras bhi pilaate hain। ab sookshm vatan mein to kuchh hai nahin। yeh sabhi saakshaatkaar hain। vaikuntha mein kitne achhe phal bageeche aadi hote hain! sookshm vatan mein thode hi bageecha rakha hai। yeh hai sabhi saakshaatkaar। yahaan baithe hue tum sabhi saakshaatkaar karte ho। geet bhi bada first class hai। tum jaante ho hamko baap mila hai aur kya chaahiye! behad ke baap se behad ka varsa lete hain to baap ko yaad karna chaahiye। baap ki mat mashhoor hai। shreemat se ham shreshtha te shreshtha banenge।

sannyaasi kehte hain yeh kaag vishtha samaan sukh hai। parantu unhon ko yeh pata nahin hai ki satayug mein sadaiv sukh tha। chhotepan mein yeh raadhe-krishna hain, inke charitra aadi kuchh hai nahin। svarga ke bachche hote hi achhe hain। bhal karke murli se dance aadi karte honge। baaki gyaan nahin sunaate। shreekrishna ko murli di hai tab bhala sarasvati kahaan gai। sarasvati ko to sitaar dete hain to badi woh thahri na! yeh sab hai bhakti maarga, gudiyon ka khel। devi devtaaon ki moorti banaakar, pooja aadi karke phir dubo dete hain। is par tumhaara ek geet bhi bana hua hai, isko kaha jaata hai blind faith। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) har ek is drama ke vash hai, is drama ki kisi bhi scene ko dekhte sanshay nahin uthaana hai। drama ke har raaz ko achhi reeti samajhkar adol rehna hai।

2) apne ko avinaashi aatma samajh is shareer se detach ho ashareeri banne ka abhyaas karna hai।

vardaan:- karaavanhaar ki smriti dvaara bade se bade kaarya ko sahaj karne vaale nimitta karanhaar bhav

baapdaada sthaapna ka bade se bada kaarya svayan karaavanhaar ban nimitta karanhaar bachchon dvaara kara rahe hain। karan-karaavanhaar is shabd mein baap aur bachche donon combined hain। haath bachchon ka aur kaam baap ka। haath badhaane ka golden chance bachchon ko hi mila hai। lekin anubhav yahin karte ho ki karaane vaala kara raha hai, nimitta banaae chala raha hai। har karma mein karaavanhaar ke roop mein saathi hai।

slogan:- gyaani tu aatma woh hai jo arji daalne ke bajaae sada raazi rahe।