Daily Murli for Sunday 4 June 2023

04-06-23 praatahmurli om shanti ''avyakt-baapdaada'' revise 31-12-94 madhuban

naye varsha ko shubh bhaavna gun swaroop varsha ke roop mein manaao

aaj navayug rachta baapdaada apne navayug raajya adhikaari bachchon ko dekh rahe hain। nav varsha ko dekh apna navayug yaad aata hai! navayug ke aage yeh nav varsha koi badi baat nahin। jis navayug mein har vastu, har vyakti, prakriti sab naya hai। naya varsha jab shuru hota hai to puraani vastu va vyakti ke puraane svabhaav, sanskaar, chaal-chalan kuchh naye hote hain, kuchh puraane hote hain। lekin aapke navayug mein puraane ka naam-nishaan nahin। vyakti bhi naya arthaat satopradhaan hai aur prakriti bhi satopradhaan arthaat nai hai। prakriti mein bhi aajkal jaisa puraanaapan nahin hoga। to navayug ki mubaarak ke saath nav varsha ki mubaarak।

aaj vishesh naya varsha manaane ke umang-utsaah se, khushi-khushi se sabhi pahunch gaye hain। to baapdaada bhi dil se dil ki duaaon sahit nav yug ki aur naye varsha ki double mubaarak dete hain। aap sabhi ko bhi double yaad hai ya single yaad hai? apna naya yug naynon ke aage buddhi mein spashta hai na? jaise kahenge kal se naya varsha shuru hai, aise hi kahenge kal navayug aaya ki aaya itna spashta hai? nasha hai? sabhi navayug ke raajya adhikaari hain? sabhi raaja banenge to praja banaai hai? aap sab to raaja ho lekin raajya kis par karenge? apne oopar! to baapdaada navayug aur naya varsha double dekh rahe hain। kal ki baat hai na, vo bhi kal aur ye bhi kal ki baat hai। phir navayug hoga na! apne navayug ki dress (shareer) saamne dikhaai deti hai? bas, puraani dress chhodenge aur nai dress dhaaran karenge। to vo dress achhi, chamkeeli, sundar hai na! abhi to dekho har vyakti mein koi na koi nuksa hoga। koi ki naak tedhi hogi, kiski aankh tedhi hogi, kiske honth aise honge aur navayug mein sab number one, har karmendriy accurate। to aisi dress saamne khooti par lagi hui hai na! bas pahanni hai। apni dress achhi, pasanda hai? dekh rahe ho na?

baapdaada sadaiv jab har ek bachche ko dekhte hain to kya dekhte hain? ek to har ek ke mastak ki chamakti hui mani shreshtha aatma ko dekhte hain aur saath-saath har ek bachche ke bhaagya ki shreshtha lakeer ko dekhte hain। har ek ka bhaagya kitna shreshtha hai! sabhi ka bhaagya shreshtha hai na! ki kiska madhyam bhi hai? sabhi one hain? second, third aur aane vaale hain? achha hai, duniya vaale kehte hain aapke mukh mein gulaab aur baapdaada kehte hain aapke mukh mein gulaab-jaamun। gulaab-jaamun sabko bahut achha lagta hai na? gulaab-jaamun ya mithaai khaane ke liye hi baapdaada ne har guroovaar bhog ka rakha hai। bhog mein khud bhi khaate ho aur baapdaada ko bhi sveekaar karaate ho। ghar mein banaaye, nahin banaaye, lekin guroovaar ko to meetha milega na। aur jab kabhi khushi ka utsav hota hai to mukh hi meetha karaate hain। meetha mukh arthaat meetha mukhda। mukh meetha to sab karte hain lekin aap sabka mukh bhi meetha hai to mukhda (face) bhi meetha hai, ya thoda-thoda kaduva bhi hai? agar ek lakeer bhi kaduve ki ho to aaj varsha ko vidaai dene ke saath-saath is thode se kaduve-pan ko bhi vidaai de dena। vidaai dena aata hai ki paas mein rakhna achha lagta hai? ya vidaai dekar phir bula lenge? phir kahenge ham to chhodna chaahte hain lekin maaya nahin chhodti hai! aise to nahin kahenge ki hamne chhod diya lekin maaya aa gai? vahaan jaakar phir aise patra likhenge? vidaai, to sadaakaal ke liye vidaai। vidaai dene ka arth hi hai phir aane nahin dena ya kabhi-kabhi aa jaaye to koi harja nahin? kyonki puraane sanskaar kaiyon ko bahut achhe lagte hain। aaj kahenge kal se nahin hoga aur phir parson parvash ho jaayenge। to usko vidaai nahin kahenge na। to vidaai dena bhi seekho। varsha ko vidaai dena to common baat hai lekin aap sabko ansh, vansh sahit maaya ko vidaai dena hai। ansh maatra bhi nahin rahe। kai bachche kehte hain 75 pratishat to pharka pad gaya hai, aur bhi pad jaayega। lekin maaya ansh se vansh bahut jaldi paida karti hai। 25 pratishat ansh maatra bhi raha to 25 se 50 tak bhi bahut jaldi pahunch sakta hai iseeliye ansh sahit samaapta karna hai। to naye varsha mein kya karenge? puraane varsha ko vidaai dene ke saath-saath maaya ke ansh ko bhi vidaai dena। aur vidaai ke saath badhaai bhi dete ho na! kal sabhi ek-do ko milenge to kahenge naye varsha ki mubaarak ho, badhaai ho। to vidaai do aur vidaai ke saath-saath apne ko bhi aur doosron ko bhi sada pharishte swaroop ki badhaai do। hain hi farishta। oopar se neeche aaye, apna kaarya kiya aur uda। pharishte yahi karte hain na! udti kala ki nishaani pankh dikhaaye hain। koi artificial pankh nahin hain। lekin ye farishton ko jo pankh dikhaate hain uska arth hai farishta arthaat udti kala vaale। to farishte swaroop ki badhaai svayan ko bhi do aur doosron ko bhi। sada farishte swaroop ke smriti mein bhi raho aur doosre ko bhi usi swaroop se dekho। phalaani hai, phalaana hai…। nahin, farishta hai। ye farishta sandesh dene ke nimitta hai। samjha? to sabhi ko farishte swaroop ki mubaarak do। chaahe koi kaisa bhi ho lekin drishti se srishti badal sakti hai। jab drishti se srishti badal sakti hai to kya brahman nahin badal sakta? aapki drishti-smriti har aatma ko badal degi।

baapdaada ko kabhi-kabhi bachchon par hansi aati hai। aap logon ko bhi apne oopar aati hai? ek taraph kehte hain ki ham vishwa parivartak hain, vishwa kalyaankaari hain... aur phir vishwa parivartak aakar kehta hai ki ye mere se badli nahin hota! apne prati bhi kabhi roohrihaan mein kehte hain chaahte hain ye nahin karen, phir bhi kar lete hain... to vishwa parivartak aur svayan ke liye hi kahe ki main chaahta hoon lekin kar nahin paata hoon to uska title kya hona chaahiye? usko vishwa parivartak kehna chaahiye ya kamjor kehna chaahiye? geet sunaate hain na kya karen, kaise karen, pata nahin kab hoga... yeh geet baapdaada to sunte hain na! jab vishwa parivartak hain, vishwa kalyaankaari hain to kya koi aatma ko nahin badal sakte? svayan ko nahin badal sakte? agar sva parivartak bhi nahin to vishwa parivartak kaise honge?

baapdaada kehte hain is varsha ki vishesh dridh pratigya svayan se karo। pratigya ka arth hi hai ki shareer chala jaaye lekin jo pratigya ki hai, woh pratigya nahin jaaye। to pratigya karne ki itni himmat hai? karenge? darenge to nahin? to yahi pratigya svayan se karo ki “kabhi bhi kisi ki kamjori va kami ko nahin dekhenge। kisi ki kamjori-kami ko nahin sunenge, nahin bolenge।'' na sunenge, na bolenge, na dekhenge। to ye varsha kya ho jaayega? ye varsha ho jaayega shubh bhaavna gun swaroop varsha। har varsha ko apna-apna naam dete ho na। jab ye pratigya sabhi kar lenge to ye varsha hua - shubh bhaavna gun swaroop varsha। manzoor hai? phir vahaan jaakar nahin badal jaana! phir kahenge madhuban mein to vaayumandal achha tha na aur yahaan to vaayumandal ka sang hai na! parivartak kisi ke sang mein nahin aata, kisi ke prabhaav mein nahin aata। agar parivartak hi prabhaav mein aa jaayega to parivartan kya karega? isliye is varsha ko gun moorta, shubh bhaavna varsha ke roop mein manaao। kiski ashubh baat ko bhi aap apne paas shubh karke uthaao। ashubh dekhte hue bhi aap shubh drishti se dekho। jab prakriti ko badal sakte ho to manushyaatmaaon ko nahin badal sakte ho? aur usmein bhi brahman aatmaayen hain, unko nahin badal sakte ho? jab sabke prati shubh bhaavna hogi to ‘kaaran' shabd samaapta hokar ‘nivaaran' shabd hi dikhaai dega। is kaaran se ye hua, is kaaran hua...। nahin, kaaran ko nivaaran mein parivartan karo। himmat hai? achha! baap-daada jab T.vi. kholte hain to bada maja aata hai। ye kaliyugi T.vi. nahin dekhte। braahmanon ki T.vi. dekhte hain। aise nahin, aap log woh T.vi. khol lo, aise nahin karna। to jab bachchon ka khel dekhte hain to bahut maja aata hai। Mickey mouse ka khel to karte ho na! thode time ke liye koi sher ban jaata, koi kutta ban jaata। jis samay krodh karte ho us samay kya ho? jis samay kisse discuss karte ho, uske oopar vaar karte jaate ho, siddha karte jaate ho to us samay kya ho? Mickey mouse hi ban jaate ho na। to is varsha Mickey mouse nahin banna। farishta banna। Mickey mouse ka khel bahut kiya। to ye varsha aise shaktishaali varsha manaana kyonki samay to sameep aana bhi hai aur laana bhi hai। draamaanusaar aana to hai hi lekin laane vaale kaun hain? aap hi ho na?

doosri visheshta is varsha mein kya karenge? naye varsha mein ek to badhaaiyaan dete ho aur doosra gift dete ho। to is naye varsha mein sadaiv har ek ko, jo bhi jab bhi sambandh-samparka mein aaye, chaahe brahman parivaar, chaahe aur aatmaayen ho, un sabko ek to madhur bol ki gift do, sneh ke bol ki saugaat do aur doosra sadaiv koi na koi gun ki, shakti ki saugaat do। yeh saugaat second mein bhi de sakte ho। aise nahin kah sakte ho ki time hi nahin mila, na lene vaale ko time tha, na dene vaale ko time tha। lekin agar apni shreshtha bhaavna, shreshtha kaamna ki vritti hai to second ke sankalp se, drishti se apne dil ke muskaraahat se second mein bhi kisi ko bahut kuchh de sakte ho। jo bhi aave usko gift deni hai, khaali haath nahin jaave। to itni gift aapke paas hai? ki do din denge to khatma ho jaayegi? sabhi ka stock bharpoor hai? ki koi ka stock thoda kam ho gaya hai? jiske paas kam ho vo haath utha lo। bhar denge। jiske paas kami ho vo chitki likhkar janak (daadi jaanki) ko dena vo class kara legi। kami to nahin rahni chaahiye na! daata ke bachche aur kami ho to achha nahin hai na! isliye bharpoor hokar jaana। kami ko lekar nahin jaana। varsha ke saath kamiyon ko bhi vidaai dekar jaana। aise nahin, ki sirf kal ek din hi gift dena hai। nahin, saara varsha sabko gift baantate jaao। bina gift ke koi nahin jaaye to kitna achha lagega। agar koi aata hai usko chhoti-si pyaar se gift de do to kitna khush hota hai। cheez ko nahin dekhte hain lekin gift arthaat sneh ke swaroop ko dekhte hain। gift se koi maalaamaal nahin ho jaate hain lekin sneh se maalaamaal ho jaate hain। to sneh dena aur sneh lena। agar koi aapko sneh nahin bhi de, to bhi aap unse le lena। lena aayega ki sharma karenge kaise len? is lene mein koi harja nahin hai। vo aap par krodh kare, aap sneh ke roop mein le lena। aap vishwa parivartak ho na। to vishwa parivartak kisi ke negative ko positive mein nahin badal sakta! to ye varsha sada sneh dena aur sneh lena। aise nahin kehna koi ne diya hi nahin, kya karun...। vo de ya na de, aap le lo। kuchh to dega na, negative de ya positive de kuchh to dega na! lekin he vishwa parivartak, aap negative ko positive mein parivartan kar lena। samjha, is varsha kya karna hai! achha। double videshi kya karenge? gift denge? daata ban gaye ho? vaah, daataapan ki mubaarak ho।

baapdaada roz bachchon ki ek baat dekhte hain। kaun-si? ki ye ‘main' aur ‘mera' ye pareshaan kar deta hai। kabhi ‘mera' aa jaata hai, kabhi ‘main' aa jaata hai, jo beech-beech mein pareshaan karta hai। to jab varsha parivartan ho raha hai to is ‘main' aur ‘mere' ko bhi parivartan karo। shabd bhale ‘main' bolo lekin main kaun? original ‘main' kisko kehte hain? shareer ko ya aatma ko? main aatma hoon। to jab bhi ‘main' shabd use karte ho to kyon nahin ‘main' shabd ka original swaroop, original arth smriti mein rakhte ho। aur saare din mein kitne baar ‘main' shabd use karte ho? karna hi padta hai na। ‘mera' bhi kai baar use karte ho aur ‘main' bhi kai baar use karte ho। to jitne baar ‘main' shabd use karte ho utne baar agar vaastavik arth se ‘main' smriti mein laao to ‘main' dhokha dega ya udaayega? to jab bhi ‘main' shabd use karte ho us samay yahi socho main aatma hoon kyonki ‘main' aur ‘mere' shabd ke bina rah bhi nahin sakte ho। bolna hi padta hai aur aadat bhi hai, ‘main' ‘mere' ke pakke sanskaar ho gaye hain। to jis samay ‘main' shabd use karte ho us samay ye socho ki main kaun? main shareer to hoon hi nahin na। body-consciousness tab aave jab main shareer hoon। shareer to mera kehte ho na? ki main shareer kehte ho? kabhi galti se kehte ho ki main shareer hoon? galti se bhi nahin kahenge na ki main shareer hoon। to ‘main' shabd aur hi smriti aur samarthi dilaane vaala shabd hai, giraane vaala nahin hai। to parivartan karo। vishwa parivartak pakke ho na? dekhna kachche nahin banna। to ‘main' shabd ko bhi arth se parivartan karo। jab bhi ‘main' shabd bolo, to us swaroop mein tik jaao aur jab ‘mera' shabd use karte ho to sabse pahle mera kaun? saare din mein mera-mera to bahut banaate ho! mera svabhaav, mera sanskaar, meri ye cheejen, mera parivaar, mera centre, mera jigyaasu, meri seva, meri seva isne kyon ki? ye kehte ho na? khel to karte ho na। to jab ‘mera' shabd bolte ho to ‘mera' kahne se pahle ye yaad karo ki mera kaun? pahle ‘mera baba' yaad karo। phir mera aur yaad karo। to jahaan baap hoga vahaan deh abhimaan va giraavat nahin aayegi। to ‘main' aur ‘mera' in donon shabdon ko us vritti se, us drishti se, us arth se dekho aur bolo। ‘mera' shabd mukh se nikle aur pahle ‘mera baba' yaad aaye। to nirantar yogi to ho jaayenge na! kyonki har ghante mein ‘mera' aur ‘main' shabd use karte ho। kaarobaar mein bhi karna padta hai na! to jitne baar ye repeat karo, mukh se bolo va man se socho - main ya mera, to arth ka parivartan karo। had se behad mein jaana hai na। jab behad srishti ki parivartak aatmaayen ho to had mein kyon jaate ho? sirf bhaarat parivartak to nahin ho na? ya double videshi sirf foreign parivartak to nahin ho na? vishwa parivartak ho। vishwa arthaat behad। vishwa parivartak hain - yeh pakka yaad hai na? to automatically nirantar yogi sahaj ban jaayenge। mehnat nahin karni padegeekyonki bhaav aur bhaavna badal jaayegi। achha!

chaaron or ke navayug ke raajya adhikaari shreshtha aatmaon ko sada sva parivartan aur vishwa parivartan ke nimitta vishesh aatmaon ko, sada purushaartha mein naveenta-shreshthata laane vaale sarva snehi aatmaon ko, sada baap ka naam pratyaksha karne vaale sapoot aatmaon ko, sada ‘mera' aur ‘main' ko yathaartha bhaav aur arth mein laane vaale sahajyogi aatmaon ko baapdaada ka yaad-pyaar aur namaste।

vardaan:- aage peechhe soch samajhkar har kaarya karne vaale gyaani tu aatma trikaaldarshi bhav

jo bachche trikaaldarshi arthaat teenon kaalon ka gyaan buddhi mein rakh, aage peechhe soch samajhkar karma karte hain unhein har karma mein saphalta milti hai। aise nahin bahut busy tha isliye jo kaam saamne aaya woh karna shuru kar diya, nahin। koi bhi karma karne ke pahle yeh aadat pad jaae ki pahle teenon kaal sochna hai। trikaaldarshi sthiti mein sthit hokar karma karo to koi bhi kaarya vyartha va saadhaaran nahin hoga।

slogan:- apne santushta aur khushnumah jeevan se seva karo tab kahenge sachche sevaadhaari।