Daily Murli for Tuesday 20 June 2023

20-06-2023 praatahmurli om shanti "baapdaada"' madhuban

“meethe bachche - deh sahit jo kuchh bhi tumhaara hai usse mamatva mitaao, trustee hokar raho isko hi jeete ji marna kaha jaata hai''

prashn:- sangamayugi braahmanon ka title kaun-sa hai, baap dvaara unhein kaun-si best prize milti hai?

uttar:- tum sangamayugi brahman ho raajarishi, raajayogi। tum brahma mukh vanshaavli brahman yagya ki sambhaal karne ke nimitta ho, tumhein bade se bade seth dvaara bahut badi dakshina milti hai। svarga ki baadshaahi best prize hai।

geet:- marna teri gali mein …

om shanti। behad ka baap baithkar behad ke bachchon ko jeete ji marne ki achhi-achhi points sunaate hain। bachchon ne geet suna ki jeete ji marna hai। kaashi mein bali chadhte hain। woh to shareer ko khatma kar dete hain। woh koi gyaan aur yog aadi nahin seekhte hain। yahaan to jeete ji baap ka banna hai। gyaan sunne liye jeete ji deh sahit sab bandhan tod apne ko aatma samajhna hai। baap abhi aatmaon se baat karte hain। bachche abhi yeh puraani duniya, puraana shareer sab kuchh mere havaale kar do। bas, ham to baba ke ban gaye। tum jeete ji kah rahe ho - ham shivbaaba ke hain। ham abhi vaanaprasthi practical mein hain। woh vaanaprasthi ghar chhod jaakar haridvaar mein baithte hain। phir bhi is mrityulok mein hi janma lete hain। abhi baap samjhaate hain ki tumko ab is mrityulok mein janma nahin milna hai। mrityulok, kaliyugi duniya murdaabaad। amarlok, satayugi duniya jindaabaad hoti hai isliye baap kehte hain raho bhal grihastha vyavhaar mein, sirf deh sahit jo kuchh tumhaara hai, isse mamatva mitaao। samjho, ham sab kuchh shivbaaba ko dete hain। sab kuchh shivbaaba ka hi hai। phir shivbaaba kehte hain achha, trustee hokar sambhaalo। samjho, shivbaaba ki bhandaari se ham apna shareer nirvaah karte hain। agyaan kaal mein bhi kehte hain na sab kuchh paramatma ka hi hai। paramatma ka hi diya hua hai। phir koi bachcha mar jaata tha to ro lete the। ab baap kehte hain puraani cheez ki yaad bhool jaao। ek baap ko yaad karo। jo baap nai duniya ke liye naya raajya-bhaagya dete hain। ghar grihastha mein rehte samjho yeh sab kuchh shivbaaba ka hai। ham shivbaaba ke bhandaare se khaate hain। ham shreemat par chalte hain। kahenge baba ham motor leven? haan bachche, bhal lo। jo bachche samajhte hain sab kuchh baba ka hai, to woh raay poochhte hain। jeete ji marna isko kaha jaata hai। bhakti maarga mein bhi shivbaaba ke aage bali chadhte the parantu yeh gyaan nahin tha। yahaan to parampita paramatma baith gyaan sunaate hain। kitna sahaj reeti 21 janmon ke liye varsa dete hain! baba kehte hain main kab aaya tha - yeh koi jaante nahin। kehte bhi hain Christ se 3 hajaar varsha pahle bhaarat svarga tha, ab woh svarga kisne sthaapan kiya? devi-devtaayen svarga mein kahaan se aaye? gaate bhi hain manushya se devta kiye karat na laagi vaar। woh kab aaye? zaroor aayenge kaliyug ke ant aur satayug ke aadi ke sangam par। baap kehte hain ab tumko manushya se devta banaane aaya hoon। itne dher padhne aate hain। ismen andhashraddha ki baat nahin। yeh doosre satsangon muaaphik nahin hai। satya baap baith bachchon ko padhaate hain। baba ne samjhaaya hai bhakti maarga mein bhi barobar do baap rehte hain। ek jisma ka laukik baap, doosra aatmaon ka paarlaukik baap। aatmaayen us paarlaukik baap ko yaad karti hain - O god father, bhinna-bhinna naam roop se yaad karti hain। laukik baap se dvaapar se lekar janma by janma varsa lete aaye ho। aise to nahin satayug mein bhi laukik baap ka varsa lete aaye hain। nahin, satayug mein jo laukik baap se varsa lete hain woh is samay ki yahaan ki kamaai hai। yahaan tum itni kamaai karte ho jo 21 janmon liye varsa le lete ho। satayug mein varsa tum abhi ke purushaartha se paate ho। behad ke baap se behad ka varsa paate ho। baap hi patit duniya ko paavan duniya banaate hain। yeh lakshya soap hai, jisse pavitra bante hain। baap kehte hain apne ko ashareeri samjho। tum aatmaayen kaanon se sunti ho। satayug-treta ka 21 janmon ka varsa abhi paarlaukik baap se milta hai। phir dvaapar se lekar laukik baap se alpakaal ke liye varsa lete aaye ho। bhinna naam, roop, desh, kaal se, yaad bhal us paarlaukik baap ko karte hain। aatma yaad karti hai, kehti hai yeh mera shareer laukik baap ne diya hai। to do baap hue na। abhi tum bachche jaante ho ki teesra baap bhi hai prajaapita brahma। tum practical mein brahmaakumaar-kumaariyaan ho। ek laukik baap, doosra paarlaukik niraakaari baap, teesra hai yeh alaukik baap। prajaapita gaaya hua hai। parantu manushya jaante nahin। samajhte hain brahma to sookshmavtanvaasi hai। tum jaante ho brahma to saakaari baap hai। ab tum parlok jaane liye taiyaari kar rahe ho। tum jeete ji sabhi vaanaprasthi ho। vaani se pare jaana hai। yeh shareer chhod jaana hai zaroor। maut sabka hona hai। manushya vaanaprastha lete hain, saadhu-santa aadi se mantra lete hain। parantu woh jaante nahin ki yeh shareer chhodkar ham sweet hom jaayenge। yeh zaroor tum jaante ho abhi hamko aaturvela (utaavli) hoti hai ki yeh puraana shareer chhod ham aatma baap ki yaad mein rahne se paavan ban baba ke paas jaayenge। baba se 21 janmon ke liye varsa lenge। to laukik baap bhi hai, brahma baba bhi hai to shivbaaba bhi hai। teenon baap hain na barobar। ismen andhashraddha ki to baat nahin।

bhramri vishta ke keede ko le aati hai, aakar bhoon-bhoon karti hai phir un keedon mein jo unki jaat vaale hote hain woh aap samaan ban jaate hain। baaki jo aur jaat vaale hote hain woh sad jaate hain। yahaan bhi tumhaare paas jo aate hain unmein bhi jo devi-devta dharma vaala hoga, unko achhi reeti samajh mein aayega। baaki ki buddhi mein baithega nahin। woh hai bhramri aur tum ho brahman-braahmaniyaan। tumhaara dhandha hai - vishay saagar ke vikaari keedon ko le aakar bhoon-bhoon karna। bhoon-bhoon kya karna hai? yeh tumhaara paarlaukik baap hai। baap kehte hain main aaya hoon tum bachchon ko varsa dene। ham jo bhi brahmaakumaar-kumaariyaan hain behad ke baap se varsa le rahe hain। tum bhi lo। abhi jaana hai nirvaandhaam mein, jahaan se aakar part bajaaya hai। yeh bahut janmon ke ant ke janma ka bhi ant hai। abhi tum amarlok jaane ke liye amraktha sun rahe ho। gyaan ka saagar ek hi parampita paramatma hai। brahma gyaan saagar va vishnu gyaan saagar va shankar gyaan saagar kabhi nahin kahenge। ek shivbaaba hi gyaan ka saagar hai। gyaan soorya pragta ... baap kehte hain - bachche, ab yeh saari puraani duniya kabristaan honi hai। paristaan ki sthaapna ho rahi hai, jisko svarga kehte hain। to yahaan tum aakar jeete ji marte ho। baba, ham aapke hain। aadha-kalpa se tum baap ka aahvaan karte aaye ho। kehte ho - baba, ham bahut dhakke khaate aaye hain। yeh drama ki bhaavi। ab phir main tumko 21 janmon liye varsa deta hoon। tum jaante ho baap ka banne se manushya se devta bante hain। ek to vaaris bante hain, jinko maatele kaha jaata hai, doosre phir hain sautele, jo pavitra nahin bante। sirf baba-baba kehte hain parantu jeete ji marte nahin। jo jeete ji marte hain ve hue sage। baaki hain lage। yahaan koi vikaari aate hain to poochha jaata hai ki jeete ji mare ho? pratigya karte ho ki baaki aayu pavitra rahenge? tab baba kehte hain pratigya kar baap ke paas aayenge, tab varsa milega। maataayen apna jeevan saphal bana rahi hain। yeh raajdhaani sthaapan ho rahi hai। shivbaaba to daata hai। tum aise mat samjho ki ham shivbaaba ko dete hain। nahin, ham unse svarga ki baadshaahi ka varsa lete hain। shivbaaba ko thode-hi makaan aadi banaana hai। woh tum bachchon ke hi kaam mein lagaate hain। is daada ka bhi sab kuchh mainne kaam mein lagaaya na, jisse maataayen, ablaayen apna jeevan saphal bana rahi hain। tum bhavishya 21 janmon ke liye kamaai kar rahe ho। laukik baap ka varsa milna banda hone ka hai। svarga mein jo tumko laukik baap se varsa milega woh yahaan ki kamaai se। ek kahaani hai - baap ne poochha tum kiska hak khaati ho? to boli apna। to yahaan bhi harek apna purushaartha kar apna hak lete ho। sabki aatma hakdaar hai - 21 janmon ke liye varsa paane। agyaan kaal mein baap se bachchi ko varsa nahin milta, sirf bachche ko varsa milta hai। is samay sab aatmaon ko varsa milna hai। mel ho va female। gaaya bhi jaata hai kumaari woh jo 21 kul ka uddhaar kare। brahmaakumaar-kumaariyaan tum ho। tum jaante ho ki ham bhaarat ke manushya maatra ko 21 janmon ke liye varsa dilaane purushaartha karaate hain shreemat par। har ek ko samjhaao - ab laukik baap se varsa lena banda hota hai। ab paarlaukik baap se 21 janmon ke liye varsa milta hai। kitni kamaai jabardasta hai! kitni achhi baaten samajhne ki hain! dil bhi hoti hai purushaartha karen parantu maaya phir toofaan mein la deti hai। maaya ka toofaan lagne se deeve bujh jaate hain। baat bilkul sahaj hai। apne ko aatma samajh baap ko yaad karna hai - yeh hai buddhi ki baat। hamko baap ko yaad karna hai, shareer ka bhaan chhod dena hai। tum guru logon ko yaad karte ho। bahut guru apna chitra banaae shishyon ko de dete hain - gale mein daal do। aise bahut hain। pati ka bhi chitra nikaal guru ka daal dete hain। baba kehte hain yahaan koi chitra daalne ki baat nahin। sirf baap ko yaad karna hai। chhote-bade sabki vaanaprastha avastha hai। ab sweet hom jaana hai zaroor। to kyon na ham pratigya karen pavitra rahne ki aur yaad mein rahen to vikarma vinaash hon। koi ko bhi duhkh nahin dena chaahiye। sabse bada duhkh hai kaam kataari chalaana। yeh hai hi kansapuri। kaha jaata hai - krishnapuri mein kaam kataari nahin chalti। yahaan kaam kataari chalti hai isliye inko kansapuri kaha jaata hai। baaki koi asuron va devtaaon ki, paandavon aur kaurvon ki ladaai lagi nahin hai। ladaai hai yavnon aur kaurvon ki। bachchon ne saakshaatkaar kiya hai। makkhan hamko milna hai। ham aakar raajya-bhaagya karne vaale hain।

bachche poochhte hain - baba, itna makaan kyon banaate ho? abhi to tarna by tarna aate hain, tab poora hota hai। are, asylum lene itne sab bachche aakar kahaan rahenge। din-pratidin vriddhi hoti jaati hai। prajaapita brahma ke to bahut bachche ho jaayenge। shivbaaba kehte hain main kitna bachdevaal hoon। yeh koton mein se koi jaante hain। tumhaare mein bhi nambarvaar hain। samajhte bhi hain ki ham shivbaaba se varsa le rahe hain phir kabhi koi bachche murjha bhi jaate hain। bachche jaante hain ham is brahma ke dvaara shivbaaba ki shreemat par chalte hain। baap kehte yeh loan ka shareer bahut janmon ke ant ke janma ke bhi ant ka hai। puraani duniya, puraane tan mein aaya hoon। ab maamekam yaad karo। main guide ban aaya hoon। god father ko liberator kaha jaata hai। manushya, manushya ko kah na sake। saari duniya ko liberate karte hain। is samay saari vishwa lanka hai, shok vaatika hai। bhal dhanvaan log samajhte hain ham svarga mein hain। parantu yeh sab mitti mein mil jaayega। khud bhi American log likhte hain ki humein koi vinaash ke liye prer raha hai। bombs banva rahe hain। kitna bhaari kharcha ho raha hai। kaliyug poora ho to satayug zaroor chaahiye। ab phir se sthaapna hoti hai। baba vahi raajayog sikhlaate hain। tum ho raajarishi। woh hain hathayog rishi। raajayogi sivaae braahmanon ke koi kahla na sake। yeh kahaan likha hua thode hi hai ki raajayogi brahman the। krishna ho to woh brahman kaise rachenge! brahma ho tab to mukh vanshaavli brahman banen। yagya braahmanon dvaara hi racha jaata hai। baba kitna bada seth hai! kitni badi dakshina milti hai! dakshina milti hai svarga ki raajaai। yeh sabse best prize hai। brahman hi phir devta ban jaate hain। chaahe sooryavanshi bano, chaahe chandravanshi bano। baba kehte hain tum poochh sakte ho - baba, kal agar hamaara shareer chhoot jaaye to ham kya pad paayenge? baba jhat bata sakte hain। abhi to samay hi thoda hai। shareer chhoot jaaye phir aap gyaan thode-hi le sakenge। chhota bachcha kya samjhega। bachche abhi samajhte hain ki ab kaliyug poora ho satayug aana hai। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada smriti rakhni hai ki yeh hamaari vaanaprastha avastha hai, humein vaani se pare sweet hom jaana hai, ashareeri banne ka abhyaas karna hai।

2) 21 janmon ke liye apna hak lene ke liye pavitra rahne ki pratigya karni hai। sada shreemat par chalna hai। jeete ji marna hai।

vardaan:- udti kala ke vardaan dvaara sada aage badhne vaale sarva bandhan mukta bhav

baap ka banna arthaat udti kala ke vardaani banna। is vardaan ko jeevan mein laane se kabhi kisi kadam mein bhi peechhe nahin honge। aage hi aage badhte rahenge। sarvashaktimaan baap ka saath hai to har kadam mein aage hain। svayan bhi sada sampanna aur doosron ko bhi sampanna banaane ki seva karte hain। ve kisi bhi prakaar ki rukaavat mein apne kadmon ko rokte nahin। aise vardaani bachche kisi ke bandhan mein aa nahin sakte, sarva bandhanon se mukta ho jaate hain।

slogan:- jinke paas sarva shaktiyon ka stock hai, prakriti unki daasi ban jaati hai।