Daily Murli for Saturday 1 July 2023

01-07-2023 praatahmurli om shanti "baapdaada"' madhuban

“meethe bachche - tumhein apne hi tan-man-dhan se bhaarat ko paavan banaane ki service karni hai, is bhaarat ko maaya raavan se liberate karna hai''

prashn:- jo bachche dehi-abhimaani rahne ka purushaartha karte hain woh kis phikra se chhoot jaate hain?

uttar:- is puraane shareer ka karmabhog jo ghadi-ghadi bhogna ke roop mein aata hai, hisaab-kitaab chuktu karna padta hai iski phikra se woh chhoot jaate hain kyonki unki buddhi mein rehta - abhi to humein puraane hisaab-kitaab chuktu kar karmaateet banna hai। phir aadhaakalpa ke liye kisi bhi prakaar ka rog hamaare paas aa nahin sakta। baba aisi first class nature-cure karte hain jo beemaari ka naam-nishaan nahin rehta।

geet:- tumheen ho maata, pita tumheen ho…

om shanti। bachchon ne geet suna। bachche jaante hain ham patit-paavan maat-pita ke sammukh baithe hain। patit bhaarat ko paavan banaane liye shreemat par chal rahe hain kyonki tum bachche ho apne parampita paramatma ki service mein। baap bhi isi service mein hai। yeh to bachche jaante hain barobar bhaarat paavan tha। ab patit bana hai। paavan duniya ko 5 hajaar varsha hue। duniya in baaton ko kuchh bhi nahin jaanti। abhi tum bachche baap ki shreemat par chal tan-man-dhan se bhaarat ki seva karte ho। bhaarat ko maaya raavan ki janjeeron se chhudaae aur raamraajya sthaapan kar rahe ho। yeh to tum kisko bhi samjha sakte ho। ham patit bhaarat ko paavan banaane aaye hain, to zaroor pavitra banna pade। pavitrata par hi jhagda chalta hai। koi na koi takleeph hoti hai। unhon ki hai hinsak ladaai, tumhaari ladaai hai raavan roopi 5 vikaaron se। tum yeh bhi jaante ho kalpa-kalpa ham shreemat par chale hain। is samay saari duniya raavan ki mat par chal rahi hai। shreemat se tum daivi mat vaale devta bante ho। abhi tum brahman varna ke ho। tum saari duniya ko patit se paavan banaate ho। behad ka baap aate hain bachchon ke paas। bachche kehte hain ham tan-man-dhan se bhaarat ko phir se daivi raajya banaate hain kyonki bhaarat satayug ke aadi mein raajasthaan tha। ham apna daivi raajya sthaapan kar rahe hain। jaise baapu gaandhi ne tan-man-dhan se seva ki। jel mein gaye to tan ki seva hui na। man bhi usmein laga hua tha। abhi tum jaante ho baap maaya raavan se liberate karte hain। yeh behad ka baap, woh bhaarat ka baapu ji tha। sabhi ka nahin tha। vaise bhi bujurga ko baapu ji kehte hain। mayor ko bhi baapu ji kehte hain। fathers to bahut hain। tumhaara father ek hai। doosra na koi। behad ka baapu ek hai - shivbaaba, woh bhaarat ko paavan banaane ki service mein upasthit hue hain। zaroor koi shareer mein aaya hoga। saath mein madadgaar bhi honge। akela to nahin hoga। tum shiv shakti sena ho। tumko samjhaane mein bada sahaj hai। unhonne bhaarat ko svatantra karaane mein kitna sahan kiya। ablaayen bhi jel aadi mein gai। jaasti duhkh purushon ne uthaaya tha। abhi phir tum maataaon ko bahut duhkh sahan karna padta hai vish ke kaaran।

tum samjha sakti ho baap aaya hai nai srishti rachne। to pahle-pahle brahman chaahiye। brahma mukh vanshaavli brahman phir tum daivi arthaat vishnu ki vanshaavli bante ho। yeh buddhi mein rehna chaahiye। barobar ham baba ke saath madadgaar hain। shreemat par to hajaaron laakhon ko chalna hai। baapu ko bhi badi sena thi। unmein bhi koi achhe naameegraami the, koi kaise the। us baapu ne phirangiyon (angrejon) se chhudaaya। abhi tum bachchon ko raavan dushman se chhudaane liye shreemat de rahe hain। jaise woh kehte hain ham svaraajya sthaapan karte hain। tumhaari buddhi mein hai ham shreemat par daivi svaraajya sthaapan kar rahe hain। kadam-kadam par shreemat leni padti hai। shreemat se shreshtha banenge। har ek ka karmabandhan apna-apna hai। karmaateet avastha ko paane ke liye ant tak purushaartha karna padta hai। karmaateet avastha abhi aai nahin hai। ajun bahut purushaartha karna hai। karmaateet avastha woh jismen shareer ko bhi koi duhkh na ho। puraane shareer ko to ant tak duhkh hota hi hai। aise nahin ki sab sampoorn ho chuke hain। karmabhog chuktu karna hai। karmaateet avastha jab tak ho tab tak maaya ke toofaan, karmon ke hisaab-kitaab ki bhogna chali aayegi। uska phikra nahin karna hai। baap ko yaad karna hai। baap kehte hain dehi-abhimaani bhav। yeh akshar abhi ke hi hain jo gaaye jaate hain। manushya to jaante nahin - iska arth kya hai? abhi tum jaante ho - soul conscious se ham akela hokar baap ko yaad kar sakte hain। ab soul conscious banna hai। purushaartha karna hai - main aatma hoon, baap ko yaad karti hoon। sarvavyaapi kahne se ham kisko yaad karen? baap ne samjhaaya hai shanti ke liye kahaan jaana nahin hai। karma to karna hi hai। ashareeri hokar rehna hai। ham aatma hain, yeh organs hain। aatma ka to svadharma hai hi shant। ham baaja nahin bajaate। woh sannyaasi aadi to hathayog karte hain, praanaayaam chadhaate hain। phir abhyaas karte hain, khadde mein jaakar anek prayatna karte hain। yahaan hathayog ki koi baat nahin। sirf knowledge ko samajhna hai। god father ki knowledge ko koi nahin jaante। ya to kah dete god father to sarvavyaapi hai। isko hi kaha jaata mithya gyaan। tum ab father ko jaante ho। sabhi ka father ek hai। vahi aakar srishti ko patit se paavan banaate hain। tum baap ke saath madadgaar ho। patit se paavan ban phir paavan duniya mein chalenge। vahaan paavan daivi raajya chalta hai। paavan duniya ke liye tum raajayog seekh rahe ho। phir teacher ban tumko srishti chakra ka gyaan dete hain। jisse tum svadarshan chakradhaari ban chakravarti raaja-raani bante ho। grihastha vyavhaar mein rehte hue is avastha ko jamaana hai। tumko kitna sahan karna padta hai! maar khaate hain, is yagya mein asuron ke kitne vighna padte hain! ablaaon par atyaachaar hote hain - vikaar ke kaaran। kaangresi us jel mein jaate the tum phir kans-jaraasandhiyon ki jel mein baandh hoti ho। thoda sahan karna padta hai। paavan banne mein majority tumhaari hai। haan, koi kamjor purush log hote hain to phir stri ka sahan karna padta hai। nahin to bhaaratvaasiyon ka kaayda hai 60 varsha ke baad vaanaprastha avastha ko dhaaran karna। phir grihastha ko chhod chaabi bachchon ko de dete hain ki sambhaalte raho। sapoot bachche achhi reeti sambhaalte hain। baap ne seva kar bada banaaya, phir bachche ka farja hai sambhaalna। kahenge - aap satsang aadi karo, ham sambhaal karte rahenge। aajkal bachche bhi dushman ban padte hain। tum bachchon ki yuddha hai maaya raavan ke saath। unhone phirangiyon se liberate kiya - gaandhi ki mat se।

tum par maaya raavan ne 2500 varsha raajya kiya hai। yeh maaya badi balvaan hai। unko to liberate karne mein 40-50 varsha lage। mehnat lagti hai। yahaan bhi tum shreemat par jeet paate ho। raavan tumhaara bada puraana dushman hai। tumko goli maarti hai maaya dushman। kaam ka hai sabse bada bomb। maaya se bada khabardaar rehna hai। baba kehte hain jitna tum yaad karenge utna khushi ka paara chadhega। tum jaante ho ham eeshvar ki aulaad bane hain। shreemat se svaraajya sthaapan karte hain - 21 janmon ke liye। kaangresiyon ne svaraajya liya alpakaal ke liye। woh koi svaraajya nahin hai, aur hi museebat hai। parantu yeh tum jaante ho mrigtrishna ke samaan raajya mila hua hai। kaangres kaise bani - yeh koi geeta-bhaagvat mein nahin hai। abhi tum samajhte ho unko to kuchh nahin mila। karke em.pi. aadi bane, so bhi alpakaal kshanbhangur ke liye। ab to sab duhkhi hain। ham svarga ki sthaapna kar rahe hain। drama mein vijay to tumhaari noondhi hui hai। tum raajayog seekh rahe ho। jaante ho ham sooryavanshi banenge। baba poochhte hain tum sooryavanshi banne ke liye purushaartha karte ho va chandravanshi banne ke liye? to kehte hain ham sooryavanshi ka karte hain। mama-baba kahne vaale to zaroor sooryavanshi hi banenge। isko kaha jaata hai follow father-mother। maat-pita hai na। yeh sooryavanshi mahaaraaja-mahaaraani bante hain। yeh to sabko 100 pratishat nishchay hai। maat-pita bachchon ko kehte hain tumko bhi purushaartha kar takhtansheen banna chaahiye। purushaartha karke follow karna chaahiye।

koi shubh bolte hain to kaha jaata hai - achha, tumhaare mukh mein gulaab। are, sooryavanshi banna koi kam baat thode hi hai! kitne heere-javaahron se saje hue mahal honge! kitna oonch pad hai! vichaar karne se romaanch khade ho jaate hain। baba hamko kitna oonch banaate hain! ham to kuchh bhi nahin jaante the। gaanvade ka chhora gaaya hua hai na। gaanvade ka chhora koi shreekrishna nahin tha। yahaan gaanv vaale kitne aaye hain! gareebon ka hi saubhaagya hai। saahookaaron ka to hriday videeran ho jaata hai। baap kehte hain main hoon hi gareeb nivaaz। dekhte ho kaun-kaun aate hain varsa lene। to koi bhi mile - bolo, ham bhaarat ki service mein hain। tan-man-dhan se bhaarat ko svarga banaane ki seva karte hain। to koi bhi inkamtaiksa vaala officer hoga tumko jhat maaph kar dega। us government ke paas to bahut paise barbaad hote hain। tumhaare paise to bhaarat ko aabaad karte hain। kitna farka hai? kisko bhi samjhaao to woh chakrit ho jaae - oho! yeh to badi bhaari service karne vaale hain। aisi service karo। bahut-bahut meethe bano। sachche saaheb se sachcha hokar rehna hai। sachche saaheb ko yaad bhi karna hai। agar sachkhanda ka maalik banna hai to sachche baba ko nirantar yaad karne ka abhyaas karo। simar-simar sukh paao। aisa aur koi nahin jiske kalah-kalesh mite hue hon। kuchh na kuchh beemaari aadi hoti rehti hain। vahaan tumko kuchh bhi nahin hoga। baap aisa nature-cure kar dete hain jo tum kabhi rogi nahin banenge। 21 janma tum nirogi ban jaate ho। to itna nashe mein rehna chaahiye। farka samjhaao - paandav-kaurav kya karat bhaye........। us baapu ji ne kya kiya, yeh behad ka baapu ji kya karte hain? baap tumhein raavan ki janjeeron se chhudaate hain। us baap ko yaad karne se tumhaare vikarma vinaash honge। woh baap bhi hai, teacher bhi hai, satguru bhi hai। janma-janmaantar ke paap sir par hain। unse paavan banne ka upaae ek hi hai। woh paani ki ganga kisko paavan nahin kar sakti। yeh baap ki yaad paavan banaati hai। aise nahin ki neshtha mein baithen। haan, baithna bhi achha hai। ek-do ke bal se baith jaayenge। parantu baba kehte hain - kaise bhi baitho, yaad to chalte-phirte kaarya karte karna hai। us school mein teacher padhaate hain to student ko teacher ko zaroor yaad karna pade। bachchon ko buddhi mein yeh baith jaana chaahiye ki hamko baba padhaate hain। aisa koi nahin jo baap-teacher ko yaad nahin kare। tum to jaante ho ab vaapis jaana hai to satguru ko bhi yaad karna pade। tum wonderful baaten sunaate ho। hamaara baap, teacher, satguru - sat baap, sat teacher, sat guru hai। sat ka sang hi taarta hai arthaat mukti-jeevanmukti mein le jaata hai। is puraani duniya se sab vaapis jaayenge। phir aakar nai duniya mein raajya karenge। tumhaari yeh race hai, behad ki ghuddaud hai। sab kehte hain ham pahle pahunche, to yaad karna pade। student ko daudaaya jaata hai। jitna purushaartha karenge utna vijay maala mein piroyenge। achha!

maat-pita baapdaada ka meethe-meethe sikeeldhe bachchon prati dil va jaan, sik va prem se yaadapyaar। tum bahut pyaare bante ho। ham so poojya devi-devtaayen the phir ham poojya do kala kam kshatriy chandravanshi bane। phir ham pujaari vaishya vanshi, shoodravanshi banen। ab phir ham pujaari se poojya ban rahe hain shreemat se। yeh chakra buddhi mein phiraana hai। achha - roohaani baap ki roohaani bachchon ko namaste।

dhaarna ke liye mukhya saar:-

1) bhaarat ko aabaad karne mein apna tan-man-dhan sab saphal karna hai। bahut-bahut meethe ban seva karni hai। sach-khanda sthaapan karne ke liye sachcha banna hai।

2) vijay maala mein pirone liye yaad ki race karni hai। chalte-phirte kaarya karte baap-teacher-satguru ko yaad karna hai।

vardaan:- tyaag aur tapasya ke sahayog se seva mein saphalta praapta karne vaale nirantar tapasveemoorta bhav

sevaadhaari arthaat tyaag aur tapasveemoorta। tyaag aur tapasya donon ke sahayog se seva mein sada saphalta milti hai। tapasya hai hi ek baap doosra na koi, yahi nirantar ki tapasya karte raho to aapka sevaasthaan tapasyaakunda ban jaayega। aisa tapasyaakunda banaao to parvaane aapehi aayenge। mansa seva se shaktishaali aatmaayen pratyaksha hongi। abhi mansa dvaara dharni ka parivartan karo - yahi vidhi hai vriddhi karne ki।

slogan:- namrata aur dhairyata ki shakti se krodhaagni ko shant bana do।

is maas ki sabhi murliyaan (eeshvareey mahaavaakya) niraakaar paramatma shiv ne brahma mukhakmal se apne brahmaavatson arthaat brahmaakumaar evan brahmaakumaariyon ke sammukh 18-1-1969 se pahle uchchaaran ki thi। yeh keval brahmaakumaareez ki adhikrit teacher bahnon dvaara niymit BK vidyaarthiyon ko sunaane ke liye hain।