Daily Murli for Sunday 17 September 2023

17-09-23 praatahmurli om shanti ''avyakt-baapdaada'' revise 13-12-95 madhuban

“vyartha bol, disturb karne vaale bol se svayan ko mukta kar bol ki economy karo''

aaj baapdaada chaaron or ki aatmaon ko aap sabhi ke saath dekh rahe hain। chaaron or ke bachche aakaar roop se baapdaada ke saamne hain। double sabha, saakaari aur aakaari donon kitni badi sabha hai। baapdaada donon sabha ke bachchon ko dekh harshit ho rahe hain kyonki baapdaada har bachche ko vishesh do roopon se dekh rahe hain। ek - har ek bachcha is sarva manushyaatmaaon ke poorvaj, saare vriksha ka foundation hain, kyonki jad se saara vriksha nikalta hai aur doosre roop mein poorvaj bade ko bhi kehte hain। to srishti ke aadi mein aap aatmaon ka hi part hai isliye bade te bade ho, is kaaran sarva aatmaon ke poorvaj ho। saath-saath oonche te oonche baap ki pahli rachna aap brahman aatmaayen ho। to jaise oonche te ooncha bhagvan hai vaise bade te bade poorvaj aap ho। to itne saare poorvaj bachchon ko dekh baap harshit hote hain। aap bhi harshit hote ho ki ham poorvaj hain - usi nishchay aur nashe mein rehte ho? to baapdaada aaj poorvajon ki sabha dekh rahe hain।

aap sabhi jo bhi baap ke bachche ho, maaya se bache hue ho। bachche ka arth hi hai baap ka banna arthaat bachche banna। to maaya se bache hue baap ke bachche bante hain। aap sabhi maaya se bache hue ho na? ki kabhi chakkar mein aa jaate ho? kehte hain na aisa bhi paavyuh hota hai jo bahut tareeke se nikalna hota hai। to koi bhi maaya ke paavyuh mein phansane vaale to nahin ho? kya koi chakkar hai? bache hue ho? (haan ji) aise nahin karna ki yahaan haan ji karke jaao aur vahaan jaakar kaho na ji। jab ek baar chakkar se nikalne ka raasta ya vidhi aa gai, to phir phansane ki to baat hi nahin hai। maaya ko bhi achhi tarah se jaan gaye ho na ki kabhi anjaan ban jaate ho? phir kehte hain hamko to pata hi nahin pada ki ye maaya hai kyonki jaise aajkal ka fashion hai bhinna-bhinna face bahut pahan lete hain। abhi-abhi kya banenge, abhi-abhi kya banenge। to maaya ke paas bhi ye phansaane ke face bahut hain। uske paas achha bada dukaan hai। jis samay jo roop dhaaran karna chaahe us samay kar leti hai। aur agar jaane-anjaane phans gaye to nikalne mein bahut time lagta hai। aur sangam ka ek second vyartha jaana arthaat ek varsha ganvaana hai, second nahin। aap socho sangamayug kitna chhota hai। abhi to diamond jubilee mana rahe ho aur is thode se samay mein jo banna hai, jo jama karna hai vo abhi ban sakte hain। to baapdaada dekh rahe the ki banne ka samay kitna thoda hai aur bante ho saara kalpa। to kahaan 5 hazaar aur kahaan abhi 60 varsha, chalo aage kitna bhi samay hoga lekin hazaaron ke ginti mein to nahin hoga na!

to is thode se samay mein raajya adhikaari banne va royal family mein aane ke liye kya karna hoga? vaise sankhya ke hisaab se satayug mein vishwa ka takhta sabhi ko to mil bhi nahin sakta। maanon pahle lakshmi-naaraayan to takhta par baithenge lekin jo pahle lakshmi-naaraayan ki royal family hai, unhon ko bhi itna hi sabhi dvaara sneh aur sammaan milta hai। to agar pahli raajdhaani ke royal family mein bhi aate hain to vo pahla number hain। chaahe bade takhta par nahin baithte lekin praalabdha number one ke hisaab se hi hai। nahin to aap sabhi logon ko treta tak bhi takhta thode hi milega। lekin vishwa raajya adhikaari ka lakshya sabhi ka hai na? ki vahaan bhi ek state ke raaja ban jaayenge? to pahle number ke royal family mein aana ye bhi shreshtha purushaartha hai। koi ko takhta milta aur kisko royal family milti hai। iske bhi guhya rahasya hain।

jo sada sangam par baap ke dil takhtansheen svatah aur sada rehta hai, kabhi-kabhi nahin, jo sada aadi se ant tak svapna maatra bhi, sankalp maatra bhi pavitrata ke vrat mein sada raha hai, svapna tak bhi avitrata ko touch nahin kiya hai, aisi shreshtha aatmaayen takhtansheen ho sakti hain। jisne chaaron hi subject mein achhe marks (numbers) liye hain, aadi se ant tak achhe number se paas hue hain, usi ko hi paas with honour kaha jaata hai। beech-beech mein marks kam hui hain phir make up kiya hai, make up vaala nahin lekin aadi se chaaron hi subject mein baap ke dil pasanda hai vo takhta le sakta hai। saath-saath jo brahman sansaar mein sarva ke pyaare, sarva ke sahayogi rahe hain, brahman parivaar har ek dil se sammaan karta hai, aisa sammaandhaari takhta nasheen ban sakta hai। agar in baaton mein kisi na kisi mein kami hai to vo nambarvaar royal family mein aa sakta hai। chaahe pahli mein aave, chaahe aathveen mein aae, chaahe treta mein aae। to agar takhtansheen banna hai to in sabhi baaton ko check karo। agar seva mein 100 marks jama hain aur dhaarna mein 25 percent to kya hoga? vo adhikaari banega? kai bachche aur subject mein aage chale jaate hain lekin practical dhaarna mein jaisa samay hai vaisa apne ko mould karna vo hai real gold। kahaan-kahaan maaya bachchon se bhi hoshiyaar ho jaati hai। vo phat se samay pramaan swaroop dhaaran kar leti hai aur bachche kya kehte hain? baap ke paas to sabki baaten aati hain na! maano ek wrong hai aur doosra right hai। aise bhi hota hai ki donon taraph ki koi na koi kami hoti hai lekin maanon aap bilkul hi apne ko right samajhte ho aur doosra bilkul hi wrong hai, to aap right ho aur vo wrong hai phir bhi jaisa samay, jaisa vaayumandal dekha jaata hai vaise apne ko hi, chaahe samaana padta hai, chaahe mitaana padta hai, chaahe kinaara karna padta hai, lekin bachche kya kehte hain ki kya har baat mein har samay hamko hi marna hai kya! marne ke liye ham hain aur mauj manaane ke liye ye hain! sada hi marna hai, ye marna to bahut mushkil hai, marjeeva to ban gaye vo to sahaj hai। brahmaakumaar, brahmaakumaari ban gaye ye bhi to marjeeva bane na! ye marna to bahut sahaj ho gaya। mar gaye, brahmaakumaari ban gaye। lekin ye baar-baar ka marna ye bahut mushkil hai! mushkil hai na? chhotiyaan kehti hain ki hamko hi jyaada marna padta hai aur bade kehte hain ki hamko hi jyaada sunna padta hai। to aapko sahan karna padta, unhon ko sunna padta, to marna kisko hai? kaun maren? ek mare, donon maren? donon hi mar gaye to baat khatma, khel khatma। to marna aata hai ya thoda mushkil lagta hai? thoda saans haamphata hai, mushkil saans nikalta hai। takleeph hoti hai? us samay jab kehte ho na ki kya humein hi marna hai, humein hi badalna hai, kya meri hi jimmevaari hai badalne ki? doosre ki bhi to hai! aadha-aadha baant lo - tum itna maro, main itna marun। baapdaada ko to us samay raham bhi bahut aata hai lekin ye marna, marna nahin hai। ye marna sada ke liye jeena hai। log kehte hain na ki bina mare svarga nahin milega। to us marne se to svarga milta nahin lekin is marne se svarga ka adhikaar zaroor milega isliye ye marna arthaat svarga ka adhikaari banna। dar jaate ho na - marna padega, marna padega, sahan karna padega to chhoti baat badi ho jaati hai। aap socho koi bhi daaku ya chor hai nahin lekin aapko dar baith gaya ki daaku hai, chor hai to bhay se kya hota hai? bhay se ya to heart neeche-oopar hogi ya blood pressure neeche-oopar hogi। dar se hota hai na? to dar jaate ho। marna badi baat nahin hai lekin aapka dar badi baat bana deta hai phir kehte hain pata nahin hamko kya hota hai, pata nahin! lekin jaise himmat se marjeeva banne mein bhay nahin kiya, khushi-khushi se kiya, aise khushi-khushi se parivartan karna hai। marna shabd nahin hai lekin aapne marna-marna shabd kah diya hai isliye dar jaate hain। vaastav mein ye marna nahin hai lekin apne dhaarna ki subject mein number lena hai। sahan karne mein ghabraao mat। kyon ghabraate ho? kyonki samajhte ho ki jhoothi baat mein ham sahan kyon karen? lekin sahan karne ki aagya kisne di hai? jhooth bolne vaale ne di hai? kai bachche sahan karte bhi hain lekin mazboori se sahan karna aur mohabbat mein sahan karna, ismen antar hai। baat ke kaaran sahan nahin karte ho lekin baap ki aagya hai sahansheel bano। to baap ki aagya maante ho to paramatma ki aagya maanna ye khushi ki baat hai na ki mazboori hai? to kai baar sahan karte bhi ho lekin thoda mix hota hai, mohabbat bhi hoti hai, mazboori bhi hoti hai। sahan kar hi rahe ho to kyon nahin khushi se hi karo। mazboori se kyon karo! vo vyakti saamne aata hai na to mazboori lagti hai aur baap saamne aave, ki baap ki aagya paalan kar rahe hain to mohabbta lagegi, mazboori nahin। to ye shabd nahin socho। aajkal ye thoda common ho gaya hai - marna padega, marna padega, kab tak marna padega, ant tak ya do saal, ek saal, 6 maas, phir to achha mar jaayen… lekin kab tak marna hai? lekin yeh marna nahin hai adhikaar paana hai। to kya karenge? marenge? yeh marna shabd khatma kar do। marna sochte ho na to marne se to dar lagta hai na। dekho apna mrityu to chhodo, koi-koi to doosre ka mrityu dekhkar bhi dar jaate hain। to ye shabd parivartan karo, aise-aise bol nahin bolo। shuddh bhaasha bolo। braahmanon ki dictionary mein yeh shabd hai hi nahin। pata nahin kisne shuru kiya hai! kiya to aap logon mein se hi hai na! aap maana jo saamne baithe hain, woh nahin। braahmanon ne hi kiya hai। baapdaada ne ye to ek misaal sunaaya lekin saare din mein aise vyartha bol ya mazaak ke bol bahut bolte hain, achhe shabd nahin bolenge, lekin kahenge mera bhaav nahin tha, yeh to mazaak mein kah diya। to aisa mazaak kya brahman jeevan mein aapke niymon mein hai? likha hua to nahin hai? kabhi padha hai ki mazaak kar sakte hain! mazaak karo lekin gyaanayukta, yogayukta। baaki vyartha mazaak jisko aap mazaak samajhte ho lekin doosre ki sthiti dagmag ho jaati hai, to woh mazaak hua ya duhkh dena hua?

to aaj baapdaada ne dekha ki ek to sabhi poorvaj hain aur doosra sabse bade te bade poojya aatmaayen bhi aap ho। aap jaisi pooja saare kalpa mein kiski nahin hoti। to poorvaj bhi ho aur poojya bhi। lekin poojya bhi nambarvaar hain। jo bhi brahman bante hain unki pooja hoti zaroor hai lekin kiski vidhipoorvak hoti hai aur kiski kaam chalaau hoti hai। to jo brahman yahaan bhi yog mein baithte hain lekin kaam chalaau, kuchh neend kiya, kuchh yog kiya, kuchh vyartha socha aur kuchh shubh socha। to yeh kaam chalaau hua na! saphed batti jal gai, kaam poora ho gaya। aise dhaarna mein bhi kaam chalaau bahut hote hain। koi bhi circumstance aayega to kahenge abhi to aise karke chalaao, peechhe dekha jaayega। to aison ki pooja kaam chalaau hoti hai। dekho laakhon saaligraam banaate hain lekin kya hota hai? vidhipoorvak pooja hoti hai? kaam chalaau hoti hai na! pipe se nahla diya aur tilak bhi katori bharke pandit log aise-aise kar dete hain। (chhidak dete hain) tilak lag gaya। to ye kya hua? kaam chalaau hua na। poojya sabhi bante ho lekin kaise poojya bante ho vo nambarvaar hai। kiski har karma ki pooja hoti hai। daatun (datoon) ka bhi darshan hota hai, daatun ho raha hai। mathura mein jaao to daatun ka bhi darshan karaate hain, is samay daatun ka samay hai। to kaam chalaau nahin banna। nahin to pooja bhi aisi hogi।

achha-sabhi teachers khush ho? ya koi-koi ichchha abhi bhi man mein hai? koi bhi ichchha hogi to achha banne nahin degi। ya ichchha poorn karo ya achha bano। aapke haath mein hai। aur dekha jaata hai ki ye ichchha aisi cheez hai jaise dhoop mein aap chalte ho to aapki parchhaai aage jaati hai aur aap usko pakadne ki koshish karo, to pakdi jaayegi? aur aap peeth karke aa jaao to vo parchhaai kahaan jaayegi? aapke peechhe-peechhe aayegi। to ichchha apne taraph aakarshit kar rulaane vaali hai aur ichchha ko chhod do to ichchha aapke peechhe-peechhe aayegi। maangane vaala kabhi bhi sampanna nahin ban sakta। aur kuchh nahin maangate ho lekin royal maang to bahut hai। jaante ho na - royal maang kya hai? alpakaal ka kuchh naam mil jaaye, kuchh shaan mil jaaye, kabhi hamaara bhi naam vishesh aatmaon mein aa jaaye, ham bhi bade bhaaiyon mein gine jaayen, ham bhi badi bahnon mein gine jaayen, aakhir hamko bhi to chance milna chaahiye। lekin jab tak mangata ho tab tak kabhi khushi ke khazaane se sampanna nahin ho sakte। ye maang ke peechhe ya koi bhi had ki ichchhaaon ke peechhe bhaagna aise hi samjho jaise mrigtrishna hai। isse sada hi bachkar raho। chhota rehna koi kharaab baat nahin hai। chhote shubhaan allaah hain kyonki baapdaada ke dil par number aage hain। alpakaal ki ichchha ka anubhav karke dekha hoga, to rulaati hai ya hansaati hai? rulaati hai na! to raavan ki aagya hai rulaao, aap to baap ke ho na, to baap hansaane vaala hai ya rulaane vaala?

aaj baapdaada vishesh is par attention dila rahe hain ki vyartha bol jo kisko bhi achhe nahin lagte, aapko achha lagta hai lekin doosre ko achha nahin lagta, to sada ke liye us shabd ko samaapta kar do। aise saare din mein agar baapdaada apne paas bachchon ke shabd note kare to kaaphi file ban sakti hai। yeh apshabda, vyartha shabd, zor se bolna… ye zor se bolna bhi vaastav mein anekon ko disturb karna hai। ye nahin bolo - mera to aavaaz hi bada hai। maayaajeet ban sakte ho aur aavaaz jeet nahin ban sakte! to aise kisi ko bhi disturb karne vaale bol aur vyartha bol nahin bolo। baat hoti hai do shabdon ki lekin aadha ghanta us baat ko bolte rahenge, bolte rahenge। to ye jo lamba bol bolte ho, jo chaar shabdon mein kaam ho sakta hai vo 12-15 shabd mein nahin bolo। aap logon ka slogan hai “kam bolo, dheere bolo''। to jo kehte hain na hamaara aavaaz bahut bada hai, ham chaahte nahin hain lekin aavaaz hi bada hai, to vo gale mein ek slogan lagaakar daal leve। hota kya hai? aap log to apni dhun mein zor se bol rahe ho lekin aane-jaane vaale sun karke ye nahin samajhte hain ki iska aavaaz bada hai। vo samajhte hain pata nahin jhagda ho raha hai। to ye bhi disservice hui। isliye aaj ka paath de rahe hain - vyartha bol ya kisi ko bhi disturb karne vaale bol se apne ko mukta karo। vyartha bol mukta। phir dekho avyakt pharishta banne mein aapko bahut madad milegi। bol, bol, bol, bolte hi rehte ho। agar baapdaada tape bharkar aapko sunaaye na to aapko bhi hansi aayegi। to kya paath pakka kiya hai? bol ki economy karo, apne bol ki value rakho। jaise mahaatmaaon ko kehte hain na - satya vachan mahaaraaj to aapke bol sada sat vachan arthaat koi na koi praapti karaane vaale vachan ho। kisko chalte-phirte hansi mein kah dete ho - ye to paagal hai, ye to besmajh hai, aise kai shabd baap-daada abhi bhool gaye hain lekin sunte hain। to braahmanon ke mukh se aise shabd nikalna ye maanon aap satavchan mahaaraaj vaale, kisi ko shraap dete ho। kisko shraapit nahin karo, sukh do। yuktiyukta bol bolo aur kaam ka bolo, vyartha nahin bolo। to jab bolna shuru karte ho to ek ghante mein check karo ki kitne bol vyartha hue aur kitne sat vachan hue? aapko apne bol ki value ka pata nahin, to bol ki value samjho। apshabda nahin bolo, shubh shabd bolo kyonki abhi last maas hai aur aadi ka maas diamond jubilee hai, to saara saal diamond banenge ya 6 maas banenge? saara saal banenge na! isliye baapdaada diamond jubilee ke pahle bachchon ko vishesh attention dila rahe hain। baapdaada chaaron or ke drishya to dekhte hi rehte hain। saara din nahin dekhte rehte hain, second mein sab dekh sakte hain। to paath pakka kiya - mukta banna hai? ya thoda-thoda yukta aur thoda-thoda mukta? har ek apne ko dekho। ye nahin shuru karna ki baba ne vaani chalaai phir bhi bol raha hai, doosre ko nahin dekhna। apne ko dekho - mainne baap ki shreemat ko kitna apnaaya hai? abhi to ek-do ko dekhte hain - ye kar raha hai... lekin jab adhikaar milne mein vo neeche pad mein jaayega to us samay aap saath denge? us samay dekhenge? us samay nahin dekhenge। phir abhi kyon dekhte ho। achha, sabhi mukta banenge na? sabhi ko paath yaad hai? kaun sa paath? vyartha bol mukta... yaad hai? bhool to nahin gaya? achha!

chaaron or ke poorvaj aatmaon ko, sada is nishchay aur nashe mein rahne vaali shreshtha aatmaon ko, sada baap ke shreemat pramaan har karma karne vaale karmayogi aatmaon ko, sada dridh sankalp se baap ke har kadam par kadam rakhne vaale follow father bachchon ko bahut-bahut yaad-pyaar aur namaste। double videshiyon ko double namaste।

vardaan:- laukik ko alaukik mein parivartan kar ghar ko mandir banaane vaale aakarshanmoorta bhav

pravritti mein rehte ghar ke vaayumandal ko aisa banaao jismen koi bhi laukikta na ho। koi bhi aaye to anubhav kare ki yeh alaukik hain, laukik nahin। yeh saadhaaran ghar nahin lekin mandir hai। yeh hai pavitra pravritti vaalon ki seva ka pratyaksha swaroop। sthaan bhi seva kare, vaayumandal bhi seva kare। jaise mandir ka vaayumandal sabko aakarshit karta hai aise aapke ghar se pavitrata ki khushbu aaye to woh khushbu svatah chaaron or phailegi aur sabko aakarshit karegi।

slogan:- man-buddhi ko dridhta se ekaagra kar kamjoriyon ko bhasma kar do-tab kahenge sachche yogi।

soochna:- aaj antarraashtreey yog divas teesra ravivaar hai, saayan 6.30 se 7.30 baje tak sabhi bhaai bahinen yog abhyaas mein anubhav karen ki mujh aatma dvaara pavitrata ki kirnen nikalkar saare vishwa ko paavan bana rahi hain। main master patit-paavni aatma hoon।