Daily Murli for Thursday 5 October 2023

05-10-2023 praatahmurli om shanti "baapdaada"' madhuban

“meethe bachche - baap se sarva sambandh rakho to bandhan khalaas ho jaayenge, maaya bandhan mein baandhati aur baap bandhanon se mukta kar dete hain''

prashn:- nirbandhan kise kaha jaata hai? nirbandhan banne ka upaay kya hai?

uttar:- nirbandhan arthaat ashareeri। deh sahit deh ka koi bhi sambandh buddhi ko apni taraph na kheenche। deh-abhimaan mein hi bandhan hai। dehi-abhimaani bano to sab bandhan samaapta ho jaayenge। jeete ji mar jaana hi nirbandhan banna hai। buddhi mein rahe ab ant ka samay hai, naatak poora hua, ham baap ke paas jaate hain to nirbandhan ban jaayenge।

geet:- jiska saathi hai bhagwan…

om shanti। baap baith bachchon ko samjhaate hain। ab itne bachche hain to zaroor behad ka baap hoga। baap samjhaate hain - kehte bhi hain niraakaar shivbaaba। brahma ko bhi baba kehte hain, vishnu va shankar ko baba nahin kahenge। shiv ko hamesha baba kehte hain। shiv ka chitra alag, shankar ka chitra alag hai। geet bhi hai shivaae namah। phir kaha jaata hai tum maat-pita........ yeh bhi samjhaana bahut sahaj hai ki barobar niraakaar shiv ko hi baap kehte hain। woh hai sabhi aatmaon ka baap। shankar va vishnu niraakaar to nahin hain। shiv ko niraakaar kahenge। mandiron mein un sabke chitra hain। bhakti maarga mein kitne chitra hain। oonch te oonch chitra dikhaate hain shivbaaba ka, phir brahma, vishnu, shankar ka chitra dikhaate hain। unka bhi roop hai। jagat amba, jagat pita ka bhi roop hai। lakshmi-naaraayan ka bhi saakaari roop hai। baaki ek hi bhagwan hai niraakaar। parantu unko sirf god kahne se manushya moonjhate hain। poochho - god tumhaara kya lagta hai, kahenge father। to yeh siddha kar batlaana hai god father hai। father rachta hai to mother bhi chaahiye। mother bigar father kaise srishti rachenge। woh father kab aayenge? sab bulaate hain - he patiton ko paavan banaane vaale aao। abhi to saari duniya patit hai। patit ho tab to aakar paavan banaayenge na। isse siddha hota hai baap ko patit duniya mein aana zaroor hai। parantu drama anusaar yeh kisi ko bhi samajh mein nahin aayega। na samjhen tab to baap aakar samjhaaye। baap baith bachchon ko samjhaate hain। bhaarat mein hi gaaya jaata hai gyaan aur bhakti, phir kehte hain brahma ka din aur brahma ki raat। raat mein ghor andhiyaara hota hai। gaaya bhi jaata hai gyaan anjan satguru diya, agyaan andher vinaash। manushyon mein itna to agyaan hai jo father ko bhi nahin jaante। in jaisa agyaan aur koi hota nahin। parampita, O god father akshar kahkar agar usko na jaanen to un jaisa agyaan koi nahin। bachche baba kahen aur phir kahen ham unke occupation, naam, roop aadi ko nahin jaante hain to unko anaadi kaha jaae na। yahi bhaaratvaasiyon ki bhool hai jo father kehte hue phir unko jaante nahin। gaate hain - O god father, aakar patiton ko paavan banaao, duhkh se chhudaao, duhkh harkar sukh do। baap ek hi baar aate hain। yeh tum jaante ho nambarvaar। koi to samajhte nahin ki hamko baap se poora varsa lena hai।

baap ka poora parichay nahin isliye kehte hain kya karen, bandhan hai। jeete ji marna aa jaae to tumhaara bandhan khalaas ho jaae। manushya achaanak mar jaate hain to bandhan chhoot jaate hain। abhi to sabke bandhan chhootne vaale hain। tumhein jeete ji nirbandhan arthaat ashareeri banna hai। baap kehte hain in shareer ke bandhanon aadi ko bhool jaao। apne ko aatma samajh mujh baap ko yaad karo। baaki bandhan tab lagta hai jab tum deh-abhimaani bante ho phir kehte ho - kaise chhooten? baap kehte hain bhal grihastha vyavhaar mein raho parantu buddhi mein rahe - hamko vaapis jaana hai। jaise naatak ka jab ant hota hai to actors naatak se jaise upraam ho jaate hain। part bajaate-bajaate buddhi mein rehta hai - baaki thoda time hai, yeh part bajaakar phir ghar jaayenge। tumko bhi yeh buddhi mein rakhna hai - abhi ant hai, ham daivi sambandh mein jaate hain। is puraani duniya mein rehte yeh buddhi mein rehna chaahiye ki ham baap ke paas jaate hain। gaate bhi hain ham tum par balihaar jaayenge। jeete ji tumhaara banenge। baaki jo deh sahit deh ke sambandh hain unko bhool ham aapke saath hi sambandh rakhenge। sambandh hai to yaad karo, pyaar karo। baap se athva apne preetam se buddhi ka yog lagaao। to tum par jo junk lagi hai woh utar jaayegi। yog to gaaya hua hai na। aur sab jismaani yog hain - maama, chaacha, kaaka, guru gosaai aadi sabse yog rakhte hain। baap kehte hain in sabse yog hataae mujh ek ko yaad karo। yog mujh ek ke saath lagaao। deh-abhimaan mein nahin aao। deh se karma karte hue bhi yeh nishchay karo ki ham part baja rahe hain। is puraani duniya ka ab ant hai, abhi hamko vaapis jaana hai, deh sahit deh ke sab sambandhon se upraam hona hai। aise-aise apne saath baaten karni hai। ab to baap ke paas jaana hai। kisi ko stri ka bandhan hai, kisi ko pati ka bandhan hai, kisi ko koi ka bandhan hai। baba to yuktiyaan bahut batlaate hain। bol do - hamko pavitra ban bhaarat ko pavitra zaroor banaana hai। ham pavitra ban tan-man-dhan se seva karte hain। parantu pahle nashtomoha chaahiye। moh nashta ho to government ko chitthi likho, to woh bhi tumko sahayog denge। bhagvaanuvaach - kaam mahaashatru hai, ham un par jeet paakar pavitra rehna chaahte hain। baap ka farmaan hai pavitra bano to svarga ka maalik banoge। hamko vinaash aur sthaapna ka saakshaatkaar hua hai, abhi pavitra banne mein hamko yeh vighna daalte hain, maarte hain। main to bhaarat ki sachchi seva mein hoon। ab mujhe asylum do। parantu pakka nashtomoha chaahiye। sannyaasi to gharbaar chhod jaate hain। yahaan to saath rehte nashtomoha banna hai। sannyaasiyon ka maarga alag hai। manushya kehte bhi hain ki grihastha vyavhaar mein rehte hamko aisa gyaan do jo ham raaja janak muaaphik mukti, jeevan-mukti ko pa len। vahi to ab tumko milta hai na।

baba kehte hain yeh meri vanni (yugal) hai, inke mukh se main praja rachta hoon। prajaapita brahma ke mukh dvaara hi kehte hain। shivbaaba tumko kehte hain tum mere potre ho। yeh phir kehte tum mere bachche ban shivbaaba ke potre bante ho। varsa unse milta hai। svarga ka varsa koi manushya de na sake। niraakaar hi dete hain। to bhakti alag cheez hai aur gyaan alag hai। bhakti mein to ved-shaastra padhte, yagya-tap, daan-punya aadi karte bahut kharcha hota hai, yeh hai saari bhakti ki saamagri। bhakti shuru hoti hai dvaapar se। devi-devta jab vaam maarga mein aakar patit bante hain to phir devi-devta naam kahla na sake kyonki devtaayen to sampoorn nirvikaari the। vaam maarga mein jaane se vikaari ban jaate hain। to kahenge devta dharma vaale vaam maarga mein aakar patit bane hain। patit ko devta kah nahin sakte, isliye phir hindu naam rakha hai। vedon-shaastron mein aarya naam rakh diya hai। aarya naam is bhaaratkhanda ke liye hai। abhi yeh akshar aaya kahaan se? satayug mein to aarya akshar hai nahin। kehte bhi hain Christ se 3 hajaar varsha pahle bhaarat mein devi-devta bade samajhdaar the phir vahi devta jab dvaapar mein vikaari bante hain to an-aarya kaha jaata hai। ek ne aarya kaha to bas, naam chal padta। jaise ek ne krishna bhagvaanuvaach kaha athva likha to bas, woh maanne lag padte। gaate bhal hain shivaae namah, tum maat-pita........parantu woh kaise maat-pita bante hain, kab rachna rachte hain yeh nahin jaante। zaroor srishti ke aadi mein rachte honge। ab srishti ka aadi kisko kaha jaae? satayug ko ya sangamayug ko? satayug mein to baap aate nahin hain। satayug aadi mein to aate hain lakshmi-naaraayan। unhon ko satayug ka maalik kisne banaaya? kaliyug mein bhi nahin aate। yeh hai kalpa ka sangamayug। baap kehte hain main har kalpa ke sangamayuge aata hoon jabki sab aatmaayen patit ban jaati hain athva srishti puraani ho jaati hai। drama ka chakra poora ho tab to baap aayenge na। tum bachchon mein badi hoshiyaari chaahiye, dhaarna chaahiye। ab conference karte hain ki ved padhne se faayda kya hota hai? ved padhna chaahiye to kyon? phainsala kuchh bhi kar nahin sakenge। phir vahi conference doosre varsha karenge। phainsala karne baithte hain parantu hota kuchh bhi nahin hai। vinaash ki taiyaariyaan bhi hoti rehti hain। bombs banaate rehte। abhi hai hi kaliyug। yeh baaten tum bachche hi jaante ho। tumhaari baaten hi niraali hain। tum jaante ho manushya, manushya ko gati-sadgati de na sake। gaate bhi hain patit-paavan, to apne ko patit kyon nahin samajhte? yeh hai patit duniya, vishay saagar। sab thode hi khivaiya ban sakte hain।

abhi tum bachchon mein woh taakat aai nahin hai jo poora samjha sako। abhi tum itna hoshiyaar nahin bane ho। yog bhi nahin hai। ab tak chhote bachchon muaaphik rote rehte hain। maaya ke toofaan mein thahar nahin sakte hain। deh-abhimaan bahut hai। dehi-abhimaani bante nahin। baba to baar-baar kehte hain - apne ko aatma samjho। abhi hamko vaapis jaana hai। sabhi actors jo apna-apna part bajaate hain, sab shareer chhodkar vaapis ghar jaayenge। tum saakshi hokar dekho। dehdhaari sambandhon mein, deh mein moh kyon rakhte ho? videhi bante nahin। phir vikarma vinaash nahin hote। baap ko yaad karte rahen to khushi ka paara chadhe। hamko shivbaaba padhaate hain phir ham devi-devta banenge to apaar khushi honi chaahiye na।

tum jaante ho bhaaratvaasi jab sukh mein the to baaki sab manushya nirvaandhaam, shantidham mein the। abhi to kitne karodon manushya hain। abhi tum purushaartha kar rahe ho, jeevanmukti paane ka। baaki sab vaapis chale jaayenge। puraani duniya badal nai duniya banni hai। naya to baap hi banaayega। sapling lag rahi hai। yeh hai daivi phoolon ka sapling। kaante se tum phool bante ho। bageecha poora taiyaar ho jaayega to yeh kaanton ka jangal khatma ho jaayega। inko aag lagni hai। phir ham phoolon ke bageeche mein chale jaayenge। kyon na mama-baba ko follow karen। gaaya hua hai follow father-mother। jaante ho yeh mama-baba, lakshmi-naaraayan banenge। inhonne hi 84 janma bitaaye hain। tumhaara bhi aise hi hai। inka mukhya part hai। likha bhi jaata hai baap aakar sooryavanshi-chandravanshi svaraajya phir se sthaapan kar rahe hain। kitna samjhaaya jaata hai, to bhi deh-abhimaan tootta nahin hai। mera pati, mera bachcha........ are, yeh to puraani duniya ke puraane sambandh hain na। mera to ek shivbaaba doosra na koi। sabhi dehdhaariyon se mamatva mit jaana bada mushkil hota hai। baap samajh jaate hain, inka mamatva mitna mushkil dikhta hai। shakla hi aise dekhne mein aati hai। kumaariyaan achhi madadgaar banti hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh sahit sabse moh nikaal videhi banne ka poora purushaartha karna hai। har actor ka part saakshi ho dekhna hai। bandhan-mukta banna hai।

2) is puraani duniya se upraam hona hai, apne aapse baaten karni hai ki humein to ab vaapas jaana hai। ab puraani duniya ke ant ka samay hai, hamaara part poora hua।

vardaan:- sarva khajaanon ki sampannata dvaara sampoornata ka anubhav karne vaale praapti swaroop bhav

jaise chandrama jab sampanna hota hai to sampannata uske sampoornata ki nishaani hoti hai, isse aur aage nahin badhega, bas itni hi sampoornata hai, jara bhi kinaari kam nahin hoti hai। aise aap bachche jab gyaan, yog, dhaarna aur seva arthaat sabhi khajaanon se sampanna hote ho, to is sampannata ko hi sampoornata kaha jaata hai। aisi sampanna aatmaayen praapti swaroop hone ke kaaran sthiti mein bhi sada sameep rehti hain।

slogan:- divya buddhi dvaara sarva siddhiyon ko praapta karna hi siddhi svarup banna hai।