Daily Murli for Monday 9 October 2023

09-10-2023 praatahmurli om shanti "baapdaada"' madhuban

“meethe bachche - jitna yaad mein rahenge, pavitra banenge utna paarlaukik maat-pita ki duaayen milengi, duaayen milne se tum sada sukhi ban jaayenge।''

prashn:- baap sabhi bachchon ko kaun-si raay dekar kukarmon se bachaate hain?

uttar:- baba raay dete - bachche, tumhaare paas jo bhi dhan-daulat aadi hai, woh sab apne paas rakho lekin trustee hokar chalo। tum kehte aaye ho he bhagwan yeh sab kuchh aapka hai। bhagwan ne bachcha diya, dhan-daulat diya, ab bhagwan kehte hain in sabse buddhiyog nikaal tum trustee hokar raho, shreemat par chalo to koi bhi kukarma nahin hoga। tum shreshtha ban jaayenge।

geet:- le lo duaayen maa baap ki …

om shanti। jo bachche kehte hain hamaara mukh nahin chalta hai, samjha nahin sakte hain - unhein centre ki braahmaniyaan kaise sikhlaayen, yeh shivbaaba samjhaate hain। chitron par samjhaana to bahut sahaj hai। chhote bachchon ko chitra dikhlaakar samjhaana pade na। aise nahin, class mein sab aakar baithe aur tumne murli shuru kar li, nahin। yeh to haddi (zigri) baith samjhaana chaahiye। bachchon ne geet to suna - ek hai paarlaukik maat-pita, jisko yaad karte rehte hain tum maat-pita… woh hai srishti ka rachayita। maat-pita zaroor svarga hi rachenge। satayug mein svargavaasi bachche hote hain। yahaan ke maat-pita khud hi narkavaasi hain to bachche bhi narka-vaasi hi paida karenge। geet mein kaha - le lo duaayen maa-baap ki...... tum jaante ho is samay ke maa-baap to duaayen nahin dete। svargavaasi dua karte hain, jo dua phir aadhaakalpa chalti hai। phir aadhaakalpa baad shraapit ho jaate hain। khud bhi patit bante to bachchon ko bhi banaate hain। use aasheervaad to nahin kahenge। shraap dete-dete bhaaratvaasi shraapit ho gaye, kitna duhkh hi duhkh hai, isliye maat-pita ko yaad karte hain। abhi woh maat-pita duaayen kar rahe hain। padhaakar patit se paavan bana rahe hain। yahaan hai aasuri sampradaay, raavan raajya। vahaan hai daivi sampradaay, raam raajya। raavan ka janma bhi bhaarat mein hai। shivbaaba, jisko raam kehte hain, unka janma bhi bhaarat mein hai। tum jab vaam maarga mein jaate ho to bhaarat mein raavan raajya shuru hota hai। to bhaarat ko hi raam parampita paramatma aakar patit se paavan banaate hain। raavan aate hain to manushya patit bante hain। gaate bhi hain raam gayo, raavan gayo, jinka bahu parivaar hai। raam ka parivaar to bahut chhota hai। aur sab dharma khatma ho jaate hain, sabka vinaash ho jaata hai। baaki tum devi-devtaayen rahenge। tum abhi jo brahman bane ho vahi transfer honge satayug mein। to ab tumko maa-baap ki duaayen mil rahi hain। maa-baap tumko svarga ka maalik banaate hain। vahaan to sukh hi sukh hai। is samay kaliyug mein hai duhkh, sabhi dharma duhkhi hain। abhi kaliyug ke baad phir satayug hona hai। kaliyug mein kitne dher manushya hain, satayug mein to itne manushya nahin honge। jitne brahman honge vahi phir vahaan devta banenge। woh bhi treta tak vriddhi ko paate rahenge। kehte hain Christ se 3000 varsha pahle satayug tha। before Christ aur after Christ। satayug mein to ek hi dharma, ek hi raajya hai। vahaan manushya bhi thode honge। sirf bhaarat hoga aur koi dharma nahin hoga। sirf sooryavanshi hi honge। chandravanshi bhi nahin honge। sooryavanshi ko bhagwan-bhagavti kah sakte hain kyonki ve sampoorn hain।

tum bachche jaante ho patit-paavan to ek parampita paramatma hi hai। (chakra ke chitra taraph ishaara) dekho, baap oopar mein baithe hain। yeh brahma dvaara sthaapna kara rahe hain। abhi tum padh rahe ho। jab in devtaaon ka raajya rehta hai tab aur koi dharma nahin rehta hai। phir aadhaakalpa baad vriddhi hoti jaati hai। oopar se aatmaayen aati jaati hain, varna badalte jaate hain, jeev aatmaayen badhti jaati hain। satayug mein honge 9 laakh, phir karod honge phir vriddhi ko paate jaayenge। satayug mein bhaarat shreshthaachaari tha, abhi bhrashtaachaari hai। aise nahin, sab dharma vaale shreshthaachaari ban jaayenge। kitne dher manushya hain। yahaan bhi bhrashtaachaari se shreshthaachaari banne mein kitni mehnat lagti hai। ghadi-ghadi shreshthaachaari bante-bante phir vikaar mein jaae bhrashtaachaari ban padte hain। baap kehte hain main aaya hoon, tumko kaale se gora banaane, tum ghadi-ghadi phir gir padte ho। behad ka baap to seedhi baat batlaate hain। kehte hain yeh kya kul kalankit bante ho, kaala munh karte ho। kya tum gora nahin banenge? tum aadhaakalpa shreshtha the phir kalaayen kam hoti jaati hain। kaliyug ant mein to kalaayen ekdam poori khatma ho jaati hain। satayug mein sirf ek hi bhaarat tha। abhi to sab dharma hain। baap aakar phir satayugi shreshtha srishti sthaapan karte hain। tumko bhi shreshthaachaari banna chaahiye। shreshthaachaari kaun aakar banaate hain? baap hai hi gareeb nivaaz। paise ki baat nahin। behad ke baap ke paas shreshtha banne aate hain to bhi log kehte hain tum yahaan kyon jaate ho। kitne vighna daalte hain। tum jaante ho is roodra gyaan yagya mein asuron ke vighna bahut padte hain। ablaaon par atyaachaar hote hain। koi phir striyaan bhi bahut tang karti hain। vikaar ke liye shaadi karte hain। ab baap kaam chita se utaar gyaan chita par bithaate hain। janma-janmaantar ka contract hai। is samay hai hi raavan raajya। government kitne shaadmaane karti hai। raavan ko jalaate hain, khel dekhne jaate hain। ab yeh raavan kahaan se aaya? raavan ka janma hue to 2500 varsha hue hain। raavan ne sabko shok vaatika mein bitha diya hai। sab duhkhi hi duhkhi hain। raam raajya mein sab sukhi hi sukhi hote hain। abhi hai kaliyug ka ant। vinaash saamne khada hai। itne karode manushya marenge to zaroor ladaai lagegi na। sarson muaaphik sab pees jaate hain। ab dekhte ho taiyaariyaan ho rahi hain। baap svarga ki sthaapna kar rahe hain। yeh gyaan aur koi bhi de na sake। yeh gyaan baap hi aakar dete hain aur patit ko paavan banaate hain। sadgati karne vaala ek hi baap hai। satayug mein hai hi sadgati। vahaan guru ki darkaar nahin। abhi tum is knowledge se trikaaldarshi bante ho। satayug mein lakshmi-naaraayan mein yeh gyaan bilkul nahin hoga। to phir parampara se yeh gyaan kahaan se aaya? abhi hai kaliyug ka ant। baap kehte hain tum mujhe yaad karo। svarga ki raajdhaani sthaapan karne vaale baap ko aur varse ko yaad karo। pavitra to zaroor rehna padega। woh hai paavan duniya, yeh hai patit duniya। paavan duniya mein kans, jaraasandhi, hiranyakashyap aadi hote nahin। kaliyug ki baaton ko satayug mein le gaye hain। shivbaaba aaye hain kaliyug ke ant mein। aaj shivbaaba aaye hain, kal shreekrishna aayega। to shivbaaba aur shreekrishna ke part ko mila diya hai। shiv bhagvaanuvaach - un dvaara padhkar shreekrishna ki aatma yeh pad paati hai। unhonne phir bhool se geeta mein shreekrishna ka naam daal diya hai। yeh bhool phir bhi hogi। manushya bhrashtaachaari banen tab to baap aakar shreshthaachaari banaaye। shreshthaachaari hi 84 janma poore kar bhrashtaachaari bante hain। is chakra par samjhaana to bahut sahaj hai। jhaad mein bhi dikhaaya hua hai - neeche tum raajayog ki tapasya kar rahe ho, oopar lakshmi-naaraayan ka raajya khada hai। abhi tum thur mein baithe ho, foundation lag raha hai। tum jaante ho phir sooryavanshi kul (vaikuntha mein) jaayenge। raamraajya ko vaikuntha nahin kaha jaata। vaikuntha shreekrishna ke raajya ko kaha jaata hai।

abhi to tumhaare paas bahut aayenge। exhibition aadi mein tumhaara naam baala hoga। ek-do ko dekhkar vriddhi ko paayenge। baap aakar yeh sab baaten samjhaate hain। chitron par kisko samjhaana bahut sahaj hai। satayug ki sthaapna bhagwan hi aakar karte hain। aur aate hain patit duniya mein। saanvare se gora banaate hain। tum shreekrishna ki raajdhaani ki vanshaavli bhi ho। praja bhi ho। baap achhi reeti samjhaate hain। niraakaar shivbaaba aatmaon ko baith samjhaate hain ki aap mujhe yaad karo। yeh hai roohaani yaatra। he aatmaayen, tum apne shantidham, nirvaandhaam ko yaad karo to svarga ka varsa milega। abhi tum sangam par baithe ho। baap kehte hain mujhe aur apne varse ko yaad karo to tum yahaan svarga mein aa jaayenge। jo jitna yaad karenge aur pavitra rahenge utna ooncha pad milega। tumko kitni badi duaayen mil rahi hain - dhanvaan bhav, putravaan bhav, aayushvaan bhav। devtaaon ki aayu bahut badi hoti hai। saakshaatkaar hota hai abhi yeh shareer chhod jaakar bachcha banna hai। to yeh andar mein aana chaahiye - ham aatma yeh puraana shareer chhod jaakar garbha mein nivaas karengi। ant mate so gate। boodhe se to ham kyon na bachcha ban jaaoon। aatma is shareer ke saath hai tab takleeph mahsoos karti hai। aatma shareer se alag hai to aatma ko koi takleeph mahsoos nahin hoti hai। shareer se alag hua khalaas। hamko ab jaana hai, mool vatan se baba aate hain lene liye। yeh duhkhadhaam hai। abhi ham jaayenge muktidhaam। baap kehte hain sabko muktidhaam le jaata hoon। jo bhi dharma vaale hain sabko muktidhaam jaana hai। woh purushaartha bhi mukti mein jaane ke liye karte hain।

baap kehte hain mujhe yaad karo to mere paas aa jaayenge। baba ko yaad kar bhojan khaao to tumko taakat milegi। ashareeri hokar tum paidal Abu Road tak chale jaao, kabhi tumko kuchh bhi thakaavat nahin hogi। baba shuru mein yeh practice karaate the। samajhte the ham aatma hain। bahut halke hokar paidal chale jaate the। kuchh bhi thakaavat nahin hoti thi। shareer bigar tum aatma to second mein baba paas pahunch sakti ho। yahaan ek shareer chhoda second mein jaakar london mein janma lete hain। aatma jaisi teekhi aur koi cheez hoti nahin। to ab baap kehte hain - bachche, ham tumko lene liye aaye hain। ab mujh baba ko yaad karo। abhi tumko practical mein behad ke paarlaukik baap ki duaayen mil rahi hain। baap bachchon ko shreshtha te shreshtha mat de rahe hain। dhan daulat aadi sab tum apne paas rakho। sirf trustee hokar chalo। tum kehte bhi aaye ho - he bhagwan yeh sab kuchh aapka hai। bhagwan ne bachcha diya, bhagwan ne yeh dhan-daulat diya। achha, phir bhagwan aakar kehte hain in sabse buddhiyog nikaal tum trustee hokar chalo। shreemat par chalo to baap ko maaloom padega tum koi kukarma to nahin karte ho। shreemat par chalne se hi tum shreshtha banenge। aasuri mat par chalne se tum bhrashta bane ho। aadhaakalpa tumko bhrashta banne mein laga hai। 16 kala se phir 14 kala bante ho phir dheere-dheere kalaayen kam hoti jaati hai, to ismen time lagta hai na। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) chalte-phirte ashareeri banne ka abhyaas karna hai। bhojan ek baap ki yaad mein khaana hai।

2) maat-pita ki duaayen leni hain। trustee hokar rehna hai। koi bhi kukarma nahin karna hai।

vardaan:- anaasakta ban laukik ko santushta karte bhi eeshvareey kamaai jama karne vaale raazayukta bhav

kai bachche laukik kaarya, laukik pravritti, laukik sambandh-samparka nibhaate hue apni vishaal buddhi se sabko santushta bhi karte aur eeshvareey kamaai ka raaz jaante hue vishesh hissa bhi nikaal lete। aise eknaami aur economy vaale anaasakta bachche hain jo sarva khajaanen, samay, shaktiyaan aur sthool dhan ko laukik se economy kar alaukik kaarya mein phraakdili se lagaate hain। aise yuktiyukta, raazayukta bachche hi mahima yogya hain।

slogan:- smriti swaroop bankar har karma karne vaale hi prakaash stambha (light house) bante hain।