Daily Murli for Tuesday 10 October 2023

10-10-2023 praatahmurli om shanti "baapdaada"' madhuban

“meethe bachche - prabhaat ke samay man-buddhi se mujh baap ko yaad karo, saath-saath bhaarat ko daivi raajasthaan banaane ki seva karo''

prashn:- sooryavanshi raajdhaani ki prize kis aadhaar par milti hai?

uttar:- sooryavanshi raajdhaani ki prize lena hai to baap ka poora madadgaar bano, shreemat par chalte raho। aasheervaad nahin maangani hai lekin yogbal se aatma ko paavan banaane ka purushaartha karna hai। deh sahit deh ke sab sambandhon ko tyaag ek most beloved baap ko yaad karo to tumhein sooryavanshi raajdhaani ki prize mil jaayegi। usmein pees, purity, prosperity sab kuchh hoga।

geet:- aakhir woh din aaya aaj…

om shanti। om shanti ka arth to tum bachchon ki buddhi mein rehta hi hai। baap jo samjhaate hain woh is duniya mein sivaae tumhaare aur kisko samajh mein nahin aayega। woh aise samjhenge jaise koi medical college mein naya jaakar baithe to kuchh samajh na sake। aise koi satsang hota nahin, jahaan manushya jaaye aur kuchh na samjhe। vahaan to hai hi shaastra aadi sunaane ki baaten। yeh hai bade te badi college। nai baat nahin hai। phir se woh din aaya aaj, jabki baap baith bachchon ko raajayog sikhlaate hain। is samay bhaarat mein raajaai to hai nahin। tum is raajayog se raajaaon ka raaja bante ho arthaat tum jaante ho ki jo vikaari raajaayen hain unke bhi ham raaja ban rahe hain। buddhi mili hai। jo koi karma karte hain woh buddhi mein rehta hai na। tum warriors ho, jaante ho ham aatmaayen ab baap ke saath yog rakhne se bhaarat ko pavitra banaate hain aur chakra ke aadi-madhya-ant ki knowledge dhaaran kar ham chakravarti raaja ban rahe hain। yeh buddhi mein rehna chaahiye। ham yuddha ke maidaan mein hain। vijay to hamaari hai hi। yeh to certain hai। barobar ham ab is bhaarat ko phir se daivi double sirtaaj raajasthaan bana rahe hain। baba chitron ke liye bahut achhi reeti samjhaate rehte hain। ham 84 janma poore kar ab vaapis jaate hain। phir aakar raajya karenge। yeh sab brahmaakumaar-kumaariyaan kya kar rahe hain, brahmaakumaariyon ki yeh sanstha kya hai? poochhte hain na। bi.ke. phat se kehti hain ki ham is bhaarat ko phir se daivi raajasthaan bana rahe hain, shreemat par। manushya ‘shri' ka arth bhi nahin jaante hain। tum jaante ho shri shri shivbaaba hain, unki hi maala banti hai। yeh saari rachna kiski hai? creator to baap hua na। sooryavanshi-chandravanshi jo bhi hain, yeh saari maala hai rudra shivbaaba ki। sab apne rachta ko jaante hain parantu unke occupation ko nahin jaante। woh kab aur kaise aakar puraani duniya ko naya banaate hain - yeh kiski buddhi mein bhi nahin hai। woh to samajhte hain - kaliyug abhi bahut varsha chalna hai।

abhi tum jaante ho ham daivi raajasthaan sthaapan karne ke nimitta bane hue hain। barobar daivi raajasthaan hoga phir kshatriy raajasthaan hoga। pahle sooryavanshi kul phir kshatriy kul ka raajya hoga। tumko chakravarti raaja raani banna hai to buddhi mein chakra phirna chaahiye na। tum kisko bhi in chitron par bahut achhi reeti samjha sakte ho। yeh lakshmi-naaraayan sooryavanshi kul aur yeh raam-seeta hain kshatriy kul। phir vaishya, shoodra vanshi patit kul ban jaate hain। poojya phir pujaari bante hain। single taaj vaale raajaaon ka chitra bhi banaana chaahiye। yeh exhibition badi wonderful ho jaayegi। tum jaante ho drama anusaar service arth yeh exhibition bahut zaroori hai tab to bachchon ki buddhi mein baithega। nai duniya kaise sthaapan ho rahi hai - woh chitron dvaara samjhaaya jaata hai। bachchon ki buddhi mein khushi ka paara chadhna chaahiye। yeh to samjhaaya hai satayug mein aatma ka gyaan hai so bhi jab boodhe hote hain tab anaayaas khyaal aata hai ki yeh puraana shareer chhod phir doosra naya shareer lena hai। yeh khyaalaat pichhaadi ke time mein aata hai। baaki saara time khushi-mauj mein rehte hain। pahle yeh gyaan nahin rehta hai। bachchon ko samjhaaya hai yeh param-pita paramatma ka naam, roop, desh, kaal koi bhi nahin jaante, jab tak ki baap aakar apna parichay de aur parichay bhi bahut gambheer hai। unka roop to pahle ling hi kehna padta। rudra yagya rachte hain to mitti ke ling banaate hain, jinki pooja hoti aai hai। baap ne pahle yeh nahin bataaya ki bindi roop hai। bindi roop kehte to tum samajh nahin sakte। jo baat jab samjhaani hai tab samjhaate hain। aise nahin kahenge pahle kyon nahin bataaya jo aaj samjhaate ho। nahin, drama mein noondh hi aisi hai। is exhibition se bahut service ki vriddhi hoti hai। invention nikalti hai to phir vriddhi hoti jaati hai। jaise baba motor ka misaal dete hain। pahle invention karne mein mehnat lagi hogi phir to dekho bade bade kaarkhaanon mein ek minute mein motor taiyaar ho jaati hai। kitni science nikli hai।

tum jaante ho kitna bada bhaarat hai। kitni badi duniya hai। phir kitni chhoti ho jaayegi। yeh buddhi mein achhi reeti bithaana hai। jo serviceable bachche hain, unhon ki hi buddhi mein rahega। baaki ka to khaan-paan, jharmui-jhagmui mein hi time vesta hota hai। yeh tum jaante ho bhaarat mein phir se daivi raajasthaan sthaapan ho raha hai। vaastav mein kingdom akshar bhi wrong hai। bhaarat daivi raajasthaan ban raha hai। is samay aasuri raajasthaan hai, raavan ka raajya hai। harek mein 5 vikaar pravesh hain। kitni karod aatmaayen hain, sab actors hain। apne-apne samay par aakar aur phir chale jaate hain। phir harek ko apna part repeat karna hota hai। second by second drama hoobhu repeat hota hai। jo kalpa pahle part bajaaya tha, vahi ab bajta hai, itna sab buddhi mein rakhna hai। dhandhedhori mein rahne se to phir mushkil ho jaata hai parantu baap kehte hain prabhaat ka to gaayan hai। gaate hain raam simar prabhaat more man… baap kehte hain abhi aur kuchh bhi nahin simro, prabhaat ke samay mujhe yaad karo। baap abhi sammukh kehte hain, bhakti maarga mein phir gaayan chalta hai। satayug-treta mein to gaayan hota nahin। baap samjhaate hain - he aatma, apne man-buddhi se prabhaat ke samay mujh baap ko yaad karo। bhakta log aksar karke raat ko jaagte hain, kuchh na kuchh yaad karte hain। yahaan ki rasma-rivaaj phir bhakti maarga mein chali aai hai। tum bachchon ko samjhaane ki bhinna-bhinna yuktiyaan milti rehti hain। bhaarat itna samay pahle daivi raajasthaan tha phir kshatriy raajasthaan hua phir vaishya raajasthaan bana। din-pratidin tamopradhaan bante jaate hain, girna zaroor hai। mukhya hai yeh chakra, chakra ko jaanne se tum chakravarti raaja bante ho। abhi tum kaliyug mein baithe ho। saamne satayug hai। yeh chakra kaise phirta hai, iska tumko gyaan hai। jaante ho kal ham satayugi raajdhaani mein honge। kitna sahaj hai। oopar mein trimoorti shiv bhi hai। chakra bhi hai। lakshmi-naaraayan bhi ismen aa jaate hain। yeh chitra saamne rakha hua ho to koi ko bhi sahaj reeti samjha sakte ho। bhaarat daivi raajasthaan tha, abhi nahin hai। single taaj vaale bhi nahin hain। chitron par hi tum bachchon ko samjhaana hai। yeh chitra bahut valuable hain। kitni wonderful cheez hai to wonderful reeti samjhaana bhi pade। yeh jhaad aur trimoorti ka chitra bhi sabko apne-apne ghar mein rakhna pade। koi bhi mitra-sambandhi aadi aaye to in chitron par hi samjhaana chaahiye। yeh world ki history-geography hai। harek bachche ke paas yeh chitra zaroor hone chaahiye। saath mein achhe-achhe geet bhi hon। aakhir woh din aaya aaj - barobar baba aaya hua hai। hamko raajayog sikhlaate hain। chitra to koi bhi maange mil sakte hain। gareebon ko free mil sakte hain। parantu samjhaane ki bhi taakat chaahiye। yeh hai avinaashi gyaan ratnon ka khajaana। tum daani ho, tumhaare jaisa avinaashi gyaan ratnon ka daan koi kar nahin sakta। aisa daan koi hota nahin। to daan karna chaahiye, jo aaye unko samjhaana chaahiye। phir ek-do ko dekh bahut aayenge। yeh chitra most valuable cheez hain, amoolya hain। jaise tum bhi amoolya kahlaate ho। tum kaudi se heere jaisa bante ho। yeh chitra vilaayat mein le jaakar koi samjhaaye to kamaal ho jaae। itna samay yeh sannyaasi log kehte aaye ki ham bhaarat ka yog sikhlaate hain। har ek apne dharma ki mahima karte hain। bauddha dharma vaale kitne ko bauddhi bana dete hain, parantu usse phaayda to kuchh bhi nahin। tum to yahaan manushya ko bandar se mandir laayak banaate ho। bhaarat mein hi sampoorn nirvikaari the। bhaarat gora tha, abhi bhaarat kaala hai। kitne manushya hain! satayug mein to bahut thode honge na। sangam par hi baap aakar sthaapna karte hain। raajayog sikhlaate hain। un bachchon ko hi sikhlaate hain, jinhonne kalpa pahle bhi seekha tha। sthaapna to honi hi hai। bachche raavan se haar khaate hain phir raavan par jeet paate hain। kitna sahaj hai। to bachchon ko bade chitra banvaakar us par service karni chaahiye। bade-bade akshar hone chaahiye। likhna chaahiye - yahaan se bhakti maarga shuru hota hai। zaroor jab durgati poori hogi tab to baap sadgati karne aayenge na।

baba ne samjhaaya hai aise kabhi bhi kisko nahin kehna ki bhakti na karo। nahin, baap ka parichay de samjhaana hai tab teer lagega। tum jaante ho mahaabhaarat ladaai kyon kaha jaata hai? kyonki yeh bada bhaari yagya hai, is yagya se hi yeh ladaai prajvalit hui hai। yeh puraani duniya khatma honi hai। yeh baaten tumhaari buddhi mein hain। manushyon ko pees prize milti rehti hai। parantu pees to hoti nahin। vaastav mein pees sthaapan karne vaala to ek hi baap hai। unke saath tum madadgaar ho। prize bhi tumko milni hai। baap ko thode hi prize milti hai। baap to hai dene vaala। tumko nambarvaar purushaartha anusaar prize milti hai। beshumaar bachche honge। tum abhi purity, pees, prosperity sthaapan kar rahe ho। kitni bhaari prize hai! jaante ho jitna jo mehnat karenge unko sooryavanshi raajdhaani ki prize milegi। baap hai shreemat dene vaala। aise nahin, baba aasheervaad karo। student ko raay di jaati hai ki baap ko yaad karo to tumhaare vikarma vinaash honge। yogbal se hi tumhaari aatma pavitra banegi। tum sab seetaayen ho, aag se paar hoti ho। ya to yogbal se paar hona hai ya to aag mein jalna padega। deh sahit sab sambandhon ko tyaag ek most beloved baap ko yaad karna hai। parantu yeh yaad nirantar rahne mein badi mushkilaat hai। time lagta hai। gaaya bhi hua hai yog agni। bhaarat ka praacheen yog aur gyaan mashhoor hai kyonki geeta hai sarva shaastramai shiromni। usmein raajayog akshar hai, parantu raaj akshar gum kar sirf yog akshar pakad liya hai। baap bigar koi kah na sake ki is raajayog se main tumko raajaaon ka raaja banaaoonga। abhi tum shivbaaba ke sammukh baithe ho। jaante ho ham sab aatmaayen vahaan paramdham mein nivaas karne vaali hain phir shareer dhaaran kar part bajaati hain। punarjanma shivbaaba to nahin lete। brahma, vishnu, shankar ko bhi punarjanma nahin lena hai। baap kehte hain main aata hi hoon patit se paavan banaane isliye hi sab yaad karte hain patit-paavan aao, yeh accurate akshar hai। baap kehte hain ham tumko paavan so devi-devta bana rahe hain to itna nasha bhi chadhna chaahiye। baba inmen aakar hamko shiksha de rahe hain। is phalon ke bageeche ka baagvaan baba hai, baba ka hamne haath pakda hai। ismen saari buddhi ki baat hai। baba hamko us paar, vishay saagar se ksheer saagar mein le jaate hain। vahaan vish hota nahin, isliye unko viceless world kaha jaata hai। nirvikaari bhaarat tha, ab woh vikaari bana hua hai। yeh chakra bhaarat ke liye hi hai। bhaaratvaasi hi chakra lagaate hain। aur dharma vaale poora chakra nahin lagaate। woh to pichhaadi mein aate hain। yeh bada wonderful chakra hai। buddhi mein nasha rehna chaahiye। in chitron par bada attention rehna chaahiye। service karke dikhaao। vilaayat mein bhi chitra jaayen to naam baala hoga। vihang maarga ki service ho jaae। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) avinaashi gyaan ratnon ka khajaana jo mila hai use daan karna hai। apna samay khaane-peene, jharmui-jhagmui mein vyartha nahin ganvaana hai।

2) kaudi jaise manushyon ko heere jaisa banaane ki seva karni hai। baap se aasheervaad ya kripa maangani nahin hai। unki raay par chalte rehna hai।

vardaan:- seva dvaara praapta maan, martabe ka tyaag kar avinaashi bhaagya banaane vaale mahaatyaagi bhav

aap bachche jo shreshtha karma karte ho-is shreshtha karma athva seva ka pratyakshaphal hai - sarva dvaara mahima hona। sevaadhaari ko shreshtha gaayan ki seat milti hai। maan, martabe ki seat milti hai, yeh siddhi avashya praapta hoti hai। lekin yeh siddhiyaan raaste ki chattiyaan hain, yeh koi final manzil nahin hai isliye iske tyaagvaan, bhaagyavaan bano, isko hi kaha jaata hai mahaatyaagi banna। gupta mahaadaani ki visheshta hi hai tyaag ke bhi tyaagi।

slogan:- pharishta banna hai to saakshi ho har aatma ka part dekho aur sakaash do।