Daily Murli for Wednesday 11 October 2023

11-10-2023 praatahmurli om shanti "baapdaada"' madhuban

“meethe bachche - yeh padhaai bahut sasti aur sahaj hai, pad ka aadhaar gareebi va saahookaari par nahin, padhaai par hai, isliye padhaai par poora dhyaan do''

prashn:- gyaani tu aatma ka pahla lakshan kaun sa hai?

uttar:- woh sabhi ke saath ati meetha vyavhaar karenge। kisi se dosti, kisi se dushmani rakhna yeh gyaani tu aatma ka lakshan nahin। baap ki shreemat hai - bachche, ati meetha bano। practice karo - main aatma is shareer ko chala rahi hoon। ab mujhe ghar jaana hai।

geet:- tu pyaar ka saagar hai…

om shanti। bachchon ne kiski mahima suni? niraakaar behad ke baap ki। woh gyaan ka saagar oonch te oonch hai, unko hi oonch te oonch baap kaha jaata hai। param shikshak arthaat gyaan ka saagar bhi kaha jaata hai। abhi tum samajhte ho yeh mahima hamaare baap ki hai, jis dvaara ham bachchon ki bhi vahi avastha honi hai। woh bade te bada baap hai, koi saadhu-sannyaasi to nahin hai। yeh to behad ka baap niraakaar parampita paramatma hai। tum bachchon ki buddhi mein hai ki yeh hamaara behad ka maat-pita, pati aadi sab hai phir bhi woh nasha sthaai nahin rehta। ghadi-ghadi bachchon ko bhool jaata hai। yeh to oonch te oonch aur ati meethe te meetha baap hai, jisko sabhi aadhaakalpa yaad karte hain। lakshmi-naaraayan ko itna yaad nahin karenge। bhakton ka bhagwan ek hi niraakaar hai, unko hi sab yaad karte hain। bhal koi lakshmi-naaraayan ko, koi ganesh aadi ko maanne vaale honge phir bhi mukh se ‘he bhagwan' shabd hi niklega। ‘he paramatma' akshar zaroor sabke mukh se nikalta hai। aatma unko yaad karti hai। jismaani bhakta jismaani cheez ko yaad karte hain to bhi aatma itni pitaavrata hai jo apne baap ko zaroor yaad karti hai। duhkh mein jhat aavaaj nikalta hai - he paramatma। yeh zaroor samajhte hain ki woh paramatma niraakaar hai parantu unka mahatva nahin jaante। abhi tum mahatva ko jaante ho ki woh to ab hamaare sammukh aaye hain। woh hai svarga ka rachayita। hamko sammukh padha rahe hain। yeh ek hi padhaai hai। woh jismaani padhaaeeyaan to bhinna-bhinna prakaar ki hoti hai। koi ka man padhaai mein nahin lagta hai to chhod bhi dete hain। yahaan is padhaai mein paise aadi ki koi baat nahin। woh government bhi gareebon ko free padhaati hai। yahaan to yeh hai hi muphta mein padhaai, fees kuchh bhi nahin। baap ko gareeb nivaaz kaha jaata hai। gareeb hi padhte hain। yeh hai bahut sahaj aur sasti padhaai। manushya apne ko insure bhi karte hain। yahaan bhi tum insure karte ho। kehte ho baba aap humein svarga mein 21 janmon ka evza dena। bhakti maarga mein aise nahin kehte ki - he parampita paramatma, hamko 21 janma liye varsa do। yeh tum abhi jaante ho ham direct apne ko insure karte hain। yeh to hamesha kehte hain phal dene vaala eeshvar hai। sabko eeshvar hi dete hain। bhal koi bhi saadhu-santa athva riddhi-siddhi vaala ho, dene vaala sabko eeshvar hai। aatma kahegi dene vaala eeshvar hai। daan-punya aadi karte hain phir bhi uska phal dene vaala eeshvar hi hai।

is padhaai mein koi kharcha nahin hai। baba ne samjhaaya hai gareeb ka bhi itna hi insure hota hai। saahookaar laakh karega to unko laakh ka milega। gareeb ek roopaya karenge, saahookaar 5 hajaar kare to bhi evja donon ko equal (baraabar) milna hai। gareebon ke liye bahut sahaj hai, koi fees nahin lagti। gareeb athva saahookaar donon baap se varsa paane ke hakdaar hain। saara madaar padhaai par hai। gareeb achha padhte hain to unka pad saahookaar se bhi oonch ho jaata hai। padhaai hi kamaai hai। badi sasti aur sahaj padhaai hai। sirf is manushya srishti jhaad ke aadi, madhya, ant ko jaanna hai, jisko koi bhi manushya maatra jaanta nahin hai। trikaaldarshi koi ho nahin sakta। sab kah dete beanta hai। samajhte hain manushya srishti ka beej paramatma hai। yeh ulta jhaad hai। phir bhi kah dete ham yathaartha reeti nahin jaante hain। barobar yathaartha to baap hi bataayenge, jo knowledgeful hai। saara madaar tum bachchon ki padhaai par hai। abhi tum nambarvaar purushaartha anusaar jaante ho। tum master gyaan saagar ho। sab ek jaise to nahin hain। koi badi nadi, koi chhoti nadi hai। padhte sab apne-apne purushaartha anusaar hain। tum bachche jaante ho yeh behad ka baap hai। unka bankar unki shreemat par chalna hai। koi ke liye kaha jaata hai yeh bichaara parvash hai। maaya ke vash ho ulti mat chalaate hain। shreemat bhagvaanuvaach hai na। jisse shreshtha te shreshtha devi-devta banna hai। jab pahle nishchay ho jaae tab phir shivbaaba se milna hai। baba samajh jaate hain inko yathaartha nishchay nahin hai। aatmaon ka baap ek hai, yeh to samajhte hain parantu woh inmen aakar varsa de raha hai - yeh nishchay baithna bada mushkil hai। jab yeh buddhi mein baithe aur likhkar de tab baba ke paas likhat le aani chaahiye। samjhenge yeh to barobar theek hai। itna samay jo samajhte aaye so wrong hai। eeshvar sarvavyaapi nahin hai woh to behad ka baap hai। barobar bhaarat ko kalpa-kalpa sangam par behad ke baap dvaara varsa milta hai। sangam par aur isi samay hi mila tha, ab phir mil raha hai - yeh likhaana hai। barobar baap sangam par hi aate hain, aakar bi.ke. dvaara svarga ki rachna rachte hain। jab likhkar de tab us par samjha sakenge - tum kiske paas aaye ho, kya lene aaye ho?

eeshvar ka roop to niraakaar hai। eeshvar ka roop na jaanne kaaran brahm tatva kah dete hain। bachchon ko samjhaaya hai - woh to bindi hai। yeh baat aur kiski buddhi mein nahin baithegi ki paramatma ek bindi hai। aatma ke liye kehte hain - chamakta hai sitaara bhrakuti ke beech mein। woh chhoti-si cheez hai। to vichaar karna hai - paartadhaari kaun hai? itni chhoti aatma mein kitna avinaashi part noondha hua hai! in baaton mein jab koi deep jaaye tab unko samjhaana hai। tumhaari aatma kehti hai hamne 84 janma liye hain, woh saara part chhoti-si bindi roop aatma mein merge hai, jo phir emerge hota hai। is baat se manushya wonder khaayenge। yeh baat to koi samajhte nahin। 84 janma hamaare repeat hote hain। yeh bana banaaya drama hai। aatma mein kaise part noondha hua hai - sunkar manushya wonder khaayenge। barobar main aatma kehti hoon, ham aatma ek shareer chhod doosra leti hoon। yeh hamaara part noondha hua hai, jo drama anusaar repeat hota hai। yeh baaten kamjor buddhi vaale kabhi dhaaran kar na saken। yeh simran karna hai - ham 84 janma le part bajaata hoon, shareer dhaaran karta hoon। jab yeh simran chalta rahe tab kahen yeh poora trikaaldarshi hai aur doosre ko bhi trikaal-darshi banaane ka purushaartha kar rahe hain। samjhaane ki bhi bachchon mein himmat chaahiye। andhon ki laathi ban neend se sujaag karna hai।

jaag sajniyaan, ab nai duniya sthaapan hoti hai। puraani duniya ka vinaash ho raha hai। tumne trimoorti brahma-vishnu-shankar naam nahin suna hai? brahma dvaara sthaapna hoti hai। yeh sab brahmaakumaar-kumaariyaan hain na। akele brahma to nahin karenge। prajaapita ke saath zaroor brahmaakumaar-kumaariyaan honge। inka baap bhi zaroor hoga, jo inko sikhlaane vaala hai। in (brahma) ko to gyaan saagar nahin kahenge। brahma ke haath mein shaastra dikhaate hain। parantu parampita paramatma inmen aakar in dvaara sabhi ved-shaastron ka saar bataate hain। brahma shaastron ka saar nahin sunaate, woh kahaan se seekhe? unka koi bhi baap va guru hoga na। prajaapita to zaroor manushya hoga aur yahaan hi hoga, woh thahra praja ko rachne vaala। unko creator, gyaan saagar, knowledgeful nahin kah sakte। gyaan saagar parampita paramatma hi hai। woh aakar prajaapita brahma dvaara padhaate hain। isko gyaan ka kalash kaha jaata hai। yeh saara madaar dhaarna par hai। insure karo, na karo, yeh tumhaare oopar hai। baba to bahut achhi reeti insure karte hain। insurance magnate hai, bhakti maarga mein bhi, to gyaan maarga mein bhi। baap ko sab aatmaayen bhakti maarga mein yaad karti hain ki baba aakar hamko duhkh se chhudaao। baap varsa denge - ya to shantidham, ya to sukhdhaam bhej denge। jinko shanti ka varsa milna hai to kalpa-kalpa vahi shanti ka varsa lenge। tum ab purushaartha kar rahe ho sukh ka varsa lene ke liye। ismen padhna hai aur phir padhaana hai। jaise baap meethe te meetha hai vaise unki rachna bhi meethe se meethi hai। svarga kitna meetha hai! svarga naam to sab mukh se lete rehte hain। koi bhi marta hai to kehte hain svargavaasi hua। to zaroor narka mein tha, ab svarga mein gaya। jaata nahin hai to bhi kehte hain। tumko likhna chaahiye zaroor hell mein tha na। yeh hell hai phir unko yahaan mangaane ki, khilaane ki kyon koshish karte hain। pitra bulaate hain na। aatma ko bulaana yeh hai pitra ko bulaana। tum phir sabhi pitron ke baap ko bulaate ho। sabhi aatmaon ka baap baith tumko padhaate hain। tum kitni gupta sena ho, shivshaktiyaan। shiv to niraakaar hai na। tum shaktiyaan ho unke bachche। shakti aatma mein aati hai। manushya jismaani shakti dikhlaate hain, tum roohaani shakti dikhlaate ho। tumhaara hai yogbal। yog rakhne se tumhaari aatma pavitra hoti hai। aatma mein jauhar aata hai। tumhaare mein mama ki gyaan talvaar sabse teekhi hai। yeh koi sthool kataari va talvaar ki baat nahin hai।

aatma ko samajh hai ki mere mein gyaan shankh dhvani karne ki achhi taakat hai। ham shankhadhvani kar sakte hain। koi kehte hain - main shankhadhvani nahin kar sakti hoon। baap kehte hain gyaan ki shankhadhvani karne vaale mujhe ati priy hain। mera parichay bhi gyaan se denge na। behad ke baap ko yaad karo, yeh bhi gyaan diya na। baap ko yaad karna hai, ismen mukh se kuchh bolna nahin hai, andar mein samajhna hai - baap hamko knowledge de rahe hain। baap kehte hain tumko vaapis chalna hai। mujhe yaad karo to vikarma vinaash honge। bhagvaanuvaach - manamnaabhav। to zaroor woh niraakaar hoga na। saakaar kaise kahenge mujhe yaad karo? niraakaar hi kehte hain - he aatmaayen mujhe yaad karo, main tumhaara baap hoon। mujhe yaad karenge to ant mati so gati ho jaayegi। tum aatmaayen is shareer dvaara kehti ho ki jeev ki aatma apne baap ko yaad karo। baap bhi aatmaon ko kehte hain manamnaabhav। tum aatmaon ko hamaare paas hi aana hai। dehi-abhimaani hona hai। achhi tarah se practice karni hai main aatma is shareer ko chalaane vaali hoon। ab mujhe vaapis baap ke paas jaana hai। baap kehte hain chalte-phirte, uthte-baithte mujhe yaad karo। jo ashaanti phailaate hain woh apna pad bhrashta karte hain। ismen to bahut-bahut meetha banna hai। geet bhi hai na - kitna meetha, kitna pyaara, shiv bhola bhagwan। tum bhi unke bachche bhole ho। first class raasta bataate ho ki baap ko yaad karo to svarga ke maalik banoge। aur koi aise sauda de na sake। to baap ko bahut yaad karna chaahiye, jinse itna sukh milta hai unko hi yaad karte hain patit-paavan aao। aatmaayen patit bani hain, unke saath shareer bhi patit bana hai। aatma aur shareer donon patit bane hain। woh log to kah dete aatma nirlep hai, patit ban nahin sakti। parantu nahin, ek parampita paramatma mein hi kabhi khaad nahin padti, baaki to sabmen khaad padni hi hai। har ek ko sato, rajo, tamo mein aana hi hai। yeh sab point dhaaran kar bahut meetha banna chaahiye। aise nahin ki koi se dushmani, koi se dosti। deh-abhimaan mein aakar yahaan hi baith koi se service lena bilkul wrong hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ka simran kar trikaaldarshi banna aur banaana hai। andhon ki laathi ban unhein agyaan neend se sujaag karna hai।

2) 21 janmon ke liye apna sab kuchh insure karna hai। saath-saath gyaan ki shankhadhvani karni hai।

vardaan:- apni jimmevaariyon ke sab bojh baap ko de sada nishchint rahne vaale saphalta sampanna sevaadhaari bhav

jo bachche jitna svayan halke rehte hain, utna seva aur svayan sada oopar chadhte rehte arthaat unnati ko paate rehte isliye sab jimmevaariyon ke bojh baap ko dekar svayan nishphurne raho। kisi bhi prakaar ke main pan ka bojh na ho। sirf yaad ke nashe mein raho। baap ke saath combined raho to jahaan baap hai vahaan seva to svatah hui padi hai। karaavanhaar kara raha hai to halke bhi rahenge aur saphalta sampanna bhi ban jaayenge।

slogan:- behad drama ke har drishya ko nishchit jaankar sada nishchint raho।