Daily Murli for Friday 20 October 2023

20-10-2023 praatahmurli om shanti "baapdaada"' madhuban

“meethe bachche - deh sahit sab kuchh bhool ek baap ko yaad karo tab kahenge maatele bachche, is puraani duniya se ab tumhaari buddhi hat jaani chaahiye''

prashn:- baap ka gyaan kin bachchon ki buddhi mein sahaj hi baith jaata hai?

uttar:- jo gareeb bachche hain, jinka moh nashta hai aur buddhi vishaal hai unki buddhi mein saara gyaan sahaj baith jaata hai। baaki jinki buddhi mein rehta - hamaara dhan, hamaara pati… woh gyaan ko dhaaran kar oonch pad nahin pa sakte। baap ka banne ke baad bhi laukik sambandhon ko yaad karna maana kachchi sagaai hai, unhein sautela kaha jaata hai।

geet:- marna teri gali mein …

om shanti। meethe-meethe bachchon ne geet ka arth to aapehi samjha hoga। ab jeete ji aakar ke baap ka banna hai aur puraani duniya jisko raurav narka kaha jaata hai, unko bhoolna bhi hai aur chhodna bhi hai hi। raurav narka ko bhool phir svarga ko yaad karna hai। apne ko aatma samajh apne baap ko yaad karna hai। puraani duniya buddhi se hat jaani chaahiye। unke liye purushaartha chaahiye। yeh hai janma-janmaantar ka karmabandhan। ek janma ka nahin, janma-janmaantar ka karmabandhan hai। kitne paap, kis-kis ke saath kiye hain, woh sab janma le bhogne padte hain। to is karmabandhan ki duniya ko bhool jaana hai। yeh chhi-chhi duniya hai, patit shareer hai na, isse moh mitaana hai। gareebon ka moh sahaj mit jaata hai, saahookaaron ka mushkil mitta hai। woh samajhte hain ham svarga mein sukhi baithe hain, gareeb duhkhi hain। yoon to saara bhaarat gareeb hai phir unmein bhi jo gareeb hain woh jhat uthaate hain। unhon ke liye hi baap aate hai। gareebon ko jaasti varsa milta hai। sab centres mein dekho saahookaar koi mushkil thahar sakte hain। striyaan bhi gareeb gharon ki hi aati hain। dhanvaan ko to pati se sukh milta hai, isliye unse buddhiyog toot nahin sakta। gareeb hi aksar karke gyaan lete hain। baap hai hi gareeb nivaaz। jis baap ko sab yaad karte hain। parantu drama anusaar bhakta bhagwan ko jaante nahin hain। bhagwan to hai hi bhakton ka rakshak। bhakti ka phal dene vaala, sadgati daata ek baap hai। tum bachche baap dvaara abhi gyaan ki baaten sun rahe ho। yeh gyaan unheen bachchon ki buddhi mein baithta hai jinki buddhi vishaal hai, moh nashta hai। jinki buddhi mein rehta hai ki hamaara pati, hamaara dhan aadi hai, woh oonch pad pa nahin sakte। pad woh paate hain jo rachta aur rachna ka parichay dete hain। baap ko pahchaane bigar varsa kaise mile? saajan ko sirf saajan kahne se phaayda nahin ho sakta hai। jaane pahchaane bigar saajan se sagaai kaise ho sakti hai? kanya ki sagaai hoti hai to unko chitra aadi dikhaate hain। phalaane ka bachcha hai, yeh occupation hai। aage dikhlaate nahin the, aise hi shaadi kara dete the। to bhi unka occupation to bataate hain na। yahaan koi-koi bachche apne baap ko athva saajan ko jaante hi nahin hain to sagaai kaise ho? nambarvaar hain। kaeeyon ki kachchi sagaai hai। paarlaukik saajan ko yaad nahin karte, laukik saajan ko laukik sambandhiyon aadi ko yaad karte rehte to goya kachchi sagaai hai। unko sautele bachche kaha jaata hai। pakke ko maatele bachche kaha jaata hai। maatele bachche bahut thode hain। bhatthi mein itne pade unmein se kitne kachche nikal pade। apne saajan ko pahchaante hi nahin। jaise paara hatheli par thaharta hi nahin hai na, vaise hi yaad bhi itni mushkil hai। ghadi-ghadi bhool jaate hain। 25-30 varsha vaale bhi poora yaad nahin kar sakte hain। tum jaante ho paarlaukik saajan svarga ke 21 janma liye mahaaraani-mahaaraaja banaane vaala hai। srishti ke aadi-madhya-ant ko jaanne vaala hai। sajniyon ko itna samjhaate hain to bhi buddhi mein baithta nahin hai। buddhi puraani duniya ke bandhanon mein bhatakti rehti hai। samajhte nahin hain ki main bandhan mein hoon। sambandh to chaahiye ek ka। baaki sab hain bandhan। bachchon ko samjhaaya jaata hai - ek se sambandh rakho, woh tumko srishti ke aadi-madhya-ant ki shiksha dete hain।

tum jaante ho - aadhaakalpa hai gyaan kaanda, aadhaakalpa hai bhakti kaanda। gyaan kaanda mein to 21 janmon ka varsa milta hai। vahaan hai satopradhaan phir satopradhaan se neeche sato mein phir sato se girkar rajo mein aana hai। jab sato poora hota to gyaan kaanda poora ho jaata hai। dvaapar se bhakti shuru hoti hai। woh bhi pahle satopradhaan bhakti hoti hai। phir bhakti bhi sato-rajo-tamo mein aati hai। vyabhichaari hone se bhakti phir girti jaati hai। ab yeh jaanna aur kisko samjhaana to bahut sahaj hai। tum bachchon ko raurav narka se sambandh tod ek se rakhna chaahiye। ek baap se sambandh rakhne ki practice karo। baap ko yaad karne se hi vikarma vinaash honge। gareeb achhi mehnat karte hain। to balihaari gareebon ki hai। baap bhi gareebon par balihaar jaate hain। shuruaat mein kitne gop the, kitni maataayen thi! kitne khatma ho gaye, baaki thode rahe hain। maataayen bhi thodi rahi। haan, koi koi saahookaar ghar ki bhi rah gai। jaise queen mother, devi aadi। ab tumhein mool baat samjhaani hai ki jis bhagwan ko sab yaad karte hain, uska parichay kya hai? patit-paavan baap jo raajayog sikhlaakar nar se naaraayan banaate hain, unko nahin jaanenge to tum paap karte rahenge, baap ko gaali dete rahenge। sammelan to bahut hote rehte hain। vahaan par samjhaane vaale bade teekhe chaahiye। samjhaana chaahiye tum vedon ki mahima samajhte ho, parantu isse koi faayda to hota nahin। faayda to ek baap se hi hota hai, jisko ham jaante hain, tum nahin jaante ho। aao to ham aapko samjhaayen। baap ko pahchaane bina varsa kaise milega? baap ka varsa hai mukti-jeevanmukti, gati-sadgati। yeh akshar sunaate hi baap hain। tum bachchon ko yaad rakhna chaahiye। aur koi cheez se faayda nahin। baap ko aur rachna ke aadi-madhya-ant ko jaanna hai। ismen bhi aadhaakalpa hai bhakti kaanda, aadha-kalpa hai sadgati, gyaan kaanda। bhal sammelan karte hain, parantu khud hi moonjhe hue hain। samajhte kuchh bhi nahin। tumhein sabko baap ka parichay dena hai। jab bahuton ko parichay mil jaayega tab kahenge kamaal hai। yeh to saare srishti ke aadi-madhya-ant ka raaz chitron sahit batlaate hain। maataaon ko bada nasha rehna chaahiye। purush madad karne liye taiyaar hain, direction baap dete hain। karna kanyaaon-maataaon ko hai। aajkal kanyaaon-maataaon ki mahima jaasti hai। governor, prime minister bhi maataayen banti hain। ek taraph hain woh maataayen, ek taraph ho tum paandavon ki maataayen। unhon ki uchhal jaasti hai kyonki unka raajya hai। tumko to teen pair prithvi ke bhi nahin milte hain।

baap tum bachchon ko anek raaz samjhaate rehte hain। tum abhi svarga ka varsa paate ho। saajan tumko shrringaarte hain, mahaaraani bana dete hain। aise saajan se buddhiyog na rakhna, yeh to badi bhaari bhool hai। bachchon ko samjhaate to bahut hain। tum sirf gyaan aur bhakti ka contrast bataao। bhaarat mein hi gaaya hua hai - duhkh mein simran sab karen, sukh mein kare na koi। sukh mein kyon yaad karenge? abhi woh nai duniya sthaapan ho rahi hai। parantu sukh ka varsa bhi poora lena chaahiye। maat-pita jaante hain har ek kitna laayak hai। maut jab nazdeek aayegi to bataayenge tumne purushaartha poora nahin kiya hai, tab tumhaara aisa haal hua hai। woh bhi bataayenge ki tum kis kisma ki praja mein jaayenge, kis kisma ke naukar-chaakar banenge, sab bataayenge। achha!

kai bachche samajhte hain aaj hamne murli bahut achhi chalaai। parantu nahin, yeh to shivbaaba aakar madad karte hain। apna ahankaar nahin hona chaahiye। tumko to baap sikhlaate hain jo tum sunaate ho। baap na hota to tumhaari murli kaahe ki। murleedhar ke bachchon ko murleedhar banna chaahiye, nahin to oonch pad pa nahin sakenge। bhal kuchh na kuchh faayda ho jaata hai, koi centre kholte hain to bahut aasheervaad milti hai। itna samay padhaai ki hai to aapehi service kar centre jamaana chaahiye। khud seekhte hain to kya auron ko nahin sikhla sakte? brahmaakumaari ki maangani karte hain to baba samajh jaate hain, shaayad khud mein itna gyaan nahin hai। baaki yahaan aakar kya karte hain। baba to samjhaate hain - baadal aayen, refresh hokar jaayen, varsha barsaayen। nahin to pad kaise paayenge? mama-baba kehte ho to gaddi pakadkar dikhaao। yeh bhi koi ko ahankaar nahin aana chaahiye ki hamne diya। tum kuchh bhi na do, baba tumko kaudi ke badle heera dene se bhi chhoot jaayega। achha! meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek ke saath sarva sambandh rakh buddhiyog anek bandhanon se nikaal lena hai। ek ke saath pakki sagaai karni hai। buddhiyog bhatkaana nahin hai।

2) baap samaan murleedhar banna hai, mainne achhi murli chalaai - is ahankaar mein nahin aana hai। baadal bharkar varsha karni hai। padhaai ki hai to centre jamaana hai।

vardaan:- baap ko saamne rakh eershya roopi paap se bachne vaale vishesh aatma bhav

brahman aatmaon mein hamashreek hone ke kaaran eershya utpanna hoti hai, eershya ke kaaran sanskaaron ka takkar hota hai lekin ismen vishesh socho ki yadi hamashreek kisi vishesh kaarya ke nimitta bana hai to unko nimitta banaane vaala kaun! baap ko saamne laao to eershya roopi maaya bhaag jaayegi। agar kisi ki baat aapko achhi nahin lagti hai to shubh bhaavna se oopar do, eershya vash nahin। aapas mein race karo, rees nahin to vishesh aatma ban jaayenge।

slogan:- baap ko apna saathi banaakar maaya ke khel ko saakshi ho dekhte chalo।ho।

maateshvari ji ke madhur mahaavaakyah

apna asli lakshya kya hai?

pahle pahle yeh jaanna zaroori hai ki apna asli lakshya kya hai? vo bhi achhi tarah se buddhi mein dhaaran karna hai tab hi poorn reeti se us lakshya mein upasthit ho sakenge। apna asli lakshya hain - main aatma us paramatma ki santaan hoon। asul mein karmaateet hoon phir apne aapko bhoolne se karmabandhan mein aa gai, ab phir se vo yaad aane se, is eeshvareey yog mein rahne se apne kiye hue vikarma vinaash kar rahe hain। to apna lakshya hua main aatma paramatma ki santaan hoon। baaki koi apne ko ham so devta samajh us lakshya mein sthit rahenge to phir jo paramatma ki shakti hai vo mil nahin sakegi। aur na phir tumhaare vikarma vinaash honge, ab yeh to apne ko full gyaan hai, main aatma paramatma ki santaan karmaateet ho bhavishya mein jaakar jeevanmukta devi devta pad paayenge, is lakshya mein rahne se woh taakat mil jaati hai। ab yeh jo manushya chaahte hain hamko sukh shanti pavitrata chaahiye, vo bhi jab poorn yog hoga tab hi praapti hogi। baaki devta pad to apni bhavishya praalabdha hai, apna purushaartha alag hai aur apni praalabdha bhi alag hai। to yeh lakshya bhi alag hai, apne ko is lakshya mein nahin rehna hai ki main pavitra aatma aakhreen paramatma ban jaaoongi, nahin। parantu hamko paramatma ke saath yog lagaae pavitra aatma banna hai, baaki aatma ko koi paramatma nahin banna hai।

is avinaashi gyaan par anek naam rakhe hue hain

is avinaashi eeshvareey gyaan par anek naam dhare gaye hain (rakhe gaye hain)। koi is gyaan ko amrit bhi kehte hain, koi gyaan ko anjan bhi kehte hain। gurunaanak ne kaha gyaan anjan guru diya, koi ne phir gyaan varsha bhi kaha hai kyonki is gyaan se hi saari srishti sabja (hari bhari) ban jaati hai। jo bhi tamopradhaan manushya hain vo satoguni manushya ban jaate hain aur gyaan anjan se andhiyaara mit jaata hai। is hi gyaan ko phir amrit bhi kehte hain jisse jo manushya paanch vikaaron ki agni mein jal rahe hain usse thande ho jaate hain। dekho geeta mein paramatma saaph kehta hai kaameshu krodheshu usmein bhi pahla mukhya hai kaam, jo hi paanch vikaaron mein mukhya beej hai। beej hone se phir krodh lobh moh ahankaar aadi jhaad paida hota hai, usse manushyon ki buddhi bhrashta ho jaati hai। ab us hi buddhi mein gyaan ki dhaarna hoti hai, jab gyaan ki dhaarna poorn buddhi mein ho jaati hai tab hi vikaaron ka beej khatma ho jaata hai। log to sirf aise hi kehte hain ki maryaada mein raho, parantu asul maryaada kaunsi thi? vo maryaada to aajkal toot gai hai, kahaan vo satayugi, tretaayugi devi devtaaon ki maryaada, jo grihastha mein rahkar kaise nirvikaari pravritti mein rehte the। ab vo sachchi maryaada kahaan hai? aajkal to ulti vikaari maryaada paalan kar rahe hain, ek do ko aise hi sikhlaate hain ki maryaada mein chalo। manushya ka pahla kya pharja hai, vo to koi nahin jaanta, bas itna hi prachaar karte hain ki maryaada mein raho, magar itna bhi nahin jaante ki manushya ki pahli maryaada kaunsi hai? manushya ki pahli maryaada hai nirvikaari banna, agar koi se aisa poochha jaae tum is maryaada mein rehte ho? to kah dete hain aajkal is kaliyugi srishti mein nirvikaari hone ki himmat nahin hai। ab mukh se kehna ki maryaada mein raho, nirvikaari bano isse to koi nirvikaari ban nahin sakta। nirvikaari banne ke liye pahle is gyaan talvaar se in paanch vikaaron ke beej ko khatma karna hai tab hi vikarma bhasma ho sakenge। achha। om shanti।