Daily Murli for Thursday 9 November 2023

09-11-2023 praatahmurli om shanti "baapdaada"' madhuban

“meethe bachche - deh-abhimaan mein aane se hi maaya ki chamaat lagti hai, dehi-abhimaani raho to baap ki har shreemat ka paalan kar sakenge''

prashn:- baap ke paas do prakaar ke purushaarthi bachche hain, woh kaun se?

uttar:- ek bachche hain jo baap se varsa lene ka poora-poora purushaartha karte hain, har qadam par baap ki raay lete hain। doosre phir aise bhi bachche hain jo baap ko faarakti dene ka purushaartha karte hain। koi hain jo duhkh se chhootne ke liye baap ko bahut-bahut yaad karte hain, koi phir duhkh mein phansana chaahte hain, yeh bhi wonder hai na।

geet:- mahphil mein jal uthi shama…

om shanti। bachchon ne geet to bahut baar suna hai। naye bachche phir nayesir sunte honge jabki baap aate hain to aakar apna parichay dete hain। bachchon ko parichay mila hua hai। jaante hain abhi ham behad ke maat-pita ki santaan bane hain। zaroor manushya srishti ka rachayita maat-pita hoga। parantu maaya ne manushyon ki buddhi bilkul dead kar di hai। itni saadhaaran baat buddhi mein nahin baithti। kehte to sabhi hain ki hamko bhagwan ne paida kiya hai। to zaroor maat-pita honge! bhakti maarga mein yaad bhi karte hain। har dharma vaale god father ko zaroor yaad karte hain। bhakta khud to bhagwan ho nahin sakte। bhakta bhagwan ki bandagi (saadhna) karte hain। god father to zaroor sabka ek hi hoga arthaat sabhi aatmaon ka father ek hai। sabhi jismon ka father ek ho nahin sakta। woh to anek father hain। woh jismaani father hote hue bhi ‘he eeshvar' kahkar yaad karte hain। baap baith samjhaate hain - manushya besmajh hain jo baap ka parichay hi bhool jaate hain। tum jaante ho svarga ka rachayita zaroor ek hi baap hai। abhi kaliyug hai। zaroor kaliyug ka vinaash hoga। ‘praayahlop' akshar to har baat mein aata hai। bachche jaante hain - satayug abhi praayahlop hai। achha, phir prashn uthta hai satayug mein unhon ko yeh pata hoga ki yeh satayug praayahlop ho jaayega phir treta hoga? nahin, vahaan to is knowledge ki darkaar hi nahin। yeh baaten kiski bhi buddhi mein nahin hain - srishti ka chakra kaise phirta hai, hamaara paarlaukik baap kaun hai? yeh tum bachche hi jaante ho। manushya gaate hain tum maat-pita ham baalak tere........ parantu jaante nahin। to kehna bhi na kahne ke baraabar ho jaata hai। baap ko bhool gaye hain isliye orphan ban pade hain। baap har baat samjhaate hain। shreemat par qadam-qadam chalo। nahin to koi samay maaya bada dhokha degi। maaya hai hi dhokhebaaz। maaya se liberate karna - yeh baap ka hi kaam hai। raavan to hai hi duhkh dene vaala। baap hai sukh dene vaala। manushya in baaton ko samajh nahin sakte। woh to samajhte hain duhkh sukh bhagwan hi dete hain। baap samjhaate hain - manushya duhkhi banne ke liye shaadiyon mein kitna kharcha karte hain! jo pavitra paudhe hain unko apvitra banaane ka purushaartha kiya jaata hai। yeh bhi tum samajh sakte ho, duniya nahin samajhti। yeh vishay saagar mein doobne liye kitni ceremony karte hain। unhon ko yeh pata nahin hai ki satayug mein yeh vish (vikaar) hota nahin। woh hai hi ksheersaagar। isko vishay saagar kaha jaata hai। woh hai sampoorn nirvikaari duniya। bhal treta mein do kala kam ho jaati hain, to bhi unko nirvikaari duniya kaha jaata hai। vahaan vikaar ho nahin sakte kyonki raavan ka raajya dvaapar se hi shuru hota hai। aadha-aadha hai na। gyaan saagar aur agyaan saagar। agyaan ka bhi saagar hai na।

manushya kitne agyaani hain। baap ko bhi nahin jaante। sirf kehte rehte hain ki yeh karne se bhagwan milega। milta kuchh bhi nahin। maatha maarte-maarte duhkhi, nidhanke ban jaate hain tab hi phir main dhani aata hoon। dhani bigar maaya ajgar ne sabko kha liya hai। baap samjhaate hain maaya badi dushtar hai। bahuton ko dhokha milta hai। koi ko kaam ki chamaat, koi ko moh ki chamaat lag jaati hai। deh-abhimaan mein aane se hi chamaat lagti hai। mehnat hai hi dehi-abhimaani banne mein isliye baap ghadi-ghadi kehte hain saavdhaan, manamnaabhav। baap ko yaad nahin karenge to maaya thappad laga degi isliye nirantar yaad karne ka abhyaas karo। nahin to maaya ulta kartavya kara degi। wrong-right ki buddhi to mili hi hai। kahaan bhi moonjho to baap se poochho। taar mein, chitthi mein athva phone par poochh sakte ho। phone savere-savere jhat mil sakta hai kyonki us samay sivaae tumhaare baaki sab soye rehte hain। to phone par tum poochh sakte ho। din-pratidin phone aadi ki aavaaj bhi sudhaarte rehte hain। parantu government hai gareeb, to kharcha bhi aise hi karti hai। is samay to sab jadajdeebhoot avastha vaale tamopradhaan hain phir bhi khaas bhaaratvaasiyon ko rajo-tamoguni kyon kaha jaata hai? kyonki yahi sabse jyaada satopradhaan the। doosre dharma vaalon ne na to itna sukh dekha hai, na duhkh dekhna hai। woh abhi sukhi hain tab to itna anaaj aadi bhejte rehte hain। unhon ki buddhi rajopradhaan hai। vinaash ke liye kitni invention karte hain। parantu unhon ko yeh pata nahin padta hai isliye unhon ko bahut chitra aadi bhejne pade, to unhon ko bhi pata padega, aakhreen samjhenge yeh cheez to badi achhi hai। in par likha hua hai god fatherly gift। jab aaphat ka samay hoga to aavaaz niklega phir samjhenge barobar yeh hamko mila tha। in chitron se bahut kaam niklega। baap ko vichaare jaante hi nahin। sukhdaata to woh ek hi baap hai। sab unko yaad karte hain। chitron se achhi reeti samajh sakte hain। abhi dekho 3 pair prithvi ke nahin milte hain aur phir tum saare vishwa ke maalik ban jaate ho! yeh chitra vilaayat mein bhi bahut service karenge। bachchon ko in chitron ka itna kadar nahin hai। kharcha to hona hi hai। raajdhaani sthaapan karne mein us government ka karodon rupaya kharcha hua hoga aur laakhon mare। yahaan to marne ki baat hi nahin। shreemat par poora purushaartha karna hai, tab hi shreshtha pad pa sakenge। nahin to peechhe saja khaane samay bahut pachhtaayenge। yeh baap bhi hai to dharmaraaj bhi hai। patit duniya mein aakar bachchon ko 21 janmon ke liye svaraajya deta hoon। agar phir koi vinaashkaari kartavya kiya to poori saja khaayenge। aise nahin, jo hoga woh dekha jaayega, doosre janma ka kaun baith vichaar kare। manushya daan punya bhi doosre janma ke liye karte hain। tum abhi jo karte ho woh 21 janmon ke liye। woh jo kuchh karte hain, alpakaal ke liye। evza phir bhi narka mein hi milega। tumko to svarga mein evza milna hai। raat-din ka farka hai। tum svarga mein 21 janmon ke liye praalabdha paate ho। har baat mein shreemat par chalne se beda paar hai। baap kehte hain tum bachchon ko naynon par bithaakar bade aaraam se le jaata hoon। tumne bahut duhkh uthaaye hain। ab kehta hoon tum mujhe yaad karo। tum nange aaye the, yeh part bajaaya, ab phir vaapis jaana hai। yeh tumhaara avinaashi part hai। in baaton ko koi bhi science ghamandi samajh nahin sakte। aatma itna chhota star hai, unmein avinaashi part sadaiv ke liye bhara hua hai, yeh kabhi samaapta nahin hota। baap bhi kehte hain main bhi to creator aur actor hoon। main kalpa-kalpa aata hoon part bajaane। kehte hain paramatma man-buddhi sahit chaitanya, knowledgeful hai, lekin kya cheez hai, yeh koi nahin jaante। jaise tum aatma star misal ho, main bhi star hoon। bhakti maarga mein bhi mujhe yaad karte hain kyonki duhkhi hain, main aakar tum bachchon ko apne saath le jaata hoon। main bhi panda hoon। main paramatma tum aatmaon ko le jaata hoon। aatma machchhar se bhi chhoti hai। yeh samajh bhi tum bachchon ko abhi milti hai। kitna achhi reeti samjhaate hain। baap kehte hain tumko vishwa ka maalik banaata hoon, baaki divya drishti ki chaabi main apne paas hi rakhta hoon। yeh kisko nahin deta hoon। yeh bhakti maarga mein mere hi kaam mein aati hai। baap kehte hain main tumko paavan, poojya banaata hoon, maaya patit, pujaari banaati hai। samjhaate to bahut hain parantu koi buddhivaan samjhe।

yeh tape masheen bahut achhi cheez hai। bachchon ko murli to zaroor sunni hai। bahut sikeeldhe bachche hain। baba ko baandheli gopikaaon par bahut taras padta hai। baba ki murli sunkar bahut khush honge। bachchon ki khushi ke liye kya nahin karna chaahiye। baba ko to raat-din gaanv ki gopikaaon ka khyaal rehta hai। neend bhi fit jaati hai, kya yukti rachen, kaise bachche duhkh se chhooten। koi to phir duhkh mein phansane liye bhi taiyaari karte hain, koi to purushaartha karte hain varsa lene ka, to koi phir phaarakti dene ka bhi purushaartha karte hain। duniya to aajkal bahut kharaab hai। koi bachche to baap ko maarne mein bhi deri nahin karte hain। behad ka baap kitna achhi reeti samjhaate hain। main bachchon ko itna dhan doonga jo yeh kabhi duhkhi nahin honge। to bachchon ko bhi itna merciful banna chaahiye ki sabko sukh ka raasta bataayen। aajkal to sabhi duhkh dete hain, baaki teacher kabhi duhkh ka raasta nahin bataayenge। woh padhaate hain। padhaai source aaph income hai। padhaai se shareer nirvaah karne laayak bante hain, maa-baap se bhal varsa milta hai parantu woh kya kaam ka? jitna jaasti dhan, utna paap bahut karte hain। nahin to teertha yaatra karne badi namrata se jaate hain। parantu koi-koi to teertha yaatra par bhi sharaab le jaate hain, phir chhipaakar peete hain। baba ka dekha hua hai - sharaab bigar rah nahin sakte। baat mat poochho। ladaai mein jaane vaale bhi sharaab khoob peete hain। ladaai vaalon ko apni jaan ka khyaal nahin rehta hai। samajhte hain aatma ek shareer chhod jaakar doosra shareer legi। tum bachchon ko bhi abhi gyaan milta hai। yeh chhi-chhi shareer chhodna hai। unhon ko koi gyaan nahin। parantu aadat padi hui hai - marna aur maarna। yahaan to ham aapehi baithe-baithe baba ke paas jaana chaahte hain। yeh puraani khaal hai। jaise sarpa bhi puraani khaal chhod dete hain। thandi mein sookh jaati to utaar dete hain। tumhaari yeh to bahut chhi-chhi puraani khaal hai, part bajaate ab inko chhodna hai, baba ke paas jaana hai। baba ne yukti to bataai hai - manamnaabhav। mujhe yaad karo bas, aise baithe-baithe shareer chhod denge। sannyaasiyon ka bhi aise hota hai - baithe-baithe shareer chhod dete hain kyonki woh samajhte hain aatma ko brahm mein leen hona hai, to yog lagaakar baithte hain। parantu ja nahin sakte। jaise kaashi kalvat khaate hain, woh jeevghaat ho jaata hai। yeh sannyaasi bhi baithe-baithe aise jaate hain, baba ka dekha hua hai, woh hua hathayog sannyaas।

baap samjhaate hain tumko 84 janma kaise milte hain? tumko kitni knowledge dete hain, koi birla hi shreemat par chalta hai। deh-abhimaan aane se phir baap ko bhi apni mat dene lag padte hain। baap samjhaate hain dehi-abhimaani bano। main aatma hoon, baba aap gyaan ke saagar ho। bas, baba aapki raay par hi chaloonga। qadam-qadam par badi saavdhaani chaahiye। bhoolen to hoti rehti hain phir purushaartha karna padta hai। kahaan bhi jaao baap ko yaad karte raho। vikarmon ka bojh sir par bahut hai। karmabhog bhi to chuktu karna hota hai na। pichhaadi tak yeh karmabhog chhodega nahin। shreemat par chalne se hi paarasbuddhi banna hai। saath mein dharmaraaj bhi hai। to responsible woh ho gaya। baap baitha hai, tum kyon apne par bojha rakhte ho। patit-paavan baap ko patiton ki mahphil mein aana hi hai। yeh to nai baat nahin, anek baar part bajaaya hai, phir bajaate rahenge। isko hi wonder kaha jaata hai। achha!

paarlaukik baapdaada ka meethe-meethe sikeeldhe bachchon prati yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan sabko duhkhon se liberate karne ka raham karna hai। sukh ka raasta bataana hai।

2) koi bhi vinaashkaari (ulta) kartavya nahin karna hai। shreemat par 21 janmon ke liye apni praalabdha banaani hai। qadam-qadam par saavdhaani se chalna hai।

vardaan:- vaaydon ki smriti dvaara faayda uthaane vaale sada baap ki blessing ke paatra bhav

jo bhi vaayde man se, bol se athva likhkar karte ho, unhein smriti mein rakho to vaayde ka poora phaayda utha sakte ho। check karo ki kitne baar vaayda kiya hai aur kitna nibhaaya hai! vaayda aur faayda - in donon ka balance rahe to vardaata baap dvaara blessing milti rahegi। jaise sankalp shreshtha karte ho aise karma bhi shreshtha hon to saphalta moorta ban jaayenge।

slogan:- svayan ko aisa divya aaina banaao jismen baap hi dikhaai de tab kahenge sachchi seva।