Daily Murli for Thursday 30 November 2023

30-11-2023 praatahmurli om shanti "baapdaada"' madhuban

“meethe bachche - tumhein roohaani panda ban yaatra karni aur karaani hai, yaad hi tumhaari yaatra hai, yaad karte raho to khushi ka paara chadhe''

prashn:- niraakaari duniya mein jaate hi kaun-se sanskaar samaapta ho jaate aur kaun se sanskaar rah jaate hain?

uttar:- vahaan knowledge ke sanskaar samaapta ho jaate, praalabdha ke sanskaar rah jaate hain। jin sanskaaron ke aadhaar par tum bachche satayug mein praalabdha bhogte ho, vahaan phir padhaai ka va purushaartha ka sanskaar nahin rehta hai। praalabdha mil gai phir gyaan khatma ho jaata hai।

geet:- raat ke raahi thak mat jaana…

om shanti। yahaan sammukh shiv bhagvaanuvaach hai। geeta mein dikhaate hain - shreekrishna bhagvaanuvaach parantu shreekrishna to us naam-roop se sammukh ho na sake। yeh to sammukh kehte hain, niraakaar bhagvaanuvaach। shreekrishnavaach kahen to woh saakaar ho jaata hai। jo bhi ved-shaastra aadi sunaate hain, woh aise nahin kahenge ki bhagvaanuvaach kyonki woh saadhu, santa, mahaatma aadi sab saakaar mein baithe hain। aur phir baap kehte hain - he roohaani raahi। roohaani baap zaroor roohon ko hi kahenge ki bachche, thak mat jaana। yaatra par kai thak jaate hain to phir vaapas aa jaate hain। woh hai jismaani yaatra। bhinna-bhinna mandiron mein jismaani teertha yaatra karne jaate hain। koi shiv ke mandir mein jaate hain, vahaan sab jismaani chitra rakhe hain bhakti maarga ke। yeh to supreme rooh parampita paramatma aatmaon ko kehte hain ki he bachche, ab mujh ek ke saath buddhi ka yog lagaao aur gyaan bhi dete hain। teerthon par jaate hain to vahaan bhi brahman log baithe hain, katha-keertan karte hain। tumhaari to ek hi satya naaraayan ki katha hai, nar se naaraayan banne ki। tum jaante ho pahle sweet hom mein jaayenge phir vishnupuri mein aayenge। is samay tum ho brahmaapuri mein, isko piyarghar kaha jaata hai। tumko jevar aadi kuchh nahin hain kyonki tum piyarghar mein ho। tum jaante ho sasurghar mein hamko apaar sukh milne hain। yahaan kaliyugi sasurghar mein to apaar duhkh hain। tumko to jaana hai us paar sukhdhaam mein। yahaan se transfer hona hai। baap sabhi ko naynon par bithaakar le jaate hain। dikhaate hain na shreekrishna ka baap unko tokri mein bithaakar us paar le gaya to yeh behad ka baap tum bachchon ko us paar sasurghar le jaate hain। pahle apne niraakaari ghar mein le jaayenge phir sasurghar bhej denge। to vahaan yeh sab piyarghar, sasurghar ki baaten bhool jaayengi। woh hai niraakaari piyarghar, vahaan yeh knowledge bhool jaati hai, knowledge ke sanskaar nikal jaate hain, baaki praalabdha ke sanskaar rah jaate hain। phir tum bachchon ko praalabdha hi dhyaan mein rehti hai। praalabdha anusaar jaakar sukh ke janma lenge। sukhdhaam jaana hai। praalabdha mil gai phir gyaan khatma। tum jaante ho praalabdha mein hamaari phir vahi act chalegi। tumhaare sanskaar hi praalabdha ke ho jaayenge। abhi hain purushaartha ke sanskaar। aise nahin ki purushaartha aur praalabdha donon sanskaar vahaan rahenge। nahin, vahaan yeh gyaan nahin rehta। to yeh tumhaari roohaani yaatra hai, tumhaara chief panda hai baap। yoon to tum bhi roohaani pande ban jaate ho, sabko saath mein le jaate ho। woh hain jismaani pande, tum ho roohaani pande। woh log amarnaath par bade dhoomdhaam se jaate hain, jhunda ke jhunda khaas amarnaath par bahut dhoomdhaam se jaate hain। baba ne dekha hai kitne saadhu-santa baaje gaaje le jaate hain। saath mein doctor aadi bhi le jaate hain kyonki thandi ka samay hota hai। kai beemaar pad jaate hain। tumhaari yaatra to bahut sahaj hai। baap kehte hain yaad mein rehna hi tumhaari yaatra hai। yaad mukhya hai। bachche yaad karte rahen to khushi ka paara chadha rahe। saath mein auron ko bhi yaatra par le jaana hai। yeh yaatra ek hi baar hoti hai। woh jismaani yaatraayen to bhakti maarga se shuru hoti hain। woh bhi koi shurooaat mein nahin hoti। aise nahin ki phat se mandir, chitra aadi ban jaate hain। woh to aahiste-aahiste baad mein bante jaate hain। pahle-pahle shiv ka mandir banega। woh bhi pahle ghar mein somnaath ka mandir banaate hain to phir kahaan jaane ki darkaar nahin rehti। yeh mandir aadi baad mein bante hain, samay lagta hai। aahiste-aahiste naye shaastra, naye chitra, naye mandir aadi bante rehte। time lagta hai kyonki padhne vaale bhi chaahiye na। math aadi jab vriddhi ko paayenge, phir vichaar hoga shaastra banaayen। to itne teerthasthaan banen, mandir banen, chitra banen, time lagta hai na। bhal kaha jaata hai ki bhakti maarga dvaapar se shuru hota hai parantu time to lagta hai na। phir kalaayen kamti hoti jaayengi। pahle avyabhichaari bhakti, phir vyabhichaari bhakti ho jaati hai। yeh sab baaten achhi reeti chitron par siddha kar bataai jaati hain। samjhaane vaalon ki buddhi mein yahi chalta rahega ki aise-aise chitra banaayen, yeh samjhaayen। sabki buddhi mein nahin chalega। nambarvaar hai na। koi ki buddhi bilkul chalti nahin, woh phir pad bhi aise paayenge। maaloom pad jaata hai - yeh kya banenge? jitna aage chalenge - tum samajhte jaayenge। jab ladaai aadi lagegi phir practical dekh lenge। phir bahut pachhtaayenge। us samay padhaai to ho na sake। ladaai ke samay traahi-traahi hoti rahegi, sun nahin sakenge। pata nahin kya ho jaayega। partition hua to kya ho gaya, dekha na। yeh vinaash ka samay bahut kada hai। haan, baaki saakshaatkaar aadi bahut honge, jisse jaan jaayenge ki yeh kitna padha hai। bahut pachhtaayenge bhi aur saakshaatkaar honge - dekho tumne padhaai chhod di tab yeh haal hua hai। dharmaraaj saakshaatkaar karaane sivaae sajaayen kaise denge? sab saakshaatkaar karaayenge। phir us samay kar kuchh nahin sakenge। kahenge haay takdeer। tadbeer ka samay to gaya। to baap kehte hain kyon nahin abhi purushaartha karte ho। service se hi dil par chadhenge। baap kahenge yeh bachche achhi service karte hain। military ka koi marta hai to unke mitra-sambandhiyon aadi ko bhi inaam dete hain। yahaan tumko inaam dene vaala hai behad ka baap। baap se bhavishya 21 janmon ke liye inaam milta hai। yeh to harek ko apni dil par haath rakh poochhna hai ki main kitna padhta hoon। dhaarna nahin hoti to goya takdeer mein nahin hai। kahenge karma hi aise phoote hue hain। bahut kharaab karma karne vaale kuchh utha nahin sakte hain।

baap samjhaate hain - meethe bachche, tumhein is roohaani yaatra par apne saathiyon ko bhi le jaana hai। farja hai harek ko yeh yaatra ki baat bataana। bolo, hamaari yeh roohaani yaatra hai। woh hai jismaani। dikhaate hain rangoon ki taraph ek chham-chham talaav hai, jahaan snaan karne se pari ban jaate hain। lekin woh pari aadi to bante nahin। yeh hai gyaan snaan karne ki baat, jisse phir tum bahishta ki beebi ban jaate ho aur gyaan-yogbal se vaikuntha mein aana-jaana to tumhaare liye common baat hai। aur hi tumko roka jaata hai, ghadi-ghadi dhyaan mein nahin jaao, aadat pad jaayegi। to yeh gyaan maan-sarovar hai, parampita paramatma aakar is manushya tan dvaara gyaan sunaate hain, isliye inko maan-sarovar kaha jaata hai। maan-sarovar akshar saagar se nikla hai। gyaan saagar mein gyaan snaan karna to bahut achha hai। bahishta ki beebi ko mahaaraani kaha jaata hai। baap kahenge tum bhi bahishta ke maalik bano। bachchon par lav rehta hai। harek par raham padta hai, saadhuon par bhi raham aata hai। yeh to geeta mein likha hua hai ki saadhuon ka bhi uddhaar karte hain। uddhaar hota hai - gyaan yog se। tum bachchon mein samjhaane ki badi phurti chaahiye। bolo - tum aur to sab jaante ho lekin chhaanchh jaante ho, baaki makkhan khilaane vaale ko tum jaante hi nahin ho। baap kitna achhi reeti samjhaate hain। parantu kiski buddhi mein bhi baithe na। baap ko jaanne se manushya heere jaisa bante hain, na jaanne se manushya kaudi misal, bilkul patit hain। baap ko jaanne se hi paavan bante hain। patit duniya mein koi paavan ho na sake। to jo mahaarthi bachche hain, woh achhi reeti samjha sakenge। kitne dher brahmaakumaar-kumaariyaan hain। prajaapita brahma naam bhi mashhoor hai। prajaapita brahma ke yeh hain mukh vanshaavli। brahma ko hi 100 bhuja, 1000 bhuja dikhaate hain। yeh bhi samjhaaya jaata hai itni bhujaayen to ho nahin sakti। baaki brahma to bahut bachde vaala hai। brahma phir kiska bachcha? inka to baap hai na। brahma hai shivbaaba ka bachcha। inka aur kaun baap ho sakta? manushya to koi ho nahin sakta। brahma, vishnu, shankar gaaye jaate hain sookshm vatan ke। woh to yahaan aa na saken। prajaapita brahma to zaroor yahaan hoga na। sookshm vatan mein to praja nahin rachenge। to parampita paramatma aakar is brahma mukh dvaara shakti sena rachte hain। pahle-pahle parichay dena hai ham brahma mukh vanshaavli hain। tum bhi brahma ke bachche ho na। prajaapita brahma hai sabka baap। phir unse aur biraadriyaan nikalti hain, naam badalte jaate hain। ab tum brahman ho। practical mein dekho prajaapita brahma ki kitni aulaad hain। zaroor aulaad ko varsa milta hoga। brahma ke paas to koi property hai nahin, property hai shivbaaba ke paas। brahma valda shiv। behad ke baap se hi varsa milta hai। brahma dvaara shivbaaba baith padhaate hain। hamko daade ka varsa milta hai। baba samjhaate to bahut hain, parantu yog nahin। kaayde par nahin chalte to baap bhi kya kare। baap kehte hain inki takdeer। agar baba se poochhen to baba bata sakte hain - is haalat mein tumhaara kya pad hoga? dil bhi gavaahi deta hai, main kitni service karta hoon? shreemat par kahaan tak chalta hoon? shreemat kehti hai manamnaabhav। sabko baap aur varse ka parichay dete rehte hain, dhindhora bhi peette rehte hain। baba ishaara dete rehte hain, tumhein government ko bhi samjhaana hai। jo woh bhi samjhen barobar bhaarat ki taakat hi chali gai hai। parampita paramatma sarvashaktimaan se yog hi nahin hai। inse tum yog lagaate ho to ekdam vishwa ke maalik bante ho, maaya par bhi tum jeet pahante ho। grihastha vyavhaar mein rehte maaya par jeet paani hai। hamaara madadgaar baap hai। kitna samjhaaya jaata hai, dhaarna karni chaahiye। baba ne samjhaaya hai dhan diye dhan na khute। service karenge tab baba ki dil par chadh sakenge। nahin to impossible hai। iska matlab yeh nahin ki baba pyaar nahin karte। baba pyaar serviceable ko karenge। mehnat karni chaahiye। sabko yaatra laayak banaate hain। manamnaabhav। yeh hai roohaani yaatra, mujhe yaad karo to tum mere paas pahunch jaayenge। shiv puri mein aakar phir vishnupuri mein chale jaayenge। yeh baaten sirf tum bachche jaante ho। koi aur manamnaabhav ka arth samajhte nahin, padhte to bahut hain। baap mahaamantra dete hain, mujhe yaad karo to tum vikarma-jeet ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan snaan karna hai। pyaar se service kar baap ke diltakhta par baithna hai। purushaartha ke samay mein albela nahin banna hai।

2) baap ki palkon par baith kaliyugi duhkhadhaam se sukhdhaam chalna hai isliye apna sab kuchh transfer kar dena hai।

vardaan:- jeevan mein divyagunon ke phoolon ki phulvaadi dvaara khushhaali ka anubhav karne vaale ever happy bhav

sada khushhaal arthaat bharpoor, sampanna। pahle kaanton ke jangal mein jeevan thi abhi phoolon ki khushhaali mein aa gaye। sada jeevan mein divyagunon ke phoolon ki phulvaadi lagi hui hai, isliye jo bhi aapke samparka mein aayega use divya-gunon ke phoolon ki khushbu aati rahegi aur khushhaali dekh karke khush honge, shakti ka anubhav karenge। khushhaali auron ko bhi shaktishaali banaati aur khushi mein laati hai isliye aap kehte ho ki ham ever happy hain।

slogan:- master sarvaashaktimaan woh hain jo maaya ke budbudon se darne ke bajaae unse khelne vaale hain।