Daily Murli for Monday 4 December 2023

04-12-2023 praatahmurli om shanti "baapdaada"' madhuban

“meethe bachche - satguru ka sahaj vasheekran mantra tumhein mila hua hai ki chup rahkar maamekam yaad karo, yahi maaya ko adheen karne ka mahaamantra hai''

prashn:- shivbaaba hi sabse bhola graahak hai - kaise?

uttar:- baba kehte - bachche, tumhaare paas deh sahit jo bhi puraana kachra hai woh main leta hoon, so bhi tab jab tum marne par ho। tumhaare saphed kapde bhi marne ki hi nishaani hain। tum abhi baap par bali chadhte ho। baap phir 21 janmon ke liye tumhein maalaamaal kar dete hain। bhakti maarga mein bhi baap sabki manokaamnaayen poorn karte hain, gyaan maarga mein bhi srishti ke aadi, madhya, ant ka gyaan de trikaaldarshi banaate hain।

geet:- bholenaath se niraala…

om shanti। bachche bholaanaath ke sammukh baithe hue hain। vyaapaari log kehte hain - aisa koi mat ka moora (kam buddhi vaala bhola) ho jo hajaar, do hajaar ka maal lekar, hamko khoob dhan dekar jaaye। he bhagwan, hamko aisa graahak milaao। ab bholaanaath baap aakar bachchon ko aadi, madhya, ant ka raaz samjhaae trikaaldarshi bana rahe hain। mere jaisa graahak tumko kabhi mil sakta hai? tum unko arpan karte ho। bhakti maarga mein bahut mahima karte ho। bholaanaath ki mahima hoti hai - tum maat-pita…। woh aakar raajayog sikhlaate hain, raajaai dete hain। baap ko kehte hain yeh jo puraana kachra hai woh ham aapke oopar bali chadhaate hain। aap hamko 21 janmon ke liye maalaamaal karte ho। sarraaph hote hain na, matta-satta karte hain, commission lete hain। yeh bhi kehte hain kachra jo bhi hai deh sahit, woh sab tumhaara leta hoon jab tum marne par ho। yahaan tum brahmaakumaariyon ke kapde bhi saphed hain। jaise ki tum mare pade ho। marne vaale par hamesha saphed chaadar daalte hain। koi bhi daag na ho। is samay sabko maaya ka kaala daag lag gaya hai, isko hi raahu ka grahan kaha jaata hai। chandrama par bhi grahan lagne se kaala ho jaata hai na। to yeh maaya ka grahan bhi saare vishwa ko kaala kar deta hai। ismen tatva aadi sab aa jaate hain।

baap baith samjhaate hain yeh tumhaara raajayog hai। raajayog se svarga mein raajaai praapta karni hai। tum raajaaon ka raaja bante ho, naaraayni nasha rehta hai। nar se naaraayan bante hain। lakshmi-naaraayan ka raajya hota hi hai satayug mein। to zaroor mujhe ant mein aana pade। yeh samay hai bhakti maarga ka, bhakti maarga mein dar-dar maatha tekte, dhakka khaate rehte hain। bhakton ka rakhvaala hai bhagwan, bhakti ka phal aakar dete hain। sab bhakta to hain parantu sabko ek jaisa phal nahin milta hai। koi ko saakshaatkaar hota hai, koi ko putra milta hai, alpakaal ke liye। kisma-kisma ki manokaamnaayen poori karta hoon। duniya mein yeh kisko pata nahin ki bhagwan aaya hua hai raajayog sikhlaane। samajhte hain woh dvaapar mein aaya tab raajayog sikhaaya hoga। phir vahaan nar se naaraayan kaise banenge? abhi hi baap tumhein raajayog sikhlaakar raajaaon ka raaja banaate hain। yahaan to tumhein sirf chup rehna hai। manamnaabhav, yahi satguru ka sahaj vasheekran mantra hai। is mantra mein bahut aamadni hai। yeh maaya ko apne adheen karne ka mantra hai। maayaajeet jagatjeet। bhakti maarga vaalon ka hai man jeete jagatjeet, iske liye woh hathayog aadi karte hain। so bhi jagatjeet banne ke liye nahin karte hain। woh to mukti ke liye karte hain। baap aakar kehte hain - bachche, deh sahit, sarva dharmaani… main phalaane dharma ka hoon, phalaana hoon। yeh sab baaten chhod apne ko aatma samajh maamekam yaad karo। bas main jo mat de raha hoon us par chalo। baaki ab tak jo anek maton par chalte aaye un sabki mat chhodni pade। to tumhaara gyaan bilkul naya ho gaya। samajhte hain inhon ki baaten to nai hain।

tum bachche jab kisi ko bhi samjhaate ho to pahle unki nabja dekhni hai। sabke saamne ek jaisi baat nahin karni hai। manushyon ki hain anek maten। tumhaari hai ek mat। parantu nambarvaar hain। jo achha yog mein rehte hain, dhaarna karte hain, woh zaroor achha samjhaayenge। kam dhaarna vaale kam samjhaayenge। koi bhi ho unko ek hi simple baat bataao-bhal grihastha vyavhaar mein rehte raho parantu kamal phool samaan। tumko maaloom hai kamal ke phool ko baal-bachche bahut hote hain aur misaal bhi unka hi diya jaata hai। baap ko bhi baal bachche to bahut hain। kamal ka phool khud paani ke oopar rehta hai, baaki baal bachche neeche rehte hain। yeh misaal achha hai। baba kehte hain grihastha vyavhaar mein raho parantu pavitra raho। yeh baat ho gai pavitrata par। so bhi is antim jeevan ke liye pavitra rah maamekam yaad karo। rachna ki paalna bhi zaroor karni hai। nahin to hathayog ho jaayega। duniya mein pavitra to bahut rehte hain। baal brahmachaari to bheeshma pitaamah misal ho gaya। achha baal brahmachaari woh jo stri-purush donon ikatthe rah pavitra rahe। gandharvi vivaah ki charcha to shaastron mein bhi hai, parantu koi jaante nahin hain। yeh to baap hi samjhaate hain। baba kehte hain - bachche, ab kaam chita ke badle donon gyaan chita ka hathiyaala baandho। kaisa achha kaam tum brahman karte ho। pratigya karni hai pavitra rahne ki। ek-do ko saavdhaan karte tum donon svarga mein chale jaayenge। yahaan tum ikatthe pavitra rahkar dikhaate ho isliye tum bada oonch pad le sakte ho। misaal diya jaayega na। gyaan chita par baith svarga mein jaakar oonch pad paate hain। ismen himmat hai badi, agar pakke ho chalte raho to pad bahut oonch hai। phir service par bhi madaar hai। jo bahut service karenge, praja banaayenge woh pad bhi achha paayenge। baba-mama se bhi oonch chala jaana chaahiye। parantu jaise baba kehte hain woh donon Christian agar aapas mein mil jaaen to vishwa ke maalik ban jaayen, aise joda koi nikle jo maa-baap se oonch jaaye, so hai nahin। jagat amba, jagat pita hi naameegraami hai। in jaisi service kar nahin sakenge। yeh nimitta bane hue hain isliye kabhi heartfail nahin hona chaahiye। achha, mama-baba jaisa nahin to second number to ban sakte ho। service par madaar hai। praja aur vaaris banaane hain, to yeh apni baaten hain nai। nai duniya rachne ke liye zaroor baap ko aana pade। vahi rachayita hai। woh to kah dete hain-paramatma naam roop se nyaara hai। parantu aisa hai nahin। unka bhi koi dosh nahin। takdeer mein ho to samjhen। bahut aate hain jo samajhte bhi hain ki baat to barobar theek hai। koi kahe aatma ka naam roop nahin hai, tab aatma naam kiska pada? aatma naam to hai na। tum sabko bolo yeh raajayog hai। parampita paramatma sangam par aate hain, raajayog zaroor sangamayug par sikhaayenge tab to patit ko paavan banaayenge। to yahaan ki baat hi nyaari hai। baap kehte hain sirf apne ko aatma samjho। baap ke paas jaana hai। ismen prashn poochhne ki koi baat hi nahin। kehte bhi hain ki hamaari aatma ko na dukhaao। yeh paap aatma hai, punya aatma hai। aatma ke liye koi kah na sake ki unka koi roop nahin hota hai। vivekaanand jab raamkrishna ke saamne baitha to unko saakshaatkaar hua, dekha ki light aai jo mere mein pravesh hui। aise kuchh baat bataate hain। tum bolo hamaara hai raajayog। ismen deh sahit deh ke sabhi mitra sambandhiyon aadi ko bhoolna padta hai, ham aatma unke bachche hain, aapas mein brotherhood hain। agar sabhi father ho jaate to phir father hi father ko praarthana karte। abhi ham raajayog seekh rahe hain। yeh hai raajaaon ka raaja banne ka yog। abhi to raajaai hai nahin। to samjhaana hai ham shanti mein rahkar sirf shivbaaba ko yaad karte hain। apne ko shareer se nyaara samajhte hain। aatma kehti hai main ek shareer chhod doosra leti hoon। to knowledge ka sanskaar aatma mein rehta hai na। achha va bura sanskaar aatma mein hai। aatma nirlep nahin hai, yeh samjhaana hai। aatma punarjanma mein aati hai। ghadi-ghadi organs lena padta hai। aatma star hai, bhrakuti ke beech rehti hai। aatma ka saakshaatkaar hua, to usne samjha inmen itni taakat hai jo mujhe aatma ka saakshaatkaar karaaya। ab aatma to bhrakuti ke beech mein rehti hai। saakshaatkaar kiya na kiya, farka kya raha? aatma khud kehti hai main star hoon। mere mein 84 janmon ka part hai। agar 84 laakh janma ho to itne sanskaar hon jo pata nahin kya ho jaae! 84 janma maan sakte hain। 84 laakh to maan na saken। abhi ham paavan ban rahe hain। baba ne humein nar se naaraayan banne ke liye pavitra banaaya hai, yeh bahut achha nasha chaahiye। tumhein koi se bhi debate karne ki darkaar nahin।

deh sahit deh ke sab dharma tyaag apne ko aatma, ashareeri samajhna hai। bhal hamne shaastra aadi padhe hain, parantu discuss kyon karen? jabki baap ne kaha hai maamekam yaad karo aur doosra farmaan hai grihastha vyavhaar mein kamal phool samaan pavitra raho। yog agni se hi paap naash honge। bhagvaanuvaach hai, bhagwan bhi param aatma hai। unko bhi star kahenge। bahut points hain ek samay nahin nikal sakti। aasaami dekh yukti se uthaana hai। bolo, ham bhi shaastra padhte hain parantu baap ka farmaan hai ki sabhi ko bhool maamekam yaad karo। woh hai niraakaar। aatma ko to sab maanenge। vivekaanand vaale bhi maanenge। aatma to sabhi mein hai। zaroor unka baap hoga na jisko parampita paramatma kaha jaata hai। yeh sab points hain na। yeh simran karne se sadaiv points milti rahengi, steamer bharta rahega। yeh bhi jaise avinaashi gyaan ratnon ka vakhar (saamagri) bharta hai। points note kar revise karo। yeh hain ratna, inko dhaaran karne aur likhne ka shauk chaahiye। achhi tarah se sabko samjhaana hai, aatma to sabhi mein hai unka naam roop nahin hai। aise to kah nahi sakenge aatma ka roop hai to paramatma ka kyon nahin hai। unko kaha hi jaata hai parampita paramatma, paramdham mein rahne vaala। kitna bachchon ko samjhaaya jaata hai। to ab service karke dikhaao। baba to service par inaam dete hain। kitna shrangaar karaate hain gyaan ratnon ka। ham yahaan ke padmapti nahin banna chaahte hain, hamko to chaahiye vishwa ki baadshaahi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ratna jo milte hain un par vichaar saagar manthan kar svayan mein dhaaran karna hai। gyaan ratnon se sada bharpoor rehna hai।

2) apne naaraayni nashe mein rehna hai, vaahyaat baaten kisi se bhi nahin karni hai। ashareeri banne ka abhyaas karna hai।

vardaan:- dua aur dava dvaara tan-man ki beemaari se mukta rahne vaale sada santushta aatma bhav

kabhi shareer beemaar bhi ho to shareer ki beemaari se man disturb na ho। sadaiv khushi mein naachte raho to shareer bhi theek ho jaayega। man ki khushi se shareer ko chalaao to donon exercise ho jaayengi। khushi hai dua aur exercise hai davaai। to dua aur dava donon se tan man ki beemaari se mukta ho jaayenge। khushi se darda bhi bhool jaayega। sada tan-man se santushta rehna hai to jyaada socho nahin। adhik sochne se time vesta hota hai aur khushi gaayab ho jaati hai।

slogan:- vistaar mein bhi saar ko dekhne ka abhyaas karo to sthiti sada ekras rahegi।

maateshvari ji ke madhur mahaavaakya - “paramatma ki sadgati karne ki gat mat paramatma hi jaanta hai''

tumhaari gat mat tum hi jaano… ab yeh mahima kiski yaadgaar mein gaate hain? kyonki paramatma ki sadgati karne ki jo mat hai vo to paramatma hi jaanta hai। manushya nahin jaan sakta, manushya ki sirf yeh ichchha rehti hai ki hamko sada ke liye sukh chaahiye, magar vo sukh kaise mile? jab tak manushya apne 5 vikaaron ko bhasma kar karma akarma nahin banaaye tab tak vo sukh mil nahin sakta, kyonki karma akarma vikarma ki gati bahut gahan hai jisko sivaae paramatma ke aur koi manushya aatma uski gati ko nahin jaan sakta। ab jab tak paramatma ne vo gati nahin sunaai hai tab tak manushyon ko jeevanmukti praapta nahin ho sakti, isliye manushya kehte hain teri gat mat tum hi jaano। inki sadgati karne ki mat vo paramatma ke paas hai। kaise karmon ko akarma banaana hai, yeh shiksha dena paramatma ka kaam hai। baaki manushyon ko to yeh gyaan nahin, jis kaaran vo ulta kaarya karte rehte hain, ab manushya ka pahla pharz hai apne karmon ko sudhaarna, tab hi manushya jeevan ka poora laabh utha sakenge। achha। om shanti।