Daily Murli for Friday 29 December 2023

29-12-2023 praatahmurli om shanti "baapdaada"' madhuban

“meethe bachche - prashnon mein moojhanna chhod manamnaabhav raho, baap aur varse ko yaad karo, pavitra bano aur banaao''

prashn:- shivbaaba tum bachchon se apni pooja nahin karva sakte hain, kyon?

uttar:- baba kehte - main tum bachchon ka most obedient servant hoon। tum bachche mere maalik ho। main to tum bachchon ko namaste karta hoon। baap hai nirhankaari। bachchon ko bhi baap samaan banna hai। main tum bachchon se apni pooja kaise karaaoonga। mere pair bhi nahin hain, jisko tum dhulaai karo। tumhein to khudaai khidmatgaar ban vishwa ki seva karni hai।

geet:- nirbal se ladaai balvaan ki…

om shanti। niraakaar shiv bhagvaanuvaach। shivbaaba niraakaar hai aur aatmaayen jo shivbaaba kehti hain woh bhi asul mein niraakaar hain। niraakaari duniya mein rahne vaale hain। yahaan part bajaane ke liye saakaar bane hain। ab ham sabko to pair hain। shreekrishna ko bhi paanv hain। pair poojte hain na। shivbaaba kehte hain main to hoon obedient, mere pair hain nahin jo tumse pair dhulaaoon va pooja karaaoon। sannyaasi pair dhulaate hain na। grihasthi log jaakar unke pair dhote hain। pair to manushyon ke hain। shivbaaba ko pair hi nahin hain, jo tumko pair ki pooja karni pade। yeh hai pooja ki saamagri। baap kehte hain main to gyaan ka saagar hoon। main apne bachchon se kaise pair dhulaaoonga? baap to kehte hain vande maatram। maataaon ko phir kya kehna hai? haan, khade hokar kahenge shivbaaba namaste। jaise salaam maalekam kehte hain na। so bhi baap ko pahle namaste karna padta hai। kehte hain aai em most obedient। behad ka servant hoon। niraakaar aur nirhankaari kitna hai। pooja ki to baat hi nahin। most beloved children, jo milkiyat ke maalik bante hain, unse kaise pooja karaayenge? haan, chhote bachche baap ke paanv padte hain kyonki baap bada hai। parantu vaastav mein to baap bachchon ka bhi servant hai। jaante hain ki bachchon ko maaya bahut tang karti hai। bahut kada part hai। bahut apaar duhkh ajun aane vaale hain। yeh saari behad ki baat hai, tab hi behad ka baap aate hain। baap kehte hain daata main ek hi hoon, anya kisi ko bhi daata nahin kah sakte। baap se sab maangate hain। saadhu log bhi mukti maangate hain। bhaarat ke grihasthi log bhagwan se jeevanmukti maangate hain। to daata ek ho gaya। gaaya bhi hua hai - sarva ka sadgati daata ek। saadhu log jab khud hi saadhna karte hain to auron ko phir gati-sadgati kaise de sakte hain? mukti-dhaam aur jeevanmuktidhaam donon ka proprietor ek hi baap hai। woh apne samay par aate hain ek hi baar। aur sabhi janma-maran mein aate rehte hain। yeh ek hi baar aate hain jabki raavan ka raajya khatma hona hota hai। uske pahle aa nahin sakte। drama mein part hi nahin hai। to baap kehte hain tumne mere dvaara mujhe ab pahchaana hai। manushya nahin jaante to sarvavyaapi kah diya hai।

abhi to hai raavan raajya। bhaaratvaasi hi raavan ko jalaate rehte hain। to siddha hai raavan raajya bhaarat mein hai, raamraajya bhi bhaarat mein hain। yeh baaten raamraajya sthaapan karne vaala hi samjhaate hain ki kaise ab raavan raajya hai। yeh kaun samjhaate hain? niraakaar shiv bhagvaanuvaach। aatma ko shiv nahin kahenge। aatmaayen hain sab saaligraam। shiv ek ko hi kaha jaata hai। saaligraam to anek hote hain। yeh hai rudra gyaan yagya। woh brahman log jo yagya rachte hain, usmein ek bada shivling aur chhote-chhote saaligraam banaakar pooja karte hain। deviyon aadi ki pooja to varsha-varsha hoti hai। yeh to roz mitti ke banaate hain aur pooja karte hain। rudra ka bada maan hota hai। saaligraam kaun hai, woh to jaante nahin। tum shivshakti sena patiton ko paavan banaati ho। shiv ki pooja to hoti hai। saaligraam kahaan jaayen? to bahut manushya rudra yagya rach saaligraamon ki pooja karte hain। shivbaaba ke saath bachchon ne bhi mehnat ki hai। shivbaaba ke madadgaar hain। unhon ko kaha jaata hai khudaai khidamgaar। khud niraakaar bhi zaroor koi shareer mein aayenge na। svarga mein to khidmat ki darkaar nahin। shivbaaba kehte hain dekho yeh mere khidmatgaar bachche hain। nambarvaar to hain na। sabki pooja to kar na saken। yeh yagya bhi bhaarat mein hi hote hain। yeh raaz baap hi samjhaate hain। woh brahman log va seth log thode hi jaante hain। vaastav mein yeh hai rudra gyaan yagya। bachche pavitra ban bhaarat ko svarga banaate hain। yeh badi hospital hai, jahaan yog dvaara ham ever healthy bante hain। baap kehte hain mujhe yaad karo। deh-ahankaar pahla number vikaar hai jo yog todta hai। body conscious hote ho, baap ko bhoolte ho tab hi phir aur vikaar aa jaate hain। yeh yog nirantar lagaana badi mehnat hai। manushya shreekrishna ko bhagwan samajh unki pooja karte hain। parantu woh patit-paavan to hai nahin, jo unke pair pooje jaayen। shiv to hai hi bigar paanv। woh to aakar maataaon ka servant bante hain aur kehte hain baap aur svarga ko yaad karo to phir tum 21 janma raajya karenge। 21 peedhi gaai hui hain। aur dharmon mein nahin gaayi jaati। kisi bhi dharma vaale ko 21 janma svarga ki baadshaahi nahin milti hai। yeh bhi drama bana hua hai। devta dharma vaale jo aur dharmo mein mix ho gaye hain woh phir nikal aayenge। svarga ke sukh to aprampaar hain। nai duniya, naye makaan mein achha sukh hota hai। thoda puraana hone mein kuchh na kuchh daag ho jaate hain phir repair kiya jaata hai। to jaise baap ki mahima aprampaar hai vaise svarga ki mahima bhi aprampaar hai, jiska maalik banne ka tum purushaartha kar rahe ho। aur koi svarga ka maalik bana na sake।

tum bachche jaante ho vinaash ki scene badi dardanaak hai। unke pahle baap se varsa le lena chaahiye। baap kehte hain ab mere bano arthaat eeshvareey god lo। shivbaaba bada hai na। to tumko praapti bahut hai। svarga ke sukh aprampaar hain। naam sunte hi mukh paani hota hai। kehte bhi hain phalaana svarga padhaara। svarga pyaara lagta hai na। yeh to hai hi narka, jab tak satayug na ho tab tak svarga mein koi ja na sake। baap samjhaate hain yeh jagdamba jaakar phir svarga ki mahaaraani lakshmi banti hai phir bachche bhi nambarvaar bante hain। mama-baba jaasti purushaartha karte hain। raajya to vahaan bachche bhi karenge na। sirf lakshmi-naaraayan to nahin karenge। to baap aakar manushya se devta banaate hain, padhaate hain। agar kehte shreekrishna banaate hain to phir shreekrishna ko to le gaye hain dvaapar mein। dvaapar mein to devta hote nahin। sannyaasi kah na saken ki ham svarga jaane ke liye raasta bataate hain। uske liye to bhagwan chaahiye। kehte hain mukti-jeevanmukti ke dvaar kaliyug ke ant mein khulenge। yeh hai rudra gyaan yagya। main hoon shiv, rudra aur yeh hain saaligraam। yeh sab shareerdhaari hain। mainne shareer ka loan liya hua hai। yeh sab brahman hain। brahman bigar yeh gyaan koi mein hota nahin। shoodron mein bhi nahin hai। satayug mein devi-devtaayen to paarasbuddhi the, jo baap hi ab banaate hain। sannyaasi kisko paarasbuddhi bana na saken। bhal khud pavitra hain phir bhi beemaar ho padte hain। svarga mein kabhi beemaar nahin padenge। vahaan to apaar sukh hain isliye baap kehte hain poora purushaartha karo। race hoti hai na। yeh hai rudra maala mein pirone ki race। aham aatma ko daudi lagaani hai yog ki। jitna yog lagaayenge to samjhenge yeh teekha daud raha hai। unke vikarma vinaash hote jaayenge। tum uthte-baithte, chalte-phirte yaatra par ho। buddhiyog ki yeh bahut achhi yaatra hai। tum kehte ho aise svarga ke aprampaar sukh paane ke liye pavitra kyon nahin rahenge। hamko maaya hila nahin sakti। pratigya karni hoti hai। antim janma hai, marna to hai hi, to kyon nahin baap se varsa le leven। kitne baba ke bachche hain। prajaapita hai, to zaroor nai rachna rachte hain। nai rachna hoti hai braahmanon ki। brahman hain roohaani social worker। devta to praalabdha bhogte hain। tum bhaarat ki service karte ho isliye tum hi svarga ke maalik bante ho। bhaarat ki service karne mein sabki service ho jaati hai। to yeh hai rudra gyaan yagya। rudra shiv ko kaha jaata hai, na ki shreekrishna ko। shreekrishna to satayug ka prince hai। vahaan yeh yagya aadi honge nahin। abhi hai raavan raajya। yeh khalaas hona hai। phir kabhi raavan banaayenge hi nahin। baap hi aakar in janjeeron se chhudaate hain। is brahma ko bhi janjeeron se chhudaaya na। shaastra padhte-padhte kya haalat hui hai! to baap kehte hain ab mujhe yaad karo। baap ko yaad karne ki himmat nahin hai। pavitra rehte nahin, phaaltu prashn poochhte rehte hain। to baap kehte hain manamnaabhav। agar kisi baat mein moonjhate ho to usko chhod do, manamnaabhav। aise nahin ki prashn ka response nahin mila to padhna hi chhod do। kehte hain bhagwan hai to response kyon nahin dete? baap kehte hain tumhaara kaam hai baap aur varse se। chakra ko bhi yaad karna pade। woh bhi trimoorti aur chakra dikhaate hain। likhte hain - “satya mev jayte'' parantu arth nahin samajhte। tum samjha sakte ho - shivbaaba ko yaad kiya to sookshm vatan vaasi brahma-vishnu-shankar bhi yaad aayenge aur svadarshan chakra ko yaad karne se vijayanti ho jaayenge। ‘jayte' maana maaya par jeet pahnenge। kitni samajh ki baat hai। yahaan kaayde hain - hanson ki sabha mein bagule baith na saken। bi.ke. jo svarga ki pari banaati hain, un par badi responsibility hai। pahle jab koi aate hain to unse hamesha yeh poochho - aatma ke baap ko jaante ho? prashn jo poochhte hain to zaroor jaante honge। sannyaasi aadi aise kabhi nahin poochhenge। woh to jaante hi nahin। tum to prashn poochhenge - behad ke baap ko jaante ho? pahle to sagaai karo। braahmanon ka dhandha hi yeh hai। baap kehte hain - he aatmaayen, mere saath yog lagaao kyonki mere paas aana hai। satayugi devi-devtaayen bahutkaal se alag rahe hain to pahle-pahle gyaan bhi unko hi milega। lakshmi-naaraayan ne 84 janma poore kiye hain to unko hi pahle gyaan milna chaahiye।

manushya srishti ka jo jhaad hai, uska pita hai brahma aur aatma ka pita hai shiv। to baap aur daada hai na। tum ho unke potre। unse tumko gyaan milta hai। baap kehte hain main jab narka mein aaoon tab to svarga rachoon। shiv bhagvaanuvaach - lakshmi-naaraayan trikaaldarshi nahin hain। unko yeh rachta-rachna ka gyaan hai nahin, to parampara kaise chale? kai samajhte hain yeh to sirf kehte rehte hain - maut aaya ki aaya। hota to kuchh nahin hai। is par ek misaal bhi hai na - usne kaha sher aaya, sher aaya, parantu sher aaya nahin। aakhir ek din sher aa gaya, bakriyaan sab kha gaya। yeh baaten sab yahaan ki hain। ek din kaal kha jaayega, phir kya karenge? bhagwan ka kitna bhaari yagya hai। paramatma ke sivaae to itna bada yagya koi rach na sake। brahma vanshi brahman kahlaakar pavitra na bana to yeh mara। shivbaaba se pratigya karni hoti hai। meetha baba, svarga ka maalik banaane vaala baba main to aapka hoon, ant tak aapka hokar rahoonga। aise baap ko athva saajan ko phaarakti di to mahaaraaja-mahaaraani ban nahin sakenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha khudaai khidmatgaar ban bhaarat ko svarga banaane mein baap ko pavitrata ki madad karni hai, roohaani social worker banna hai।

2) kisi bhi prakaar ke prashnon me moonjhakar padhaai nahin chhodni hai। prashnon ko chhod baap aur varse ko yaad karna hai।

vardaan:- hadon se paar rah sabko apne pan ki mahoosta karaane vaale anubhvi moorta bhav

jaise har ek ke man se nikalta hai mera baba। aise sabhi ke man se nikle ki yeh mera hai, behad ka bhaai hai ya behen hai, deedi hai, daadi hai। kahaan bhi rehte ho lekin behad seva ke nimitta ho। hadon se paar rahkar behad ki bhaavna, behad ki shreshtha kaamna rakhna - yahi hai follow father karna। abhi iska practical anubhav karo aur karaao। vaise bhi anubhvi bujurga ko pita ji, kaaka ji kehte hain, aise behad ke anubhvi arthaat sabko apnaapan mahsoos ho।

slogan:- upraam sthiti dvaara udti kala mein udte raho to karma roopi daali ke bandhan mein phansenge nahin।