Daily Murli for Saturday 30 December 2023

30-12-2023 praatahmurli om shanti "baapdaada"' madhuban

“meethe bachche - shubh kaarya mein deri nahin karni hai, apne bhaai bahinon ko thokar khaane se bachaana hai, bhoon-bhoon kar aap samaan banaana hai''

prashn:- kis baat ka anartha hone se bhaarat kaudi misal ban gaya hai?

uttar:- sabse bada anartha hua hai jo geeta ke svaami ko bhool, geeta gyaan se janma lene vaale bachche ko svaami kah diya hai। isi ek anartha ke kaaran sabhi baap se bemukh ho gaye hain। bhaarat kaudi tulya ban gaya hai। ab tum bachche baap se sammukh mein sachchi geeta sun rahe ho jis geeta gyaan se hi devi-devta dharma sthaapan hota hai, tum shreekrishna ke samaan bante ho।

geet:- kisne yeh sab khel rachaaya…

om shanti। brahman kul bhooshan bachche samajh gaye hain ki barobar hamko svarga mein bahut aprampaar sukh the, ham bahut khushi mein the, ham jeev aatmaayen svarga mein bahut masti mein the phir kya hua? rang roop ki maaya aakar chatki। vikaaron ke kaaran hi isko narka kaha jaata hai। narka to saara hai। ab yeh jo bhramri ka misaal dete hain, bhramri aur braahmani donon ka kaam ek hai। bhramri ka misaal tumhaare oopar hai। bhramri keede le jaati hai। ghar banaakar usmein keede daal deti hai। yeh bhi narka hai। sab keede hain। parantu sab keede devi-devta dharma vaale nahin hain। jo bhi dharma vaale hain sab narkavaasi keede hain। ab devi-devta dharma ke keede kaun hain, yeh kaise pata pade ki yeh brahma vanshi braahmaniyaan hain jo baith bhoon-bhoon karti hain। jo devta dharma ke honge vahi thahar sakenge। jo nahin honge, thahrenge nahin। narkavaasi keede to sabhi hain। sannyaasi bhi yahi kehte hain ki narka ka yeh sukh kaag vishta samaan hai। unko yeh pata nahin ki svarga mein athaah sukh hain। yahaan par 5 percent sukh aur 95 percent duhkh hai। to isko koi svarga nahin kaha jaayega। svarga mein to duhkh ki baat nahin rehti। yahaan to anek shaastra, anek dharma tatha anek maten ho gai hain। svarga mein to ek hi advet devta mat hai। ek hi dharma hai। to tum ho braahmaniyaan। tum bhoon-bhoon karti ho phir jo is dharma ke hain woh thahar jaate hain। anek prakaar ke hain। koi nature ko maante, koi science ko, koi kehte yeh srishti kalpana maatra hai। aisi vaartaalaap yahaan hi chalti hai, satayug mein nahin chalti। yeh behad ka baap prajaapita brahma ke mukh kamal se apne bachchon ko baith samjhaate hain ki tum mere paas the, ab phir mere paas aana hai। ismen shaastron ki to baat nahin uthti। Christ tatha buddha aate hain, woh bhi aakar sunaate hain, us samay to shaastra ka prashn uth na sake। Christ Bible padhta tha kya? Bible ka prashn hi nahin uthta। baap kehte hain - bachche, tum apni haalat to dekho। maaya raavan ne tumhaari kaisi haalat kar di hai! samajhte bhi hain ki ham aasuri raavan sampradaay hain। raavan ko jalaate hain parantu jalta nahin। raavan ka jalna banda kab hoga? yeh manushyon ko pata nahin hai। tum ho eeshvareey daivi sampradaay। tum bachche ho hamaare, ab main phir aaya hoon tum bachchon ko raajayog sikhlaane। anek dharma hain। unmein se nikaalne mein kitni mehnat lagti hai। geeta bhi kahaan se aai? aadi sanaatan dharma jo tha unki nishaaniyaan kahaan se nikli? jo phir rishi-muniyon ne baith banaai, jo ab tak sunte aaye hain। ved kisne gaaye? vedon ka baap kaun hai? baap kehte hain ki geeta ka bhagwan main hoon। geeta maata rachi shivbaaba ne, usse janma liya shreekrishna ne। unke saath raadhe aadi sab aa jaate hain। pahle hain hi brahman।

tum bachchon ko nishchay hai ki woh hamaara most beloved baap hai - jisko sab kehte hain O god father raham karo। bhakta pukaarte hain ki kaise duhkh se chhooten। agar bhagwan sarvavyaapi ho to phir pukaarne ki baat hi nahin। mukhya hai geeta ki baat, kitne yagya aadi rachte hain। ab tum aise parche chhapaao। ab kitna anartha ho gaya hai। jahaan-tahaan dekho geeta likhte rehte hain। geeta kisne rachi, kisne gaai, kab gaai, kisne banaai, kuchh bhi pata nahin hai। shreekrishna ka bhi yathaartha parichay nahin hai। bas, kah dete jidhar dekho sarvavyaapi krishna hi krishna hai। raadhe ke bhakta raadhe ke liye kahenge sarvavyaapi raadhe hi raadhe hai। ek niraakaar paramatma ko hi kahen to bhi theek। sabko kyon sarvavyaapi kar diya hai। ganesh ke liye bhi kahenge sarvavyaapi। ek hi mathura shahar mein koi kahenge shreekrishna sarvavyaapi hai, koi kahenge raadhe sarvavyaapi hai। kitni moonjh ho gai hai। ek ki mat na mile doosre se। ek hi ghar mein baap ka guru alag to bachche ka guru alag। vaastav mein guru kiya jaata hai vaanaprastha mein। baap kehte hain main bhi aaya hoon inki vaanaprastha avastha mein। duniya mein to jitna jo bada guru hota hai unko utna nasha rehta hai। aadi dev ko mahaaveer bhi naam diya hai। hanoomaan ko bhi mahaaveer kehte hain। mahaaveer to tum shaktiyaan ho। delvaada mandir mein shaktiyon ki sher par savaari hai aur paandavon ki haathiyon par। mandir bada yukti se bana hua hai। hoobhu tumhaara yaadgaar hai। tum to us samay honge nahin jo tumhaara chitra den। mandir to dvaapar mein bane hain to tumhaare chitra kahaan se aayenge। service to tum abhi kar rahe ho। baaten sab abhi ki hain। unhonne baad mein shaastra banaaye hain। ham agar geeta ka naam na len to manushya samjhenge - pata nahin, yeh kaun-sa naya dharma hai? kitni mehnat lagti hai। woh is duniya mein sirf dharma sthaapan karte hain। tumko to nai duniya ke liye baap taiyaar karte hain।

baap kehte hain mere jaisa kartavya koi kar na sake। sab patiton ko paavan banaana padta hai। ab tum bachchon ko warning deni pade। bhaarat mein kitna anartha ho gaya hai jis kaaran hi bhaarat kaudi tulya bana hai। baap ne geeta maata dvaara shreekrishna ko janma diya, unhonne phir shreekrishna ko geeta ka svaami bana diya hai। geeta ka svaami to shiv hai, usne geeta se shreekrishna ko janma diya । tum sab sanjay ho, sunaane vaala ek shivbaaba hai। praacheen devi-devta dharma ka rachne vaala kaun? yeh sab likhne mein buddhi chaahiye। geeta se ham janma le rahe hain। mama raadhe aur yeh phir shreekrishna banega। yeh gupta baaten hain na। braahmanon ka janma koi samajh na sake। baat hi hai shreekrishna aur paramatma ki। brahma, shreekrishna aur shivbaaba - yeh sab baaten guhya hain na। in baaton ko samajhne vaala bada buddhivaan chaahiye। jinka yog poora hoga, unki buddhi paaras banti jaayegi। bhatakne vaale ki buddhi mein yeh thahar na sake। baba tum bachchon ko kitni oonchi knowledge de rahe hain। vidyaarthi apni buddhi bhi chalaate hain na। to abhi baithkar likho। shubh kaarya mein deri nahin karni chaahiye। ham saagar ke bachche apne bhaai-bahnon ko bachaayen। bichaare thokar khaate rehte hain। kahenge bi.ke. itni radiyaan maarti hain, kuchh to baat hogi। laakhon parche chhapvaakar geeta paathshaalaaon aadi mein baanto। bhaarat avinaashi khanda hai aur sarvottam teertha hai। jo baap sabko sadgati dete hain unke teertha sthaan ko gum kar diya hai to phir unka naam nikaalna pade। phool chadhaane laayak ek shiv hi hai। baaki to sab vyartha hain। geeta paathshaalaayen bahut hain। tum vesh badalkar vahaan jaao। phir bhal samjhen yeh bi.ke.hongi। aise prashn koi poochh na sake। achha!

tum samajhte ho ki shivbaaba brahma tan se baith yeh baaten samjhaate hain। jo baba svarga ka maalik banaane vaala hai, woh abhi aaya hua hai। jab tak brahman na banen tab tak devta ban na saken। brahman kul devtaaon se bhi oonch hai। sabki aatma paavan ho rahi hai। tum phir nai duniya mein punarjanma lenge। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

raatri class 12.01.69

tum bachche ek baap ki yaad mein baithe ho, ek ki yaad mein rehna ise kahenge avyabhichaari yaad। agar yahaan baithe bhi doosre koi ki yaad aati hai to vyabhichaari yaad kahenge। khaana peena, rehna ek ghar mein, yaad doosre ko karna yeh to thagi ho gai। bhakti bhi jab tak ek shivbaaba ki karte hain tab tak avyabhichaari bhakti hui phir auron ko yaad karna, yeh vyabhichaari bhakti ho jaati hai। abhi tum bachchon ko gyaan mila hai, ek baap kitni kamaal karte hain! hamko vishwa ka maalik banaate hain। to us ek ko hi yaad karna chaahiye। mera to ek। parantu bachche kehte hain shivbaaba ki yaad bhool jaati hai। vaah! bhakti maarga mein to tum kehte the ham ek ki hi bhakti karenge। vahi patit-paavan hai, aur to koi ko patit-paavan nahin kaha jaata। ek ko hi kaha jaata hai। vahi oonch te oonch hai। abhi to bhakti ki baat hi nahin। bachchon ko gyaan hai। gyaan saagar ko yaad karna hai। bhakti maarga mein kehte hain aap aayenge to ham aapko hi yaad karenge। to yeh baaten yaad karni chaahiye। harek apne se poochhe ham ek baap ko yaad karte hain ya anek mitra, sambandhiyon aadi ko yaad karte hain? ek baap se hi dil lagaani hai। agar dil aur taraph gai to yaad vyabhichaari ho jaati hai। baap kehte hain bachche maamekam yaad karo। phir vahaan tumhein daivi sambandhi milenge। nai duniya mein sabhi naye milenge। to apni jaanch rakhni hai ki ham kisko yaad karte hain? baap kehte hain tum mujh paarlaukik baap ko yaad karo। main hi patit-paavan hoon, koshish kar aur taraph se buddhiyog hataakar baap ko yaad karna hai। jitna yaad karenge utna hi paap katenge। aisa nahin ki jitna ham yaad karenge utna baba bhi yaad karenge। baap ko koi paap thode hi kaatne hai। abhi tum yahaan baithe ho paavan banne liye। shivbaaba bhi yahaan hai। unhein apna shareer to hai nahin, loan liya hua hai। tumhaari baap se pratigya ki hui hai - baba aap aayenge to ham aapke ban nai duniya ke maalik banenge। apne dil se poochhte raho। yeh to jaante ho buddhiyog ki link ghadi-ghadi baap se toot jaati hai। baap jaante hain link tootegi, phir yaad karenge, phir tootegi। bachche nambarvaar to purooshaartha karte hi hain। achhi reeti yaad mein rahe to is dynasty mein aa jaayenge। apni jaanch karte raho, diary rakho। saare din mein hamaara buddhiyog kahaan-kahaan gaya? to phir baap samjhaayenge। aatma mein jo man, buddhi hai woh bhaagti hai। baap kehte hain bhaagne se ghaata pad jaayega। mujhe yaad karne se bahut phaayda hai, baaki to nuksaan hi nuksaan hai। yaad karna hai mukhya ek ko। apne oopar khabardaari rakhni hai, kadam-kadam par phaayda, kadam-kadam par ghaata। 84 janma dehdhaariyon ko yaad kar ghaata hi paaya। ek-ek din hokar 5000 varsha beet gaye, ghaata hi hua, abhi baap ki yaad mein rah phaayda karna hai।

aise vichaar saagar manthan kar gyaan ratna nikaalne hain, baap ki yaad mein ekaagrachit ho lagna hai। kai bachchon ko kaudiyaan kamaane ki chinta rehti hai। maaya dhandhe aadi ke vichaar le aati hai। dhanvaan ko to bahut vichaar aate hain। baba kya kare। baba ka kitna achha dhandha tha, dhakke aadi khaane ki darkaar hi nahin thi। koi vyaapaari aata tha to main poochhta tha pahle yeh to bataao vyaapaari ho ya agent ho? (history) tumhein dhandha aadi karte buddhi ka yog baap se rakhna hai। abhi kaliyug poora ho satayug aata hai। patit to satayug mein jaayenge hi nahin। jitna yaad karenge utna hi pavitra banenge। purity se dhaarna achhi hogi। patit na yaad kar sakenge, na dhaarna hogi। koi ko takdeer anusaar samay milta hai, purooshaartha karte hain, koi ko samay hi nahin milta, yaad hi nahin karte। jisne jitni koshish kalpa pahle ki hai utni karte hain। harek ko apne se mehnat karni hai। kamaai mein ghaata padta tha to aage kehte the eeshvar ki ichchha। abhi kehte hain drama। jo kalpa pahle hua hai woh hoga। aise nahin abhi 4 ghanta yaad karte ho to doosre kalpa mein jaasti karenge। nahin। shiksha di jaati hai। abhi purooshaartha karenge to kalpa-kalpa achha purooshaartha hoga। to jaanch karo buddhi kahaan-kahaan jaati hai। malayuddha mein badi khabardaari rakhte hain। achha - roohaani bachchon ko roohaani baapdaada ka yaad-pyaar good night।

dhaarna ke liye mukhya saar:-

1) buddhivaan banne ke liye yaad se apni buddhi ko paaras banaana hai। buddhi idhar-udhar bhatkaani nahin hai। baap jo sunaate hain us par hi vichaar karna hai।

2) bhramri ban bhoon-bhoon kar narkavaasi bane hue keedon ko devi-devta banaane ki seva karni hai। shubh kaarya mein deri nahin karni hai। apne bhaai-bahinon ko bachaana hai।

vardaan:- samaanta ki bhaavna hote bhi har kadam mein visheshta ka anubhav karaane vaale vishesh aatma bhav

har bachche mein apni-apni visheshtaayen hain। vishesh aatmaon ka karma saadhaaran aatmaon se bhinna hai। har ek mein bhaavna to samaanta ki rakhni hai lekin dikhaai de ki yeh vishesh aatmaayen hain। vishesh aatmaayen arthaat vishesh karne vaali, sirf kahne vaali nahin। unse sabko feeling aayegi ki yeh sneh ke bhandaar hain, har kadam mein, har nazar mein sneh anubhav ho - yahi to visheshta hai।

slogan:- srishti ki kayaamat ke pahle apni kamiyon aur kamjoriyon ki kayaamat karo।