Daily Murli for Saturday 6 January 2024

06-01-2024 praatahmurli om shanti "baapdaada"' madhuban

“meethe bachche - tumhein ab is shareer ko bhool anaasakta, karmaateet ban ghar chalna hai isliye sukarma karo, koi bhi vikarma na ho''

prashn:- apni avastha ki jaanch karne ke liye kin teen ki mahima ko sada yaad rakho?

uttar:- 1. niraakaar ki mahima 2. devtaaon ki mahima 3. svayan ki mahima। ab jaanch karo ki niraakaar baap ke samaan poojya bane hain, unke sab gunon ko dhaaran kiya hai! devtaaon jaisi royal chalan hai! devtaaon ka jo khaan paan hai, unke jo gun hain woh hamaare hain? aatma ke jo gun hain un sab gunon ko jaan unka swaroop bane hain?

om shanti। bachchon ko samjhaaya gaya hai ki aatmaon ka nivaas sthaan hai tower aaph silence yaani shanti ki choti। jaise himaalay pahaadi ki choti hai na। woh bahut oonchi hoti hai। tum rehte bhi oonch te oonch ho। vo log pahaadi par chadhne ki practice karte hain, race karte hain। pahaadi par chadhne mein bhi koi hoshiyaar hote hain। sab nahin chadh sakte। tum bachchon ko ismen race aadi karne ki darkaar nahin। aatma jo patit hai, unko paavan ban oopar jaana hai। isko kaha jaata hai tower oph silence। aur woh phir hai tower aaph science। unke bade-bade bombs hote hain, unka bhi tower hota hai। vahaan rakhte hain khauphnaak cheezen। jahar aadi bombs mein daalte hain। baap kehte hain bachche tumko to udna hai ghar ki taraph। woh phir ghar baithe aise bombs phekte hain jo sab khatma kar denge। tumko to yahaan se oopar jaana hai tower oph silence। vahaan se tum aaye ho phir jaayenge tab jab satopradhaan ban jaayenge। satopradhaan se tamopradhaan mein aaye ho phir satopradhaan banna hai। jo satopradhaan banne ka purooshaartha karte woh phir auron ko bhi raasta bataate hain। tum bachchon ko ab sukarma karna hai। koi bhi vikarma nahin karna hai। baap ne karmon ki gati bhi samjhaai hai। raavan raajya mein tumhaari durgati hui hai। ab baap sukarma sikhaate hain। 5 vikaar bade dushman hain। moh bhi vikarma hai। koi bhi vikaar kam nahin hai। moh rakhne se bhi deh-abhimaan mein phans padte hain isliye baap kanyaaon ko bahut samjhaate hain। kanya pavitra ko kaha jaata hai, maataaon ko bhi pavitra banna hai। tum sab brahmaakumaar kumaariyaan ho। bhal budhiya ho parantu brahma ke to bachche ho na।

baap samjhaate hain meethe-meethe bachchon, ab kumaar kumaari ki stage se bhi oopar jaao। jaise pahle shareer mein aaye phir nikalkar jaana hai, mehnat karni hai। agar oonch pad paane chaahte ho to aur koi ki smriti na aaye। hamaare paas hai hi kya। haath khaali aaye hain na, kuchh bhi nahin। apna yeh shareer bhi nahin hai। ab is shareer ko bhoolna hai। anaasakta, karmaateet ban jaana hai। trustee bano। baap kehte hain bhal ghoomo phiro, baaki phaaltu kharcha mat karo। manushya daan bhi bahut karte hain। akhbaar mein padta hai phalaana bahut daani hai। hospital, dharmashaala aadi banaai hai। jo bahut daan karte hain unko phir government se title milta hai। pahle-pahle title hote hain his holiness, har holiness। holi pavitra ko kaha jaata hai। jaise devtaayen pavitra the aise banna hai। phir aadhaakalpa pavitra rahenge। bahut kahenge yeh kaise ho sakta hai। vahaan bhi bachche paida hote hain। to phat se bolo vahaan raavan nahin hai। raavan dvaara hi vikaari duniya hoti hai। raam baap aakar paavan banaate hain। vahaan patit koi ho nahin sakta। koi kehte hain pavitrata ki baat bhi nahin karni chaahiye। shareer kaise chal sakega। yeh pata hi nahin hai ki pavitra duniya bhi thi। ab apvitra duniya hai। yeh khel hai, veshyaalay, shivaalay… patit duniya, paavan duniya। pahle hai sukh phir hai duhkh। kahaani hai kaise raajaai li phir kaise ganvaai। yeh achhi tarah se samajhna hai। hamne haar khaai hai, hamko hi jeet paani hai। bahaadur banna chaahiye। apni avastha ko jamaana chaahiye। gharbaar hote, sambhaal karte pavitra zaroor banna hai। koi bhi apvitra kaam nahin karna hai। moh bhi bahuton mein hota hai। apne ko dekhna chaahiye hamne pratigya ki hai ki aapke sivaae kisko bhi pyaar nahin karenge phir doosron ko kyon pyaar karte ho! jo pyaare te pyaari cheez hai woh yaad aani chaahiye। phir aur sab deh ke sambandh bhool jaayenge। sabko dekhte aise samjho ham ab svarga mein ja rahe hain। yeh sab kaliyugi bandhan hai। ham daivi sambandh mein ja rahe hain। aur koi manushya ki buddhi mein yeh gyaan nahin। tum baap ki yaad mein achhi tarah raho to khushi ka paara chadha rahega। jitna ho sake bandhan kam karte jaao। apne ko halka kar do। bandhan badhaane ki zaroorat nahin। is raajya paane mein kharche ki zaroorat nahin। bigar kharche vishwa ki raajaai lete ho। unhon ka baarood, lashkar aadi par kitna kharcha hota hai। tumhaare paas kharcha kuchh bhi nahin। tum jo kuchh baap ko dete ho woh dete nahin parantu lete ho। baap to hai gupta। woh shreemat dete rehte hain ki museum kholo, hospital, university kholo, jisse tum knowledge praapta karte ho। yog se tum sadaiv ke liye nirogi ban jaate ho। health, wealth unke saath happiness to hai hi - 21 janmon ke liye। ek second mein mukti jeevanmukti kaise milti hai woh aakar samjho। dvaar par hi samjha sakte ho। jaise darvaaje par bheekh maangane aate hain na। tum bhi jaise bheekh dete ho jisse manushya ekdam maalaamaal ban jaate hain। koi bhi ho bolo tum kya bheekh maangate ho। ham tumko aisi bheekh dete hain jo tum janma-janmaantar bheekh maangane se hi chhoot jaayenge। behad ke baap aur srishti chakra ko jaanne se tum yeh bante ho।

tumhaara yeh badge bhi kamaal kar sakta hai। second mein behad ka varsa inse tum koi ko bhi de sakte ho। service karni chaahiye। baap second mein vishwa ka maalik banaate hain। phir hai purooshaartha par। chhote bade sabko kaha jaata hai baap ko yaad karo। train mein bhi tum badge par service kar sakte ho। badge sada lagaakar raho, is par tum sabko samjha sakte ho ki tumko do baap hain। do se hi varsa milta hai। brahma se varsa nahin milta hai। woh to dalaal hai। in dvaara baap tumko sikhlaate hain aur varsa dete hain। manushya, manushya dekhkar samjhaana chaahiye। yaatra par bhi bahut jaate hain। woh sab hai jismaani yaatraayen। yeh hai roohaani। isse tum vishwa ke maalik bante ho। jismaani yaatra se to dhakke khaate rehte hain। seedhi ka chitra bhi saath mein ho। service karte raho phir unko bhojan aadi ki bhi darkaar nahin rahegi। kaha jaata hai khushi jaisi khuraak nahin। dhan nahin hoga to unko ghadi-ghadi bhookh lagti rahegi। dhanvaan raajaaon ka jaise pet bhara rehta hai। badi royal chalan hoti hai। baatcheet bhi first class। tum samajhte ho ham kya ban rahe hain! vahaan khaan paan aadi badi royalty se hota hai। be-time kabhi khaate nahin। bada royalty se shanti se khaate hain। tumhein sab gun seekhne chaahiye। niraakaar ki mahima devtaaon ki mahima aur apni mahima teenon ki jaanch karo। ab tum baba ke gunon vaale ban rahe ho phir banenge devtaaon ke gun vaale। to woh gun abhi dhaaran karne chaahiye। ab tum daiveegun dhaaran kar rahe ho। gaate hain shanti ka saagar, prem ka saagar.. jaise baap pooja jaata hai vaise tum bhi pooje jaate ho। baap tumko namaste karte hain। tumhaari to pooja bhi double hoti hai। yeh sab baaten baap hi samjhaate hain। tumhaari mahima bhi samjhaate hain ki purooshaartha kar aisa bano। dil se poochhna chaahiye ki ham aise bane hain? jaise ham ashareeri aaye hain vaise ashareeri hokar jaana hai। shaastron mein bhi hai, laathi bhi chhodo। parantu ismen laathi ki baat nahin। yahaan to shareer ko chhodne ki baat hai। baaki sab hain bhakti maarga ki baaten। yahaan sirf baap ko yaad karna hai। baap bigar doosra na koi।

tum bachchon ko gyaan mila hai, tum jaante ho manushya kitna gurooon ki janjeero mein phanse hue hain। anek prakaar ke guru hain। ab tumhein na guru chaahiye, na kuchh padhna hi hai। baap ne ek hi mantra de diya hai - maamekam yaad karo। varse ko yaad karo aur daiveegun dhaaran karo। grihastha vyavhaar mein rehte pavitra banna hai। yahaan aate ho refresh hone ke liye। yahaan samjhenge ham baba ke sammukh baithe hain। vahaan samjhenge ki baba madhuban mein baithe hain। jaise hamaari aatma takhta par baithi hai vaise baba bhi is takhta par baithe hain। baba koi geeta shaastra aadi haath mein nahin lete hain। aise bhi nahin isne koi kantha kiya hua hai। woh to sannyaasi aadi kantha karte hain। yeh to hai gyaan ka saagar। brahma dvaara sab raaz samjhaate hain। shivbaaba kabhi koi school mein satsang mein gaya hai kya? baap to sab kuchh jaante hi hain। koi kahe bhala science jaante hain? baba kehte hain science se hamko kya karna hai। mujhe bulaate hi hain ki aakar patiton ko paavan banaao, ismen science kyon seekhoonga। kahenge shivbaaba phalaana shaastra padhe hain? are unke liye to kaha jaata hai gyaan ka saagar। yeh to bhakti maarga ke shaastra hain। vishnu ke haath mein shankh, chakra aadi de diya hai। arth ka kuchh bhi pata nahin। vaastav mein yeh alankaar brahma ko aur braahmanon ko dena chaahiye। sookshm vatan mein to yeh shareer hi nahin। brahma ka saakshaatkaar bhi ghar baithe bahuton ko hota hai। shreekrishna ka bhi hota hai। iska arth hai is brahma ke paas jaao to shreekrishna jaisa ban jaayenge va shreekrishna ki god mein aa jaayenge। woh sirf prince ka saakshaatkaar hota hai। agar tum achhi reeti padhenge to yeh ban sakte ho। yeh hai em object। sample to ek ka bataayenge na। usko model kehte hain। tum jaante ho baba aaya hai satya naaraayan ki katha sunaane, nar se naaraayan banaane। pahle to zaroor prince banenge। shaastron mein dikhaaya hai shreekrishna ne maakhan khaaya, vaastav mein yeh hai vishwa ki baadshaahi ka gola। baaki chandrama aadi kaise mukh mein dikhaayenge। kehte bhi hain do bille aapas mein lade, beech mein jo srishti ka maalik bana unko maakhan dikha diya hai। ab apne ko dekho ham aise bane hain va nahin। yeh padhaai hai hi raajaai pad ke liye। praja paathshaala thode hi kahenge। yeh hai nar se naaraayan banne ki paathshaala। godly university। bhagwan padhaate hain। baba ne kaha likho eeshvareey vishwa vidyaalay, bracket mein likho university। parantu yeh likhna bhool jaate hain। tum kitna bhi literature do to bhi kuchh samjhenge nahin। ismen sammukh samjhaana padta hai। behad ke baap se behad ka varsa milta hai। janma janmaantar tum had ka varsa lete aaye ho। tum badge par service kar sakte ho। bhal koi hansi bhi kare। do baap ki baat achhi hai। aise bahut apne bachchon ko samjhaate hain। bachche bhi baap ko samjha lete hain। stri pati ko le aati hai। kahaan-kahaan phir jhagadte hain। ab tum jaante ho, tum sab aatmaayen bachche ho। varse ke hakdaar ho। laukik sambandh mein bachchi shaadi karke doosre ghar mein jaati hai, unko kanya daan kaha jaata hai। doosre ko dete hain na। abhi to woh kaam nahin karna hai। vahaan svarga mein bhi kanya doosre ghar mein jaati hai parantu pavitra rehti hai। yeh hai patit duniya aur woh satayug hai shivaalay, paavan duniya। tum bachchon par ab hai brihaspati ki dasha। tum svarga mein to zaroor jaayenge yeh to pakka-pakka hai। baaki purooshaartha se oonch pad paana hai। dil se poochhna hai ki ham phalaane misal service karte hain। aise nahin braahmani (teacher) chaahiye, teacher tum khud bano। achha!

bachchon ko purooshaartha karna hai। baaki baba kisse paise le karke kya karenge। tum jaakar museum aadi kholo। makaan aadi to sab yahaan khatma ho jaayenge। baba to vyaapaari hai na। sharraaph bhi hai। duhkh ki janjeeron se chhudaae sukh dene vaala hai। ab baap kehte hain bahut gai thodi rahi.. tum dekhte rahenge, bahut hangaame honge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) trustee aur anaasakta bankar raho। koi bhi phaaltu (vyartha) kharche mat karo। svayan ko devtaaon jaisa pavitra banaane ka purooshaartha karte raho।

2) ek pyaare te pyaari cheez (baap) ko yaad karo। jitna ho sake kaliyugi bandhan ko halka karte jaao, badhaao mat। satayugi daivi sambandh mein ja rahe hain, is khushi mein raho।

vardaan:- puraane svabhaav-sanskaar ke bojh ko samaapta kar double light rahne vaale pharishta bhav

jab baap ke ban gaye to saara bojh baap ko de do। puraane svabhaav sanskaar ka thoda bojh bhi raha hua hoga to oopar se neeche le aayega। udti kala ka anubhav karne nahin dega isliye baapdaada kehte hain sab de do। yeh raavan ki property apne paas rakhenge to duhkh hi paayenge। pharishta arthaat jara bhi raavan ki property na ho। sab puraane khaate bhasma karo tab kahenge double light pharishta।

slogan:- nirbhay aur harshitmukh ho behad ke khel ko dekho to halchal mein nahin aayenge।

avyakti silence dvaara double light pharishta sthiti ka anubhav karo

jaise brahma baap ko chalta-phirta pharishta, dehbhaan rahit anubhav kiya। karma karte, baatcheet karte, direction dete, umag-utsaah badhaate bhi deh se nyaara, sookshm prakaash roop ki anubhooti karaai, aise follow father karo। sada deh-bhaan se nyaare raho, har ek ko nyaara roop dikhaai de, isko kaha jaata hai deh mein rehte pharishta sthiti।