Daily Murli for Tuesday 13 February 2024

13-02-2024 praatahmurli om shanti "baapdaada"' madhuban

“meethe bachche - videhi ban baap ko yaad karo, svadharma mein tiko to taakat milegi, khushi aur tanduroosti rahegi, battery full hoti jaayegi''

prashn:- drama ki kis noondh ko jaanne ke kaaran tum bachche sada achal rehte ho?

uttar:- tum jaante ho yeh bombs aadi jo bane hain, yeh chhootne hain zaroor। vinaash hoga tab to hamaari nai duniya aayegi। yeh drama ki anaadi noondh hai, marna to sabko hai। tumhein khushi hai ki ham yeh puraana shareer chhod raajaai mein janma lenge। tum drama ko saakshi ho dekhte ho, ismen hilne ki baat nahin, rone ki koi darkaar nahin।

om shanti। baap baith bachchon ko samjhaate hain yeh jo aadi sanaatan devi-devta dharma tha usko hindu dharma mein kyon laaya? kaaran nikaalna chaahiye। pahle to aadi sanaatan devi-devta dharma hi tha। phir jab vikaari hue to apne ko devta kah na sake। to apne ko aadi sanaatan devi-devta ke badle aadi sanaatan hindu kah diya hai। aadi sanaatan akshar bhi rakha hai। sirf devta badli kar hindu rakh diya hai। us samay islaami aaye to un baahar vaalon ne aakar hindu dharma naam rakh diya। pahle hindustaan naam bhi nahin tha। to aadi sanaatan hindu devta dharma vaale hi samajhne chaahiye। woh aksar karke dharmaatma hote hain। sabhi sanaatni nahin hain, jo peechhe aaye hain unko aadi sanaatni nahin kahenge। hinduon mein bhi peechhe aane vaale honge। aadi sanaatan hinduon ko bataana chaahiye ki tumhaara aadi sanaatan devta dharma tha। tum hi satopradhaan aadi sanaatan the phir punarjanma lete-lete tamopradhaan bane ho, ab phir yaad ki yaatra se satopradhaan bano। unhon ko yeh davaai achhi lagegi। baba surgeon hai na। jinhon ko yeh davaai achhi lagti hai unko deni chaahiye। jo aadi sanaatan devi-devta dharma ke the, unhon ko smriti dilaani chaahiye। jaise tum bachchon ko smriti aai hai। baba ne samjhaaya hai - kaise tum satopradhaan se tamopra-dhaan bane ho? ab phir tamopradhaan se satopradhaan banna hai। tum bachche satopradhaan ban rahe ho - yaad ki yaatra se। jo aadi sanaatan hindu honge vahi asul devi-devta honge aur vahi devtaaon ko poojne vaale bhi honge। usmein bhi jo shiv ke ya lakshmi-naaraayan, raadhe-krishna, seeta-raam aadi devtaaon ke bhakta hain, woh devta gharaane ke hain। ab smriti aai hai - jo soorya-vanshi hain vahi chandravanshi bante hain to aise-aise bhakton ko dhoondhana chaahiye। form unse bharaana hai jo samajhne liye aate hain। mukhya centres par form bharaane ke liye zaroor hone chaahiye। jo bhi aaye unko lesson to shuru se denge। pahli mukhya baat hai jo baap ko nahin jaante to unko samjhaana padta hai। tum apne bade baap ko nahin jaante ho। tum asal mein paarlaukik baap ke ho। yahaan aakar laukik ke bane ho। tum apne paarlaukik baap ko bhool jaate ho। behad ka baap hai hi svarga ka rachayita। vahaan yeh anek dharma hote nahin। to form jo bharte us par hi saara madaar hona chaahiye। koi bachche bhal samjhaate bahut achha hain parantu yog hai nahin। ashareeri ban baap ko yaad karen, woh hai nahin। yaad mein thahar nahin sakte। bhal samajhte hain ham achha samjhaate hain, museum aadi bhi kholte hain parantu yaad bahut kam hai। apne ko aatma samajh baap ko yaad karte rahen, ismen hi mehnat hai। baap warning dete hain। aise mat samjho ki ham to bahut achha kanvinsa kar sakte hain। parantu isse phaayda kya? chalo, svadarshan chakradhaari ban gaye parantu ismen to videhi banna hai। karma karte apne ko aatma samajhna hai। aatma is shareer dvaara kartavya karti hai - yeh yaad karna bhi nahin aata, khyaal mein nahin aata, unko kahenge buddhu। baap ko yaad nahin kar sakte! service karne ki taakat nahin। yaad bigar aatma mein taakat kahaan se aayegi? battery kaise bhare? chalte-chalte khadi ho jaayegi, taakat nahin rahegi।

kaha jaata hai religion is might। aatma svadharma mein tike, tab taakat mile। bahut hain jinko baap ko yaad karna aata nahin। shakla se pata pad jaata hai। aur sab yaad aayega, baba ki yaad thahregi nahin। yog se hi bal milega। yaad se badi khushi aur tanduroosti rahegi। phir doosre janma mein bhi shareer aisa tejasvi milega। aatma pure to shareer bhi pure milega। kahenge yeh 24 carat gold hai, to 24 carat jevar hai। is samay sab 9 carat ban gaye hain। satopradhaan ko 24 carat kahenge, sato ko 22, yeh badi samajhne ki baaten hain। baap samjhaate hain pahle to form bharaana hai to pata pade kahaan tak response karte hain? kitni dhaarna ki hai? phir yeh bhi aata hai yaad ki yaatra mein rehte hain? tamopradhaan se satopradhaan yaad ki yaatra se banna hai। woh hain bhakti ki jismaani yaatraayen, yeh hai roohaani yaatra। rooh yaatra karti hai। usmein rooh aur jisma donon hi yaatra karte hain। patit-paavan baap ko yaad karne se hi aatma mein tej aata hai। koi jigyaasu ko jalva aadi dikhaana hai to baba ki praveshta bhi ho jaati hai। maa-baap donon hi madad karte hain - kahin knowledge ki, kahin yog ki। baap to sada videhi hai। shareer ka bhaan hai hi nahin। to baap donon taakat ki madad de sakte hain। yog nahin hoga to taakat milegi kahaan se? samjha jaata hai yeh yogi hai ya gyaani hai। yog ke liye din-pratidin nai-nai baaten bhi samjhaate hain। aage thode hi yeh samjhaate the। apne ko aatma samajh baap ko yaad karo। ab baba jor se uthaate hain, jisse bhaai-behen ka sambandh bhi hat jaae, sirf bhaai-bhaai ki drishti rah jaae। ham aatma bhaai-bhaai hain। yeh bahut oonchi drishti hai। ant tak yeh purushaartha chalna hai। jab satopradhaan ban jaayenge tab yeh shareer chhod denge isliye jitna ho sake purushaartha ko badhaana hai। budhon ke liye aur hi sahaj hai। ab hamko vaapis zaroor jaana hai। javaanon ko kabhi aise khyaalaat nahin aayenge। budhe vaanaprasthi rehte hain। samjha jaata hai ab vaapis jaana hai। to yeh sab gyaan ki baaten samajhni hain। jhaad ki vriddhi bhi hoti rehti hai। vriddhi hote-hote saara jhaad taiyaar ho jaayega। kaanton ko badalkar naya chhota phoolon ka jhaad banna hai। naya ban phir puraana hona hai। pahle jhaad chhota hoga phir badhta jaayega। vriddhi hote-hote pichhaadi mein kaante ban jaate hain। pahle hote hain phool। naam hi hai svarga। phir baad mein woh khushbu, woh taakat nahin rehti hai। kaante mein khushbu nahin hoti। halke-halke phoolon mein bhi khushbu nahin hoti। baap baagvaan bhi hai to khivaiya bhi hai, sabki naav paar karte hain। naav paar kaise karte hain, kahaan le jaate hain - yeh bhi jo sayaane bachche hain, woh samajh sakte hain। jo samajhte nahin, woh purushaartha bhi nahin karte। nambarvaar to hote hain na। koi-koi aeroplane to aavaaz se bhi teekha jaata hai। aatma kaise bhaagti hai - yeh bhi kisko pata nahin hai। aatma to rocket se bhi teekhi jaati hai। aatma jaisi teekhi aur koi cheez hoti nahin। un rocket aadi mein aisi koi cheez daalte hain jo jaldi uda le jaate hain। vinaash ke liye kitna baarood aadi taiyaar karte hain। steamer, aeroplane mein bhi bombs le jaate hain। aaj-kal poori taiyaari rakhte hain। akhbaaron mein likhte hain, aise nahin kah sakte ki bombs kaam mein nahin laayenge। ho sakta hai bombs chala den - aise kehte rehte hain। yeh sab taiyaariyaan ho rahi hain। vinaash to zaroor hona hai। bombs na chhooten, vinaash na ho - aisa ho nahin sakta। tumhaare liye nai duniya zaroor chaahiye। yeh drama mein noondh hai, isliye tumko bahut khushi honi chaahiye। mirooa maut malooka shikaar… drama anusaar sabko marna hi hai। tum bachchon ko drama ka gyaan hone ke kaaran tum hilte nahin ho, saakshi hokar dekhte ho। rone aadi ki darkaar nahin। samay par shareer to chhodna hi hota hai। tumhaari aatma jaanti hai ham doosra janma raajaai mein lenge। main raajkumaar banoonga। aatma ko pata hai tab to ek shareer chhod doosra leti hai। sarpa mein bhi aatma hai na। kahenge ham ek khaal chhod doosri lete hain। kabhi to woh bhi shareer chhodenge, phir bachcha banenge। bachche to paida hote hain na। punarjanma to sabko lena hai। yeh sab vichaar saagar manthan karna hota hai।

sabse mukhya baat hai baap ko bahut pyaar se yaad karna hai। jaise bachche maa-baap ko ekdam chatak jaate hain, vaise bahut pyaar se buddhiyog dvaara baap ko ekdam chatak jaana chaahiye। apne ko dekhna bhi hai ki ham kitni dhaarna kar rahe hain। (naarad ka misaal) bhakta jab tak gyaan na uthaayen tab tak devta ban na saken। yeh sirf lakshmi ko varne ki baat nahin hai। yeh to samajhne ki baat hai। tum bachche samajhte ho jab ham satopradhaan the to vishwa par raajya karte the। ab phir satopradhaan banne ke liye baap ko yaad karna hai। yeh mehnat kalpa-kalpa tum yatha yog yatha shakti karte hi aaye ho। har ek samajh sakte hain ham kahaan tak kisko samjha sakte hain? deh-abhimaan se ham kahaan tak nikalte ja rahe hain? main aatma ek shareer chhod doosra leti hoon। main aatma inse kaam leti hoon, yeh mere organs hain। ham sab paartadhaari hain। is drama mein yeh behad ka bada naatak hai। usmein nambarvaar sab actors hain। ham samajh sakte hain - ismen kaun-kaun mukhya actors hain। first, second, third grade kaun-kaun hain? tum bachche baap dvaara drama ke aadi-madhya-ant ko jaan gaye ho। rachayita dvaara rachna ki knowledge milti hai। rachayita hi aakar apna aur rachna ka raaz samjhaate hain। yeh unka rath hai, jismen pravesh kar aaye hain। kahenge tab to do aatmaayen hain। yeh bhi common baat hai। pitra khilaate hain, to aatma aati hai na। aage bahut aate the, unse poochhte the। abhi to tamopradhaan ho gaye hain। koi-koi ab bhi batlaate hain - ham aage janma mein phalaana tha। future ka koi nahin bataate। pichhaadi ka sunaate hain। sab par to koi vishvaas nahin karte।

baba kehte hain - meethe bachche, ab tumko shant mein rehna hai। tum jitna-jitna gyaan-yog mein majboot honge to phir pakke solid ho jaayenge। abhi to bahut bachche bhole hain। bhaaratvaasi devi-devtaayen kitne solid the। dhan se bhi bharpoor the। abhi to khaali hain। woh solvent, tum insolvent। tum khud bhi jaante ho bhaarat kya tha, ab kya hai। bhookh marna hi padega। anaaj-paani aadi kuchh nahin milega। kahaan baadh hoti rahegi, to kahaan paani ki boond nahin hogi। is samay duhkh ke baadal hain, satayug mein sukh ke baadal hain। is khel ko tum bachchon ne hi samjha hai aur kisko bhi pata nahin hai। badge par bhi samjhaana bahut achha hai। woh laukik had ka baap, yeh paarlaukik behad ka baap। yeh baap ek hi baar sangam par behad ka varsa dete hain। nai duniya ban jaati hai। yeh hai iron ej phir golden ej zaroor banni hai। tum abhi sangam par ho। dil saaph muraad haansil। roz apne se poochho - kharaab kaam to nahin kiya? kiske liye andar vikaari khyaalaat to nahin aaye? apni masti mein rahe ya jharmui-jhagmui mein time ganvaaya? baap ka farmaan hai - maamekam yaad karo। agar yaad nahin karte to naapharmaanbardaar ho jaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan-yog ki masti mein rehna hai, dil saaph rakhni hai। jharmui-jhagmui (vyartha chintan) mein apna samay nahin ganvaana hai।

2) ham aatma bhaai-bhaai hain, ab vaapis ghar jaana hai - yeh abhyaas pakka karna hai। videhi ban svadharma mein sthit ho baap ko yaad karna hai।

vardaan:- sva swaroop aur baap ke satya swaroop ko pahchaan satyata ki shakti dhaaran karne vaale divyata sampanna bhav

jo bachche apne sva swaroop ko va baap ke satya parichay ko yathaartha jaan lete hain aur usi swaroop ki smriti mein rehte hain to unmein satyata ki shakti aa jaati hai। unke har sankalp sada satyata va divyata sampanna hote hain। sankalp, bol, karma aur sambandh-samparka sabmen divyata ki anubhooti hoti hai। satyata ko siddha karne ki aavashyakta nahin rehti। agar satyata ki shakti hai to khushi mein naachte rahenge।

slogan:- sakaash dene ki seva karo to samasyaayen sahaj hi bhaag jaayengi।