Daily Murli for Friday 10 May 2024

10-05-2024 praatahmurli om shanti "baapdaada"' madhuban

“meethe bachche - baap samaan merciful bano, merciful bachche sabko duhkhon se chhudaakar patit se paavan banaane ki seva karenge''

prashn:- saari duniya ki maang kya hai? jo baap ke sivaae koi poori nahin kar sakta?

uttar:- saari duniya ki maang hai shanti aur sukh mile। sabhi bachchon ki pukaar sunkar baap aate hain। baba behad ka hai isliye use bahut phurna hai ki mere bachche kaise duhkhi se sukhi banen। baba kehte - bachche, puraani duniya bhi meri hai, mere hi sab bachche hain, main aaya hoon sabko duhkhon se chhudaane। main saari duniya ka maalik hoon, ise mujhe hi patit se paavan banaana hai।

om shanti। baap paavan bana rahe hain bachchon ko। to zaroor baap se pyaar chaahiye। bhal bhaaiyon-bhaaiyon ka aapas mein pyaar to theek hai। ek baap ke sab bachche aapas mein bhaai-bhaai hain। parantu paavan banaane vaala ek baap hi hai isliye sab bachchon ka love ek baap mein hi chala jaata hai। baap kehte hain - bachchon, maamekam yaad karo। yeh to theek hai tum bhaai-bhaai ho to zaroor ksheerkhanda hi honge। ek baap ke bachche ho। aatma mein hi itna pyaar hai। jabki devtaai pad praapta karte ho to aapas mein bahut hi pyaar hona chaahiye। ham bhaai-bhaai bante hain। baap se varsa lete hain। baap aakar sikhlaate hain। jo samajhne vaale hote hain woh samajhte hain yeh school va badi university hai। baap sabko drishti dete hain va yaad karte hain। behad ke baap ko saari duniya ke manushya maatra sabhi aatmaayen yaad karti hain। baap ki hi saari duniya hai - nai va puraani। nai duniya baap ki hai to puraani nahin hai kya? baap hi sabhi ko paavan banaate hain। puraani duniya bhi meri hai। saari duniya ka maalik main hi hoon। bhal main nai duniya mein raajya nahin karta hoon parantu hai to meri na। mere bachche mere is bade ghar mein bhi bahut sukhi rehte hain aur phir duhkh bhi paate hain। yeh khel hai। yeh saari behad ki duniya hamaara ghar hai। yeh bada maandava hai na। baap jaante hain saare ghar mein hamaare bachche hain। saari duniya ko dekhte hain। sab chaitanya hain। sabhi bachche is samay duhkhi hain isliye pukaarte hain baba hamko chhi chhi, duhkhi duniya se shanti ki duniya mein le chalo, shanti deva। baap ko hi pukaarte hain। devtaaon ko to kah na saken। sabka woh ek baap hai। unko saare srishti ka phurna rehta hai। behad ka ghar hai। baap jaante hain is behad ghar mein is samay sab duhkhi hain isliye kehte hain shanti deva, sukh deva। do cheezen maangate hain na। abhi to jaante ho ham behad ke baap se sukh ka varsa le rahe hain। baap aakar hamko sukh bhi dete hain, shanti bhi dete hain। aur koi sukh-shanti to dene vaala hai nahin। baap ko hi taras padega। woh hai behad ka baap। tum samajhte ho ham baba ke bachche bahut sukhi the jabki pavitra the। ab apvitra banne se duhkhi ho jaate hain। kaam chita par baith kaale patit ban jaate hain। mool baat hai ki baap ko bhool jaate hain। jis baap ne itna oonch pad diya। gaate bhi hain na tum maat pita… sukh ghanere the। so phir tum abhi le rahe ho kyonki ab duhkh ghanere hain। yeh hai tamopradhaan duniya। vishay saagar mein gote khaate rehte hain। samajhte kuchh nahin hai। tumko ab samajh aai hai। tum samajhte ho ki yeh raurav narka hai।

baap bachchon se poochhte hain - abhi tum narkavaasi ho ya svargavaasi ho? jab koi marta hai to jhat kah dete hain svargavaasi hua arthaat sab duhkhon se door hua। phir narka ki cheezen unko kyon khilaate ho? yeh bhi samajhte nahin। baap aakar svarga ki sthaapna karte hain। tum bachchon ko raajayog sikhlaate hain। baap kehte hain meethe bachche, main tumko yeh knowledge sunaata hoon। mere mein hi yeh knowledge hai। gyaan saagar main hoon। kehte hain yeh shaastron ki authority hai। lekin woh bhi aatmaayen hain na, yeh bhi samajhte nahin। baap ka hi pata nahin hai। baap jo vishwa ka maalik banaate hain unke liye kehte hain thikkar bhittar sabmen hai। vyaas bhagwan ne kya-kya baaten likh di hain। manushyon ko kuchh bhi pata nahin hai। bilkul orphan ban aapas mein ladte-jhagadte rehte hain। baap rachta aur rachna ke aadi-madhya-ant ko koi nahin jaante hain। baap apna aur rachna ke aadi-madhya-ant ka raaz samjhaate hain। aur to koi bata na sake। tum koi se bhi poochho-jisko eeshvar, bhagwan, rachta kehte ho unko tum jaante ho? kya thikkar-bhittar mein eeshvar kehna hi jaanna hai? pahle apne ko to samjho। manushya tamopradhaan hain to jaanvar aadi sab tamopradhaan hain। manushya satopradhaan hain to sab sukhi ban jaate hain। jaisa manushya, vaisa unka furniture bhi hota hai। saahookaar logon ka furniture bhi achha hota hai। tum to bilkul sukhi vishwa ke maalik bante ho to tumhaare paas har cheez sukhdaai hai। vahaan duhkhadaai koi cheez hoti nahin। yeh narka hai hi gandi duniya।

baap aakar samjhaate hain bhagwan to ek hi hai, vahi patit-paavan hai। svarga ki sthaapna karte hain। devtaaon ki mahima bhi gaate hain sarvagun sampanna.....। mandiron mein jaakar devtaaon ki upma, apni ninda karte hain kyonki sabhi bhrashtaachaari hain। shreshthaachaari, svarga-vaasi to yeh lakshmi-naaraayan hain, jinki sab pooja karte hain। sannyaasi bhi karte hain। satayug mein aise nahin hota। tumhaara sannyaas hai behad ka। behad ka baap aakar behad ka sannyaas karaate hain। woh hai hathayog, had ka sannyaas। woh dharma hi doosra hai। baap kehte hain tum apne dharma ko bhool kitne dharmon mein ghus pade ho। apne bhaarat ka naam hi hindustaan rakh diya hai aur phir hindu dharma kah diya hai। vaastav mein hindu dharma to koi ne sthaapan hi nahin kiya hai। mukhya dharma hain hi chaar - devi-devta, islaami, bauddhi aur Christian। tum jaante ho yeh saari duniya island hai, ismen raavan ka raajya hai। raavan dekha hai? jinko ghadi-ghadi jalaate hain, yeh sabse puraana dushman hai। yeh bhi samajhte nahin ki ham kyon jalaate hain? samajh chaahiye na - yeh kaun hai? kab se jalaate aaye hain? samajhte hain parampara se। are, unka bhi koi hisaab to chaahiye na। tumko koi jaante hi nahin। tum ho brahma ke bachche। tumse koi poochhe tum kiske bachche ho? are, ham brahmaakumaar-kumaariyaan hain to unke bachche thahre na। brahma kiska bachcha? shivbaaba ka। ham unke pautre thahre। sabhi aatmaayen unke bachche hain। phir shareer mein pahle brahman bante hain। prajaapita brahma hai na। itni praja kaise rachte hain, yeh tum jaante ho। yeh adoption hai। shivbaaba adopt karte hain brahma dvaara। mela bhi lagta hai। vaastav mein mela vahaan lagna chaahiye jahaan brahmaputra badi nadi saagar mein jaakar milti hai। us sangam par mela lagna chaahiye। yeh mela yahaan hai। brahma baitha hai, tum jaante ho baap bhi hai aur badi mama bhi to yeh hai। parantu mel hai isliye mama ko mukrar kiya jaata hai ki tum in maataaon ko sambhaalo। baap kehte hain main tumko sadgati deta hoon। tum jaante ho yeh devtaayen hain double ahinsak kyonki vahaan raavan hota hi nahin। bhakti se hoti hai raat, gyaan se din। gyaan saagar ek baap hi hai, unke liye phir kah dete hain sarvavyaapi। baap hi aakar yeh samjhaate hain aur bachchon ko hi samjhaate hain। shiv bhagvaanuvaach hai na। shiv jayanti manaate hain to zaroor koi mein aate hain। kehte hain mujhe prakriti ka aadhaar lena padta hai। main koi chhote bachche ka aadhaar nahin leta hoon। shreekrishna to bachcha hai na। main to unke bahut janmon ke ant mein so bhi vaanaprastha avastha mein pravesh karta hoon। vaanaprastha avastha ke baad hi manushya bhagwan ko simran karte hain। parantu bhagwan ko yathaartha koi bhi jaante nahin। tab baap kehte hain yada yadaahi..... main bhaarat mein hi aata hoon। bhaarat ki mahima aprampaar hai।

manushyon ko deh ka ahankaar dekho kitna hai - main phalaana hoon, yeh hoon! ab baap aakar tumko dehi-abhimaani banaate hain। meethe-meethe roohaani bachchon ko roohaani baap baith gyaan ke sab raaz bataate hain। yeh hai puraani duniya। satayug hai nai duniya। satayug mein aadi sanaatan devi-devta dharma hi tha। 5 hazaar varsha ki baat hai। shaastron mein phir vyaas ne likh diya hai, kalpa ki aayu laakhon hazaar varsha hai। vaastav mein hai 5 hajaar varsha ka kalpa। manushya bilkul agyaan ki, kumbhakran ki neend mein soye pade hain। abhi tumhaari yeh baaten koi naya sunega to samajh nahin sakega isliye baap kehte hain main apne bachchon se hi baat karta hoon। bhakti bhi tum hi shuru karte ho। apne ko hi chamaat maari hai। baap ne tumko poojya banaaya, tum phir pujaari ban jaate ho। yeh bhi khel hai। koi-koi manushya narma dil hote hain to khel dekhkar bhi ro padte hain। baap to kehte hain jin roya tin khoya। satayug mein rone ki baat nahin। yahaan bhi baap kehte hain rona nahin hai। rote hain dvaapar-kaliyug mein। satayugi kabhi rote nahin hain। pichhaadi mein to kisko rone ki phursat hi nahin rahegi। achaanak marte rahenge। haay raam bhi nahin kah sakenge। vinaash aisa hoga jo jara bhi duhkh nahin hoga kyonki hospital aadi to rahengi nahin isliye cheezen hi aisi banaate hain। to baap samjhaate hain tum bandaron ki main sena leta hoon, raavan par jeet paane ke liye। ab baap tumko yukti bataate hain - raavan par jeet kaise paani hai? sab seetaaon ko raavan ki janjeeron se chhudaana hai। yeh sab samajhne ki baaten hain। bhagvaanuvaach, bachchon ko hi baap kehte hain hear no evil.... jin baaton se tumhein koi phaayda nahin, unse tum apne kaan banda kar lo। ab tumko shreemat milti hai। tum hi shreshtha banenge। yahaan to shri shri ka title sabko de diya hai। achha, phir bhi baap kehte hain apne ko aatma samjho aur baap ko yaad karo। kitna wonderful haar-jeet ka yeh behad ka khel hai jo baap hi samjhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan merciful banna hai। sabko duhkhon se chhuda kar patit se paavan banaane ki seva karni hai। paavan banne ke liye ek baap se bahut-bahut love rakhna hai।

2) baap kehte hain jin roya tin khoya isliye kaisi bhi paristhiti ho tumhein rona nahin hai।

vardaan:- sva ke raajya dvaara apne saathiyon ko snehi sahayogi banaane vaale master daata bhav

raaja arthaat daata। daata ko kehna va maangana nahin padta। svayan har ek raajaaon ko apne sneh ki saugaat offer karte hain। aap bhi sva par raajya karne vaale raaja bano to har ek aapke aage sahayog ki saugaat offer karenge। jiska sva par raajya hai uske aage laukik alaukik saathi ji haajir, ji hajoor, haan ji kehte hue snehi-sahayogi bante hain। parivaar mein kabhi order nahin chalaana, apni karmendriyon ko order mein rakhna to aapke sarva saathi aapke snehi, sahayogi ban jaayenge।

slogan:- sarva praapti ke saadhan hote bhi vritti upraam rahe tab kahenge vairaagya vritti।