Daily Murli for Saturday 11 May 2024

11-05-2024 praatahmurli om shanti "baapdaada"' madhuban

“meethe bachche - tumhein abhi allaah mila hai to sulte bano arthaat apne aapko aatma samjho, deh samajhna hi ulta banna hai''

prashn:- kis ek baat ko samajhne vaale behad ke vairaagi ban sakte hain?

uttar:- puraani duniya ab hopeless hai, kabristaan banna hai, yeh baat samajh li to behad ke vairaagi ban sakte hain। tum jaante ho ab nai duniya sthaapan ho rahi hai। is roodra gyaan yagya mein saari puraani duniya svaaha honi hai। yahi ek baat tumhein behad ka vairaagi bana degi। tumhaari dil is kabristaan se nikal gai hai।

om shanti। yoon to hai double om shanti kyonki do aatmaayen hain। donon aatmaon ka svadharma hai shant। baap ka bhi svadharma hai shant। bachche vahaan shanti mein rehte hain, usko kaha hi jaata hai shantidham। baap bhi vahaan rehte hain। baap to sadaiv paavan hai। baaki jo bhi manushya maatra hain, woh punarjanma le apvitra bante hain। baap bachchon ko kehte hain - bachche, apne ko aatma samjho। aatma jaanti hai parampita paramatma gyaan ka saagar hai, shanti ka saagar hai, unki mahima hai na। woh sarva ka baap hai aur sarva ka sadgati daata bhi hai। to sabhi ka baap ke varse par hak zaroor lagta hai। baap se varsa kya milta hai? bachche jaante hain baap hai hi svarga ka rachayita to zaroor svarga ka varsa hi denge aur denge bhi zaroor narka mein। narka ka varsa diya hai raavan ne। is samay sab narkavaasi hain na। to zaroor varsa raavan se mila hai। narka aur svarga donon hain। yeh kaun sunte hain? aatma। agyaan kaal mein bhi sab kuchh aatma karti hai, parantu deh-abhimaan ke kaaran samajhte hain - shareer sab kuchh karta hai। hamaara svadharma hai shant। yeh bhool jaate hain। ham rahne vaale shantidham ke hain। yeh bhi samjhaana chaahiye ki sachkhanda hi phir jhoothkhanda banta hai। bhaarat sachkhanda tha phir raavan raajya jhooth khanda bhi banta hai। yeh to common baat hai। manushya kyon nahin samajh sakte hain! kyonki aatma tamopradhaan ho gai hai, jisko pattharbuddhi kehte hain। jisne bhaarat ko svarga banaaya, poojya banaaya unko hi phir pujaari ban gaali dete hain। ismen bhi koi ka dosh nahin। baap bachchon ko samjhaate hain yeh drama kaise bana hua hai। kaise poojya se pujaari banen। baap samjhaate hain aaj se 5 hazaar varsha pahle bhaarat mein aadi sanaatan devi-devta dharma tha, kal ki baat hai। parantu manushya bilkul bhoole hue hain। yeh shaastra aadi sab bhakti maarga ke liye baith banaaye hain। shaastra hain hi bhakti maarga ke liye, na ki gyaan maarga ke liye। gyaan maarga ka shaastra banta hi nahin। baap hi kalpa-kalpa aakar bachchon ko knowledge dete hain, devta pad ke liye। baap padhaai padhaate hain phir yeh gyaan praayah lop ho jaata hai। satayug mein koi shaastra hota nahin kyonki woh to hai gyaan maarga ki praalabdha। 21 janmon ke liye behad ke baap se behad ka varsa milta hai, peechhe phir raavan ka varsa milta hai alpakaal ke liye। jisko sannyaasi log kaag vishta samaan sukh kehte hain। duhkh hi duhkh hai, inka naam hi duhkhadhaam hai। kaliyug ke pahle hai dvaapar, usko kahenge semi duhkhadhaam। yeh hai final duhkhadhaam। aatma hi 84 janma leti hai, neeche utarti hai। baap seedhi chadha dete hain kyonki chakra ko phirna zaroor hai। nai duniya thi, devi devtaaon ka raajya tha। duhkh ka naam nishaan nahin tha isliye dikhaate hain sher-bakri ikatthe jal peete hain। vahaan hinsa ki koi baat hi nahin। ahinsa parmo devi-devta dharma kaha jaata hai। yahaan hai hinsa। pahli-pahli hinsa hai kaam kataari chalaana। satayug mein vikaari koi hota nahin। unhon ki to mahima gaate hain। lakshmi-naaraayan ki mahima gaate hain na - aap sampoorn nirvikaari…। yeh kaliyug hai iron aged world। inko koi golden ej to kah na sake। drama hi aisa bana hua hai। satayug hai shivaalay। vahaan sab hain paavan, jinhon ke chitra bhi hain। shivaalay banaane vaale shivbaaba ka bhi chitra hai। bhakti maarga mein unko anek naam de diye hain। vaastav mein naam hai ek। baap ko apna shareer to hai nahin। khud kehte hain mujhe apna parichay dene va rachna ke aadi-madhya-ant ka gyaan sunaane aana padta hai। mujhe aakar tumhaari service karni hoti hai। tum hi mujhe bulaate ho he patit-paavan aao। satayug mein nahin bulaate ho। is samay sab bulaate hain kyonki vinaash saamne khada hai। bhaaratvaasi jaante hain yeh vahi mahaabhaarat ladaai hai। phir aadi sanaatan devi-devta dharma ki sthaapna hoti hai। baap bhi kehte hain main raajaaon ka raaja banaane aaya hoon। aajkal to mahaaraaja, baadshaah aadi hain nahin। abhi to praja ka praja par raajya hai। bachche samajhte hain ham bhaaratvaasi solvent the। heere-javaahraaton ke mahal mein the। nai duniya thi phir nai hi puraani bani hai। har cheej puraani to hoti hi hai। jaise makaan naya banaate hain phir aakhreen to aayu kam hoti jaayegi। kaha jaayega yeh naya hai, yeh aadha puraana hai, yeh madhyam hai। har ek cheej sato, rajo, tamo hoti hai। bhagvaanuvaach hai na। bhagwan maana bhagwan। bhagwan kisko kaha jaata hai, yeh bhi nahin jaante hain। raaja raani hain nahin। yahaan hain president, prime minister aur unke dher minister.... satayug mein hai yatha raaja raani.... farka to baap ne bataaya hai। satayug ke jo maalik hain unhon ke minister, adviser hote nahin। darkaar nahin। is samay hi shivbaaba se taakat praapta kar woh pad paate hain। is samay baap se oonch raay milti hai, jisse oonch pad paate hain। phir koi se raay lenge nahin। vahaan vazeer hote nahin। vazeer tab hote hain jab vaam maarga mein jaate hain। akla chat ho jaati hai।

mool baat hai vikaar ki। deh-abhimaan se hi vikaar paida hote hain। unmein kaam hai number one। baap kehte hain yeh kaam mahaashatru hai, un par jeet paani hai। baap ne bahut baar samjhaaya hai apne ko aatma samjho। achhe va bure sanskaar aatma mein hi hote hain। yahaan hi karmon ko kootna hota hai, satayug mein nahin। woh hai sukhdhaam। baap aakar tum bachchon ko sukhdhaam, shantidham ka vaasi banaate hain। baap direct aatmaon se baat karte hain। sabko kehte hain aatma nishchay buddhi ho baitho, deh-abhimaan chhodo। yeh deh vinaashi hai, tum avinaashi aatma ho। yeh gyaan aur koi mein hai nahin। gyaan ka pata na hone kaaran bhakti ko hi gyaan samajh liya hai। ab tum bachche samajhte ho - bhakti alag hai, gyaan se to sadgati hoti hai। bhakti ka sukh hai alpakaal ke liye kyonki paap aatma ban jaate hain, vikaar mein chale jaate hain। aadhaakalpa ke liye behad ka varsa mila, woh poora ho gaya। ab phir baap varsa dene aaye hain, jismen pavitrata, sukh, shanti sab mil jaati hai। bachche, tum jaante ho yeh puraani duniya to kabristaan banni hi hai। ab is kabristaan se dil hataae paristaan nai duniya se mamatva lagaao। jaise laukik baap naya makaan banaate hain to bachchon ka buddhiyog puraane makaan se nikal naye makaan se lag jaata hai। office mein baitha hoga to bhi buddhi naye makaan mein hi hogi। woh hai had ki baat। behad ka baap to nai duniya svarga rach rahe hain। kehte hain ab puraani duniya se sambandh tod ek mujh baap se jodo। tumhaare liye nai duniya svarga sthaapan karne aaya hoon। ab yeh saari puraani duniya is roodra gyaan yagya mein svaaha honi hai। yeh saara jhaad tamopradhaan jadajdeebhoot ho gaya hai। ab phir naya banta hai। to baap samjhaate hain yeh hai nai duniya ki baaten। jaise manushya beemaari mein bhi hopeless ho jaate hain na। samajhte hain inka bachna mushkil hai। vaise duniya bhi ab hopeless hai। kabristaan banna hai phir inko yaad kyon karna chaahiye। yeh hai behad ka sannyaas। woh hathayogi sannyaasi sirf gharbaar chhod jaate hain। tum puraani duniya ka hi sannyaas karte ho। puraani duniya se nai duniya ho jaati hai।

baap kehte hain ham to obedient servant hoon। main bachchon ki service mein aaya hoon। mujhe bulaaya hai - baba ham patit ban gaye hain, aap patit duniya aur patit shareer mein aao। nimantran dekho kaisa dete hain! patit banaane vaala raavan hai, jisko jalaate rehte hain। yeh bahut kada dushman hai। jab se yeh raavan aaya hai tumko aadi-madhya-ant duhkh mila hai। vishay saagar mein gote khaate rehte ho। ab baap kehte hain vish chhod gyaan amrit piyo। aadhaakalpa raavan raajya mein tum vikaaron ke kaaran kitne duhkhi ban gaye ho। itne matvaale ban jaate ho jo gaali baith dete ho। gaali bhi itni dete ho - kamaal karte ho jo tumko paavan vishwa ka maalik banaate hain, unko sabse jaasti gaali dete ho। manushyon ke liye to kehte ho 84 laakh yoniyaan aur mujhe sarvavyaapi kah dete ho। yeh bhi drama hai। tumko hansi mein samjhaate hain। achhe athva bure sanskaar-svabhaav aatma ke hi hote hain। aatma kehti hai ham 84 janma bhogte hain। aatma hi ek shareer chhod doosra leti hai। yeh bhi abhi baap ne samjhaaya hai। drama ke plan anusaar phir baap hi aakar jo ulte ho gaye hain unko sulta banaate hain। meethe-meethe bachchon ko baap kehte hain ki yahaan tum ulte hokar nahin baitho। apne ko aatma samjho। ab tumko allaah baap mila hai jo sulta banaate hain। raavan ulta banaate hain। phir sulta banne se tum seedhe khade ho jaate ho। yeh ek naatak hai। yeh gyaan baap hi baith bataate hain। bhakti, bhakti hai। gyaan, gyaan hai। bhakti bilkul alag hai। kehte hain ek talaab hai, jahaan snaan karne se pariyaan ban jaati hain। phir kah dete hain paarvati ko amraktha sunaai। abhi tum amar-katha sun rahe ho na। sirf ek paarvati ko amraktha sunaai kya! yeh to behad ki baat hai। amarlok hai satayug, mrityulok hai kaliyug। inko kaanton ka jangal kaha jaata hai। baap ko jaante hi nahin। kehte bhi hain parampita paramatma, he bhagwan। parantu jaante nahin। tum bhi nahin jaante the। tumko baap ne aakar sulta banaaya hai। bhagwan ko allaah kaha jaata hai। allaah padhaakar allaah pad denge na। parantu bhagwan ek hai। inko (lakshmi-naaraayan ko) bhagwan-bhagavti nahin kahenge। yeh to punarjanma mein aate hain na। mainne hi inhon ko padhaakar daiveegunon vaala banaaya hai।

tum sab brothers ho। baap ke varse ke hakdaar ho। manushya to ghor andhiyaare mein hain। aasuri sampradaay hain na। kehte hain kaliyug to abhi regdi pahante hain,(chhote bachche jaisa ghutne ke bal par chalna), samajhte hain abhi bahut varsha pade hain। kitna agyaan andhere mein soye pade hain। yeh bhi khel hai। sojhre mein duhkh nahin hota, andhiyaare mein raat ko duhkh hota hai। yeh bhi tum hi samajhte ho aur samjha sakte ho। pahle-pahle to har ek manushya ko baap ka parichay dena hai। do baap to har ek ko hote hain। had ka baap had ka sukh dete hain, behad ka baap behad ka hi sukh dete hain। shivraatri manaate hain to zaroor baap aate hain svarga sthaapan karne। jo svarga past ho gaya hai phir se sthaapna kar rahe hain। abhi hai tamopradhaan duniya narka। drama plan anusaar jab accurate samay hota hai tab phir main aakar apna part bajaata hoon। main to hoon niraakaar। mujhe mukh to zaroor chaahiye। bail ka mukh thode hi hoga। main mukh inka leta hoon, jo bahut janma ke ant ke janma mein vaanaprastha avastha mein hai, inmen pravesh karta hoon। yeh apne janmon ko nahin jaante। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap direct aatmaon se baat karte hain, aise svayan ko aatma nishchay karna hai। is kabristaan se mamatva nikaal dena hai। aise sanskaar dhaaran karne hain jo kabhi karma kootne na pade।

2) jaise baap drama par atal hone kaaran kisi ko bhi dosh nahin dete, gaali dene vaale apkaariyon par bhi upkaar karte, aise baap samaan banna hai। is drama mein kisi ka dosh nahin, yeh accurate bana hua hai।

vardaan:- har kadam mein vardaata se vardaan praapta kar mehnat se mukta rahne vaale adhikaari aatma bhav

jo hain hi vardaata ke bachche unhon ko har kadam mein vardaata se vardaan svatah hi milte hain। vardaan hi unki paalna hai। vardaanon ki paalna se hi palte hain। bina mehnat ke itni shreshtha praaptiyaan hona ise hi vardaan kaha jaata hai। to janma-janma praapti ke adhikaari ban gaye। har kadam mein vardaata ka vardaan mil raha hai aur sada hi milta rahega। adhikaari aatma ke liye drishti se, bol se, sambandh se vardaan hi vardaan hai।

slogan:- samay ki raphtaar ke pramaan purushaartha ki raphtaar teevra karo।