Daily Murli for Wednesday 22 May 2024

22-05-2024 praatahmurli om shanti "baapdaada"' madhuban

“meethe bachche - tumhein karmaateet bankar jaana hai, isliye andar mein koi bhi flaw nahin rehna chaahiye, apni jaanch kar kamiyaan nikaalte jaao''

prashn:- kis avastha ko jamaane mein mehnat lagti hai? uska purooshaartha kya hai?

uttar:- in aankhon se dekhne vaali koi bhi cheez saamne na aaye। dekhte bhi na dekho। deh mein rehte dehi-abhimaani raho। yeh avastha jamaane mein time lagta hai। buddhi mein sivaae baap aur ghar ke koi vastu yaad na aaye, iske liye antarmukhi ho apni jaanch karni hai। apna chart rakhna hai।

om shanti। meethe-meethe sikeeldhe roohaani bachche yeh to jaante hain ki ham apni daivi raajdhaani sthaapan kar rahe hain, ismen raajaayen bhi hain to praja bhi hain। purooshaartha to sab karte hain, jo jaasti purooshaartha karte hain, woh jaasti prize lete hain। yeh to ek common kaayda hai। yeh koi nai baat nahin hai। isko daivi bageecha kaho va raajdhaani kaho। abhi yeh hai kaliyugi bageecha athva kaanton ka jangal। usmein bhi koi bahut phal dene vaale jhaad hote hain, koi kam phal dene vaale hote hain। koi kam ras vaale aam hote, koi kaise hote hain। phoolon ke, phalon ke aise bhinna-bhinna prakaar ke jhaad hote hain। vaise hi tum bachchon mein bhi nambarvaar purooshaartha anusaar hain। koi bahut achha phal dete hain, koi halka phal dete hain। bhinna-bhinna jhaad hote hain। yeh phal dene vaala bageecha hai। is daivi jhaad ki sthaapna ho rahi hai athva phoolon ke bageeche ki sthaapna ho rahi hai kalpa pahle misal। aahiste-aahiste meethe khushboodaar bhi ban rahe hain - nambarvaar purooshaartha anusaar। sab variety hain na। baap ke paas bhi aate hain, baap ka mukhda dekhne। yeh to zaroor samajhte ho baba hamko svarga ka maalik banaate hain। yeh bachchon ko nishchay hai zaroor। behad ka baba hamko behad ka maalik bana rahe hain। maalik banne mein khushi bhi bahut hoti hai। had ke maalikapne mein duhkh hai, yeh khel hi sukh aur duhkh ka bana hua hai aur yeh bhi bhaaratvaasiyon ke liye hi hai। bachchon ko baba kahe pahle apna ghar to sambhaalo। ghar par dhani ki nazar rehti hai na। to baap bhi ek-ek bachche ko baith dekhte hain - inmen kaun-kaun se gun hain aur kaun se avgun hain? bachche khud bhi jaante hain। baba agar kahe ki bachche tum sab apni-apni khaamiyaan aapehi likhkar aao to jhat likh sakte hain। ham apne mein kya-kya khaami samajhte hain? koi na koi khaami hai zaroor। sampoorn to koi bane nahin hain। haan, banna zaroor hai। kalpa-kalpa bane hain, ismen koi sanshay nahin। parantu is samay khaami hai। woh batlaane se baba us par hi samjhaayenge। is samay to bahut khaamiyaan hain। mukhya sab khaamiyaan hoti hi hain deh-abhimaan ke kaaran। woh phir bahut hairaan karti hain। avastha ko aage badhne nahin deti, isliye ab poori reeti purooshaartha karna hai। yeh shareer bhi abhi chhodkar jaana hai। daiveegun bhi yahaan hi dhaaran karke jaana hai। karmaateet avastha mein jaane ka arth bhi to baba samjha rahe hain। karmaateet hokar jaana hai to koi bhi flaw na rahe kyonki tum heere bante ho na। hamaare mein kya-kya flaw hai! yeh to har ek jaante hain kyonki tum chaitanya ho। jad heere mein flaw hoga to woh nikaal thode hi sakenge। tum to chaitanya ho। tum is flaw ko nikaal sakte ho। tum kaudi se heere jaisa bante ho। tum apne ko achhi reeti jaante ho। surgeon poochhte hain kaun-sa flaw hai, jo tumko atkaata hai, aage badhne nahin deta hai? flawless to pichhaadi mein banna hai। woh sab abhi nikaalna hai। agar flaw nahin nikalta to heere ki value kam ho jaati hai। yeh bhi bada pakka jauhri hai na। saari aayu heere hi in aankhon se dekhe hain। aisa jauhri koi hoga nahin, jisko itna heeron ko parakhne ka shauk ho। tum bhi heere ban rahe ho। jaante ho koi na koi flaw hai zaroor। sampoorn bane nahin hain। chaitanya hone kaaran tum purooshaartha se flaw nikaal sakte ho। heere jaisa to banna hai zaroor। so tab banenge jab poora purooshaartha karenge।

baap kehte hain tumhaari avastha aisi pakki ho, jo shareer chhootne samay ant mein koi bhi yaad na aaye। yeh to clear hai। mitra-sambandhi aadi sabko bhoolna hai। sambandh rakhna hi hai ek baap se। abhi tum heere ban rahe ho। yeh javaahraat ki dukaan hai। tum har ek jauhri ho। yeh baaten doosra koi bhi jaanta nahin। tum bachche jaante ho - har ek ke dil mein hai, ham vishwa ke maalik ban rahe hain - purooshaartha anusaar। jinhon ko oonch pad mila hai, unhon ne zaroor purooshaartha kiya hai। hain to tumhaare mein se hi na। tum bachchon ko hi itna purooshaartha karna hai isliye baba ek-ek bachche ko dekhte rehte hain। jaise phoolon ko dekha jaata hai na। yeh kaisa khushboodaar phool hai! yeh kaisa hai! inmen baaki kya flaw hai? kyonki tum chaitanya ho। chaitanya heere jaan sakte hain na - hamaare mein kya-kya khaami hai, jo baap se buddhiyog tudaae kahaan na kahaan bhatkaate hain। baap to kehte hain - bachche, maamekam yaad karo। doosra koi yaad na aaye। grihastha vyavhaar mein rehte ek baap ko yaad karna hai। inhon ki to bhatthi banni thi, jo taiyaar ho nikli service ke liye। dekhte hain puraane-puraane jo hain woh achhi service kar rahe hain। thode naye bhi add hote jaate hain। puraanon ki bhatthi banni thi। bhal puraane hain to bhi khaamiyaan hain zaroor। har ek apne dil mein samajhte hain ki baba jo avastha banaane liye kehte hain woh abhi bani nahin hai। em object to baap samjhaate hain। sabse jaasti khaad hai deh-abhimaan ki, tab hi deh ki taraph buddhi chali jaati hai। deh mein hote hue dehi-abhimaani banna hai। in aankhon se dekhne vaali cheez koi bhi saamne na aaye, aisi avastha jamaani hai। hamaari buddhi mein sivaae ek baap ke aur shantidham ke, koi bhi vastu yaad na aaye। kuchh bhi saath nahin le jaana hai। pahle-pahle ham naye sambandh mein aaye। abhi hai puraana sambandh। puraane sambandh ki jara bhi yaad na aaye। gaayan bhi hai antakaal… yeh abhi ki baat hai। geet to kaliyugi manushyon ne banaaye hain। parantu woh samajhte thode hi hain। mool baat baba samjhaate hain ek baap ke sivaae aur koi yaad na aaye। ek baap ki yaad se hi tumhaare paap kat jaayenge aur pavitra heere banenge। koi-koi patthar to bahut valuable hote hain। maanik bhi valuable hote hain। baap apne se bhi bachchon ki value oonch karte rehte hain। apni jaanch karni hoti hai, baap kehte hain antarmukh ho apne mein dekho - hamaare mein kya khaami hai? kahaan tak deh-abhimaan hai? baba purooshaartha ke liye bhinna-bhinna yuktiyaan samjhaate rehte hain। jitna ho sake ek ki yaad rahe। bhal kitne bhi pyaare hon, khoobsoorat bachche bahut lovely hon, to bhi kiski yaad na aaye। yahaan ki koi bhi cheez yaad na aaye। koi-koi bachche mein bahut moh rehta hai। baap kehte hain un sabse mamatva mitaae ek ki yaad rakho। ek lovely baap se hi yog rakhna hai। unse sab kuchh mil jaata hai। yog se hi tum lovely bante ho। lovely aatma banti hai। baap lovely pure hai na। aatma ko lovely pure banaane ke liye baap kehte hain - bachche, jitna mujhe yaad karenge tum athaah lovely banenge। tum itne lovely bante ho jo tum devi-devtaaon ki ab tak pooja ho rahi hai। bahut lovely bante ho na। aadhaakalpa tum raajya karte ho aur phir aadhaakalpa tum hi pooje jaate ho। tum khud hi pujaari ban apne chitron ko poojte ho। tum ho sabse lovely banne vaale, parantu jab lovely baap ko achhi reeti yaad karenge tab hi lovely banenge। sivaae ek baap ke aur koi yaad na aaye। to apni jaanch karo ki baap ko bahut lav se yaad karte hain? baap ki yaad mein prem ke aansu aa jaaen। baba mera to aapke sivaae doosra na koi। aur koi ki yaad na aaye, maaya ke toophaan na aayen। toophaan to bahut aate hain na। apne oopar bahut jaanch rakhni hai। hamaara lav baap ke sivaae aur koi taraph to nahin jaata hai? bhal kitni bhi pyaari cheez ho, to bhi ek baap ki hi yaad aaye। tum sab ek maashook ke aashik bante ho। aashik-maashook jo hote hain, ek baar ek-do ko dekh liya, bas! shaadi aadi bhi nahin karte। rehte bhi alag hain। parantu ek-do ki yaad buddhi mein rehti hai। abhi tum jaante ho ham sab aashik hain ek maashook ke। us maashook ko tum bhakti maarga mein bhi bahut yaad karte the। yahaan bhi tumhein bahut yaad karna hai, jabki woh sammukh hai। baap kehte hain maamekam yaad karo to tumhaara beda paar ho, ismen sanshay ki koi baat nahin hai। bhagwan se milne ke liye sab bhakti karte hain।

yahaan koi-koi bachche to bahut haddi service karte hain। service ke liye jaise ekdam tadaphte hain। bahut mehnat karte hain। yeh bhi tum jaante ho ki bade aadmi itna nahin samajh sakenge। parantu tumhaari mehnat koi vyartha nahin jaati hai। koi samajhkar laayak bante hain, phir baba ke aage aate hain। tum samajhte ho yeh laayak hai va nahin? drishti to unhon ko tum bachchon se milti hai, shrringaar karne vaale tum bachche ho। jo bhi yahaan aaye hue hain, un sabko tum bachchon ne shrringaar karaaya hai। baba ne tumko karaaya hai, tum phir auron ko shrringaar karaae le aate ho। baap aaphreen dete hain, jaisa shrringaar kiya hai, aisa hi auron ko bhi karaate hain। balki apne se bhi auron ko achha kara sakte hain। sabki apni-apni takdeer hai na। koi-koi samajhne vaale samjhaane vaalon se bhi teekhe ho jaate hain। samajhte hain inse ham achha samjha sakte hain। samjhaane ka nasha chadhta hai to woh phir nikal padte hain। baap-daada donon ki dil par chadh padte hain। bahut naye-naye hain, jo puraanon se bhi teekhe hain। kaanton se achha phool ban pade hain isliye baba ek-ek ko baith dekhte hain - inmen kya-kya kami hai? yeh kami inmen se nikal jaae to bahut achhi service karen। baagvaan hai na। dil hota hai - uthkar pichhaadi mein bhi jaakar dekhoon kyonki pichhaadi mein bhi jaakar baithte hain। achhe-achhe mahaarthiyon ko to front mein baithna chaahiye। ismen kisko dhakka aane ki to baat hi nahin। agar dhakka aayega, roothenge to apni takdeer se roothenge। saamne phoolon ko dekh-dekh athaah khushi hoti hai। yeh bada achha hai, ismen thoda defect hai। yeh bahut achha saaph hai। inmen andar koi junk jami padi hai। to woh saara kichda nikaalna hai। baap jaisa lav koi nahin karta। stri ka bhi pati mein lav rehta hai na। pati ka itna nahin hota। woh to doosri-teesri stri kar lete hain। stri ka to pati gaya, bas - ya husain, ya husain karti rehti hai। purooshon ke liye to ek jutti gai to aur kar lenge। shareer ko jutti kaha jaata hai। shivbaaba ka bhi long boot hai na। ab tum bachche samajhte ho ham baba ko yaad karenge, first class banenge। koi-koi fashionable hote hain to juttiyaan bhi 4-5 rakhte hain। nahin to aatma ki jutti ek hai। paanv ki jutti bhi ek honi chaahiye। parantu yeh ek fashion pad gaya hai।

abhi tum samajhte ho baap se ham kya varsa paate hain। ham us paradise ke maalik ban rahe hain। heaven ko kaha hi jaata hai wonder oph world। zaroor heavenly god father hi heaven sthaapan karenge। ab tum practical mein shreemat par apne liye svarga ki sthaapna kar rahe ho। yahaan to kitne bade-bade mahal banaate hain। yeh sab khatma ho jaayenge। tum vahaan kya karenge! dil mein aana chaahiye, yahaan to hamaare paas kuchh bhi nahin hai। vaise hi bhal baahar mein ghar grihastha mein rehte hain - yeh bhi samajhte hain, sab kuchh baba ka hai, hamaare paas to kuchh nahin, ham trustee hain। trustee kuchh nahin rakhte hain। baba hi maalik hai। yeh sab kuchh baba ka hai। ghar mein rehte bhi aise samjho। saahookaaron ki buddhi mein to yeh baaten aa na saken। baba kehte hain trustee ho raho। kuchh bhi karo baba ko ishaara dete raho। likhte hain baba makaan banaaoon? baba kahenge bhale banaao। trustee hokar raho। baap to baitha hai na। baap jaayenge to sab ikatthe jaayenge apne ghar। phir tum chale jaayenge apni raajdhaani mein। hamko phir kalpa-kalpa aana hi hai paavan banaane। apne samay par aata hoon। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sabhi se mamatva nikaal ek lovely baap ko yaad karna hai। antarmukh ho apni kamiyon ki jaanch kar nikaalna hai। valuable heera banna hai।

2) jaise baap ne ham bachchon ko shrrigaanr kiya hai, aise sabka shrrigaanr karna hai। kaanton ko phool banaane ki seva mein lag jaana hai। trustee hokar rehna hai।

vardaan:- brahman jeevan mein ekavrata ke paath dvaara roohaani royalty mein rahne vaale sampoorn pavitra bhav

is brahman jeevan mein ekavrata ka paath pakka kar purity ki royalty ko dhaaran kar lo to saare kalpa mein yeh roohaani royalty chalti rahegi। aapke roohaani royalty aur purity ki chamak paramdham mein sarva aatmaon mein shreshtha hai। aadikaal devta swaroop mein bhi yeh personality vishesh rahi hai, phir madhyakaal mein bhi aapke chitron ki vidhipoorvak pooja hoti hai। is sangamayug par brahman jeevan ka aadhaar purity ki royalty hai isliye jab tak brahman jeevan mein jeena hai tab tak sampoorn pavitra rehna hi hai।

slogan:- aap sahansheelta ke dev aur devi bano to gaali dene vaale bhi gale lagaayenge।