Daily Murli for Saturday 1 June 2024

01-06-2024 praatahmurli om shanti "baapdaada"' madhuban

“meethe bachche - tum sab aapas mein roohaani bhaai-bhaai ho, tumhaara roohaani pyaar hona chaahiye, aatma ka pyaar aatma se ho, jisma se nahin''

prashn:- baap ne apne ghar ki wonderful baat kaun-si sunaai hai?

uttar:- jo bhi aatmaayen mere ghar mein aati hain, woh apne-apne section mein apne number par fix hoti hain। woh kabhi bhi hilti dulti nahin। vahaan par sabhi dharma ki aatmaayen mere nazdeek rehti hain। vahaan se nambarvaar apne-apne samay par part bajaane aati hain yeh wonderful knowledge isi samay kalpa mein ek baar hi tumhein milti hai। doosra koi yeh knowledge nahin de sakta।

om shanti। baap baith bachchon ko samjhaate hain। bachche jaante hain ham aatmaon ko baap samjhaate hain aur baap apne ko aatmaon ka baap samajhte hain। aise koi samajhte nahin aur na koi kabhi samjhaate hain ki apne ko aatma samjho। yeh baap hi aatmaon ko baith samjhaate hain। is gyaan ki praalabdha tum nai duniya mein lene vaale ho nambarvaar purooshaartha anusaar। yeh bhi koi sabhi ko yaad nahin rehta ki yeh duniya badalne vaali hai, badlaane vaala baap hai। yahaan to sammukh baithe hain, jab ghar mein jaate hain to saara din apne dhandhe aadi mein hi lag jaate hain। baap ki shreemat hai - bachche, kahaan bhi rehte tum mujhe yaad karo। jaise kanya hoti hai to woh jaanti nahin ki hamko kaun pati milega, chitra dekhti hai to unki yaad thahar jaati hai। kahaan bhi rehte ek-do ko donon yaad karte hain, isko kaha jaata hai jismaani pyaar। yeh hai roohaani pyaar। roohaani pyaar kiske saath? bachchon ka roohaani baap ke saath aur bachchon ka bachchon ke saath। tum bachchon ka aapas mein bhi bahut pyaar hona chaahiye yaani aatmaon ka aatmaon ke saath bhi pyaar chaahiye। yeh shiksha bhi abhi tum bachchon ko milti hai। duniya ke manushyon ko kuchh bhi pata nahin। tum sab bhaai-bhaai ho to aapas mein zaroor pyaar hona chaahiye kyonki ek baap ke bachche ho na। isko kaha jaata hai roohaani pyaar। drama plan anusaar sirf purooshottam sangamayug par hi roohaani baap aakar roohaani bachchon ko sammukh samjhaate hain। aur bachche jaante hain ki baap yahaan aaye hue hain। ham bachchon ko gul-gul, pavitra patit se paavan banaakar saath le jaayenge। aise nahin ki koi haath se pakad kar le jaate hain। sabhi aatmaayen aise udengi jaise tiddiyon ka jhunda jaata hai। unhon ka bhi koi guide hota hai। guide ke saath aur bhi guides hote hain jo front mein rehte hain। saara jhunda jab ikattha jaata hai to bahut aavaaz hoti hai। soorya ki roshni ko bhi dhak dete hain, itna bada jhunda hota hai। tum aatmaon ka to kitna bada anginat jhunda hai। kabhi ginti nahin kar sakte। yahaan manushyon ki ginti nahin kar sakte। bhal aadamshumaari nikaalte hain, woh bhi accurate nahin nikaalte hain। aatmaayen kitni hain, woh hisaab kabhi nikaal nahin sakte। andaaj lagaaya jaata hai ki satayug mein kitne manushya honge kyonki sirf bhaarat hi rah jaata hai। tumhaari buddhi mein hai ki ham vishwa ke maalik ban rahe hain। aatma jab shareer mein hai to jeevaatma hai, to donon ikatthe sukh athva duhkh bhogte hain। aise bahut log samajhte hain ki aatma hi paramatma hai, woh kabhi duhkh nahin bhogti, nirlep hai। bahut bachche is baat mein bhi moonjhate hain ki ham apne ko aatma nishchay to karen lekin baap ko kahaan yaad karen? yeh to jaante ho baap paramdham nivaasi hai। baap ne apna parichay diya hua hai। kahaan bhi chalte-phirte baap ko yaad karo। baap rehte hain paramdham mein। tumhaari aatma bhi vahaan rahne vaali hai phir yahaan part bajaane aati hai। yeh bhi gyaan abhi mila hai।

jab tum devta ho vahaan tumko yeh yaad nahin rehta hai ki phalaane-phalaane dharma ki aatmaayen oopar mein hain। oopar se aakar yahaan shareer dhaaran kar part bajaati hain, yeh chintan vahaan nahin chalta। aage yeh pata nahin tha ki baap bhi paramdham mein rehte hain, vahaan se yahaan aakar shareer mein pravesh karte hain। ab woh kis shareer mein pravesh karte hain, woh apni address to bataate hain। tum agar likho ki shivbaaba care of paramdham, to paramdham mein to chitthi ja nahin sakti isliye likhte hi ho shivbaaba care-aaph brahma, phir yahaan ki address daalte ho kyonki tum jaante ho baap yahaan hi aate hain, is rath mein pravesh karte hain। yoon to aatmaayen bhi oopar rahne vaali hain। tum bhaai-bhaai ho। sadaiv yahi samjho yeh aatma hai, inka phalaana naam hai। aatma ko yahaan dekhte hain parantu manushya deh-abhimaan mein aa jaate hain। baap dehi-abhimaani banaate hain। baap kehte hain tum apne ko aatma samjho aur phir mujhe yaad karo। is samay baap samjhaate hain jab main yahaan aaya hoon, aakar bachchon ko gyaan bhi deta hoon। puraane organs liye hain, jismen mukhya yeh mukh hai, aankhen bhi hain, gyaan amrit mukh se milta hai। gaoomukh kehte hain na arthaat maata ka yeh mukh hai। badi maata dvaara tumko adopt karte hain। kaun? shivbaaba। woh yahaan hai na। yeh gyaan saara buddhi mein rehna chaahiye। main tumko prajaapita brahma dvaara adopt karta hoon। to yeh maata bhi ho gai। gaaya bhi jaata hai tum maat-pita ham baalak tere… to woh sab aatmaon ka baap hai। unko maata nahin kahenge। woh to baap hi hai। baap se varsa milta hai phir maata chaahiye। woh yahaan aate hain। abhi tumko maaloom pada hai baap oopar mein rehte hain। ham aatmaayen bhi oopar rehti hain। phir yahaan aati hain part bajaane। duniya ko in baaton ka kuchh bhi pata nahin। woh to thikkar bhittar mein paramatma ko kah dete hain, phir to anginat ho jaayen। isko kaha jaata hai ghor andhiyaara। gaayan bhi hai gyaan soorya pragta, agyaan andher vinaash। is samay tumko gyaan hai - yeh hai raavan raajya, jis kaaran andhiyaara hai। vahaan to raavan raajya hota nahin isliye koi vikaar nahin। deh-abhimaan bhi nahin। vahaan aatma-abhimaani rehte hain। aatma ko gyaan hai - ab chhota bachcha hain, ab ham javaan bane hain, ab vriddha shareer hua hai isliye ab yeh shareer chhod doosra lena hai। vahaan aise nahin kehte phalaana mar gaya। woh to hai hi amarlok। khushi se ek shareer chhod doosra lete hain। abhi aayu poori hui hai, yeh chhod naya lena hai isliye sannyaasi log sarpa ka misaal dete hain। misaal vaastav mein baap ka diya hua hai। woh phir sannyaasi log uthaate hain। tab baap kehte hain yeh jo gyaan main tumko deta hoon, yeh praayahlop ho jaata hai। baap ke akshar bhi hain, to chitra bhi hain parantu jaise aate mein namak। to baap baith arth samjhaate hain - jaise sarpa puraani khaal chhod deta hai aur nai khaal aa jaati hai। unke liye aise nahin kahenge ek shareer chhod doosre mein pravesh karte hain। nahin। khaal badalne ka ek sarpa ka hi misaal hai। woh khaal unki dekhne mein bhi aati hai। jaise kapda utaara jaata hai vaise sarpa bhi khaal chhod deta hai, doosri mil jaati hai। sarpa to jinda hi rehta hai, aise bhi nahin sadaiv amar rehta hai। 2-3 khaal badli kar phir mar jaayenge। vahaan bhi tum samay par ek khaal chhod doosri le lete ho। jaante ho abhi hamko garbha mein jaana hai। vahaan to hai hi yogbal ki baat। yogbal se tum janmate ho, isliye amar kaha jaata hai। aatma kehti hai ab ham boodha ho gaya hoon, shareer puraana hua hai। saakshaatkaar ho jaata hai। ab ham jaakar chhota bachcha banoonga। aapehi shareer chhod aatma bhaag-kar jaae chhote bachche mein pravesh karti hai। us garbha ko jel nahin, mahal kaha jaata hai। paap to koi hote nahin hain jo bhogna pade। garbha mahal mein aaraam se rehte hain, duhkh ki koi baat nahin। na koi aisi gandi cheez khilaate hain jisse beemaar ho jaayen।

ab baap kehte hain - bachche, tumko nivaarnadhaam mein jaana hai, yeh duniya badalni hai। puraani se phir nai hogi। har ek cheej badalti hai। jhaad se beej nikalte hain, phir se beej lagaao to kitna phal milta hai। ek beej se kitne daane nikalte hain। satayug mein ek hi bachcha paida hota hai - yogbal se। yahaan vikaar se 4-5 bachche paida karte hain। satayug aur kaliyug mein bahut farka hai jo baap batlaate hain। nai duniya phir puraani kaise hoti hai, usmein aatma kaise 84 janma leti hai - yeh bhi samjhaaya hai। har ek aatma apna-apna part bajaakar phir jab jaayegi to apni-apni jagah par jaakar khadi rahegi। jagah badalti nahin hai। apne-apne dharma mein apni jagah par nambarvaar khade honge, phir nambarvaar hi neeche aana hai isliye chhote-chhote models banaakar rakhte hain mool vatan ke। sab dharmon ka apna-apna section hai। devi-devta hai pahla dharma, phir nambarvaar aate hain। nambarvaar hi jaakar rahenge। tum bhi nambarvaar paas hote ho, un marks ke hisaab se jagah lete ho। yeh baap ki padhaai kalpa mein ek hi baar hoti hai। tum aatmaon ka kitna chhota sijra hoga। jaise tumhaara itna bada jhaad hai। tum bachchon ne divya drishti se dekhkar phir yahaan baithkar chitra aadi banaaye hain। aatma kitni chhoti hai, shareer kitna bada hai। sab aatmaayen vahaan jaakar baithengi। bahut thodi jagah mein najdeek mein jaakar rehti hain। manushyon ka jhaad kitna bada hai। manushyon ko to jagah chaahiye na - chalne, phirne, khelne, padhne, naukri karne ki। sab kuchh karne ki jagah chaahiye। niraakaari duniya mein aatmaon ki chhoti jagah hogi isliye in chitron mein bhi dikhaaya hai। bana-banaaya naatak hai, shareer chhodkar aatmaon ko vahaan jaana hai। tum bachchon ki buddhi mein hai ki ham vahaan kaise rehte hain aur doosre dharma vaale kaise rehte hain। phir kaise alag-alag hote hain nambarvaar। yeh sab baaten tumko kalpa-kalpa ek hi baap aakar sunaate hain। baaki to sabhi hain jismaani padhaai। unko roohaani padhaai nahin kah sakte hain।

abhi tum jaante ho ham aatma hain। aai maana aatma, maai maana mera yeh shareer hai। munashya yeh nahin jaante। unhon ka to sadaiv daihik sambandh rehta hai। satayug mein bhi daihik sambandh hoga। parantu vahaan tum aatma-abhimaani rehte ho। yeh pata padta hai ki ham aatma hain, yeh hamaara shareer ab vriddha hua hai, isliye ham aatma ek shareer chhod doosra lete hain। ismen moonjhane ki bhi koi baat nahin hai। tum bachchon ko to baap se raajaai leni hai। zaroor behad ka baap hai na। manushya jab tak gyaan ko poora nahin samajhte hain tab tak anek prashn poochhte hain। gyaan hai tum braahmanon ko। tum braahmanon ka vaastav mein mandir bhi ajmer mein hai। ek hote hain pushkarni brahman, doosre saarsiddha। ajmer mein brahma ka mandir dekhne jaate hain। brahma baitha hai, daadhi aadi di hui hai। unko manushya ke roop mein dikhaaya hai। tum brahman bhi manushya ke roop mein ho। braahmanon ko devta nahin kaha jaata hai। sachche-sachche brahman tum ho brahma ki aulaad। woh koi brahma ki aulaad nahin hain, peechhe aane vaalon ko yeh maaloom nahin padta hai। tumhaara yeh viraat roop hai। yeh buddhi mein yaad rehna chaahiye। yeh saari knowledge hai jo tum koi ko achhi reeti samjha sakte ho। ham aatma hain, baap ke bachche hain, yeh yathaartha reeti samajhkar, yeh nishchay pakka-pakka hona chaahiye। yeh to yathaartha baat hai, sabhi aatmaon ka baap ek paramatma hai। sabhi unko yaad karte hain। ‘he bhagwan' manushyon ke mukh se zaroor nikalta hai। paramatma kaun hai - yeh koi bhi nahin jaante hain, jab tak ki baap aakar samjhaaye। baap ne samjhaaya hai yeh lakshmi-naaraayan jo vishwa ke maalik the, yahi nahin jaante the to rishi-muni phir kaise jaan sakte! abhi tumne baap dvaara jaana hai। tum ho aastik, kyonki tum rachayita aur rachna ke aadi, madhya, ant ko jaante ho। koi achhi reeti jaante hain, koi kam। baap sammukh aakar padhaate hain phir koi achhi reeti dhaaran karte hain, koi kam dhaaran karte hain। padhaai bilkul simple bhi hai, badi bhi hai। baap mein itna gyaan hai jo saagar ko syaahi banaao to bhi ant nahin paaya ja sakta। baap sahaj karke samjhaate hain। baap ko jaanna hai, svadarshan chakradhaari banna hai। bas! achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sada yaad sahaj bani rahe uske liye chalte phirte yeh chintan karna ki ham aatma hain, paramdham nivaasi aatma yahaan part bajaane aai hain। baap bhi paramdham mein rehte hain। woh brahma tan mein aaye hain।

2) jaise roohaani baap se aatma ka pyaar hai, aise aapas mein bhi roohaani pyaar se rehna hai। aatma ka aatma se pyaar ho, shareer se nahin। aatma-abhimaani banne ka poora-poora abhyaas karna hai।

vardaan:- had ki kaamnaaon se mukta rah sarva prashnon se paar rahne vaale sada prasannachit bhav

jo bachche had ki kaamnaaon se mukta rehte hain unke chehre par prasannata ki jhalak dikhaai deti hai। prasannachit koi bhi baat mein prashnachit nahin hote। vo sada nihsvaarthi aur sada sabhi ko nirdosh anubhav karenge, kisi aur ke oopar dosh nahin rakhenge। chaahe koi bhi paristhiti aa jaae, chaahe koi aatma hisaab-kitaab chuktu karne vaali saamna karne aati rahe, chaahe shareer ka karmabhog saamna karne aata rahe lekin santushtata ke kaaran ve sada prasannachit rahenge।

slogan:- vyartha ki checking attention se karo, albele roop mein nahin।