Daily Murli for Tuesday 11 June 2024

11-06-2024 praatahmurli om shanti "baapdaada"' madhuban

“meethe bachche - ab tumhein sampoorn banna hai kyonki vaapis ghar jaana hai aur phir paavan duniya mein aana hai''

prashn:- sampoorn paavan banne ki yukti kaun si hai?

uttar:- sampoorn paavan banna hai to poora beggar bano, deh sahit sab sambandhon ko bhoolo aur mujhe yaad karo tab paavan banenge। ab tum in aankhon se jo kuchh dekhte ho yeh sab vinaash hona hai isliye dhan, sampatti, vaibhav aadi sab bhool beggar bano। aise beggar hi prince bante hain।

om shanti। meethe-meethe roohaani bachchon prati roohaani baap samjha rahe hain। bachche yeh to achhi reeti samajhte hain ki shuru mein aatmaayen sab pavitra rehti hain। ham hi paavan the, patit aur paavan yeh aatma ke liye hi kaha jaata hai। aatma paavan hai to sukh hai। buddhi mein aata hai ki ham paavan banenge to paavan duniya ke maalik banenge। iske liye hi purooshaartha karte hain। 5 hazaar varsha pahle paavan duniya thi। usmein aadhaakalpa tum paavan the, baaki raha aadhaakalpa। yeh baaten aur koi samajh nahin sakte। tum jaante ho patit aur paavan, sukh aur duhkh, din aur raat aadha-aadha hai। jo achhe samajhdaar hain, jinhonne bahut bhakti ki hai, vahi achhi reeti samjhenge। baap kehte hain - meethe bachchon, tum paavan the। nai duniya mein sirf tum hi the। baaki jo itne sab hain woh shantidham mein the। pahle-pahle ham paavan the aur bahut thode the phir nambarvaar manushya srishti vriddhi ko paati hai। ab tum meethe bachchon ko kaun samjha rahe hain? baap। aatmaon ko paramatma baap samjhaate hain, isko kaha jaata hai sangam। isko hi kumbha kaha jaata hai। manushya is sangamayug ko bhool gaye hain। baba ne samjhaaya hai 4 yug hote hain, paanchava yeh chhota-sa leap sangamayug hai। iski aayu chhoti hai। baap kehte hain main inki vaanaprastha avastha mein pravesh karta hoon, bahut janmon ke ant ke bhi ant mein। bachchon ko yeh khaatiri hai na। baap ne inmen pravesh kiya hai, inki bhi biography sunaai hai। baap kehte hain main aatmaon se hi baat karta hoon। aatma aur shareer donon ka ikattha part hota hai। inko kaha jaata hai jeev aatma। pavitra jeev aatma, apvitra jeev aatma। tum bachchon ki buddhi mein hai ki satayug mein bahut thode devi-devta hote hain। phir apne liye bhi kahenge ham jeevaatma jo satayug mein paavan thi woh phir 84 janmon ke baad patit bani hain। patit se paavan, paavan se patit - yeh chakra phirta hi rehta hai। yaad bhi us patit-paavan baap ko karte hain। to har 5 hajaar varsha baad baba ek hi baar aate hain, aakar svarga ki sthaapna karte hain। bhagwan ek hai, zaroor vahi puraani duniya ko naya banaayenge। phir naye ko puraana kaun banaata hai? raavan, kyonki raavan hi deh-abhimaani banaate hain। dushman ko jalaaya jaata hai, mitra ko nahin jalaaya jaata hai। sarva ka mitra ek hi baap hai jo sarva ki sadgati karte hain। unko sab yaad karte hain kyonki woh hai hi sabko sukh dene vaala। to zaroor duhkh dene vaala bhi koi hoga। woh hai 5 vikaaron roopi raavan। aadhaakalpa raamraajya, aadhaakalpa raavan raajya। svaastika nikaalte hain na। iska bhi arth baap samjhaate hain। ismen poora chautha hota hai। jara bhi kam jaasti nahin। yeh drama bada accurate hai। koi samajhte hain ham is drama se nikal jaayen, bahut duhkhi hain isse to jaakar jyoti jyot samaayen va brahm mein leen ho jaayen। lekin koi bhi ja nahin sakta। kya-kya khyaalaat karte hain। bhakti maarga mein prayatna bhi bhinna-bhinna karte hain। sannyaasi shareer chhodenge to aise kabhi nahin kahenge ki svarga va vaikuntha padhaara। pravritti maarga vaale kahenge phalaana svarga padhaara। aatmaon ko svarga yaad hai na। tumko to sabse jyaada yaad hai। tumko donon ki history-geography ka pata hai, aur koi ko pata nahin। tumko bhi pata nahin tha। baap baith bachchon ko sab raaz samjhaate hain।

yeh manushya srishti roopi vriksha hai। vriksha ka zaroor beej bhi hona chaahiye। baap hi samjhaate hain, paavan duniya kaise patit banti hain phir main paavan banaata hoon। paavan duniya ko kaha jaata hai svarga। svarga past ho gaya phir zaroor repeat hona hai isliye kaha jaata hai world ki history repeat hoti hai arthaat world hi puraani se nai, nai se puraani hoti hai। repeat maana hi drama hai। ‘drama' akshar bahut achha hai, shobhta hai। chakra hoobhu phirta hi rehta hai, naatak ko hoobhu nahin kaha jaata। koi beemaar ho padte hain to chhutti le lete hain। to tum bachchon ki buddhi mein hai - ham poojya devta the phir pujaari banen। baap aakar patit se paavan banne ki yukti bataate hain jo ki 5 hazaar varsha pahle bataai thi। sirf kehte hain bachchon mujhe yaad karo। baap pahle-pahle tumko aatma-abhimaani banaate hain। pahle-pahle yeh shabka (paath) dete hain - bachche, apne ko aatma samjho, baap ko yaad karo। itna tumko yaad karaata hoon, tum phir bhi bhool jaate ho! bhoolte hi rahenge jab tak drama ka ant aaye। ant mein jab vinaash ka samay hoga tab padhaai poori hogi phir tum shareer chhod denge। jaise sarpa bhi ek puraani khaal chhod dete hain na। to baap bhi samjhaate hain tum jab baithte ho athva chalte phirte ho, dehi-abhimaani hokar raho। aage tumko deh-abhimaan tha। ab baap kehte hain aatma-abhimaani bano। deh-abhimaan mein aane se tumko 5 vikaar pakad lete hain। aatma-abhimaani banne se koi vikaar pakdega nahin। dehi-abhimaani ban baap ko bahut pyaar se yaad karna hai। aatmaon ko paramatma baap ka pyaar milta hai, is sangamayug par। isko kalyaankaari sangam kaha jaata hai, jabki baap aur bachche aakar milte hain। tum aatmaayen bhi shareer mein ho। baap bhi shareer mein aakar tumko aatma nishchay karaate hain। baap ek hi baar aate hain, jabki sabhi ko vaapis le jaana hai। samjhaate bhi hain - ham tumko kaise vaapis le jaayenge। tum kehte bhi ho ham sabhi patit hain, aap paavan ho। aap aakar hamko paavan banaao। tum bachchon ko pata nahin hai ki baba kaise paavan banaayenge। jab tak banaave nahin tab tak kya jaanen। yeh bhi tum samajhte ho aatma chhota sitaara hai। baap bhi chhota sitaara hai। parantu woh gyaan ka saagar, shanti ka saagar hai। tumko bhi aap samaan banaate hain। yeh gyaan tum bachchon ko hai jo tum phir sabko samjhaate ho। phir satayug mein jab tum honge to yeh gyaan sunaayenge kya? nahin। gyaan saagar baap to ek hi hai jo tumko abhi hi padhaate hain। jeevan kahaani to sabki chaahiye na। woh baap sunaate hi rehte hain। parantu tum ghadi-ghadi bhool jaate ho, tumhaari maaya ke saath yuddha hai। tum feel karte ho baba ko ham yaad karte hain, phir bhool jaate hain। baap kehte hain maaya hi tumhaari dushman hai, jo tumko bhula deti hai arthaat baap se bemukh kar deti hai। tum bachche ek hi baar baap ke sammukh hote ho। baap ek hi baar varsa dete hain। phir baap ko sammukh aane ki darkaar hi nahin। paap aatma se punya aatma, svarga ka maalik banaaya। bas। phir kya aakar karenge। tumne bulaaya aur main bilkul poore time par aaya। har 5 hazaar varsha baad main apne samay par aata hoon। yeh kisko bhi pata nahin hai। shivraatri kyon manaate hain, usne kya kiya? kisko bhi pata nahin hai isliye shivraatri ki holy de aadi kuchh nahin karte hain। aur sabki holy de karte hain lekin shivbaaba aate hain, itna part bajaate hain, unka koi ko pata nahin padta। arth hi nahin jaante। bhaarat mein kitna agyaan hai।

tum bachche jaante ho ki shivbaaba hi oonch te oonch hai to zaroor manushyon ko oonch te oonch banaayenge। baap kehte hain mainne inko gyaan diya, yog sikhaaya phir woh nar se naaraayan bana। unhonne yeh knowledge suni hai। yeh gyaan tumhaare liye hi hai, aur kiske liye shobhta nahin। tumko phir se banna hai, aur koi nahin bante। yeh hai nar se naaraayan banne ki katha। jinhonne aur dharma sthaapan kiye, sab punarjanma lete-lete tamopradhaan bane hain phir un sabko satopradhaan banna hai। us pad ke anusaar phir repeat karna hai। oonch paartadhaari banne ke liye tum kitna purooshaartha kar rahe ho। kaun purooshaartha kara rahe hain? baba। tum oonch ban jaate ho phir kabhi yaad bhi nahin karte ho। svarga mein thode hi yaad karenge। oonch te oonch baap hai, phir banaate bhi oonch hain। naaraayan se pahle to shreekrishna hai। phir tum aise kyon kehte ho ki nar se naaraayan banen? kyon nahin kehte ho nar se krishna banen? pahle naaraayan thode hi banenge? pahle to prince shreekrishna banenge na। bachcha to phool hota hai woh to phir bhi yugal ban jaate hain। mahima brahmachaari ki hoti hai। chhote bachche ko satopradhaan kaha jaata hai, tum bachchon ko khyaal mein aana chaahiye - ham pahle-pahle zaroor prince banenge। gaaya bhi jaata hai - beggar tu prince। beggar kisko kaha jaata hai? aatma ko hi shareer ke saath beggar va saahookaar kehte hain। is samay tum jaante ho sabhi beggars ban jaate hain। sab khatma ho jaate hain। tumko is samay hi beggar banna hai, shareer sahit। paai paise jo kuchh hain khatma ho jaayenge। aatma ko beggar banna hai, sab kuchh chhodna hai। phir prince banna hai। tum jaante ho dhan daulat aadi sab chhodkar beggar ban ham ghar jaayenge। phir nai duniya mein prince bankar aayenge। jo kuchh bhi hai, sab kuchh chhodna hai। yeh puraani cheez koi kaam ki nahin hai। aatma pavitra ho jaayegi phir yahaan aayegi part bajaane। kalpa pahle misal। jitna-jitna tum dhaarna karenge utna oonch pad milega। bhal is samay kisi ke paas 5 karod hain, sab khatma ho jaayenge। ham phir se apni nai duniya mein jaate hain। yahaan tum aaye ho nai duniya mein jaane ke liye। aur koi satsang nahin jismen koi samjhe ki ham nai duniya ke liye padh rahe hain। tum bachchon ki buddhi mein hai baba hamko pahle beggar banaakar phir prince banaate hain। deh ke sab sambandh chhode to beggar thahra na। kuchh bhi hai nahin। abhi bhaarat mein kuchh bhi nahin hai। bhaarat abhi beggar, insolvent hai। phir solvent hoga। kaun bante hain? aatma shareer dvaara banti hai। abhi raaja-raani bhi hain nahin। woh bhi insolvent hain, raaja-raani ka taaj bhi nahin hai। na woh taaj hai, na ratna jadit taaj hai। andheri nagri hai, sarvavyaapi kah dete hain। goya sabmen bhagwan hai। sab ek samaan hain, kutte-billi sabmen hai isko kaha jaata hai andher nagri… tum braahmanon ki raat thi। ab samajhte ho gyaan din aa raha hai। satayug mein sabhi jaagti jyot hain। abhi deeva bilkul dull ho gaya hai। bhaarat mein hi deeva jagaane ki rasma hai। aur koi thode hi deeva jagaate hain। tumhaari jyot ujhaai hui hai। satopradhaan vishwa ke maalik the, woh taakat kam hote-hote abhi kuchh taakat hi nahin rahi hai। phir baap aaye hain tumko taakat dene। battery bharti hai। aatma ko paramatma baap ki yaad rahne se battery bharti hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab naatak poora ho raha hai, humein vaapis jaana hai isliye aatma ko baap ki yaad se satopradhaan, paavan zaroor banaana hai। baap samaan gyaan ka saagar, shanti ka saagar abhi hi banna hai।

2) is deh se bhi poora beggar banne ke liye buddhi mein rahe ki in aankhon se jo kuchh bhi dekhte hain, yeh sab khatma ho jaana hai। humein beggar se prince banna hai। hamaari padhaai hai hi nai duniya ke liye।

vardaan:- chamatkaar dikhaane ke bajaae avinaashi bhaagya ka chamakta hua sitaara banaane vaale siddhi swaroop bhav

aajkal jo alpakaal ki siddhi vaale hain woh last mein oopar se aane ke kaaran satopradhaan stage ke pramaan pavitrata ke phalasvaroop alpakaal ke chamatkaar dikhaate hain lekin woh siddhi sadaakaal nahin rehti kyonki thode samay mein hi sato rajo tamo teenon stages se paas karte hain। aap pavitra aatmaayen sada siddhi swaroop hain, chamatkaar dikhaane ke bajaae chamakti hui jyotisvaroop banaane vaale hain। avinaashi bhaagya ka chamakta hua sitaara banaane vaale hain, isliye sab aapke paas hi anchali lene aayenge।

slogan:- behad ki vairaagya vritti ka vaayumandal ho to sahayogi sahaj yogi ban jaayenge।