Daily Murli for Tuesday 20 August 2024

20-08-2024 praatahmurli om shanti "baapdaada"' madhuban

“meethe bachche - kaamkaaj karte hue bhi ek baap ki yaad rahe, chalte-phirte baap aur ghar ko yaad karo, yahi tumhaari bahaaduri hai''

prashn:- baap ka regard aur dis regard kab aur kaise hota hai?

uttar:- jab tum bachche baap ko achhi tarah yaad karte ho tab regard dete ho। agar kehte yaad karne ki phursat nahin hai to yeh bhi jaise disregard hai। vaastav mein yeh baap ka disregard nahin karte, yeh to apna hi disregard karte ho isliye naameegraami keval bhaashan mein nahin lekin yaad ki yaatra mein bano, yaad ka chart rakho। yaad se hi aatma sato-pradhaan banegi।

om shanti। roohaani bachchon prati roohaani baap samjhaate hain, yeh jo 84 ke chakra ka gyaan samjhaaya jaata hai yeh to ek knowledge hai। jo to ham bachchon ne janma-janmaantar padhi hai aur dhaarna karte aaye hain। yeh to bilkul sahaj hai, yeh koi nai baat nahin।

baap baith samjhaate hain - satayug se lekar kaliyug ant tak tumne kitne punarjanma liye hain। yeh gyaan to sahaj reeti buddhi mein hai hi। yeh bhi ek padhaai hai, rachna ke aadi, madhya, ant ko samajhna hai। so baap ke sivaae aur koi samjha nahin sakta। baap kehte hain is gyaan se bhi oonch baat hai yaad ki yaatra, jisko yog kaha jaata hai। yog akshar mashhoor hai। parantu yeh hai yaad ki yaatra। jaise manushya yaatra par jaate hain, kahenge ham phalaane teertha yaatra par jaate hain। shreenaath ya amarnaath jaate hain to woh yaad rehta hai। abhi tum jaante ho roohaani baap to badi lambi yaatra sikhlaate hain ki mujhe yaad karo। un yaatraaon se to phir laut aate hain। yeh woh yaatra hai jo muktidhaam mein jaakar nivaas karna hai। bhal part mein aana hai parantu is puraani duniya mein nahin। is puraani duniya se tumko vairaagya hai। yeh to chhi-chhi raavan raajya hai। to mool baat hai yaad ki yaatra। kai bachche yeh bhi samajhte nahin hain ki kaise yaad karna hai। koi yaad karte hain va nahin karte hain - yeh dekhne mein to koi cheez nahin aati hai। baap kehte hain apne ko aatma samajh mujh baap ko yaad karna hai। dekhne ki to cheej nahin। na maaloom pad sakta hai। yeh us avastha mein kahaan tak yaad ki yaatra mein kaayam rehte hain, yeh to khud hi jaanen। yukti to bahuton ko bataate hain। kalyaankaari baap ne samjhaaya hai - apne ko aatma samajh shivbaaba ko yaad karo। bhal apni service bhi karte raho। jaise misaal - pahre par bachche hain, chakkar lagaate rehte hain, inko yaad mein rehna to bada sahaj hai। sivaae baap ki yaad ke aur kuchh yaad nahin aana chaahiye। baba misaal de bataate hain, us yaad ki yaatra mein hi aaye, jaaye। jaise paadri log jaate hain, kitna silence mein jaate hain। to tum bachchon ko bhi bada prem se baap aur ghar ko yaad karna hai। yeh manzil badi bhaari hai। bhakta log bhi yahi purooshaartha karte rehte hain। parantu unko yeh pata nahin hai ki hamko vaapis jaana hai। woh to samajhte hain jab kaliyug poora hoga, tab jaayenge। unko bhi aise sikhlaane vaala to koi hai nahin। tum bachchon ko to sikhlaaya jaata hai। jaise pahra dete ho to ekaanta mein jitna baap ko yaad karenge utna achha hai। yaad se paap katte hain। janma janmaantar ke paap sir par hain। jo pahle satopradhaan bante hain, raamraajya mein bhi pahle woh jaate hain। to unko hi sabse jaasti yaad ki yaatra mein rehna hai। kalpa-kalpa ki baat hai। to inko yaad ki yaatra mein rahne ka achha chance hain। yahaan to koi ladaai-jhagde ki baat hi nahin hai। aate-jaate athva baithte ek panth, do kaarya - pahra bhi do, baap ko bhi yaad karo। karma karte baap ko yaad karte raho। pahre vaale ko to sabse jaasti phaayda hai। chaahe din ko, chaahe raat ko jo pahra dete hain, unhon ke liye bahut phaayda hai। agar yeh yaad rahne ki aadat pad jaae to। baap ne yeh service bahut achhi di hai, pahra aur yaad ki yaatra। yeh bhi chance milta hai baap ki yaad mein rahne ka। yeh bhinna-bhinna yuktiyaan bataai jaati hain - yaad ki yaatra mein rahne ki। yahaan tum jitna yaad mein rah sakenge utna baahar dhandhe aadi mein nahin isliye madhuban mein aate hain refresh hone। ekaanta mein jaakar ek pahaadi par baith yaad ki yaatra mein rahen phir ek jaae va 2-3 jaayen। yahaan chance bahut achha hai। yahi mukhya hai baap ki yaad। bhaarat ka praacheen yog mashhoor bhi bahut hai। abhi tum samajhte ho is yaad ki yaatra se paap katte hain। ham satopradhaan ban jaayenge। to ismen purooshaartha bahut achha karna hai, bahaaduri to ismen hain jo kaam karte baap ko yaad kar dikhlaao। karma to karna hi hai kyonki tum ho pravritti maarga vaale। grihastha vyavhaar mein rehte dhandha aadi karte buddhi mein baap ki yaad rahe, ismen tumhaari bahut-bahut kamaai hai। bhal abhi kai bachchon ki buddhi mein nahin aata hai। baap kehte rehte hain chart rakho। thoda bahut koi likhte hain। baap yuktiyaan to bahut bataate hain। bachche chaahte hain baba ke paas jaayen। yahaan bahut kamaai kar sakte hain। ekaanta bahut achhi hai। baap sammukh baith samjhaate hain mujhe yaad karo to paap kat jaayen kyonki janma-janmaantar ke paap sir par hain। vikaar ke liye kitne jhagde chalte hain, vighna padte hain। kehte hain baba hamko pavitra rahne nahin dete। baap kehte hain - bachche, tum yaad ki yaatra mein rah janma-janmaantar ke paap jo sir par hain, woh bojha utaaro। ghar baithe shivbaaba ko yaad karte raho। yaad to kahaan bhi baith kar sakte ho। kahaan bhi rehte yeh practice karni hai। jo bhi aaye unko bhi paigaam do। baap kehte hain apne ko aatma samajh baap ko yaad karo, inko hi yogbal kaha jaata hai। bal maana taakat, shakti। baap ko sarvashaktimaan kehte hain na। to woh shakti baap se kaise milegi? baap khud kehte hain mujhe yaad karo। tum neeche utarte-utarte tamopradhaan ban gaye ho to woh shakti bilkul khatma ho gai hai। paai ki bhi nahin rahi hai। tumhaare mein bhi koi hain jo achhi reeti samjhaate hain, baap ko yaad karte hain।

to apne se poochhna hai hamaara chart kaisa rehta hai? baap to sab bachchon ko kehte hain, yaad ki yaatra mukhya hai। yaad se hi tumhaare paap katenge। bhal koi saavdhaan karne vaala bhi nahin ho to bhi baap ko yaad kar sakte ho na। bhal vilaayat mein akele raho, to bhi yaad mein rah sakte ho। samjho koi shaadi kiya hua hai, stri aur koi jagah hai, to unko bhi likh sakte ho - tum ek baat sirf yaad karo - baap ko yaad karo to janma-janmaantar ke paap bhasma ho jaayenge। vinaash saamne khada hai। baap yuktiyaan to bahut achhi samjhaate rehte hain phir koi kare, na kare, unki marji। bachche bhi samajhte honge ki baap raay to bahut achhi dete hain। hamaara kaam hai mitra-sambandhi aadi jo bhi milen, sabko paigaam dena। dosta ho ya koi bhi ho, service ka shauk chaahiye। tumhaare paas chitra to hain, badge bhi hai। yeh badi achhi cheez hai। badge kisko bhi lakshmi-naaraayan bana sakta hai। trimoorti ke chitra par achhi tarah samjhaana hai, inke oopar shiv hai। vo log trimoorti banaate hain, oopar mein shiv dikhaate nahin। shiv ko na jaanne kaaran bhaarat ka beda dooba hua hai। ab shivbaaba dvaara hi bhaarat ka beda paar hota hai। pukaarte hain patit-paavan aakar ham patiton ko paavan banaao phir bhi sarvavyaapi kah dete hain। kitni paai paise ki bhool hai। baap baith samjhaate hain tumko aise-aise bhaashan karna hai। baap bhi direction dete rehte hain - aise museum kholo, service karo to bahut aayenge। circus bhi bade-bade shahron mein kholte hain na। kitna unhon ke paas saamaan rehta hai। gaanv-gaanv se dekhne ke liye log aate hain isliye baba kehte hain tum bhi aisa khoobsoorat museum banaao, jo dekhkar khush ho jaayen phir auron ko jaakar sunaayen। yeh bhi samjhaate hain jo kuchh service hoti hai, kalpa pahle misal hoti hai, parantu satopradhaan banne ka ona bahut rakhna hai। ismen hi bachche gaphlat karte hain। maaya vighna bhi is yaad ki yaatra mein hi daalti hai। apne dil se poochhna hai - itna hamko shauk hai, mehnat karte hain? gyaan to common baat hai। baap bigar 84 ka chakra koi samjha na sake। baaki yaad ki yaatra hai mukhya। pichhaadi mein koi bhi yaad na aaye sivaae ek baap ke। direction to baap poore dete rehte hain। mukhya baat hai yaad karne ki। tum koi ko bhi samjha sakte ho। bhal koi bhi ho tum sirf badge par samjhaao। aur koi ke paas aise arth sahit medal nahin hote। military vaale achha kaam karte hain to unko medal milte hain। raay saaheb ka medal, sab dekhenge inko viceroy se title mila hai। aage viceroy hote the। abhi to unke paas koi power nahin hai। abhi to kitne jhagde lage pade hain। manushya bahut ho gaye hain, to unke liye jameen chaahiye shahar mein। abhi baba svarga ki sthaapna kar rahe hain, itne sab khalaas ho baaki kitne thode jaakar rahenge। jameen dher hogi। vahaan to sab kuchh naya hoga। us nai duniya mein chalne ke liye phir achhi reeti purooshaartha karna hai। har ek manushya purooshaartha karte hain bahut oonch pad paane ka। koi poora purooshaartha nahin karte to samajhte hain naapaas ho jaayenge। khud bhi samajhte hain ham fail ho jaayenge phir padhaai aadi ko chhod-kar naukri mein lag jaate hain। aajkal to naukriyon mein bhi bahut kade kaayde nikaalte rehte hain। manushya bahut duhkhi hain। ab baba tumko aisa raasta bataate hain jo 21 janma kabhi duhkh ka naam nahin rahega। baap kehte hain sirf yaad ki yaatra mein raho। jitna ho sake raat ko bahut achha hai। bhal lete hue yaad karo। koi ko phir neend aa jaati hai। budha hoga, jaasti baith nahin sakega to zaroor so jaayega। lete hue baap ko yaad karte rahenge। badi khushi andar mein hoti rahegi kyonki bahut-bahut kamaai hai। yeh to samajhte hain - time pada hai parantu maut ka koi thikaana nahin। to baap samjhaate hain mool hai yaad ki yaatra। baahar shahar mein to mushkil hai। yahaan aate hain to bada achha chance milta hai। koi phikraat ki baat nahin isliye yahaan chart badhaate raho। tumhaare characters bhi isse sudharte jaayenge। parantu maaya badi dushtar hai। ghar mein rahne vaalon ko itna kadar nahin rehta hai, jitna baahar vaalon ko hai। phir bhi is samay gopon ki result achhi hai।

kai bachchiyaan likhti hain shaadi ke liye bahut tang karte hain, kya karen? jo majboot sensible bachchiyaan hongi woh kabhi aise likhengi nahin। likhti hain to baba samajh jaate hain - ridh bakri hain। yeh to apne haath mein hai jeevan ko bachaana। is duniya mein anek prakaar ke duhkh hain। ab baba to sahaj bataate hain।

tum bachche to mahaan bhaagyashaali ho, jo aakar saahebjaade bane ho। baap kitna oonch banaate hain। phir bhi tum baap ko gaali dete ho, so bhi kachchi gaali। itne tamopradhaan bane ho jo baat mat poochho। isse jaasti aur kya sahan karenge। kehte hain na - jaasti tang karenge to khatma kar denge। to yeh baap baith samjhaate hain। shaastron mein to kahaaniyaan likh di hain। baba yukti to bahut sahaj bataate hain। karma karte hue yaad karo, ismen bahut-bahut phaayda hai। savere aakar yaad mein baitho। bahut maza aayega। parantu itna shauk nahin hai। teacher student ki chalan se samajh jaate hain - yeh fail ho jaayenge। baap bhi samajhte hain - yeh fail ho jaayenge, so bhi kalpa-kalpaantar ke liye। bhal bhaashan mein to bahut hoshiyaar hain, pradarshani bhi samjha lete hain parantu yaad hai nahin, ismen fail ho padte hain। yeh bhi jaise disregard karte hain। apna hi karte hain, shivbaaba ka to disregard hota nahin। aise koi kah na sake ki hamko phursat hi nahin yaad karne ki। baba maanenge nahin। snaan par bhi yaad kar sakte ho। bhojan karte samay baap ko yaad karo, ismen bahut-bahut kamaai hai। kai bachche sirf bhaashan mein naameegraami hain, yog hai nahin। woh ahankaar bhi gira deta hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sarvashaktimaan baap se shakti lene ke liye yaad ka chart badhaana hai। yaad ki bhinna-bhinna yuktiyaan rachni hai। ekaanta mein baith vishesh kamaai jama karni hai।

2) satopradhaan banne ka ona rakhna hai। gaphlat nahin karni hai। ahankaar mein nahin aana hai। service ka shauk bhi rakhna hai, saath-saath yaad ki yaatra par bhi rehna hai।

vardaan:- sab kuchh baap havaale kar kamal pushpa samaan nyaare pyaare rahne vaale double light bhav

baap ka banna arthaat sab bojh baap ko de dena। double light ka arth hi hai sab kuchh baap havaale karna। yeh tan bhi mera nahin। to jab tan hi nahin to baaki kya। aap sabka vaayda hi hai tan bhi tera, man bhi tera, dhan bhi tera - jab sab kuchh tera kaha to bojh kis baat ka isliye kamal pushpa ka drishtaanta smriti mein rakh sada nyaare aur pyaare raho to double light ban jaayenge।

slogan:- roohaaniyat se rob ko samaapta kar, svayan ko shareer ki smriti se galaane vaale hi sachche paandav hain।