Daily Murli for Monday 2 September 2024

02-09-2024 praatahmurli om shanti "baapdaada"' madhuban

“meethe bachche - jaise tumhein nishchay hai ki eeshvar sarvavyaapi nahin, woh hamaara baap hai, aise doosron ko samjhaakar nishchay karaao phir unse opinion lo''

prashn:- baap apne bachchon se kaun si baat poochhte hain, jo doosra koi nahin poochh sakta hai?

uttar:- baba jab bachchon se milte hain to poochhte hain - bachche, pahle tum kab mile ho? jo bachche samjhe hue hain woh jhat kehte hain - haan baba, ham 5 hazaar varsha pahle aapse mile the। jo nahin samajhte hain, woh moonjh jaate hain। aisa prashn poochhne ka akla doosre kisi ko aayega bhi nahin। baap hi tumhein saare kalpa ka raaz samjhaate hain।

om shanti। roohaani bachchon prati roohaani behad ka baap samjhaate hain - yahaan tum baap ke saamne baithe ho। ghar se nikalte hi is vichaar se ho ki ham jaate hain shivbaaba ke paas, jo brahma ke rath mein aakar hamko svarga ka varsa de rahe hain। ham svarga mein the phir 84 ka chakra lagaakar abhi narka mein aakar pade hain। aur koi bhi satsang mein kiski buddhi mein yeh baaten nahin hongi। tum jaante ho ham shivbaaba ke paas jaate hain jo is rath mein aakar padhaate bhi hain। vo ham aatmaon ko saath le jaane aaye hain। behad ke baap se zaroor behad ka varsa milna hai। yeh to baap ne samjhaaya hai ki main sarvavyaapi nahin hoon। sarvavyaapak to 5 vikaar hain। tumhaare mein bhi 5 vikaar hain isliye tum mahaan duhkhi hue ho। ab eeshvar sarvavyaapi nahin hai, yeh opinion zaroor likhvaana hai। tum bachchon ko to pakka nishchay hai ki eeshvar baap sarvavyaapi nahin hai। baap supreme baap hai, supreme teacher, guru bhi hai। behad ka sadgati daata hai। vahi shanti dene vaala hai। aur koi jagah aise khyaal koi nahin karta hai ki kya milna hai। sirf kanras - raamaayan, geeta aadi jaakar sunte hain। buddhi mein arth kuchh nahin। aage ham paramatma sarvavyaapi kehte the। ab baap samjhaate hain yeh to jhooth hai। badi glaani ki baat hai। to yeh opinion bhi bahut zaroori hai। aajkal jinse tum opening aadi karaate ho, woh likhte hain brahmaakumaariyaan achha kaam karti hain। bahut achhi samjhaani deti hain। eeshvar ko praapta karne ka raasta bataati hain, isse logon ke dil par sirf achha asar padta hai। baaki yeh opinion koi bhi nahin likhkar dete ki duniya bhar mein jo manushya kehte hain eeshvar sarvavyaapi hai, yeh badi bhool hai। eeshvar to baap, teacher, guru hai। ek to mukhya baat hai yeh, doosra phir opinion chaahiye ki is samjhaani se ham samajhte hain geeta ka bhagwan shreekrishna nahin hai। bhagwan koi manushya ya devta ko nahin kaha jaata hai। bhagwan ek hai, woh baap hai। us baap se hi shanti aur sukh ka varsa milta hai। aisi-aisi opinion lena hai। abhi jo tum opinion lete ho woh koi kaam ki nahin likhte hain। haan, itna likhte hain ki yahaan shiksha bahut achhi dete hain। baaki mukhya baat jismen hi tumhaari vijay honi hai, woh likhaao ki yeh brahmaakumaariyaan satya kehti hain ki eeshvar sarvavyaapi nahin hai। woh to baap hai, vahi geeta ka bhagwan hai। baap aakar bhakti maarga se chhudaae gyaan dete hain। yeh bhi opinion zaroori hai ki patit-paavni paani ki ganga nahin, parantu ek baap hai। aisi-aisi opinion jab likhen tab hi tumhaari vijay ho। abhi time pada hai। abhi tumhaari jo service chalti hai, itna kharcha hota hai, yeh to tum bachche hi ek-do ko madad karte ho। baahar vaalon ko to kuchh pata hi nahin। tum hi apne tan-man-dhan se kharcha kar apne liye raajdhaani sthaapan karte ho। jo karega woh paayega। jo nahin karte woh paayenge bhi nahin। kalpa-kalpa tum hi karte ho। tum hi nishchay buddhi hote ho। tum samajhte ho ki baap, baap bhi hai, teacher bhi hai, geeta ka gyaan bhi yathaartha reeti sunaate hain। bhakti maarga mein bhal geeta sunte aaye parantu raajya thode hi praapta kiya hai। eeshvareey mat se badalkar aasuri mat ho gai। character bigadte patit ban pade। kumbha ke mele par kitne manushya karodon ki andaaj mein jaate hain। jahaan-jahaan paani dekhte, vahaan jaate hain। samajhte hain paani se hi paavan honge। ab paani to jahaan tahaan nadiyon se aata rehta hai। inse koi paavan ban sakta hai kya! kya paani mein snaan karne se ham patit se paavan ban devta ban jaayenge। abhi tum samajhte ho koi bhi paavan ban na sake। yeh hai bhool। to in 3 baaton par opinion lena chaahiye। abhi sirf kehte hain sanstha achhi hai, to bahuton ke andar jo bhraantiyaan bhari hui hain ki brahmaakumaariyon mein jaadu hai, bhagaati hain - woh khyaalaat door ho jaate hain kyonki aavaaz to bahut phaila hua hai na। vilaayat tak yeh aavaaz gaya tha ki inko 16108 raaniyaan chaahiye, unse 400 mil gai hain kyonki us samay satsang mein 400 aate the। bahuton ne virodh kiya, picketing aadi bhi karte the, parantu baap ke aage to koi ki chal na sake। sab kehte the yeh jaadoogar phir kahaan se aaya। phir wonder dekho, baba to karaachi mein tha। aapehi saara jhunda aapas mein milkar bhaag aaya। koi ko pata nahin pada ki hamaare ghar se kaise bhaage। yeh bhi khyaal nahin kiya itne sab kahaan jaakar rahenge। phir phat se bangala le liya। to jaadu ki baat ho gai na। abhi bhi kehte rehte hain yeh jaadoogarni hain। brahmaakumaariyon ke paas jaayenge to phir lautenge nahin। yeh stri-puroosh ko bhaai-behen banaati hain phir kitne to aate hi nahin hain। abhi tumhaari pradarshani aadi dekhkar woh jo baaten buddhi mein baithi hui hain, woh door hoti hain। baaki baba jo opinion chaahte hain, woh koi nahin likhte। baba ko woh opinion chaahiye। yeh likhen ki geeta ka bhagwan shreekrishna nahin hai। saari duniya samajhti hai shreekrishna bhagvaanuvaach। parantu shreekrishna to poore 84 janma lete hain। shivbaaba hai punarjanma rahit। to ismen bahuton ki opinion chaahiye। geeta sunne vaale to dher ke dher hain phir dekhenge yeh to akhbaar mein bhi nikal pada hai geeta ka bhagwan parampita paramatma shiv hai। vahi baap, teacher, sarva ka sadgati daata hai। shanti aur sukh ka varsa sirf unse milta hai। baaki abhi tum mehnat karte ho, udghaatan karaate ho, sirf manushyon ki bhraantiyaan door hoti hain, samjhaani achhi milti hai। baaki baba jaise kehte hain woh opinion likhen। mukhya opinion hai yeh। baaki sirf raay dete hain - yeh sanstha bahut achhi hai। isse kya hoga। haan, aage chal jab vinaash aur sthaapna najdeek hogi to tumko yeh opinion bhi milenge। samajhkar likhenge। abhi tumhaare paas aane to lage hain na। abhi tumko gyaan mila hai - ek baap ke bachche ham sab bhaai-bhaai hain। yeh kisi ko bhi samjhaana to bahut sahaj hai। sab aatmaon ka baap ek supreme baba hai। unse zaroor supreme behad ka pad bhi milna chaahiye। so 5 hazaar varsha pahle tumko mila tha। vo log kaliyug ki aayu laakhon varsha kah dete hain। tum 5 hazaar varsha kehte ho, kitna pharka hai।

baap samjhaate hain 5 hazaar varsha pahle vishwa mein shanti thi। yeh em object saamne khadi hai। inke raajya mein vishwa mein shanti thi। yeh raajdhaani ham phir sthaapan kar rahe hain। saare vishwa mein sukh-shanti thi। koi duhkh ka naam nahin tha। abhi to apaar duhkh hain। ham yeh sukh-shanti ka raajya sthaapan kar rahe hain, apne hi tan-man-dhan se gupta reeti। baap bhi gupta hai, knowledge bhi gupta hai, tumhaara purooshaartha bhi gupta hai, isliye baba geet-kavitaaen aadi bhi pasanda nahin karte hain। woh hai bhakti maarga। yahaan to chup rehna hai, shanti se chalte-phirte baap ko yaad karna hai aur srishti chakra buddhi mein phiraana hai। abhi hamaara yeh antim janma hai, puraani duniya mein। phir ham nai duniya mein pahla janma lenge। aatma pavitra zaroor chaahiye। abhi to sab aatmaayen patit hain। tum aatma ko pavitra banaane ke liye baap se yog lagaate ho। baap khud kehte hain - bachche, deh sahit deh ke sab sambandh chhodo। baap nai duniya taiyaar kar rahe hain, unko yaad karo to tumhaare paap kat jaaen। are, baap jo tumko vishwa ki baadshaahi dete hain, aise baap ko tum bhool kaise jaate ho! woh kehte hain - bachche, yeh antim janma sirf pavitra bano। ab is mrityulok ka vinaash saamne khada hai। yeh vinaash bhi hoobhu 5 hazaar varsha pahle aise hi hua tha। yeh to smriti mein aata hai na। apna raajya tha to doosra koi dharma nahin tha। baba ke paas koi bhi aata hai to usse poochhta hoon - aage kab mile ho? koi to jo samjhe hue hain woh jhat kah dete hain 5 hazaar varsha pahle। koi naye aate hain to moonjh padte hain। baba samajh jaate hain ki braahmani ne samjhaaya nahin hai। phir kehta hoon socho, to smriti aati hai। yeh baat aur to koi bhi poochh na sake। poochhne ka akla aayega hi nahin। woh kya jaanen in baaton se। aage chalkar tumhaare paas bahut aakar sunenge, jo is kul ke honge। duniya badalni to zaroor hai। chakra ka raaz to samjha diya hai। ab nai duniya mein jaana hai। is puraani duniya ko bhool jaao। baap naya makaan banaate hain to buddhi usmein chali jaati hai। puraane makaan mein phir mamatva nahin rehta hai। yeh phir hai behad ki baat। baap nai duniya svarga sthaapan kar rahe hain isliye ab is puraani duniya ko dekhte hue bhi nahin dekho। mamatva nai duniya mein rahe। is puraani duniya se vairaagya। woh to hathayog se had ka sannyaas kar jangal mein jaakar baithte hain। tumhaara to hai saari puraani duniya se vairaagya, ismen to athaah duhkh hain। nai satayugi duniya mein apaar sukh hain to zaroor unko yaad karenge। yahaan sab duhkh dene vaale hain। maa-baap aadi sab vikaaron mein phansa denge। baap kehte hain kaam mahaashatru hai, unko jeetne se hi tum jagatjeet banenge। yeh raajayog baap sikhlaate hain, jisse ham yeh pad paate hain। bolo, hamko svapna mein bhagwan kehte hain paavan bano to svarga ki raajaai milegi। to ab main ek janma apvitra ban apni raajaai ganvaaoongi thode hi। is pavitrata ki baat par hi jhagda chalta hai। dropdi ne bhi pukaara hai yeh dushaasan hamko nangan karte hain। yeh bhi khel dikhaate hain ki dropdi ko shreekrishna 21 saadiyaan dete hain। ab baap baith samjhaate hain kitni durgati ho gai hai। apaar duhkh hain na। satayug mein apaar sukh tha। ab main aaya hoon - anek adharma ka vinaash aur ek sat dharma ki sthaapna karne। tumko raajya-bhaagya dekar vaanaprastha mein chale jaayenge। aadhaakalpa phir meri darkaar hi nahin padegi। tum kabhi yaad bhi nahin karenge। to baba samjhaate hain - tumhaare liye jo sabke man mein ulta vibration hai woh nikalkar theek ho raha hai। baaki mukhya baat hai opinion likha lo eeshvar sarvavyaapi nahin hai। usne to aakar raajayog sikhaaya hai। patit-paavan bhi baap hai। paani ki nadiyaan thode hi paavan bana sakengi। paani to sab jagah hota hai। ab behad ka baap kehte hain apne ko aatma samjho। deh sahit deh ke sab sambandh chhodo। aatma hi ek shareer chhod doosra leti hai। woh phir kah dete aatma nirlep hai। aatma so paramatma yeh hai bhakti maarga ki baaten। bachche kehte hain - baba, yaad kaise karen? are, apne ko aatma to samajhte ho na। aatma kitni chhoti bindi hai to unka baap bhi itna chhota hoga। woh punarjanma mein nahin aata hai। yeh buddhi mein gyaan hai। baap yaad kyon nahin aayega। chalte-phirte baap ko yaad karo। achha, bada roop hi samjho baap ka। parantu yaad to ek ko karo na, to tumhaare paap kat jaaen। aur to koi upaay hai nahin। jo samajhte hain woh kehte hain baba aapki yaad se ham paavan ban paavan duniya, vishwa ke maalik bante hain to ham kyon nahin yaad karenge। ek-do ko bhi yaad dilaana hai to paap kat jaaen। achha!

meethe-meethe sikeeldhe bachchon prati maat-pita baapdaada ka yaad-pyaar good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap aur knowledge gupta hai, aise purooshaartha bhi gupta karna hai। geet-kavitaaon aadi ke bajaae chup rehna achha hai। shanti mein chalte-phirte baap ko yaad karna hai।

2) puraani duniya badal rahi hai isliye isse mamatva nikaal dena hai, ise dekhte hue bhi nahin dekhna hai। buddhi nai duniya mein lagaani hai।

vardaan:- brahman janma ki visheshta ko natural nature banaane vaale sahaj purushaarthi bhav

brahman janma bhi vishesh, brahman dharma aur karma bhi vishesh arthaat sarvashreshtha hai kyonki brahman karma mein follow saakaar brahma baap ko karte hain। to braahmanon ki nature hi vishesh nature hai, saadhaaran va maayaavi nature braahmanon ki nature nahin। sirf yahi smriti swaroop mein rahe ki main vishesh aatma hoon, yeh nature jab natural ho jaayegi tab baap samaan banna sahaj anubhav karenge। smriti swaroop so samarthi swaroop ban jaayenge - yahi sahaj purushaartha hai।

slogan:- pavitrata aur shanti ki light chaaron or phailaane vaale hi light house hain।