Daily Murli for Tuesday 3 September 2024

03-09-2024 praatahmurli om shanti "baapdaada"' madhuban

“meethe bachche - tumhein kisi bhi patit dehdhaariyon se pyaar nahin rakhna hai kyonki tum paavan duniya mein ja rahe ho, ek baap se pyaar karna hai''

prashn:- tum bachchon ko kis cheez se tang nahin hona hai aur kyon?

uttar:- tumhein apne is puraane shareer se zara bhi tang nahin hona hai kyonki yeh shareer bahut-bahut valuable hai। aatma is shareer mein baith baap ko yaad karke bahut badi lottery le rahi hai। baap ki yaad mein rahenge to khushi ki khuraak milti rahegi।

om shanti। meethe-meethe roohaani bachche, ab doordesh ke rahne vaale phir door desh ke paisenjarsa ho। ham aatmaayen hain aur abhi bahut door-desh jaane ka purooshaartha kar rahe hain। yeh sirf tum bachche hi jaante ho ki ham aatmaayen doordesh ki rahne vaali hain aur doordesh mein rahne vaale baap ko bhi bulaate hain ki aakarke hamko bhi vahaan doordesh mein le jaao। ab doordesh ka rahne vaala baap tum bachchon ko vahaan le jaate hain। tum roohaani paisenjarsa ho kyonki is shareer ke saath ho na। rooh hi traveling karegi। shareer to yahaan hi chhod degi। baaki rooh hi traveling (yaatra) karegi। rooh kahaan jaayegi? apne roohaani duniya mein। yeh hai jismaani duniya, woh hai roohaani duniya। bachchon ko baap ne samjhaaya hai ab ghar vaapis jaana hai, jahaan se part bajaane yahaan aaye hain। yeh bahut bada maandava athva stage hai। stage par act karke part bajaakar phir sabko vaapis jaana hai। naatak jab poora hoga tab to jaayenge na। abhi tum yahaan baithe ho, tumhaara buddhiyog ghar aur raajdhaani mein hai। yeh to pakka-pakka yaad kar lo kyonki yeh to gaayan hai ant mati so gati। abhi yahaan tum padh rahe ho, jaante ho bhagwan shivbaaba hamko padhaate hain। bhagwan to sivaae is purooshottam sangamayug ke kabhi padhaayenge nahin। saare 5 hajaar varsha mein niraakaar bhagwan baap ek hi baar aakar padhaate hain। yeh to tumko pakka nishchay hai। padhaai bhi kitni sahaj hai, ab ghar jaana hai। us ghar se to saari duniya ka pyaar hai। muktidhaam mein jaana to sab chaahte hain parantu uska bhi arth nahin samajhte hain। manushyon ki buddhi is samay kaisi hai aur tumhaari buddhi abhi kaisi bani hai, kitna pharka hai। tumhaari hai svachchha buddhi, nambarvaar purooshaartha anusaar। saare vishwa ke aadi-madhya-ant ka knowledge tumko achhi tarah hai। tumhaare dil mein yeh hai ki hamko ab purooshaartha kar nar se naaraayan zaroor banna hai। yahaan se to pahle apne ghar mein jaayenge na। to khushi se jaana hai। jaise satayug mein devtaayen khushi se ek shareer chhod doosra lete hain, vaise is puraane shareer ko bhi khushi se chhodna hai। inse tang nahin hona hai kyonki yeh bahut valuable shareer hai। is shareer dvaara hi aatma ko baap se lottery milti hai। ham jab tak pavitra nahin bane hain to ghar ja nahin sakenge। baap ko yaad karte rahenge tab hi us yogbal se paapon ka bojha utrega। nahin to bahut saja khaani padegi। pavitra to zaroor banna hai। laukik sambandh mein bhi bachche koi ganda patit kaam karte hain to baap gusse mein aakar laathi se bhi maar dete hain kyonki bekaayde patit bante hain। kiske saath bhi bekaayde pyaar rakhte hain to bhi maa-baap ko achha nahin lagta hai। yeh behad ka baap phir kehte hain tum bachchon ko yahaan to rehna nahin hai। abhi tumko jaana hai nai duniya mein। vahaan vikaari patit koi hota nahin। ek hi patit-paavan baap aakar aisa paavan tumko banaate hain। baap khud kehte hain hamaara janma divya aur alaukik hai, aur koi bhi aatma mere samaan shareer mein pravesh nahin kar sakti। bhal dharma sthaapak jo aate hain unki aatma bhi pravesh karti hai parantu woh baat hi alag hai। ham to aate hi hain sabko vaapis le jaane ke liye। woh to oopar se utarte hain neeche apna part bajaane। ham to sabko le jaate hain phir batlaate hain ki tum kaise pahle-pahle nai duniya mein utrenge। us nai duniya satayug mein bagula koi bhi hota nahin। baap to aate hi hain bagulon ke beech। phir tumko hans banaate hain। tum ab hans bane ho, moti hi chugte ho। satayug mein tumko yeh ratna nahin milenge। yahaan tum yeh gyaan ratna chug kar hans bante ho। bagule se tum hans kaise bante ho, yeh baap baith samjhaate hain। abhi tumko hans banaate hain। devtaaon ko hans, asuron ko bagula kahenge। abhi tum kichda chhudaae moti chugaate ho।

tumko hi padmaapadma bhaagyashaali kehte hain। tumhaare pair mein chhaapa lagta hai padmon ka। shivbaaba ko to paanv hain nahin jo padma ho saken। woh to tumko padmaapadma bhaagyashaali banaate hain। baap kehte hain main tumko vishwa ka maalik banaane aaya hoon। yeh sab baaten achhi reeti samajhne ki hain। manushya yeh to samajhte hain na svarga tha। parantu kab tha phir kaise hoga, woh pata nahin hai। tum bachche abhi roshni mein aaye ho। woh sab hain andhiyaare mein। yeh lakshmi-naaraayan vishwa ke maalik kab kaise banen, yeh pata hi nahin hai। 5 hazaar varsha ki baat hai। baap baithkar samjhaate hain jaise tum aate ho part bajaane, vaise main bhi aata hoon। tum nimantran dekar bulaate ho - he baba, ham patiton ko aakar paavan banaao। aur kisko bhi aise kabhi nahin kahenge, apne dharma sthaapak ko bhi aise nahin kahenge ki aakar sabko paavan banaao। Christ athva buddha ko thode hi patit-paavan kahenge। guru woh jo sadgati kare। woh to aate hain, unke pichhaadi sabko neeche utarna hai। yahaan se vaapis jaane ka raasta batlaane vaala, sarva ka sadgati karne vaala akaal moorta ek hi baap hai। vaastav mein satguru akshar hi right hai। tum sabse right akshar phir bhi sikkha log bolte hai। badi-badi aavaaz se kehte hain - satguru akaal। badi zor se dhun lagaate hain, satguru akaal moorta kehte hain। moorta hi nahin ho to woh phir satguru kaise banenge, sadgati kaise denge? woh satguru svayan hi aakar apna parichay dete hain - main tumhaare misal janma nahin leta hoon। aur to sab shareerdhaari baith sunaate hain। tumko ashareeri roohaani baap baith samjhaate hain। raat-din ka farka hai। is samay manushya jo kuchh karte hain woh wrong hi karte hain kyonki raavan ki mat par hain na। har ek mein 5 vikaar hain। abhi raavan raajya hai, yeh baaten detail mein baap baith samjhaate hain। nahin to saari duniya ke chakra ka maaloom kaise pade। yeh chakra kaise phirta hai, maaloom padna chaahiye na। yeh bhi tum nahin kehte ho ki baba samjhaao। aapehi baap samjhaate rehte hain। tumko ek bhi prashn poochhne ka nahin rehta। bhagwan to baap hai। baap ka kaam hai, sab kuchh aapehi sunaana, aapehi sab kuchh karna। bachchon ko school mein baap aapehi bithaate hain। naukri par lagaate hain phir unko kehte hain 60 varsha baad yeh sab chhod bhagwan ka bhajan karna। ved-shaastra aadi padhna, pooja karna। tum aadhaakalpa pujaari bane phir aadhaakalpa ke liye poojya bante ho। pavitra kaise bano, uske liye kitna sahaj samjhaaya jaata hai। phir bhakti bilkul chhoot jaati hai। woh sab bhakti kar rahe hain, tum gyaan le rahe ho। woh raat mein hain, tum din mein jaate ho arthaat svarga mein। geeta mein likha hua hai manamnaabhav, yeh akshar to mashhoor hai। geeta padhne vaale samajh sakte hain, bahut sahaj likha hua hai। saari aayu geeta padhte aaye hain, kuchh bhi nahin samajhte। ab vahi geeta ka bhagwan baith sikhlaate hain to patit se paavan ban jaate hain। abhi ham bhagwan se geeta sunte hain phir auron ko sunaate hain, paavan bante hain।

baap ke mahaavaakya hain na - yeh hai vahi sahaj raajayog। manushya kitne andhashraddha mein doobe hue hain, tumhaari to baat hi nahin sunte hain। drama anusaar unhon ki bhi jab takdeer khule tab hi aa saken, tumhaare paas। tumhaare jaisi takdeer aur koi dharma vaalon ki nahin hoti। baap ne samjhaaya hai yeh tumhaara devi-devta dharma bahut sukh dene vaala hai। tum bhi samajhte ho - baap theek kehte hain। shaastron mein to vahaan bhi kans-raavan aadi baith dikhaaye hain। vahaan ke sukh ka to koi ko pata hi nahin hai। bhal devtaaon ko poojte hain parantu buddhi mein kuchh nahin baithta। ab baap kehte hain - bachche, mujhe yaad karte ho? aise kabhi suna ki baap bachche ko kahe ki tum mujhe yaad karo। laukik baap kabhi aise yaad karaane ka purooshaartha karaate hain kya? yeh behad ka baap baith samjhaate hain। tum saare vishwa ke aadi-madhya-ant ko jaan-kar chakravarti raaja ban jaayenge। pahle tum jaayenge ghar। phir aana hai paartadhaari bankar। abhi kisko bhi pata nahin padega ki yeh nai aatma hai ya puraani aatma hai। nai aatma ka naamaachaar zaroor hota hai। abhi bhi dekho koi-koi ka kitna naamaachaar hota hai। manushya dher aa jaate hain। baithe-baithe anaayaas hi aa jaate hain। to woh prabhaav padta hai। baba bhi ismen anaayaas hi aate hain to woh prabhaav padta hai। woh bhi nai aatma aati hai to puraanon par prabhaav hota hai। taal-taaliyaan nikalti jaati hain to unki mahima hoti hai। kisko pata nahin rehta hai ki inka naamaachaar kyon hai? nai aatma hone se unmein kashish hoti hai। abhi to dekho kitne dher jhoothe bhagwan ban gaye hain, isliye gaayan hai sach ki bedi hilti-dulti hai lekin doobti nahin hai। toofaan bahut aate hain kyonki bhagwan khivaiya hai na। bachche bhi hilte hain, naanv ko toofaan bahut lagte hain। aur satsangon mein to dher jaate hain parantu vahaan kabhi toofaan aadi ki baat nahin aati। yahaan ablaaon par kitne atyaachaar hote hain parantu phir bhi sthaapna to honi hai। baap baith samjhaate hain - he aatmaayen, tum kitna jangali kaante ban pade ho, doosron ko kaanta lagaate ho to tumko bhi kaanta lagta hai। respond to har baat ka milta hai। vahaan duhkh ki chhi-chhi baaten koi hoti nahin isliye unko kaha hi jaata hai svarga। manushya svarga aur narka kehte hain parantu samajhte nahin hain। kehte hain - phalaana svarga gaya, yeh kehna bhi vaastav mein wrong hai। niraakaari duniya ko koi heaven nahin kaha jaata hai। woh hai mukti-dhaam। yeh phir kehte hain svarga mein gaya।

abhi tum jaante ho - yeh muktidhaam aatmaon ka ghar hai। jaise yahaan ghar hote hain। bhakti maarga mein jo bahut dhanvaan hote hain, to kitne oonche mandir banaate hain। shiv ka mandir dekho kaise banaaya hua hai। lakshmi-naaraayan ka bhi mandir banaate hain to sachche jevar aadi kitne hote hain। bahut dhan rehta hai। abhi to jhooth ho gaya hai। tum bhi aage kitne sachche jevar pahante the। abhi to government ke dar se sachcha chhipaae jhooth pahante rehte hain। vahaan to hai sach hi sach। jhootha kuchh bhi hota nahin। yahaan sachcha hote bhi chhipaakar rakh dete hain। din-pratidin sona mahanga hota rehta hai। vahaan to hai hi svarga। tumko sab kuchh naya milega। nai duniya mein sab kuchh naya, akeechaar (athaah) dhan tha। abhi to dekho har ek cheez kitni manhagi ho gai hai। abhi tum bachchon ko mool vatan se lekar sab raaz samjhaaya hai। mool vatan ka raaz baap bigar kaun samjhaayenge। tumko bhi phir teacher banna hai। grihastha vyavhaar mein bhi bhal raho। kamal phool samaan pavitra raho। auron ko bhi aap samaan banaayenge to bahut oonch pad pa sakte hain। yahaan rahne vaalon se bhi woh oonch pad pa sakte hain। nambarvaar to hain hi, baahar mein rehte hue bhi vijay maala mein piro sakte hain। haphte ka course le phir bhal vilaayat mein jaayen va kahaan bhi jaayen। saari duniya ko bhi message milna hai। baap aaye hain, sirf kehte hain maamekam yaad karo। woh baap hi liberator hai, guide hai। vahaan tum jaayenge to akhbaar mein bhi bahut naam ho jaayega। doosron ko bhi yeh bahut sahaj baat lagegi - aatma aur shareer do cheez hain। aatma mein hi man-buddhi hai, shareer to jad hai। paartadhaari aatma banti hai। khoobi vaali cheez aatma hai to ab baap ko yaad karna hai। yahaan rahne vaale itna yaad nahin karte hain, jitna baahar vaale karte hain। jo bahut yaad karte hain aur aap samaan banaate rehte hain, kaanton ko phool banaate rehte hain, woh oonch pad paate hain। tum samajhte ho pahle ham bhi kaante the। ab baap ne ordinance nikaala hai - kaam mahaashatru hai, in par jeet paane se tum jagatjeet ban jaayenge। parantu likhat se koi samajhte thode hi hain। abhi baap ne samjhaaya hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ka namaste।

dhaarna ke liye mukhya saar:-

1) sada gyaan ratna chugne vaala hans banna hai, moti hi chugne hain। kichda chhod dena hai। har kadam mein padmon ki kamaai jama kar padmaapadma bhaagyashaali banna hai।

2) oonch pad paane ke liye teacher bankar bahuton ki seva karni hai। kamal phool samaan pavitra rah aapasmaan banaana hai। kaanton ko phool banaana hai।

vardaan:- tere mere ki halchal ko samaapta kar raham ki bhaavna emerge karne vaale merciful bhav

samay prati samay kitni aatmaayen duhkh ki lahar mein aati hain। prakriti ki thodi bhi halchal hoti hai, aapdaayen aati hain to anek aatmaayen tadapti hain, mercy, raham maangati hain। to aisi aatmaon ki pukaar sun raham ki bhaavna emerge karo। poojya swaroop, merciful ka dhaaran karo। svayan ko sampanna bana lo to yeh duhkh ki duniya sampanna ho jaae। abhi parivartan ke shubh bhaavna ki lahar teevragti se phailaao to tere mere ki halchal samaapta ho jaayegi।

slogan:- vyartha sankalpon ki hathaudi se samasya ke patthar ko todne ke bajaae high jump de samasya rupi pahaad ko paar karne vaale bano।