Daily Murli for Saturday 21 September 2024

21-09-2024 praatahmurli om shanti "baapdaada"' madhuban

“meethe bachche - baap kalpa-kalpa aakar tum bachchon ko apna parichay dete hain, tumhein bhi sabko baap ka yathaartha parichay dena hai''

prashn:- bachchon ke kis prashn ko sunkar baap bhi wonder khaate hain?

uttar:- bachche kehte hain - baba aapka parichay dena bahut mushkil hai। ham aapka parichay kaise den? yeh prashn sunkar baap ko bhi wonder lagta hai। jab tumhein baap ne apna parichay diya hai to tum bhi doosron ko de sakte ho, ismen mushkilaat ki baat hi nahin। yeh to bahut sahaj hai। ham sab aatmaayen niraakaar hain to zaroor unka baap bhi niraakaar hoga।

om shanti। meethe-meethe roohaani bachche samajhte hain behad ke baap paas baithe hain। yeh bhi jaante hain behad ka baap is rath par hi aate hain। jab baapdaada kehte hain, yeh to jaante hain ki shivbaaba hai aur woh is rath par baitha hai। apna parichay de rahe hain। bachche jaante hain woh baba hai, baba mat dete hain ki roohaani baap ko yaad karo to paap bhasma ho jaaen, jisko yog agni kehte hain। abhi tum baap ko to pahchaante ho। to aise kabhi thode hi kahenge ki baap ka parichay doosre ko kaise doon। tumko bhi behad ke baap ka parichay hai to zaroor de bhi sakte ho। parichay kaise den, yeh to prashn hi nahin uth sakta hai। jaise tumne baap ko jaana hai, vaise tum kah sakte ho ki ham aatmaon ka baap to ek hi hai, ismen moonjhane ki darkaar hi nahin rehti। koi-koi kehte hain baba aapka parichay dena bada mushkil hota hai। are, baap ka parichay dena - ismen to mushkilaat ki koi baat hi nahin। jaanvar bhi ishaare se samajh jaate hain ki main phalaane ka bachcha hoon। tum bhi jaante ho ki ham aatmaon ka woh baap hai। ham aatma abhi is shareer mein pravesh hain। jaise baba ne samjhaaya hai ki aatma akaalmoortta hai। aise nahin uska koi roop nahin hai। bachchon ne pahchaana hai - bilkul simple baat hai। aatmaon ka ek hi niraakaar baap hai। ham sab aatmaayen bhaai-bhaai hain। baap ki santaan hain। baap se hamko varsa milta hai। yeh bhi jaante hain aisa koi bachcha is duniya mein nahin hoga jo baap ko aur unki rachna ko na jaanta ho। baap ke paas kya property hai, woh sab jaante hain। yeh hai hi aatmaon aur paramatma ka mela। yeh kalyaankaari mela hai। baap hai hi kalyaankaari। bahut kalyaan karte hain। baap ko pahchaanne se samajhte ho - behad ke baap se hamko behad ka varsa milta hai। woh jo sannyaasi guru hote hain, unke shishyon ko guru ke varse ka maaloom nahin rehta hai। guru ke paas kya milkiyat hai, yeh koi shishya mushkil jaante honge। tumhaari buddhi mein to hai - woh shivbaaba hai, milkiyat bhi baba ke paas hoti hai। bachche jaante hain behad ke baap ke paas milkiyat hai - vishwa ki baadshaahi svarga। yeh baaten sivaae tum bachchon ke aur koi ki buddhi mein nahin hain। laukik baap ke paas kya milkiyat hai, woh unke bachche hi jaante hain। abhi tum kahenge ham jeete ji paarlaukik baap ke bane hain। unse kya milta hai, woh bhi jaante hain। ham pahle shoodra kul mein the, abhi brahman kul mein aa gaye hain। yeh knowledge hai ki baba is brahma tan mein aate hain, inko prajaapita brahma kaha jaata hai। woh (shiv) to hai sab aatmaon ka father। inko (prajaapita brahma ko) great-great grand father kehte hain। ab ham inke bachche bane hain। shivbaaba ke liye to kehte hain woh haaziraahjoor hai। jaani-jaananhaar hai। yeh bhi ab tum samajhte ho ki woh kaise rachna ke aadi-madhya-ant ki knowledge dete hain। woh sab aatmaon ka baap hai, unko naam-roop se nyaara kehna to jhooth hai। unka naam-roop bhi yaad hai। raatri bhi manaate hain, jayanti to manushyon ki hoti hai। shivbaaba ki raatri kahenge। bachche samajhte hain raatri kisko kaha jaata hai। raat mein ghor andhiyaara ho jaata hai। agyaan andhiyaara hai na। gyaan soorya pragta agyaan andher vinaash - abhi bhi gaate hain parantu arth kuchh nahin samajhte। soorya kaun hai, kab pragta, kuchh nahin samajhte। baap samjhaate hain gyaan soorya ko gyaan saagar bhi kaha jaata hai। behad ka baap gyaan ka saagar hai। sannyaasi, guru, gosaai aadi apne ko shaastron ki authority samajhte hain, woh sab hai bhakti। bahut ved-shaastra padhkar vidvaan hote hain। to baap roohaani bachchon ko baith samjhaate hain, inko kaha jaata hai aatma aur paramatma ka mela। tum samajhte ho baap is rath mein aaye hue hain। is milan ko hi mela kehte hain। jab ham ghar jaate hain to woh bhi mela hai। yahaan baap khud baith padhaate hain। woh father bhi hai, teacher bhi hai। yeh ek hi point achhi reeti dhaaran karo, bhoolo mat। ab baap to hai niraakaar, unko apna shareer nahin hai to zaroor lena pade। to khud kehte hain main prakriti ka aadhaar leta hoon। nahin to boloon kaise? shareer bigar to bolna hota nahin। to baap is tan mein aate hain, inka naam rakha hai brahma। ham bhi shoodra se brahman banen to naam badalna hi chaahiye। naam to tumhaare rakhe the। parantu usmein bhi abhi dekho to kai hain hi nahin isliye braahmanon ki maala nahin hoti। bhakta maala aur roodra maala gaai hui hai। braahmanon ki maala nahin hoti। vishnu ki maala to chali aai hai। sookshm vatan mein vishnu ko 4 bhuja vaala dikhaaya hai। do bhuja lakshmi ki, do bhuja naaraayan ki।

baap samjhaate hain main dhobi hoon। main yogbal se tum aatmaon ko shuddh banaata hoon phir bhi tum vikaar mein jaakar apna shrringaar hi ganva dete ho। baap aate hain sabko shuddh banaane। aatmaon ko aakar sikhlaate hain to sikhlaane vaala zaroor yahaan chaahiye na। pukaarte bhi hain aakar paavan banaao। kapda bhi maila hota hai to unko dhokar shuddh banaaya jaata hai। tum bhi pukaarte ho - he patit paavan baba, aakar paavan banaao। aatma paavan banen to shareer bhi paavan mile। to pahli-pahli mool baat hoti hai baap ka parichay dena। baap ka parichay kaise den, yeh to prashn hi nahin poochh sakte। tumko bhi baap ne parichay diya hai tab to tum aaye ho na। baap paas aate ho, baap kahaan hai? is rath mein। yeh hai akaal takhta। tum aatma bhi akaal moortta ho। yeh sab tumhaare takhta hain, jis par tum aatmaayen viraajmaan ho। woh to akaal takhta jad ho gaya na। tum jaante ho main akaal moortta arthaat niraakaar, jiska saakaar roop nahin hai। main aatma avinaashi hoon, kab vinaash ho na sake। ek shareer chhod doosra leta hoon। mujh aatma ka part avinaashi noondha hua hai। aaj se 5 hazaar varsha pahle bhi hamaara aise hi part shuru hua tha। one-one sanvat se ham yahaan part bajaane ghar se aate hain। yeh hai hi 5 hazaar varsha ka chakra। woh to laakhon varsha kah dete hain isliye thode varshon ka vichaar mein nahin aata। to bachche aisa kabhi kah nahin sakte ki ham baap ka parichay kisko kaise den। aise-aise prashn poochhte hain to wonder lagta hai। are, tum baap ke bane ho, phir baap ka parichay kyon nahin de sakte ho! ham sab aatmaayen hain, woh hamaara baba hai। sarva ki sadgati karte hain। sadgati kab karenge yeh bhi tumko abhi pata pada hai। kalpa-kalpa, kalpa ke sangamayug par aakar sarva ki sadgati karenge। woh to samajhte hain - abhi 40 hazaar varsha pade hain aur pahle se hi kah dete naam-roop se nyaara hai। ab naam-roop se nyaari koi cheez thode hi hoti hai। patthar bhittar ka bhi naam hai na। to baap kehte hain - meethe-meethe bachchon, tum aaye ho behad ke baap ke paas। baap bhi jaante hain, kitne dher bachche hain। bachchon ko abhi had aur behad se bhi paar jaana hai। sab bachchon ko dekhte hain, jaante hain in sabko main lene liye aaya hoon। satayug mein to bahut thode honge। kitna clear hai isliye chitron par samjhaaya jaata hai। knowledge to bilkul easy hai। baaki yaad ki yaatra mein time lagta hai। aise baap ko to kabhi bhoolna nahin chaahiye। baap kehte hain maamekam yaad karo to paavan ban jaayenge। main aata hi hoon patit se paavan banaane। tum akaalmoortta aatmaayen sab apne-apne takhta par viraajmaan ho। baba ne bhi is takhta ka loan liya hai। is bhaagyashaali rath mein baap pravesh hote hain। koi kehte hain paramatma ka naam-roop nahin hai। yeh to ho hi nahin sakta। unko pukaarte hain, mahima gaate hain, to zaroor koi cheez hai na। tamopradhaan hone kaaran kuchh bhi samajhte nahin। baap samjhaate hain - meethe-meethe bachchon, itni 84 laakh yoniyaan to koi hoti nahin। hain hi 84 janma। punarjanma bhi sabka hoga। aise thode hi brahm mein jaakar leen honge va moksha ko paayenge। yeh to bana-banaaya drama hai। ek bhi kam-jaasti nahin ho sakta। is anaadi avinaashi drama se hi phir chhote-chhote drama va naatak banaate hain। woh hain vinaashi। abhi tum bachche behad mein khade ho। tum bachchon ko yeh knowledge mili hui hai - hamne kaise 84 janma liye hain। abhi baap ne bataaya hai, aage kisko pata nahin tha। rishi-muni bhi kehte the - ham nahin jaante hain। baap aate hi hain sangamayug par, is puraani duniya ko change karne। brahma dvaara nai duniya ki sthaapna phir se karte hain। woh to laakhon varsha kah dete hain। koi baat yaad bhi na aa sake। mahaapralay bhi koi hoti nahin। baap raajayog sikhlaate hain phir raajaai tum paate ho। ismen to sanshay ki koi baat hi nahin। tum bachche jaante ho pahle number mein sabse pyaara hai baap phir next pyaara hai shreekrishna। tum jaante ho shreekrishna hai svarga ka pahla prince, number one। vahi phir 84 janma lete hain। uske hi antim janma mein main pravesh karta hoon। ab tumko patit se paavan banna hai। patit-paavan baap hi hai, paani ki nadiyaan thode hi paavan kar sakti hain। yeh nadiyaan to satayug mein bhi hoti hain। vahaan to paani bahut shuddh rehta hai। kichda aadi kuchh nahin rehta। yahaan to kitna kichda padta rehta hai। baba ka dekha hua hai, us samay to gyaan nahin tha। abhi wonder lagta hai paani kaise paavan bana sakta hai।

to baap samjhaate hain - meethe bachche, kabhi bhi moonjho nahin ki baap ko yaad kaise karen। are, tum baap ko yaad nahin kar sakte ho! woh hain kukh ki santaan, tum ho adopted bachche। adopted bachchon ko jis baap se milkiyat milti hai, unko bhool sakte hain kya? behad ke baap se behad ki milkiyat milti hai to unko bhoolna thode hi chaahiye। laukik bachche baap ko bhoolte hain kya। parantu yahaan maaya ka opposition hota hai। maaya ki yuddha chalti hai, saari duniya karmakshetra hai। aatma is shareer mein praveshkar yahaan karma karti hai। baap karma-akarma-vikarma ka raaz samjhaate hain। yahaan raavan raajya mein karma vikarma ban jaate hain। vahaan raavan raajya hi nahin to karma akarma ho jaate hain, vikarma koi hota hi nahin। yeh to bahut sahaj baat hai। yahaan raavan raajya mein karma vikarma hote hain isliye vikarmo ka danda bhogna padta hai। aise thode hi kahenge raavan anaadi hai। nahin, aadhaakalpa hai raavan raajya, aadhaakalpa hai raam raajya। tum jab devta the to tumhaare karma akarma hote the। ab yeh hai knowledge। bachche bane ho to phir padhaai bhi padhni hai। bas, phir aur koi dhandhe aadi ka khyaal bhi nahin aana chaahiye। parantu grihastha vyavhaar mein rehte dhandha aadi bhi karne vaale hain to baap kehte hain kamal phool samaan raho। aise devta tum banne vaale ho। woh nishaani vishnu ko de di hai kyonki tumko shobhega nahin। unko shobhta hai। vahi vishnu ke do roop lakshmi-naaraayan banne vaale hain। woh hai hi ahinsa parmo devi-devta dharma। na koi vikaar ki kaam kataari hoti, na koi ladaai-jhagda aadi hota hai। tum double ahinsak bante ho। satayug ke maalik the। naam hi hai golden ej। kanchan duniya। aatma aur kaaya donon kanchan ban jaati hain। kanchan kaaya kaun banaate hain? baap। abhi to iron ej hai na। ab tum kehte ho satayug paas ho gaya hai। kal satayug tha na। tum raajya karte the। tum knowledgeful bante jaate ho। sab to ek jaise nahin banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) main aatma akaal takhta nasheen hoon, is smriti mein rehna hai, had aur behad se paar jaana hai isliye hadon mein buddhi nahin phansaani hai।

2) behad baap se behad ki milkiyat milti hai, is nashe mein rehna hai। karma-akarma-vikarma ki gati ko jaan vikarmon se bachna hai। padhaai ke samay dhandhe aadi se buddhi nikaal leni hai।

vardaan:- shreemat ki lagaam ko tight kar man ko vash karne vaale baalak so maalik bhav

duniya vaale kehte hain man ghoda hai jo bahut tej bhaagta hai, lekin aapka man idhar udhar bhaag nahin sakta kyonki shreemat ka lagaam majboot hai। jab man-buddhi sidescene ko dekhne mein lag jaati hai to lagaam dheela hone se man chanchal hota hai isliye jab bhi koi baat ho, man chanchal ho to shreemat ka lagaam tight karo to manzil par pahunch jaayenge। baalak so maalik hoon - is smriti se adhikaari ban man ko apne vash mein rakho।

slogan:- sada nishchay ho ki jo ho raha hai vo bhi achha aur jo hone vaala hai vo aur bhi achha to achal-adol rahenge।