Daily Murli for Saturday 5 October 2024

05-10-2024 praatahmurli om shanti "baapdaada"' madhuban

“meethe bachche - baba aaya hai tum bachchon se duhkhadhaam ka sannyaas karaane, yahi hai behad ka sannyaas''

prashn:- un sannyaasiyon ke sannyaas mein aur tumhaare sannyaas mein mukhya antar kya hai?

uttar:- ve sannyaasi gharbaar chhodkar jangal mein jaate lekin tum gharbaar chhodkar jangal mein nahin jaate ho। ghar mein rehte hue saari duniya ko kaanton ka jangal samajhte ho। tum buddhi se saari duniya ka sannyaas karte ho।

om shanti। roohaani baap baith roohaani bachchon ko roz-roz samjhaate hain kyonki aadhaakalpa ke besmajh hain na। to roz-roz samjhaana padta hai। pahle-pahle to manushyon ko shanti chaahiye। aatmaayen sab asul rahne vaali bhi shantidham ki hain। baap to hai hi sadaiv shanti ka saagar। abhi tum shanti ka varsa praapta kar rahe ho। kehte hain na shanti deva… arthaat hamko is srishti se apne ghar shantidham mein le jaao athva shanti ka varsa do। devtaaon ke aage athva shivbaaba ke aage yeh jaakar kehte hain ki shanti do kyonki shivbaaba hai shanti ka saagar। abhi tum shivbaaba se shanti ka varsa le rahe ho। baap ko yaad karte-karte tumko shantidham mein jaana hai zaroor। nahin yaad karenge to bhi jaayenge zaroor। yaad isliye karte ho ki paapon ka bojha jo sir par hai woh khatma ho jaae। shanti aur sukh milta hai ek baap se, kyonki woh sukh aur shanti ka saagar hai। woh cheez hi mukhya hai। shanti ko mukti bhi kaha jaata hai aur phir jeevanmukti aur jeevan bandha bhi hai। abhi tum jeevanbandha se jeevanmukta ho rahe ho। satayug mein koi bandhan nahin hota hai। gaaya bhi jaata hai sahaj jeevanmukti va sahaj gati-sadgati। ab donon ka arth tum bachchon ne samjha hai। gati kaha jaata hai shantidham ko, sadgati kaha jaata hai sukhdhaam ko। sukhdhaam, shantidham phir yeh hai duhkhadhaam। tum yahaan baithe ho, baap kehte hain - bachche, shantidham ghar ko yaad karo। aatmaon ko apna ghar bhoola hua hai। baap aakar yaad dilaate hain। samjhaate hain he roohaani bachchon tum ghar ja nahin sakte ho jab tak mujhe yaad nahin karenge। yaad se tumhaare paap bhasma ho jaayenge। aatma pavitra ban phir apne ghar jaayegi। tum bachche jaante ho yeh apvitra duniya hai। ek bhi pavitra manushya nahin। pavitra duniya ko satayug, apvitra duniya ko kaliyug kaha jaata hai। raam raajya aur raavan raajya। raavan raajya se apvitra duniya sthaapan hoti hai। yeh bana-banaaya khel hai na। yeh behad ka baap samjhaate hain, unko hi satya kaha jaata hai। satya baaten tum sangam par hi sunte ho phir tum satayug mein jaate ho। dvaapar se phir raavan raajya shuru hota hai। raavan arthaat asur thahra, asur kabhi satya nahin bol sakte isliye isko kaha jaata hai jhoothi maaya, jhoothi kaaya। aatma bhi jhoothi hai to shareer bhi jhootha hai। aatma mein sanskaar bharte hain na। 4 dhaatuen hain na - sona-chaandi-taamba-loha...... sab khaad nikal jaati hai। baaki sachcha sona tum bante ho is yogbal se। tum jab satayug mein ho to sachcha sona hi ho। phir chaandi padti hai to chandravanshi kaha jaata hai। phir taambe ki, lohe ki khaad padti hai dvaapar-kaliyug mein। phir yog se tumhaare mein jo chaandi, taamba, loha ki khaad padi hai, woh nikal jaati hai। pahle to tum sab aatmaayen shantidham mein ho phir pahle-pahle aate ho satayug mein, to usko kaha jaata hai golden aged। tum sachcha sona ho। yogbal se saari khaad nikalkar baaki sachcha sona bachta hai। shantidham ko golden ej nahin kaha jaata hai। golden ej, silver ej, copper ej yahaan kaha jaata hai। shantidham mein to shanti hai। aatma jab shareer leti hai tab golden aged kaha jaata hai phir srishti hi golden ej ban jaati hai। satopradhaan 5 tatvon se shareer banta hai। aatma satopradhaan hai to shareer bhi satopradhaan hai। phir pichhaadi mein aakar iron aged shareer milta hai kyonki aatma mein khaad padti hai। to golden ej, silver ej is srishti ko kaha jaata hai।

to ab bachchon ko kya karna hai? pahle-pahle shantidham jaana hai isliye baap ko yaad karna hai tab hi tamopradhaan se satopradhaan ban jaayenge। ismen time utna hi lagta hai, jitna time baap yahaan rehte hain। woh golden ej mein part lete hi nahin। to aatma ko jab shareer milta hai tab kaha jaata hai yeh golden aged jeev aatma hai। aise nahin kahenge golden aged aatma। nahin, golden aged jeevaatma phir silver aged jeevaatma hoti hai। to yahaan tum baithe ho, tumko shanti bhi hai to sukh bhi praapta hota hai। to kya karna chaahiye? duhkhadhaam ka sannyaas। isko kaha jaata hai behad ka sannyaas। un sannyaasiyon ka hai had ka sannyaas, gharbaar chhod jangal mein jaate hain। unko yeh pata nahin hai ki saari srishti hi jangal hai। yeh kaanton ka jangal hai। yeh hai kaanton ki duniya, woh hai phoolon ki duniya। woh bhal sannyaas karte hain parantu phir bhi kaanton ki duniya mein, jangal mein shahar se door-door jaakar rehte hain। unhon ka hai nivritti maarga, tumhaara hai pravritti maarga। tum pavitra jodi the, abhi apvitra bane ho। unko grihastha aashram bhi kehte hain। sannyaasi to aate hi baad mein hain। islaami, bauddhi bhi baad mein aate hain। Christian se kuchh pahle aate hain। to yeh jhaad bhi yaad karna hai, chakra bhi yaad karna hai। baap kalpa-kalpa aakar kalpa vriksha ki knowledge dete hain kyonki khud beejroop hain, sat hain, chaitanya hain isliye kalpa-kalpa aakar kalpa vriksha ka saara raaz samjhaate hain। tum aatma ho parantu tumko gyaan saagar, sukh ka saagar, shanti ka saagar nahin kaha jaata। yeh mahima ek hi baap ki hai jo tumko aisa banaate hain। baap ki yeh mahima sadaiv ke liye hai। sadaiv woh pavitra hai aur niraakaar hai। sirf thode samay ke liye aate hain paavan banaane। sarvavyaapi ki to baat hi nahin। tum jaante ho baap sadaiv vahaan hi rehte hain। bhakti maarga mein sadaiv unko yaad karte hain। satayug mein to yaad karne ki darkaar nahin rehti hai। raavan raajya mein tumhaara chillaana shuru hota hai, vahi aakar sukh-shanti dete hain। to phir zaroor ashaanti mein unki yaad aati hai। baap samjhaate hain har 5 hazaar varsha baad main aata hoon। aadhaakalpa hai sukh, aadhaakalpa hai duhkh। aadhaakalpa ke baad hi raavan raajya shuru hota hai। ismen pahla number mool hai deh-abhimaan। uske baad hi phir aur-aur vikaar aate hain। ab baap samjhaate hain apne ko aatma samjho, dehi-abhimaani bano। aatma ki bhi pahchaan chaahiye। manushya to sirf kehte hain aatma bhrakuti ke beech chamakti hai। abhi tum samajhte ho woh hai akaal moorta, us akaal moorta aatma ka takhta yeh shareer hai। aatma baithti bhi bhrakuti mein hai। akaal moorta ka yeh takhta hai, sab chaitanya akaal takhta hain। woh akaaltakhta nahin jo amritsar mein lakdi ka bana diya hai। baap ne samjhaaya hai jo bhi manushya maatra hain, sabka apna-apna akaaltakhta hai। aatma aakar yahaan viraajmaan hoti hai। satayug ho ya kaliyug ho, aatma ka takhta hai hi yeh manushya shareer। to kitne akaaltakhta hain। jo bhi manushya maatra hain akaal aatmaon ke takhta hain। aatma ek takhta chhod jhat doosra leti hai। pahle chhota takhta hota hai phir bada hota hai। yeh shareer roopi takhta chhota-bada hota hai, woh lakdi ka takhta jisko sikkha log akaal takhta kehte hain, woh to chhota bada nahin hota। yeh kisko bhi pata nahin hai ki sab manushya maatra ka akaal takhta yeh bhrakuti hai। aatma akaal hai, kab vinaash nahin hoti। aatma ko takhta bhinna-bhinna milte hain। satayug mein tumko bada first class takhta milta hai, unko kahenge golden aged takhta। phir us aatma ko silver, copper, iron aged takhta milta hai। phir golden aged takhta chaahiye to zaroor pavitra banna pade isliye baap kehte hain maamekam yaad karo to tumhaari khaad nikal jaayegi। phir tumko aisa daivi takhta milega। abhi brahman kul ka takhta hai। purooshottam sangamayug ka takhta hai phir mujh aatma ko yeh devtaai takhta milega। yeh baaten duniya ke manushya nahin jaante। deh-abhimaan mein aane ke baad ek-do ko duhkh dete rehte hain, isliye inko duhkhadhaam kaha jaata hai। ab baap bachchon ko samjhaate hain shantidham ko yaad karo, jo tumhaara asli nivaas sthaan hai। sukhdhaam ko yaad karo, inko bhoolte jaao, inse vairaagya। aise bhi nahin sannyaasiyon misal gharbaar chhodna hai। baap samjhaate hain woh ek taraph achha hai, doosre taraph bura hai। tumhaara to achha hi hai। unka hathayog achha bhi hai, bura bhi hai kyonki devtaayen jab vaam maarga mein jaate hain to bhaarat ko thamaane ke liye pavitrata zaroor chaahiye। to usmein bhi madad karte hain। bhaarat hi avinaashi khanda hai। baap ka bhi aana yahaan hota hai। to jahaan par behad ka baap aate hain woh sabse bada teertha ho gaya na। sarva ki sadgati baap hi aakar karte hain, isliye bhaarat hi oonch te oonch desh hai।

mool baat baap samjhaate hain - bachche, yaad ki yaatra mein raho। geeta mein bhi manamnaabhav akshar hai parantu baap koi sanskrit to nahin batlaate hain। baap manamnaabhav ka arth bataate hain। deh ke sab dharma chhod apne ko aatma nishchay karo। aatma avinaashi hai, woh kabhi chhoti-badi nahin hoti। anaadi-avinaashi part bhara hua hai। drama bana hua hai। pichhaadi mein jo aatmaayen aati hain unka bahut thoda part hai। baaki time shantidham mein rehte hain। svarga mein to aa na saken। pichhaadi ko aane vaale vahaan hi thoda sukh, vahaan hi thoda duhkh paate hain। jaise deevaali par machchhar kitne dher nikalte hain, subah ko uthkar dekho to sab machchhar mare pade honge। to manushyon ka bhi aise hai pichhaadi mein aane vaale ki kya value rahegi। jaise jaanvar misal thahre। to baap samjhaate hain yeh srishti ka chakra kaise phirta hai। manushya srishti roopi jhaad chhote se bada, bade se chhota kaise hota hai। satayug mein kitne thode manushya, kaliyug mein kitni vriddhi ho jhaad bada ho jaata hai। mukhya baat baap ne ishaara diya hai - grihastha vyavhaar mein rehte maamekam yaad karo। 8 ghanta yaad mein rahne ka abhyaas karo। yaad karte-karte aakhreen pavitra ban baap ke paas chale jaayenge to scholarship bhi milegi। paap agar rah jaayenge to phir janma lena pade। sajaayen khaate hain phir pad bhi kam ho padta hai। hisaab-kitaab chuktu to sabko karna hai। jo bhi manushya maatra hain abhi tak bhi janma lete rehte hain। is samay dekhenge bhaaratvaasiyon se Christian ki sankhya jyaada hai। woh phir sensible bhi hain। bhaaratvaasi to 100 percent sensible the, so ab phir nonsensible ban gaye hain kyonki yahi 100 percent sukh paate hain phir 100 percent duhkh bhi yahi paate hain। woh to aate hi peechhe hain।

baap ne samjhaaya hai Christian dynasty ka shreekrishna dynasty se connection hai। Christian ne raajya chheena phir Christian dynasty se hi raajya milna hai। is samay Christian ka jor hai। unhon ko bhaarat se hi madad milti hai। abhi bhaarat bhookh marta hai to return service ho rahi hai। yahaan se bahut dhan, bahut heere-javaahar aadi vahaan le gaye hain। bahut dhanvaan bane hain to ab phir dhan pahunchaate rehte hain। unko milne ka to hai nahin। to ab tum bachchon ko to koi pahchaante nahin hain। agar pahchaante to aakar raay lete। tum ho eeshvareey sampradaay, jo eeshvar ki raay par chalte ho। vahi phir eeshvareey sampradaay se daivi sampradaay banenge। phir kshatriy, vaishya, shoodra sampradaay banenge। abhi ham so brahman hain phir ham so devta, ham so kshatriy..... ham so ka arth dekho kitna achha hai। yeh baajoli ka khel hai jisko samajhna bahut sahaj hai। parantu maaya bhula deti hai phir daiveegunon se aasuri gunon mein le aati hai। apvitra banna aasuri gun hai na। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) scholarship lene ke liye grihastha vyavhaar mein rehte kam se kam 8 ghanta baap ko yaad karne ka abhyaas karna hai। yaad ke abhyaas se hi paap katenge aur golden aged takhta milega।

2) is duhkhadhaam se behad ka vairaagya kar apne asli nivaas sthaan shantidham aur sukhdhaam ko yaad karna hai। deh-abhimaan mein aakar kisi ko duhkh nahin dena hai।

vardaan:- karmo ke hisaab-kitaab ko samajhkar apni achal sthiti banaane vaale sahaj yogi bhav

chalte-chalte agar koi karmo ka hisaab kitaab saamne aata hai to usmein man ko hilaao nahin, sthiti ko neeche oopar nahin karo। chalo aaya to parakhkar use door se hi khatma kar do। abhi yoddhe nahin bano। sarvashaktivaan baap saath hai to maaya hila nahin sakti। sirf nishchay ke foundation ko practical mein laao aur samay par chooz karo to sahajyogi ban jaayenge। ab nirantar yogi bano, yuddha karne vaale yoddhe nahin।

slogan:- double light rehna hai to apni sarva jimmevaariyon ka bojh baap havaale kar do।